“Asaliw Kayo ed Sakey a Bili”
“Asaliw kayo ed sakey a bili. Kanian, igloria yo so Dios ed say laman yon totoo.”—1 CORINTO 6:20.
1, 2. (a) Anto so angilukas na “say kililiktar a manlapud ipapatey”? (b) Anto so nepeg a gawaen pian nagawan legal so bagat nen Kristo, unong ya iyanino na anto?
“SAY tua a Dios diad sikatayo so sakey a Dios na manangiliktar iran gawa,” inkuan na salmista, “tan si Soberanon Katawan a Jehova so akankien na kililiktar a manlapud ipapatey.” (Salmo 68:20) Say bagat nen Jeus-Kristo so angilukas na satan a dalan. Balet pian magmaliw a legal itan a bagat, kaukolan ya onapireng a personal si Kristo ed arap na Dios a mismo.
2 Saya so iyanino na Pananakbong ya Agew sanen say atagey a seserdote et linmoob ed Sankasantosan. (Leviticus 16:12-15) “Anggaman ontan,” insulat na apostol Pablo, “sanen sinmabi si Kristo a bilang atagey a saserdote sikato so linmoob, andi, aliwan ed dala na saray kanding tan saray kilaw a baka, noag lapu ed dala to a dili, ya aminpinsan parad amin a panaon ed masanto a pasen tan agamoran to so maando ya inkarondon parad sikatayo. Ta linmoob si Kristo, aliwan ed masanton pasen a gawa na lima, a satan so kopya na matua, noag diad mismon tawen, pian ompatnag natan ed arap na persona na Dios parad sikatayo.”—Hebreos 9:11, 12, 24.
Say Pakayari na Dala
3. (a) Panon a minoria na saray managdayew nen Jehova so dala, tan akin? (b) Anto so mangipanengneng a say dala so walaan na legal a pakayarin manondon parad saray kasalanan?
3 Anto so betang na dala nen Kristo ed kilalaban tayo? Nanlapud agew nen Noe, saray tuan managdayew so walan nanmoria ed dala a bilang sagrado. (Genesis 9:4-6) Baleg so kaimportantian na dala ed andar na bilay, ta ikuan na Biblia a “say kamarerwa [o bilay] na laman so walad dala.” (Leviticus 17:11) Kanian say Mosaikon Ganggan so mankaukolan a sano say ayep et nibagat, say dala to so niyibong ed arap nen Jehova. No maminsan say dala met so nipasen ed saray suyok na altar. Malinlinew, say manondon a pakayari na bagat so wala ed dala to. (Leviticus 8:15; 9:9) “Tan unong a kuan na ganggan ngalngali amin na saray bengatla sikara so nagogolan na dala, tan no anggapo so niyibung a dala anggapo so panamerdonan nagawa.”—Hebreos 9:22.
4. (a) Anto so gagala na inpanebel na Dios ed pangusar na dala? (b) Anto so kakanaan na dala ed impatey nen Jesus?
4 Sirin, agpankelawan, a diad leksab na Ganggan, antokaman ya aliwan pangusar na dala so nadusa na patey! (Leviticus 17:10) Kabat tayon amin a no say sakey a substansya so ginawan matalag, odino masyado aginabuloy so pangusar ed satan, say balor to so ondaak. Say panebel nen Jehova ed pangusar ed satan so mamaseguro a say dala so namoria, ya aliwan bengatlan sakey ya ordinaryon kablian, balet ontanlan mabli, mabalor. (Gawa 15:29; Hebreos 10:29) Saya so mangiter na matalonggaring a gagala a say dala nen Kristo so manlinkor. Matukotukoy, sikatoy inatey ed pamaakaran a mansengeg a say dala to so nipatedter. Sirin, mapatnag ya aglambengat imbagat nen Kristo so atooan a laman to noagta inyibong so kamarerwa to, inbagat so mogmong bilay to a bilang ayadyarin too! (Isaias 53:12) Ag-inekal nen Kristo so legal a kanepegan to a satan a bilay lapud ag-inkayadyari, kanian say inyibong a dala to et walaan na baleg a balor tan nipresenta ed arap na Dios bilang pananondon ed saray kasalanan na katooan.
5. (a) Anto so inawit nen Kristo ed tawen, tan akin? (b) Panon a mapatnag ya inawat na Dios so bagat nen Kristo?
5 Agnaawit nen Kristo so literal a dala to ed tawen. (1 Corinto 15:50) Imbes, inala to no anto so isimbolo na dala: say legal a kablian na say nibagat ya ayadyarin atooan a bilay to. Diad arap na persona na Dios et sikato so makapanggawa na pormal a presentasyon na satan a bilay bilang sakey a dondon a kasalat na makasalanan a katooan. Say impangawat nen Jehova na satan a bagat so mapatnag nen Pentecostes 33 K.P., sanen say masanton espiritu so sinmabi ed 120 babangatan ed Jerusalem. (Gawa 2:1-4) Si Kristo, a singa onman, so akankayaryan natan ed atooan a rasa diad impangaliw. (Galacia 3:13; 4:5; 2 Pedro 2:1) Sirin, saray gungguna na dondon so onaagus ed katooan.
Saray Manunan Makagungguna ed Dondon
6. Anto iran areglo so walan ginawa na Dios ed pangiyaplika na saray gungguna na dondon nen Kristo?
6 Anggaman ontan, agkabaliksan na saya, a saray katooan so naitdan na tampol a pisikal ya inkayadyari, ta anggad say makasalanan ya inkatoo so natalonaan, say pisikal ya inkayadyari so agposibli. (Roma 7:18-24) Panon tan kapigan a say panagkasalanan et natalonaan? Inmunan inyarunsa na Dios parad 144,000 mangatatawen ‘a saserdote ed Dios tayo a manuley a bilang arari ed dalin’ a pati si Kristo Jesus. (Apocalipsis 5:9, 10; 7:4; 14:1-3) Diad panamegley da saray gungguna na dondon so kalkalnan niyaplika ed katooan ed loob na peryodo na sanlibon taon.—1 Corinto 15:24-26; Apocalipsis 21:3, 4.
7. (a) Anto so balon sipanan, siopa iray kabiangan ed satan, tan anto so panserbian na gagala? (b) Akin a nepeg a nagawa so ipapatey pian gawaen a posible so balon sipanan, tan antoy betang na dala nen Kristo?
7 Mitukoyan ed satan, say 144,000 ya ararin-saserdote so “inala a manlapud limog na katooan.” (Apocalipsis 14:4) Saya so asumpal ed panamegley na “sakey a balon sipanan.” Sayan sipanan so sakey a kontrata ed baetan nen Jehova a Dios tan espiritual ya Israel na Dios a saray membro to et manlikor a bilang arari tan saserdote. (Jeremias 31:31-34; Galacia 6:16; Hebreos 8:6-13; 1 Pedro 2:9) Ingen, panon a say sipanan ed baetan na Dios tan ag-ayadyarin too et posible? Isalaysay nen Pablo: “Ta no iner a wala so sakey a sipanan [ed baetan na Dios tan ag-ayadyarin too], nakaukolan a nitarok so ipapatey na toon managsipan. Ta wala so biskeg na sipanan ed saray inatey, ta anggapo so antokaman a biskeg to legan a mabilay ni so toon managsipan.”—Hebreos 9:16, 17.
8, 9. Panon a mitukoyan so dondon ed balon sipanan?
8 Kanian, say dondon bagat so manuna ed balon sipanan, a Manamegley si Jesus. Insulat nen Pablo: “Ta wala so saksakey a Dios, tan saksakey a manamegley ed baetan na Dios tan saray totoo, say toon, si Kristo Jesus, ya inter to so inkasikato ya inpanondon parad amin—a saya so natasian ed saraman la a dilin panaon to.” (1 Timoteo 2:5, 6) Saraman a salita so nagkalautlan niyaplika ed 144,000, ya akigawaan na balon sipanan.
9 Sanen nanggawa na sipanan so Dios ed silalaman ya Israel, satan so aliwan legal ya anggad nipatedter so dala na ayep a bilang bagat. (Hebreos 9:18-21) Mipadpara, pian say balon sipanan so onkana, walan inpatedter nen Kristo so “dala na sipanan.” (Mateo 26:28; Lucas 22:20) Tekep nen Kristo ya onakto a bilang namparan Atagey a Saserdote tan “manamegley ed balon sipanan,” iyaplika na Dios so balor na dala nen Jesus ed saramay inala ed balon sipanan, legal a pinabtangan ira na atooan ya inkatunong. (Hebreos 9:15; Roma 3:24; 8:1, 2) Sirin sarag na Dios ya alaen ira ed balon sipanan a magmaliw a mangatatawen ya ararin-saserdote! Bilang say Manamegley da tan Atagey a Saserdote, ontulong si Jesus ed sikara diad pamasiansia na malinis a talindeg ed arap na Dios.—Hebreos 2:16; 1 Juan 2:1, 2.
Tiponen Iray Bengatla ed Dalin
10, 11. (a) Panon ya onlaknab so dondon ed labas na saray alanaan a Kristianos? (b) Siopa iray baleg ya ulop, tan anto so walan talindeg da ed arap na Dios?
10 Saray alanaan lambengat a Kristianos so makaeksperiensa na kibubulos diad panamegley na dondon, say kaperdona na kasalanan da? Andi, say Dios so ipulang to ed inkasikato so amin a bengabengatla diad pikareenan ed panamegley na niyibong a dala ed panamairapan a kiew, unong ya ipanengneng na Colosas 1:14, 20. Saya so mangilanor ed saray bengatla ed katawenan (say 144,000) tan ontan met ed saray bengatla ed dalin. Saray saginonor et saramay manilalo ed mangaraldalin a bilay, katooan a mangayaga ed ayadyarin bilay ed Paraiso diad dalin. Nagkalautla nen 1935 a wala so gunaet ed panugyop na saratan. Deskribien na Apocalipsis 7:9-17 ira bilang “say baleg ya ulop” ya utang da so kilalaban ed Dios tan ed Kordero. Kaukolan da ni so makaliktar ed “baleg a kairapan” tan ‘niwanwan ed saray subul na danum na bilay,’ ta ipanengneng na Apocalipsis 20:5 a saratan so magmaliw a nanagnap a manbilay, a walaan na ayadyarin atooan a bilay, diad kasampotan na Sanlibon Taon ya Uley nen Kristo. Saraman sirin so onlabas ed kaunoran a subok ed ayadyarin atooan a kipapasen da so niyabawag a matunong parad andi-anggan a bilay ed dalin.—Apocalipsis 20:7, 8.
11 Anggaman ontan, diad sakey a manunaan a dalan, say baleg ya ulop so walan “anguras la ed saray kawes tan pinaputi ira ed dala na Kordero.” (Apocalipsis 7:14) Agkinmiwas si Kristo a bilang Manamegley na balon sipanan ed sikara, ingen nagungunaan ira a manlapud sayan sipanan ed panamegley na kimey na Panarian na Dios. Anggaman ontan, onakto ni si Kristo ed sikara, a bilang Atagey a Saserdote, a diad panamegley to et sarag tan niyaplika nen Jehova so dondon diad laknab a sikara la natan so niyabawag a matunong a bilang kakaaro na Dios. (Ipareng so Santiago 2:23.) Legan na Milenyo, sikaray kalkalnan “niliktar ed inkaaripen na kabolokan [ya anggad sikaray] walaan na maglorian kawayangan na saray anak na Dios.”—Roma 8:21.
12. Diad anton basiyan ya akideneng so Dios ed matoor a totoo ed sakbay-Kristianon panaon?
12 No nipaakar ed talindeg da ed Dios, ompatnag a saraman ed baleg ya ulop so dagdaiset a miduma a manlapud saray sakbay-Kristianon managdayew. Anggaman ontan, say Dios so akideneng ed saray saginonor tekep na iilaloan ya arapen a dondon a probisyon. (Roma 3:25, 26) Nangayaga ira ed panamerdona na saray kasalanan da lambengat ed sakey a probisyonal a dalan. (Salmo 32:1, 2) Imbes a nanagnap ira a nibulos ed pannodnonotan “na kasalanan,” saray bagat na ayep so sengegan a “nipanonot iray kasalanan.”—Hebreos 10:1-3.
13. Anto iran bentaha so wala ed sikatayo no ipareng ed sakbay-Kristianon ariripen na Dios?
13 Satan so miduma ed saray tuan Kristiano natan. Sikaray mandayew ed basean na dondon a walan abayaran! Diad panamegley na Atagey a Saserdote ra, sikaray “onasingger a mailalo ed trono na agkanepegan a panangasi.” (Hebreos 4:14-16) Say pipolangan ed Dios so aliwan singa-ilalon nagawa ed arapen balet kaplesan a katuaan! (2 Corinto 5:20) Sano sikaray nalingo, makawat ira na peteg a perdona. (Efeso 1:7) Pangayagaan da so peteg ya alinisan a konsiensia. (Hebreos 9:9; 10:22; 1 Pedro 3:21) Sarayan bendisyon so pataway na say maglorian kawayangan na ananak na Dios a pangayagaan na ariripen nen Jehova ed arapen!
Say Kaaralman na Kakabatan tan Aro na Dios
14, 15. Panon ya iparungtal na dondon so agnaparaan a kakabatan nen Jehova, tan ontan met ed inkatunong tan aro to?
14 Agaylan makapelaw a regalo a manlapud si Jehova so say dondon! Magmainomay a natalosan, ingen magenap a manlagyat na kelaw ed sankabalgan a pakatalos. Dagdaiset ni so naaralan ed impanrepaso tayo ed say kimey na dondon. Ingen, mieyag tayo ed si Pablo: “O say kaaralman na kayamanan tan kakabatan tan pakaamta na Dios! Agaylan agnausisa a kanonotan to tan agnatebek ira a dalan to.” (Roma 11:33) Say kakabatan nen Jehova so nipanengneng a sikatoy makapangiliktar ed katooan tan mangalangon na inkasoberano to. Diad panamegley na dondon, “pinmatnag so inkatunong na Dios . . . ingeter na Dios si [Kristo] bilang sakey ya opresi na makapapa ed panamegley na pananisia ed dala to.”—Roma 3:21-26.
15 Anggapoy nagawan pamalaw sumpad Dios ed inpamerdona na saray kasalanan a walan agawa ed apalabas na saray sakbay-Kristiano iran managdayew. Niarum ni, anggapoy pamalaw a nipasen a sumpad si Jehova diad pangiyabawag na alanaan a matunong a bilang ananak to odino say baleg ya ulop a bilang kakaaro to. (Roma 8:33) Diad baleg a bili ed sikaton mismo, say Dios so walan ayadyarin legal, odino maptek, ed saray pidedeneng to, kompleton apaneknekan a tila so ibabaga nen Satanas a si Jehova so aliwan maptek a manuley! Say andi-siblet ya aro na Dios ed saray palsa to so nidemostra met ya andian na panduwaruwaan.—Roma 5:8-11.
16. (a) Diad anton dalan a say dondon so angitarya ed pangiyareglo ed salisalan ed katooran na ariripen na Dios? (b) Panon a say dondon so mangiter ed sikatayo na basiyan na pananisia ed onsasabin balon mundo na inkatunong?
16 Say dalan a say dondon so nitarya so angyareglo met ed saray salisalan a mangilalanor ed katooran na saray ariripen na Dios. Say katutulok lambengat nen Jesus so anumpal ed satan. (Uliran 27:11; Roma 5:18, 19) Balet niyarum ed satan so kurso na bilay na 144,000 iran Kristiano, ya anggaman ed isusumpa nen Satanas et nansiansian matoor ya anggad patey! (Apocalipsis 2:10) Gawaen a posible na say dondon a saraya et makawat a bilang palangkap da et say ag-ipapatey—agnaderal a bilay! (1 Corinto 15:53; Hebreos 7:16) Saya so manggawan andi-kana so ibabaga nen Satanas a saray aripen na Dios so agnapanmatalkan! Say dondon so anggiter met ed sikatayo na sakey a mabiskeg a basean na pananisia ed saray sipan na Dios. Makanengneng tayo ed uksoyan na kilalaban salanti “legal a niletneg” ed panamegley na dondon bagat. (Hebreos 8:6) Sakey a balon mundo na inkatunong so walan agarantiyaan!—Hebreos 6:16-19.
Agsasaewen so Gagala To
17. (a) Panon ya ipanengneng na arum a sikara so walan sinmaew ed gagala na dondon? (b) Anto so mamayubo ed sikatayo a mansiansian malinis ed moral?
17 Pian nagunggunaan ed dondon, nakakaukolan a say sakey et mangala na pikakabat, mangagamil na pananisia, tan manbilay unong ed saray estandarte na Biblia. (Juan 3:16; 17:3) Anggaman, dagdaiset a maong, so mabulos a manggawa ed satan. (Mateo 7:13, 14) Anggano ed limog na saray tuan Kristiano, saray arum so “mangawat na ag-kanepegan a panangasi na Dios tan onsaew ed saray gagala to.” (2 Corinto 6:1) Alimbawa, diad loob na saray taon nilibo so walan adispelosip ed seksual a kondukta. Agaylan makapabaing nisengeg ed no anto so walan ginawa nen Jehova tan si Kristo ed sikatayo! Agta say panamabli parad dondon so mamakiwas ed sakey a toon onarawi ed pagmaliw “a malingwan ed panlinis to a manlapud saray kasalanan nen saman”? (2 Pedro 1:9) Matukotukoy, sirin, ya impanonot nen Pablo ed saray Kristiano: “Asaliw kayo ed sakey a bili. Kanian, igloria yo so Dios ed say laman yon totoo.” (1 Corinto 6:20) Say pannonot ed saya so mangiter na mabiskeg a motibasyon a mansiansian malinis ed moral!—1 Pedro 1:14-19.
18. Panon a say sakey a Kristiano a naplag ed seryoson kasalanan et siansian makawat ed inkasikato na dondon?
18 Anto no sakey a too et walan naplag ed seryoson kasalanan? Alaen to so bentaha ed panagbabawi a say dondon et gawaen ton posible, ya aawaten so tulong a manlapud saray maaron manangasikaso. (Santiago 5:14, 15) Anggano nakaukolan so mabiskeg a disiplina, say sakey a manbabawin Kristiano so nepeg ya ag-onsaew ed silong na ontan a pangorehi. (Hebreos 12:5) Walaan tayo na sayan makapakelaw a Biblikon paseguro: “No ikonpesal tayo so saray kasalanan tayo, sikato so matoor tan matunong a mamerdona na saray kasalanan tayo tan linisan to itayo a manlapud amin ya ag-inkatunong.”—1 Juan 1:9.
19. Anto so panmoria na sakey a Kristiano ed aliwan konduktan agawa sakbay na impanaral to ed katuaan.?
19 No maminsan saray Kristiano et masyadon nadismaya lapud apalabas a mauges ya awawey. “Sakbay a sinmabi ak ed katuaan,” insulat na sakey ya adismayan agin laki, “say asawak tan siak so nansakit na genital herpes. No maminsan alikna nin marutak, a kuanmono sikamiy aliwan ‘makanepegan’ ed malinis ya organisasyon nen Jehova.” Iyan la, anggan kayariy pagmaliw a Kristiano, arum so nayarin manani na sukat na panamairap a manlapud apalabas iran lingo. (Galacia 6:7) Siansia, anggapo so katunongan a liknaen tayon marutak ed mata nen Jehova no say sakey et manbabawi. “Say dala nen Kristo” so makayarin “manlinis ed saray konsiensia tayo a manlapud saray inatey a kimey.”—Hebreos 9:14.
20. Panon a say pananisia ed dondon so mangibulos ed sakey a Kristiano ed agnisisitan kasalanan?
20 On, say pananisia ed dondon so makatulong ed pakabulos tayo ed agnisisitan pabelat na kasalanan. Inadmite na sakey ya agin bii a: “Siak so mipupuligesgesan ed sakey ya agmalinis ya ugalin panagsalsal ed ngalngalin 11 taon la natan. Dawdawit ya onekal ak ed kongregasyon, a liliknaen a si Jehova et agmalabay a balot ed sakey a toon ontanlan makapadimla a mamarutak ed kongregasyon to.” Nepeg a nonoten tayo, anggaman, a si Jehova so “maabig tan akaparaan a mamerdona” daput no sikatayo so sigugunaet a mibakal a sumpad ag-inkatunong, ya ag-onsuko ed satan!—Salmo 86:5.
21. Panon a mangapekto so dondon ed panmoria tayo ed saramay mamasakit ed sikatayo?
21 Say dondon so nepeg a walaan na pitukoyan ed no panon so pideneng ed saray arum. Alimbawa, panon so ikiwas yo sano sakey a kaparan Kristiano et napasakitan to kayo? Kasin sibubulos yon ipalaknab so singa-Kriston panagbabawi? (Lucas 17:3, 4) Kasin sikayo so “mapangasi tan manpiperdonaan [ed arum] a singa met ed Dios a pinerdona to kayo ed Kristo”? (Efeso 4:32) Odino sika so manemem odino manpokok na sanok? Maseguron satan so mamasaew ed gagala na dondon.—Mateo 6:15.
22, 23. (a) Anto so nepeg ya epekto na dondon ed saray kalat tayo tan estiloy-panagbilay? (b) Anton panresolbe so nepeg a wala ed amin a Kristianos nipaakar ed dondon?
22 Kaunoran, say panamabli parad dondon so nepeg a walaan na mapatnag ya epekto ed saray kalat tayo tan estiloy-panagbilay. Ibaga nen Pablo: “Asaliw kayo ed sakey a bili; agkayo magmaliw ya aripen na totoo.” (1 Corinto 7:23) Kasin saray ekonomikon kakaukolanen—abung, trabaho, tagano, kawesen—so siansian sentro na bilay yo? Odino sikayo so mangiyuuna ed Panarian, a mangyan na pananisia ed sipan ya intarok na Dios parad sikayo? (Mateo 6:25-33) Nayari kayo kasin paaripen ed maniempleyo ed sikayo balet onsaew a mangiyarunsa parad teokratiko iran kimey yo? Nonoten, si Kristo et “angiter ed inkasikato parad sikatayo pian sikatoy . . . man linis na sakey a baley a nipaakar a kien ton dili, mapaga ed saray maabig a gawa.”—Tito 2:14; 2 Corinto 5:15.
23 “Misalamat ed Dios diad panamegley nen Jesu-Kristo” parad sayan sankabalgan a regalo—say dondon! (Roma 7:25) Agtayo komon nasaew so gagala na dondon balet mangyabuloy ed satan a magmaliw a peteg a puersa ed saray bilay tayo. Diad kanonotan, ed salita, tan ed gawa, komon lawas tayon pagalangen so Dios, misasalamat a mannonot a sikatayoy asaliw ed sakey a bili.
Repason Tepetepet
◻ Akin ya ipasen a sagrado so dala, tan panon a say dala nen Kristo et nipresenta ed arap nen Jehova diad tawen?
◻ Anto so betang na dala nen Kristo ed say balon sipanan?
◻ Panon a makagungguna so dondon ed alanaan tan ed baleg ya ulop?
◻ Panon tayon nipanengneng a walan sinmaew tayo ed gagala na dondon?
[Litrato ed pahina 14]
Say mananondon pakayari na bagat so wala ed dala na bilay
[Litrato ed pahina 15]
Say sakey a manamabli ed panamerdona na Dios so sibubulos a mangilaknab na panamerdona ed saray arum