Makatumang so Panagaral

KASIN akaimaton kayo la na totoon manpipili na prutas? Maslak et nengnengen da so kolor tan kabaleg to pian amtaen so inkaluto to. Arum a totoo et angoben da so prutas. Arum et kapaen da tan piriten da ni ingen. Wala ni iray arum et amtaen day belat to, egnaan dan sansakey ed nantupag a lima ra pian likasen no dinan so ambebbelat tan matabol. Anto so iisipen na sarayan totoo? Aanalisaen daray detalye, papadesiran iray pandurumaan, nonoten daray apalabas ya impanpili, tan ikompara so nanenengneng da natan ed saman so amta ra la. Maabig a tumang so manaalagar ed sikara lapud maalwar ya inimano ra so pamaakaran.

Siempre, saray tumang ed panagaral na Salita na Dios so mas babaleg. Sano say ontan a panagaral so walaay importantin pasen ed bilay tayo, ombiskeg so pananisia tayo, onaralem so aro tayo, magmaliw a lalon mabunga so ministeryo tayo, tan saray desisyon a gawaen tayo so mangiter na babaleg a pakapatnagan na pakatebek tan maridios a kakabatan. Nipaakar ed ontan iran tumang, ibabaga na Uliran 3:15: “Saray bengatla a napanpilalekan mo so makapipara ed sikato.” Kasin nanaeksperiensiam so ontan iran tumang? Say paraan na panagaral mo so nayarin sakey a sengegan.​—Col. 1:9, 10.

Anto so panagaral? Satan so nagkalalo nen say palawpaw a panagbasa. Lalanoren na satan so panangusar ed saray pakayari na nonot mo ed maalwar odino apalaknab a panangonsidera ed sakey a tema. Laktipen na satan so panangusisa ed babasaen mo, ya ikompara ed saman so kabat mo la, tan panginota ed saray niiter a rason ed saray balikas. Sano manaaral, isipen a maong iray antokaman ya ideyan nibalikas a nayarin balo ed sika. Ikonsidera, met, no panon mon personal a nagkalalon niyaplika so Makasulatan a simbawa. Bilang sakey a Tasi nen Jehova, labay mo met ya isipen so nipaakar ed saray pankanawnawan usaren so materyal diad panulong ed arum. Mapatnag, laktipen na panagaral so panagdalepdep.

Nawalaan na Dugan Kipapasen na Nonot

Sano manparaan a manaral, itaryam iray bengatla a singa say Biblia, antokaman iran publikasyon a nononoten mon usaren, lapis odino ballpen, tan nayarin pati kuaderno. Balet kasin ipaparaan mo met so pusom? Ibabaga na Biblia a si Esdras et “impasen [“imparaan,” NW] to so puso to a mananap na tunong nen Jehova, tan manumpal ed sikato, tan mangibangat ed Israel na saray panontonan tan saray panguksoyan.” (Esd. 7:10) Anto so lalanoren na ontan a panangiparaan ed puso?

Tulongan itayo na pikakasi a nagawa ed manepeg ya awawey so panagaral ed Salita na Dios. Labay tayon say puso tayo, say kaaraldalman tayo, so magmaliw a maawat ed panamilin ya iiter nen Jehova ed sikatayo. Diad gapo na kada sesyon ed panagaral, kerewen ed si Jehova so tulong na espiritu to. (Luc. 11:13) Patulongan ka ed sikato pian natalosan moy kabaliksan na aralen mo, no panon itan a misiglaotan ed gagala to, no panon kan tulongan na satan a mantebek ed maong tan mauges, no panon mon iyaplika iray prinsipyo to ed bilay mo, tan no panon a say materyal so mangapekta na relasyon mo ed sikato. (Uli. 9:10) Legan a manaaral ka, “itultuloy mon kerewen ed Dios” so kakabatan. (Sant. 1:5, NW) Simamatuan uusisaen mo so inkasika ed liwawa na nanaaral mo legan mon kekerewen so tulong nen Jehova a mangiwaklit ed saray lingon kaisipan odino makaderal iran pilalek. Lawas ya “onebat ed si Jehova diad pisasalamat” ed saray bengatlan ipaparungtal to. (Sal. 147:7, NW) Sayan sipipikasin panagaral so mangitonton ed inkamaapit ed si Jehova, lapud natulongan itayon onebat ed sikato legan a mitotongtong ed sikatayo diad panamegley na Salita to.​—Sal. 145:18.

Say ontan ya inkamaawat so mangiduma ed saray totoo nen Jehova manlapud arum ya estudyante. Diad limog na saramay andian na maridios a debosyon, uso so panduaruwa tan pananuppiat ed walan nisulat. Balet aliwan ontan so awawey tayo. Manmamatalek itayo ed si Jehova. (Uli. 3:5-7) No agtayo natalosan so sakey a bengatla, ag-itayo mapangayan mangikuan a lingo itan. Legan a susukimaten tan kukutkoten so ebat, manalagar itayo ed si Jehova. (Miq. 7:7) Singa si Esdras, kalat tayo so onkiwas tan mangibangat ed nanaaralan tayo. Diad onian pampilalek na puso, nidasig itayon manani na mayaman iran tumang manlapud panagaral tayo.

No Panon so Panaral

Imbes a basta igapo ed parapo 1 tan itultuloy ya anggad sampot, unona nin parlasan so interon artikulo odino kapitulo ed materyal. Igapo diad panganalisa ed tema. Saya so tema na aralen mo. Insan imanoen a maalwar no panon so pisiglaotan na saray subtitulo ed tema. Usisaen so dinanman ya ilustrasyon, saray tsart, odino saray kahon na panagbangat a kaiba na teksto. Tepetan mo so inkasika: ‘Base ed sayan impamarlas, anto so ilaloan kon naaralan? Diad anton paraan a satan so makana ed siak?’ Saya so mangigiya ed sika ed panaral mo.

Natan alaen iray katuaan. Saray artikulon aaralen ed Panag-Bantayan tan arum a libro so walaan na inimprintan tepetepet. Diad pamabasam ed kada parapo, makagunggona no markaan moray ebat. Anggano anggaporay tepetepet ya aralen, siansian nayarin markaan moray importantin punton labay mon natandaan. No say punto so balo ed sika, ikdan na kaaruman a panaon pian naseguron natalosan mon maong itan. Imanoen moray ilustrasyon odino panagkatunongan a makanakana ed sika diad lawak na ministeryo odino saman so nayarin itekep ed magano lan panpaliwawam. Isipen iray espesipikon totoo a say pananisia ra so nayarin napabiskeg no inabang mo ed sikara so nanaaral mo. Markaan iray punton labay mon usaren, tan repasoen mo ra sano asumpal mo lay impanaral mo.

Legan ya aaralen mo so materyal, nengnengen iray nisitan teksto. Analisaen no panon a misiglaot so kada teksto ed manunan punto na parapo.

Nayarin naabet moray punton agmon tampol natalosan odino saman so labay mon usisaen nin maong. Imbes a saratan so mangisuawi ed sika, mangisulat na nota pian saraya so aralen a maong ed saginonor. Mabetbet a saray punto so nalinewan legan ya itultuloy mon basaen so nakekeraan ed materyal. No andi, mansukimat ka ni na nagkalalo. Anto niran bengatla so nayarin imanoen? Nayarin wala so sakey ya inaon a teksto ya agmo tanto natalosan. Odino nayarin agmo tampol a natalosan no panon itan ya onaplika ed suheton sisingbaten. Nayarin liknaen mon natatalosan mo so sakey ya ideya ed materyal balet ta agmo tanto nipaliwawa ed arum. Imbes a basta saraya so palabasen la, makabat so pansukimat ed saratan sano asumpal mo la so inggapom ya aralen.

Sanen insulat nen apostol Pablo so detalyadon sulat to ed saray Hebreon Kristiano, sikatoy tinmunda ed pegley a kuanto: “Saya so manunan punto.” (Heb. 8:1, NW) Kasin panapanaon a papanonotan mo so inkasika a singa ontan? Nonoten pa no akin a ginawa nen Pablo so onman. Diad saray akaunan kapitulo na apuyanan a sulat to, impabitar to la a si Kristo so linmoob la ed mismon tawen bilang matalonggaring ya Atagey a Saserdote na Dios. (Heb. 4:14-5:10; 6:20) Ingen, diad pangipabitar tan pangidanet ed satan a manunan punto diad gapo na kapitulo 8, imparaan nen Pablo so kanonotan na saray bumabasa to a manisip a maong no panon itan a misiglaotan ed bilay da. Impabitar to a si Kristo so pinmatnag ed mismon imaton na Dios a nisesengeg ed sikara tan angilukas ed dalan pian makaloob iran mismo ed satan a mangatatawen a “masanton pasen.” (Heb. 9:24; 10:19-22) Say inkaseguro na ilalo ra so ontulong ed sikaran mangiyaplika ed kaaruman a simbawan lugan na sayan sulat nipaakar ed pananisia, panagsungdo, tan Kristianon kondukta. Mipadpara, sano manaral itayo, say pangiyapasakey ed saray manunan punto so ontulong ed sikatayon manebek ed katitibukel na tema tan onsepsep ed kanonotan tayo iray maabig a rason diad ikiwas a mitukoyan ed satan.

Kasin say personal a panagaral mo so mamakiwas ed sika? Saya so makanakanan tepet. Sano manaaral ka na sakey a bengatla, tepetan mo so inkasika: ‘Panon ya apektaen na saya so awawey ko tan saray kalat ko ed bilay? Panon kon iyaplika iyan impormasyon diad panolbar ed problema, diad pandesisyon, odino pandampot ed kalat? Panon kon usaren itan diad pamilyak, diad lawak na ministeryo, diad kongregasyon?’ Sarayan tepetepet so sipipikasin konsideraen tan molimolien iray peteg a kipapasen a nayarian mon iyaplika so pikakabat mo.

Kayarim a nasumpal so sakey a kapitulo odino artikulo, ipanaon mo so antikey a panrepaso. Salien mo no kasin nanonotan mo iray manunan punto tan saray mananuportan argumento. Sayan kundang so ontulong ed sikan natandaan so impormasyon ya usaren ed arapen.

No Anto so Aralen

Bilang totoo nen Jehova, walaan itayo na dakel ya aralen. Balet iner so pangigapoan tayo? Kada agew, maabig no aralen tayo so teksto tan komento ed Usisaen so Kasulatan ya Inagew-agew. Kada simba, onaatendi itayo ed saray miting ed kongregasyon, tan say panagaral parad pangiparaan ed saraya so ontulong ed sikatayon nagunggonaan a nagkalalo. Niarum ed saya, arum so makabat ya angusar na panaon da diad panagaral ed arum ed saray Makristianon publikasyon tayo a niimprinta sakbay na impakaaral da ed katuaan. Arum so mamili na pigaran kabiangan na sinimban panagbasa ed Biblia tan manggawa na nagkalalon panagaral ed saratan a bersikulo.

Anto no ag-iyabuloy na sirkumstansyam pian maalwar mon aralen so amin ya impormasyon a nasingbat diad sinimban miting ed kongregasyon? Paliisan iray patit diad panapuran panaral ed materyal ta pian nagawaan lambengat odino, lalon makapuy, diad agla panaral na anggan dinan ed satan lapud agmo nagawaan ya amin. Imbes, determinaen no kaunongan karakel so naaral mo, tan satan so gawaen mon maong. Satan so gawaen mon kada simba. Kabekta, panggunaetan mon palaknaben ya isakop so arum iran miting.

“Pabiskegen so Sankaabungan Mo”

Bidbiren nen Jehova a saray ulo na pamilya so nepeg a mankimey ya impasya diad panlegpet ed saray inad-aro ra. “Iparaan moy kimey mo ed paway,” kuan na Uliran 24:27, NW “tan iparaan moy inkasika diad uma.” Ingen, saray espiritual a pankaukolan na pamilyam so agnayarin paulyanan. Kanian, intuloy na bersikulo: “Kayari to et nepeg mo met a pabiskegen so sankaabungan mo.” Panon iyan nagawaan na saray ulo na pamilya? Ibabaga na Uliran 24:3: “Lapu ed pakatalos [say sankaabungan] so niletneg.”

Panon a say pakatebek so mangunggona ed sankaabungan mo? Say pakatebek so abilidad na nonot a mangusisa ed labas ni na malinew la. Nibagan maong a say epektibon panagaral na pamilya so onggapo ed pangusisan mismo ed pamilyam. Panon ya onaligwas ed espiritual iray membro na pamilyam? Ontalineng a maong legan na pitotongtong mo ed sikara. Kasin wala so awawey a mareklamo odino imbel na linawa? Kasin saray materyalistikon gegemtan so importantin bengatla? Sano kaibam a manpupulong iray anak mo, ag-ira kasi nababaingan ya ikabat day inkasikara ed saray kalimog da bilang Tastasi nen Jehova? Kasin panliliketan da so programa yo ed panagbasa tan panagaral na Biblia bilang pamilya? Kasin peteg a gagawaen da so dalan nen Jehova a dalan na kabibilay da? Bilang ulo na pamilya, say maalwar a panag-imaton so mangipatnag no anto so nakaukolan mon gawaen pian niletneg tan napabiskeg so espiritual iran kalidad ed kada membro na pamilya.

Nengnengen iray artikulo na Say Panag-Bantayan tan Awake! a manasaglawi ed saray espesipikon pankaukolan. Insan ibagan masakbay ed pamilya no anto so aralen pian namotektek da la so impormasyon. Pansiansiaen so maaron atmospera legan na panagaral. Agpantatamian odino papabaingan so anggan siopan membro na pamilya, ipabitar so kablian na materyal ya aaralen, a manggawa na espesipikon aplikasyon ed saray pankaukolan na pamilyam. Ipibali so kada membro. Tulongan so balang sakey a makatalos ed no panon a say Salita nen Jehova so “nagnap” diad pangitarya ed nakaukolan ed bilay.​—Sal. 19:7.

Anien Iray Tumang

Saray maimanon totoo ya andian na espiritual a pakatalos so makayarin manaral ed uniberso, saray nagagawa ed mundo, tan anggan diad sikaran dili balet agda natalosan so peteg a kabaliksan na nanenengneng da. Diad biek a dapag, diad tulong na espiritu na Dios, saray totoon maparanay a manaaral ed Salita na Dios so makatebek ed sarayan bengatlan kimey na Dios, say kasumpalan na propesiya na Biblia, tan say kipaparungtal na gagala na Dios diad pamendisyon ed matulok a katooan.​—Mar. 13:4-29; Roma 1:20; Apoc. 12:12.

Anggaman alay abig na satan, ag-itayo komon magmaliw a mapaatagey. Imbes, say inagew-agew a panangusisa ed Salita na Dios so ontulong ed sikatayon mansiansian mapaabeba. (Deut. 17:18-20) Salimbengan to itayo met manlapud “panamalingo na kasalanan” lapud sano mabilay ed kapusoan tayo so Salita na Dios, agnadaeg na pananagyat na kasalanan so determinasyon tayon onsumpa ed satan. (Heb. 2:1; 3:13; Col. 3:5-10) Sirin, sikatayo so ‘mankurang a makana ed Katawan ya onarap ed amin a makapaliket, mamabunga [itayo] ed ganaganan maabig a gawa.” (Col. 1:10) Say panggawa na ontan so gagala tayo diad panagaral ed Salita na Dios, tan say panumpal ed satan so sankabalgan a tumang.