KASIN mainomay moy mitongtong ed arum? Para ed dakel, say mismon kaisipan na pitongtong, nagkalalo la ed sakey ya agda kabat, so makapaaburido. Saratan a totoo so nayarin mabaing. Nayarin isipen da: ‘Anto kasi so itongtong ko? Panon kon igapo so tongtongan? Panon ko kasin nitultuloy?’ Saray totoon matalek tan makaaro so nayarin onkiling a mandomina ed tongtongan. Nayarin angat ed sikara so pamasalita ed arum tan panaral ya ontalineng ed anto so nibaga. Sirin amin tayo, balanglan mabaing odino makaaro, so kaukolan a mamayubo ed arte a mitongtong.

Igapo ed Abung

Pian napaaligwas iray dunong mon mitongtong, akin ya ag-igapo ed abung? Say makapabiskeg a pantotongtong so makatulong na baleg ed liket na sakey a pamilya.

Say sankamanunaan a tombok na ontan a pantotongtong et say pililiknan tuloy ed balang sinansakey. (Deut. 6:6, 7; Uli. 4:1-4) Sano sikatayo so mililikna, sikatayo so mitalosan, tan sikatayo so ontalineng sano walay labay ya ibaga na arum a too. Sananey nin importantin sengegan et say pangibaga na bengatlan makana. No walaan itayo na maparanay a programa ed personal a panagbasa tan panagaral na Biblia, dakel so nayarian tayon inabang. Say makabat a pangusar ed pulyeton Usisaen so Kasulatan ya Inagew-agew so nayarin managyat na tongtongan. Legan na sanagew, nayarin walaan itayo na makapaliket ya eksperiensya ed lawak na kimeyan. Nayarin akabasa itayo na bengatlan makaibangat odino makapalek. Iyugali tayo ya inabang irayan bengatla legan na makapabiskeg a pantotongtong na pamilya. Saya so ontulong met ed sikatayon makapitongtong ed totoo ya agtayo kapamilya.

Pitongtong ed Sakey a Sankaili

Masuyat so dakel a totoon mangigapo na tongtongan ed sakey ya agda kabat. Balet lapud panangaro ra ed Dios tan ed kakaabay da, panggugunaetan na saray Tastasi nen Jehova ya aralen no panon so pitongtong ta pian nipanabang da ed arum so katuaan na Biblia. Anto so ontulong ed sika pian napaaligwas iyan pamaakaran?

Say prinsipyon nibaga ed Filipos 2:4 so makanakana. Sikatayo so apaseseg ya iteen so mata ya, ‘aliwan diad kayarian [tayon] dili, noagta nengnengen to met so saray bengatlan kayarian na arum.’ Isipen itan ed onian dalan: No agmo nin balot nabet so sakey a too, sika so ipasen ton estranghero. Panon mon pagmaliwen a sikato so relaks tan komportable? Makatulong so maligsan imis tan makaaron panangibano. Balet wala ni so lalon konsideraen.

Nayarin napaer mo iray kanonotan to. No, salien mon itongtong ed sikato so wala ed kanonotan mo ya agmo iimanoen so wala ed kanonotan to, marakep kasi so ikiwas to? Anto so ginawa nen Jesus sanen nabet to so sakey a bii diad sakey a bobon ed Samaria? Say walad kanonotan na bii et say iyasol to na danum. Inggapo nen Jesus so impitongtong ed sikato nipaakar ed satan, kabekta et impaarap to ed sakey a mabilabilay a tongtongan nipaakar ed espiritual.​—Juan 4:7-26.

No maimano ka, natebek mo met no anto so nayarin nononoten na totoo. Kasin maliket odino maermen so too? Kasin sikato so matatken la tan ompan agla makayari? Kasin nalikas mon walaray ugugaw ed abung? Kasin ompatnag a say too et walaan to odino ikakairapan toy panaanap ed saray nakakaukolan ed bilay? Kasin saray dekorasyon ed abung odino sulong ton alahas et mangipatnag a sikatoy relihyoso? No say panangibanom et managlawi ed ontan iran bengatla, nayarin sika so moriaen to a nakapakna to.

No agmo napiarapan so onabung, nayarin narengel mo labat so boses to diad sakey ya akakandadon puerta, anto kasi so nayarin nibagam? Nayarin say too so manbibilay a natatakot. Kasin nausar mo itan ya impormasyon diad pangigapo na tongtongan diad puerta?

Diad arum a pasen et sarag mon nasagyat a mitongtong so sakey a too diad pangibagam ed sikato na bengatla nipaakar ed inkasika​—say abenegan mo, no akin a sika so tinmoktok ed puerta to, no akin a sika so manisia ed Dios, no akin a ginapoan mon aralen so Biblia, tan no panon a say Biblia so akatulong ed sika. (Gawa 26:4-23) Siempre, nonoten mon saya so kaukolan a gawaen a maalwar tan tekep na malinew a gagala. Saya met so nayarin mamakiwas ed too ya ibaga to ed sika so bengatla nipaakar ed inkasikato tan no panon so panmoria to ed saray bengatla.

Diad arum a kultura, ugali so inkamaparawes ed saray sankaili. Nayarin saray totoo so tampol a mamaloob tan mamayurong ed sika. Bektan akayurong ka la, no magalang mon amtaen so nipaakar ed pankaabigan na pamilya tan masimoon ya ontalineng ed ebat, nayarin marengerengel so onabung ed walan ibagam. Arum a totoo so mangipanengneng na nagkalalo nin interes ed saray bisita, kanian nayarin andukey ni so pakapitongtong mo. Legan na pantotongtong, nayarin naimano ran makapanpakna kayo. Saya so nayarin mansumpal ed makagunggonan espiritual a diskusyon.

Anto no walaray totoo ed lugar mo a mansasalita na sananey a lenguahe likud ed uusaren mo? Panon mon sabien irayan totoo? No naaralan mo so anggan simplin panangibano ed arum ed saratan a lenguahe, namoria na totoo a sika so interesado ed sikara. Saya so nayarin mangilukas na dalan parad kaaruman a pakapitongtong.

No Panon so Pangituloy ed Pitotongtong

Pian mantultuloy so tongtongan, magmaliw ya interesado ed kaisipan na arum a too. Sikato so pasesegen mon mangibalikas ed inkasikato no labay to. Saray pinilin maong a tepet so makatulong. Saray punto de bistan tepet so sankaabigan lapud saratan et maslak a managyat a lalo nen say basta iyebat na on odino andi. Alimbawa, kayari panalambit na sakey a probleman kapapagaan ed lokal, nayarian mon itepet: “Anto so isipen mon sengegan na sayan kipapasen?” odino “Anto so isipen mon polaing?”

Sano sika so mantepet, dengel mon maong so ebat. Ipanengneng moy puron interes diad pansalita, itanger, pan-andawes. Agka onsasalet. Tekep na lukas a kanonotan, imanoen so nibabaga. “Maples ed panagdengel, matantan ed panagsalita.” (Sant. 1:19, NW) Sano sika so onebat, ipanengneng mo a talagan ontatalineng ka ed saman so nibabaga.

Anggaman ontan, bidbiren ya aliwan amin et onebat ed saray tepet mo. Parad arum a totoo et nayarin say ebat da labat et say pangitagey da na kirep odino onimis. Arum et nayarin onebat na on odino andi. Agnadidismaya. Mananos. Ag-ipipilit so tongtongan. No mabulos so toon ontalineng, usaren so pankanawnawan inabang iray makapabiskeg a Makasulatan a punto. Nasabi panaon, nayarin sika la so ipasen na too bilang sakey a kaaro. Diad ontan et sikato la so lalon mabulbulos a manginabang ed saray kanonotan to.

Diad pitotongtong mo ed totoo, iparaan so arapen a panagpawil. No pinalesa na sakey a too so pigaran tepet, ebatan mo so arum ed saratan balet mangitilak ka na sakey odino duara parad ontumbok lamet a pantongtong yo. Ibagam a mansukimat ka ni, insan ipanabang ed sikato iray resulta. No sikato so agmamalesa na saray tepet, nayarin panampoten moy tongtongan diad sakey a tepet a sisiaen mon paninteresan to. Ibaga a satan so pantongtongan ed ontumbok ya ibisitam. Dakel iran ideya so naromog ed libron Reasoning From the Scriptures, brosyur ya Anto so Kakaukolanen na Dios ed Sikatayo?, tan diad agano niran paway na Say Panag-Bantayan tan Awake!

Sano Kaiba Iray Kapananisiaan

Sano naabet mo so sakey ed saray Tastasi nen Jehova ed unonan pankanawnawa, kasin sika so unona lan mikabat? Odino sika so basta akaalagey ya ag-oneseesel? Say aro ed agagi tayo so nepeg a mamakiwas ed sikatayon malabay a mikabat ed sikara. (Juan 13:35) Panon mon igapo? Nayarin ibagam labat lay ngaran mo insan mo met tepeten so ngaran to. Say panepet no panon ton naamtaay katuaan so gendat lan mangitonton ed makapasagyat a tongtongan tan ontulong ed sikan makapankabatan kayon dua. Anggaman agtanto marlas so ibabagam, say sagpot so napatnagan na sakey a too a sika so mililikna ed sikato, tan satan so importante.

Anto so makatulong diad makabaliksan a pitotongtong ed sakey a membro ed kongregasyon yo? Ipanengneng so puron interes ed satan a too tan ed say pamilya to. Kasin kasumsumpal na miting? Tongtongen iray punton aromog mon makatulong. Saya so nayarin makagunggona ed sikayon dua. Nayarin managlawi ka na sakey a punton makapainteres diad agano nin paway na Say Panag-Bantayan odino Awake! Saya so agnepeg a gawaen bilang pangipasirayew odino panubok ed pikakabat. Gawaen itan diad pangipanabang na bengatlan aromog mon makapaliket a tuloy. Nayarin tongtongen mo so nipaakar ed asainmin to odino sika diad Teokratikon Eskuelaan Parad Ministeryo tan mansalatan na ideya ed no panon a gawaen itan. Nayarin inabang mo met iray eksperiensya ed lawak na ministeryo.

Siempre, say interes tayo ed totoo so mabetbet a mangipaarap ed pantotongtong nipaakar ed totoo​—saray bengatlan ibaga ra tan gawaen da. Say pampaelek met so nayarin kabiangan na panagsalita tayo. Kasin say ibaga tayo so makapabiskeg? No ipapuso tayo so simbawan manlapud Salita na Dios tan napakiwas lapud maridios ya aro, say panagsalita so seguradon makapabiskeg.​—Uli. 16:27, 28; Efe. 4:25, 29; 5:3, 4; Sant. 1:26.

Sakbay a mibiang ed lawak na ministeryo, manparaan itayo. Akin ya agmangiparaan na sakey a makapainteres a punto pian itotongtong ed kakaaro? Diad pakabasam tan pakadngel ed saray bengatlan makapainteres, tandaan iray punton labay mon inabang ed arum. Nasabi panaon, nawalaan ka na dakel a pampilian. Diad panggawa ed saya et makatulong ed sikan onlaknab likud ed saray komento ed inagew-agew a rotina na bilay. Nagkalalo ed amin, komon ta say panagsalitam so mangipatnag ed no panon kamabli ed sika so Salita na Dios.​—Sal. 139:17.