TEPETEPET NA SARAY MANBABASA
Kasin papateyen na saray Israelita iray kriminal diad pangibitay ed kiew?
Dakel ya nasyon nensaman so mamapatey ed saray kriminal diad pangipasak ed sikara ed kiew o poste. Itataker odino ipapasak na saray Romano so sakey a kriminal, anggad ipatey to lay ot-ot, paet, eras, tan petang odino betel kayari pigaran agew. Ipapasen na saray Romano ya makapabaing a dusa so kipasak tan para labat itan ed saray kriminal ya ikuekuentan abebbeba.
Diad nasyon na Israel nensaman ey? Kasin papateyen da iray kriminal diad pangibitay ed kiew? Malinew so ibabaga na Mosaikon Ganggan: “No pinatey so sakey a too lapud ginawa ton ambelat a kasalanan tan imbitin ed sakey a kiew so bangkay to agnepeg a natilak diman a sanlabi. Nepeg a niponpon ed saman met lanlamang ya agew.” (Deu. 21:22, 23, Maung a Balita) Malinew sirin a diad saman a panaon, say toon manepeg ya ompatey et pateyen da nin unona insan ibitay ed poste odino kiew.
Nipaakar ed saya, oniay imbaga na Levitico 20:2: “Say siopaman a kabiangan na saray anak na Israel, odino dia ed saray sangkaili a miaayam ed Israel a mangiter na ilalak to ed kinen Molec, napapatey naani. Saray totoo ed dalin tupaken da naani na batobato.” Napapatey met iray “managsalamangka” odino espiritista. Panon? Diad ‘panupak ed sikara na batobato.’—Lev. 20:27.
Oniay nabasa tayod Deuteronomio 22:23, 24: “No wala so sakey a marikit a birhen ya akisipan ya asawaen na sakey a laki, et say sananey a laki sikato so naromog to ed sakey a syudad et karokolan to; ipaway yo ra ed satan ed pinto na satan a syudad, tan tupaken yo ra na batobato; saman so marikit lapu ed ag-inmakis, anta wala ed loob na syudad; et saman so laki natupak met lapu ed dineral to so galang na bii ya asawa na kapara to a too; ontan so panangekal mo naani na mauges ed pegley mo.” No diad saray Israelita nensaman sirin, say panupak na bato so manunan paraan da pian pateyen iray nanggaway mauge-uges ya krimen.a
Malinew a diad saman a panaon, say toon manepeg ya ompatey et pateyen nin unona insan ibitay ed poste odino kiew
Ibabaga na Deuteronomio 21:23 ya samay “too ya abitay sikato so insamba na Dios.” Seguradon baleg so epektod saray Israelita na pakanengneng ed akabitay ya bangkay na mauges a toon “insamba na Dios.” On, ibibitay dad poste odino kiew so bangkay na kriminal pian panmadmaran na arum.
a Mipakna so dakel ya iskolar ya unong ed Ganggan et kaukolan nin pateyen so sakey a kriminal antis ya ibitay ed kiew. Balet, walay ebidensya ya nen inmunan siglo, mabilay ya impasak ed poste na saray Judio so arum a kriminal tan ditan la inatey.