Mantultuloy a Manpulong
1 Mauges la so panaon. Kasmak la ray sibil a panlalaban, guerra lapud pandurumaay poli, natural iran kalamidad, tan arum niran makapataktakot a nagagawa. Mas kakkaukolan natan na katooan so maong a balita nen say kapiganman. Balet ta dakdakel so andiay interes ed espiritual iran bengatla. Diad arum iran pasen, agaylay irap a naromog iray totoo ed kaabungan tan lalon mair-irap so pakalmoy ondengel odino paiyaralan na Biblia. Anggaman ontan, importante ya itultuloy tayon ipulong so maong a balita na niletneg lan Panarian na Dios.—Mat. 24:14.
2 Aro ed Totoo: Say panagpulong tayo so mangipapabitar ed panangaro nen Jehova ed totoo. “Agto labay a wala so siopaman a natawtaw noag ingen amin komon nagegemtan da so panagsibkel.” (2 Ped. 3:9; Eze. 33:11) Kanian, unong ya imbaga la nen Jesus, ingganggan To a “say ebanghelyo [so] kaukolan a nipulong ya unona ed saray amin a nasyones.” (Mar. 13:10) Kekerewen na Dios ed totoo ya ondago ira ed sikato pian naliktaran da so kaukom na mundo nen Satanas. (Joel 2:28, 29, 32; Sof. 2:2, 3) Agta misalsalamat itayo ta innatnat nen Jehova ed sikatayo iyan pribilehyo?—1 Tim. 1:12, 13.
3 Ipaparungtal na sankamundoan a report a nen 2004 a serbisyon taon et walay promedyon 6,085,387 a panangiyaral na Biblia kada bulan, tan manga 5,000 a balon babangatan so abautismoan ed kada simba! Arum ed sarayan balon dedikado so aromog lapud pamebendisyon nen Jehova ed tuloy-tuloy a panggugunaet na saray manangipalapag a katongtongen so amin diad saray niasain a teritorya ra. Baleg a liket so pinawala na satan ed saray kongregasyon, tan agaylan pribilehyo so pagmaliw a kakimeyan na Dios ed sayan manangiliktar-bilay a kimey!—1 Cor. 3:5, 6, 9.
4 Pangidayew ed Ngaran na Dios: Mantutultuloy itayon manpupulong pian mapubliko tayon nidayew si Jehova tan napasanto so ngaran to ed imaton na amin a katooan. (Heb. 13:15) Papalikdoen nen Satanas so “lapag na sankamundoan” pian napanisia iran agnasolbar na Dios iray problema na katooan, ya anggapoy pibabali To ed paniirap na totoo, odino anggapo kunoy Dios. (Apo. 12:9) Diad pampupulong tayo, itatandoro tayo so katuaan nipaakar ed maomaong a mangatatawen ya Ama tayo. Komon ta itultuloy tayon idayew so ngaran to—natan tan ed andi-anggaan.—Sal. 145:1, 2.