KASIN NANONOTAN YO?
Binasam ta iray agano nin isyu na Say Panag-bantayan? Salim pa sirin ya ebatan irayan tepet:
Anto so bibliomancy, tan antoy panmoria na saray Kristiano ed satan?
Satan imay gagawaen na arum ya basta pambukay ed Biblia lapud panisiaan dan samay sankaunaan ya bersikulon nanengneng da so ebat ed problema da. Agmanguusar na mahiko iray tuan Kristiano. Imbes, aaralen day Biblia pian nawalaan iray suston pikakabat tan giya a manlapud Dios.—12/15, pahina 3.
Anto so “mundo” ya naderal?
Say “mundo” ya naderal et saray totoo a say panagbilay da et kontra ed labay na Dios. (1 Juan 2:17) Say dalin tan saray matunong ya totoo et makaliktar.—1/1, pahina 5-7.
Panon a mansasalita ni si Abel anggano inatey la? (Heb. 11:4)
Panamegley na pananisia. Makaaral tayod alimbawa tan pananisia to. Say alimbawa to et mabilay tan maabig ya aligen tayo.—1/1, pahina 12.
Anto ray agtayo nepeg ya abuloyan a mangiyarawid sikatayo ed Dios?
Kaibad saratan so trabaho odino propesyon, panagrelaks tan panagligliwaan, pililimog ed adispelosip a kapamilya, panangusar ed modernon teknolohiya, alabas a panagpaga ed bunigas, lingon panmoria ed kuarta, tan pangiter na sobran importansia ed panmoria tan posisyon tayo.—1/15, pahina 12-21.
Antoy naaaralan tayod inkamapaabeba nen Moises?
Agbinmaleg so ulo nen Moises sanen naikdan na autoridad, sikatoy agnandependid sarili to noagta diad Dios. Agtayo labay so magmaliw a mapaatagey lapud pakayari, autoridad, odino saray abilidad tayo; imbes manmatalek tayod si Jehova. (Uli. 3:5, 6)—3/1, pahina 5.
Iner so laen na saray onoli?
Say eksakton bilang ya 144,000 et onlad tawen. Balet say karaklan et napaoli diad dalin tan manbilay ya andi-angga.—5/1, pahina 13.
Akin a nibagan ‘ag-agalsiman so puso’ na saray Israelita? (Jer. 9:26)
Sikaray benger tan rebelyoso tan kaukolan ya ekalen iray mamapaawet ed puso ra—say kanonotan, liknaan, odino motibo ya sumlang ed Dios. (Jer. 5:23, 24)—3/15, pahina 9-10.
Akin et ehemplo si Jesus na sakey ya walaay maliket a bilay?
Walay gagala tod bilay, say panggawa na linawa na Dios. Inad-aro ton maong so Ama to tan inaro to ray totoo. Amta nen Jesus a sikatoy inaro tan aabobonan na Ama to. Saraya so sekreto na maliket a bilay.—5/1, pahina 4-5.
Anto ray kabiangan na organisasyon na Dios diad dalin?
Kaibad saya so Mananguley ya Ulop, saray branch committee, saray ombiabiahen manangasikaso, saray ulop na mamatatken, saray kongregasyon, tan saray manangipalapag.—4/15, pahina 29.
Kasin nibaga tayon anggapoy panangasi na Dios sano manudusa?
Andi. Agmaliket si Jehova ed ipatey na mauges. (Eze. 33:11) Ipapanengneng na saray ginawa to nensaman a papasakbayan to ni ray totoo antis to ran deralen. Saya so mangiter ed sikatayo na ilalo a nayarin niliktar itayod panangukom tod arapen.—7/1, pahina 5-6.
Kasin papateyen na saray Israelita iray kriminal diad pangibitay ed kiew?
Andi. Ginawa itan na arum a nasyon balet andi ed saray Israelita. Nensaman, saray kriminal et pateyen da nin unona, nayarin panamegley na panupak. (Lev. 20:2, 27) Insan da ibitay ed poste so bangkay to pian panmadmaran na arum.—5/15, pahina 13.
Akin et mairap ya niwalay kareenan?
Anggano wala ray maabig ya agawaan na totoo, agda sarag ya igiyay sarili da. (Jer. 10:23) Si Satanas so manguuley ed mundo, kanian agsarag na totoon napawalay kareenan. (1 Juan 5:19)—7/1, pahina 16.