Saray Tumang ed Panangigalang ed Saray Maedad Lan Atateng
RERESPITOEN, igagalang, tan aasikasoen na saray tuan managdayew ed Dios iray maedad lan atateng da lapud inaro da ra. Kabiangan itan na panagdayew da. Oniay ibabaga na Biblia: “Amtaen na saraya [ananak odino kaapoan] komon ya unona ya ipanengneng so kasimpitan [maridios a debosyon, NW] da ed kaamong dan dili, tan tumangan da so kaatengan da, ta saya sikato so makapalikliket ed arap na Dios.” (1 Timoteo 5:4) Balanglan malangwer odino matatken itayo, matukoy labat a “tumangan” tayoray kaatengan tan saray laki tan bai tayo. Diad onian dalan et ipapanengneng tayoy apresasyon ed panangaro, impasyan kimey, tan say impangasikaso ra ed sikatayo ed loob na dakerakel a taon. Siempre, otang tayon mismoy bilay tayo ed atateng tayo!
Imanoen a say pambayar na kanepegan a tumang ed atateng tan ed saray laki tan bai tayo so “makapaliket ed arap na Dios.” Satan so misiglaotan ed “maridios a debosyon tayo.” Kanian, diad panusumpal ed sayan konseho, sikatayoy natutumangan, a kabat tayon say gagawaen tayo et makapaliket ed Dios. Mangitatarok itan na gayaga ed sikatayo.
Wala so gayaga’d pangiter ed arum, nagkalalo la sano mangiiter tayo’d saraman so mabunlok ya angiter ed sikatayo. (Gawa 20:35) Sirin, agaylan walay tumang diad ikiwas a mitunosan ed prinsipyo na Biblia: “Ikdan moy amam tan inam na sengegay panliket, manggayaga komon so angiyanak ed sika”!—Uliran 23:25, The New English Bible.
Panon tayon niiter so kanepegan a tumang ed atateng tan saray laki tan bai tayo? Diad taloran paraan: diad materyal, emosyonal, tan espiritual. Balang sakey so mangitarok na saray tumang.
Panangiter ed Materyal a Paraan
Amta na saramay manlilingkor ed Dios ya importanti so pangitarya na materyal parad maaapit a membroy pamilya. Onia so impanonot nen apostol Pablo: “Balet no wala so agmanagano ed anak to, tan lalo la ed saray kakaamong to a dili, pinaandi to la so pananisia, et sikato so lalon mauges nen say agmanisia.”—1 Timoteo 5:8.
Si Tunji tan Joy so manaayam ed Sagur ya Aprika. Anggaman gipit ed pinansyal, inimbitaan day maedad lan atateng nen Joy a miamong lara’d sikara. Walay sakit na ama tan kabekta et inatey. Onia so nanonotan ni nen Tunji: “Sanen inatey si Papa, nilakap nen Mama so asawak tan kuanto: ‘Ginawa yo ya amin so posiblin nagawaan na sakey a too. Diad antokaman a paraan et agyo nepeg a teteley inkasikayo’d impatey nen Papa yo.’ Anggaman paniliwan mi si Papa, amta min asaliw mi so sankaabigan a tambal parad sikato tan lawas min nanggunaetan ya ipalikna’d sikaton kalkaliktanen tan nakakaukolan; ginawa mi anggaay nayarian mi pian sumpaley inter-Dios a responsabilidad mi. Walaan kami na ontan ya inkapenek.”
Siempre, aliwan amin so walad posisyon ya ontulong ed arum ed materyal a paraan. Inkuan na sakey a laki a manaayam ed Nigeria: “No agnalegpet na sakey a too so inkasikato, panoy pakalegpet to kasi ed sananey a too?” Diad dakel a daldalin nayarin onloor ni ingen so kipapasen ed panakar na panaon. Unong ed padesir na Nasyones Unidas, agmanbayag et say kapaldua na populasyon ed bandan abalaten na Saharan Aprika so manbilay ed sigpot ya inkaduka.
No mairap so panagbilay mo, naligliwa ka manlapud tuan estorya na sakey a walad pankaukolan a biin balo. Sanen wadiad dalin si Jesus, naimatonan toy sakey a balon angidonasyon na melag ed simpenay kayamanan na templo. Sikatoy angiter labat na “duaran maravilis [na melag a balor].” Siansia, lapud pakaamta’d kipapasen to, inkuan nen Jesus: “Tua kuanko ed sikayo, Sayan duka a balon bii angipelag na dakdakel nen sikara ya amin. Ta amin so saraya dia ed masulok ed sikara so angalaan da na ipelag da ed saray tukdol, ingen sikato dia ed kakulangan to impelag to so amin a pantagano a wala ed sikato.”—Lucas 21:1-4.
Mipadpara, no gagawaen tayoy anggaay nayarian tayo ed pangasikaso’d atateng odino saray laki tan bai tayo diad materyal a paraan, anggaman melag labat itan, naiimatonan tan aapresiaen nen Jehova itan. Agto tayo iilaloan a manggawa na labas na nayarian tayo. Nayarin ontan met so liknaen na atateng odino saray laki tan bai tayo.
Panangiter ed Emosyonal a Paraan
Say panangitarya parad atateng tan saray laki tan bai tayo et sasaglawien toy mas ni nen say basta pangasikaso ed materyal iran pankaukolan da. Amin tayo so walaan na saray emosyonal a pankaukolan. Amin, pati saray matatken la, so walaan a pilalek a naaro, naliknan nakaukolan tan kaliktanen, tan pablien bilang membro na pamilya.
Si Mary, a manaayam ed Kenya, so mangaasikaso ed maedad lan katulangan ton bii ed loob la na taloy taon. Inkuan nen Mary: “Likud ed pangitarya na materyal iran pankaukolan to, sikatoy lawas min pitotongtongan. Daiset lay nagawaan nen Ina ed abung, balet sikami mantotongtong tan nagmaliw a maapit a sankaaro. No maminsan pantongtongan mi nipaakar ed Dios, no maminsan et nipaakar ed totoo dima’d datin panaayaman mi. Anggaman sikato lay masulok a 90 años, maong ni memorya to. Nanonotan tan nidalatdat to ni kabibilay sanen sikatoy melag ni, diad saray agew sakbay na 1914.”
Intuloy ni nen Mary: “Agmainomay so pangasikaso ed matatken lan too, balet say pakapiamong to ed sikami so mangitatarok na mayaman iran tumang. Walaan kami na kareenan tan pantutunosan ed pamilya. Say pangaasikasok ed sikato so mangisasagyat na espirituy panangiter ed arum a membro ed pamilya. Lalon rerespitoen ak na asawak. Tan no walay narengel nen Ina a mansalitay agmarakep a bengatlan nipaakar ed siak, sikatoy tampol ya onsalet pian idepensa ak. Anggapoy makapansalitay ansakit ed siak no sikatoy wadtan a mandengdengel!”
Panangiter ed Espiritual a Paraan
No panon a say materyal tan emosyonal a panangiter et mangitatarok na tumang ed sakey a mangiiter, ontan met ed espiritual a pamaakaran. Oniay insulat nen apostol Pablo ed Kristianon kongregasyon ed Roma: “Pampirawatan ko so pakanengneng ko ed sikayo, pian nipanabang ko ed sikayo so maespiritu a palangkap, pian napaletan kayo. Salanti, dia ed abay yo naligliwa ak ed sikayo, balang sakey ed sikatayo ed pananisia na sananey, say pananisia yo, tan say pananisiak.”—Roma 1:11, 12.
Diad mipadparan paraan, nipaakar ed panangiter ed espiritual a paraan ed saray maedad la a manlilingkor ed Dios, mabetbet a makapanpasesegan so sakey tan sakey. Oniay isasalaysay nen Osondu, a manaayam ed Nigeria: “Say paninteresan kon maong ed lakik tan baik et say pankanawnawan iiter da ed siak pian napasikmatan so apalabas. Say lakik, tekep na manim-imis a kamataan to et mangistorya nipaakar ed teritoryan kinimeyan to bilang sigpot-panaon a ministro ed saray dekada na 1950 tan 1960. Ipapareng toy kaplesan a kongregasyonal ya uksoyan sanen sikatoy nagmaliw a Tasi. Tinmulong irayan eksperiensia ed serbisyok bilang sakey a payunir.”
Arum ed Kristianon kongregasyon so makatulong met ed panangiter ed saray matatken la. Si Tunji, ya asalambit ed akadkauna, so angipaliwawa no antoy agawa ed kongregasyon da: “Sakey a payunir a kalangweran ya agin laki ya apabtangan a manpaliwawa ed publiko so angawit na outline ed si Papa ta pian niparaan dan dua iman. Say konduktor met na Panagaral na Panag-Bantayan so sinmabi tan inkuanto ed si Papa: ‘Eksperiensiado kayo. Antoy nibaga yon papaaligwasen ko?’ Ayarian nen Papa ya inikdan itan a matatken na pigaran praktikal a simbawa. Aminpigan danay a sinalambit na agagi so ngaran nen Papa ed saray pikakasi ed kongregasyon. Amin na saya so angipalikna ed sikaton kalkaliktanen.”
Niyaasingger so Totoo ed Dios Lapud Maabig a Kondukta
No maminsan, legan tayon ipapanengneng so galang tan panangaro ed atateng tan saray laki tan bai tayo, niyaasingger tayoy totoo ed Dios. Oniay insulat nen apostol Pedro: “Masimpit komon so tongtongan yo ed utel na saray bugkalot, pian dia ed pantalabutob da ed sikayo a singa managgawa na mauges nitandoro ra so Dios.”—1 Pedro 2:12.
Si Andrew, sakey a Kristianon matatken ed Sagur ya Aprika, so manbiabiahe na 95 kilometro a mamidua ed sakey simba pian asikasoen so ama ton mansasakit, ya agmananisia. Insalaysay to: “Sanen nagmaliw ak a sakey ed Tastasi nen Jehova, sumpan maong si amak. Balet sanen naobserbaan toy pangaasikasok ed sikato legan a mansasakit, naynay ton papasesegen iray yogtan ko, ‘Kaukolan yoy mimebro’d relihyon nen kuya yo!’ Satan so amakiwas ed sikara, tan natan et amin a siameran ilalak nen amak et Tastasi nen Jehova.”
Say panangigalang tan panangasikaso ed maedad lan atateng tayo et nayarin magmaliw a sakey ya angat, nagkalalo la ed panaoy kairapay panagbilay. Balet bangta pambabanikelan iyan gawaen na Kristianos, sikaray manani na dakel a tumang. Nagkalalo ed amin, naeeksperiensia ra so gayaga na panangiter tekep na pakapenek ed pakaamtan napapaliket da si Jehova a Dios, a sikato so “Ama na saray lapag.”—Efeso 4:6.
[Kahon ed pahina 6]
Maridios a Simbawa Parad Saramay Aasikasoen tan Parad Saramay Mangaasikaso
Magmaliw a Makapaseseg: “Balang sakey ed sikatayo paliketen to komon so kapara ton too ed kaabigan to ed kipaalagey.”—Roma 15:2.
Ontalindeg a Malet: “Ag-itayo sirin komon nakesawan a manggawa na maabig, pian dia ed panaon to manani itayo, no ag-itayo pinmakil.”—Galacia 6:9.
Magmaliw a Mapaabeba: “Anggapon balot komon so gawaen yo a lapud kasusumpa o panpasirayew, noag dia ed kaabebaan na kalakal balang sinansakey ibilang to so arum a magmaong nen say sikaton dili.”—Filipos 2:3.
Magmaliw a Mananumpal na Maabig: “Anggapo komon so siopan too a mananap na kaabigan ton dili, noag say kaabigan na kapara ton too.”—1 Corinto 10:24.
Magmaliw a Makatunongan: “Nakabatan komon na amin a totoo so kasungdoan yo.”—Filipos 4:5.
Magmaliw a Maabagey: “Tan manaanosan kayo ed sakey tan sakey, mapangasi, manpeperdonaan so sakey tan sakey.”—Efeso 4:32.
[Litrato ed pahina 7]
Nagunggunaan iray mas malangwer nin mamatatken manlapud eksperiensia na saray mas matatken la