Kapitulo 11

Kasin Walad Libro na Bilay so Ngaran Mo?

SARDIS

1. Anto so espiritual a kipapasen na kongregasyon ed Sardis, tan panon so impangigapo nen Jesus ed mensahe to?

MANGA 50 kilometro ed abalaten na modernon Akhisar (Tiatira) et say kawalaan na ontumbok a kongregasyon a mangawat na mensahe na niglorian Jesus: say Sardis. Nen komanem a siglo antis na Komon a Panaon tayo, sayan syudad so matalonggaring a kabisera na kadaanan a panarian na Lydia tan nanuleyan na mayamyaman ya Ari a si Croesus. Nen panaon nen Juan, asagmak na satan so mairap iran panaon, tan nagmaliw labat lan awaran so datin karlangan na satan diad uley nen Croesus. Mipadpara, say Kristianon kongregasyon diman so nagmaliw a duka ed espiritual a paraan. Diad sankaunaan a pankanawnawa, ag-inggapo nen Jesus so mensahe to panamegley na komendasyon. Imbes et inkuanto: “Tan isulat mo ed anghel na iglesia [“kongregasyon,” NW] dia ed Sardis: Say wala ed sikato so pitora ya espiritu na Dios, tan pitora a bitewen, kuan to so saraya: Siak amtak so saray gawam, a wala so ngaran mo a mabilay ka, et anta inatey ka.”—Apocalipsis 3:1.

2. (a) Antoy kabaliksan parad saray Kristiano ed Sardis na say ‘inkawalaan nen Jesus na pitora ya espiritu’? (b) Anto so reputasyon na kongregasyon na Sardis, balet antoray katuaan?

² Akin ya impabidbir nen Jesus so inkasikato bilang say ‘walaan na pitora ya espiritu’? Lapud sarayan espiritu so mangirerepresenta ed masanton espiritu nen Jehova a sigpot ya onaagus. Diad saginonor, deneskribe met nen Juan iratan bilang “pitora a mata,” a mangipapatnag na ontatalos a pakanengneng ya ipapagamor na masanton espiritu na Dios ed si Jesus. (Apocalipsis 5:6) Kanian, nayarian ton iparungtal tan asikasoen so anggan anton situasyon a nayarin onlesa. (Mateo 10:26; 1 Corinto 4:5) Say kongregasyon ed Sardis so walaan na reputasyon bilang mabilay, aktibo. Balet nanengneng nen Jesus ya inatey itan ed espiritual. Mapatnag, maslak ed saray membro na satan so pinmawil ed inkaandian na interes, a singa ed datin kipapasen da antis iran nagmaliw a Kristiano.—Ikompara so Efeso 2:1-3; Hebreos 5:11-14.

3. (a) Akin a say “anghel na iglesia dia ed Sardis” so nepeg a nagkalalon mangimano ed katuaan a si Jesus so walaan na “pitora a bitewen”? (b) Anton mabiskeg a simbawa so inter nen Jesus ed kongregasyon ed Sardis?

³ Ipapanonot met nen Jesus ed “anghel na iglesia dia ed Sardis” a Sikato imay walaan na “pitora a bitewen.” Saratan a mamatatken ed kongregasyon et sankaegnaan to ed nikawanan a lima to, a walaan na autoridad a mangiwanwan ed sikara ed panagpastol a kimey da. Nepeg dan iyapasakey so kapusoan da diad ‘pangamta ed kipapasen na saray karnero.’ (Uliran 27:23) Kanian, nepeg dan dengelen a maong so ontumbok iran salita nen Jesus: “Manbantay ka, tan ipaletneg mo ray bengatla a kera, a sipaparaan ira ya ompatey: ta agko aromog ya ayadyari so saray gawam ed arap na Dios ko. Pakanonoten mo sirin no panoy impangawat mo tan impakadngel mo; et yatol mo, tan magbabawi ka. Kanian no agka manbantay, singa matakew laen ta ka, tan agmo naamtaan no anton oras so idagok ed sika.”—Apocalipsis 3:2, 3.

4. Panon ya ontulong iray salita nen Pedro ed kongregasyon na Sardis a ‘[mamabiskeg] ed saray bengatla a kera’?

⁴ Kaukolan a nonoten na saray mamatatken ed Sardis so gayagan walad sikara nen inmuna sanen naaralan da so katuaan tan saray bendisyon a naawat da ed saman. Balet natan et sikaray inatey no nipaakar ed espiritual a kimey. Onkukuyep so lampara da bilang kongregasyon lapud kakulangan na saray gawa na pananisia. Pigaran taon antis na saya, sinulat nen apostol Pedro so kongregasyon ed Asia (nayarin kalaktip so Sardis) pian pabiskegen so apresasyon da ed maglorian maong a balita ya inawat na saray Kristiano tan inyabawag la “panamegley na espiritu santo a nibakin nanlapu ed tawen”—unong ya inrepresenta na saray pitoran espiritu ed pasingawey nen Juan. Pinanonotan met nen Pedro iray Kristiano ed Asia a kabiangan ira ed ‘apili a kapolian, peteg ya inkasaserdote, masantos a nasyon, sakey a baley na Dios a dilin kayarian to, a mangibelyaw na karlangan na saman so angekal ed sikara ed kabilungetan, ta anawag ed sikara ed makapakelaw a silew to.’ (1 Pedro 1:12, 25; 2:9) Ontulong ed kongregasyon ed Sardis so pandalepdep ed saratan ya espiritual a katuaan pian magbabawi tan ‘ipaletneg [odino pabiskegen] da iray bengatla a kera.’—Ikompara so 2 Pedro 3:9.

5. (a) Antoy agawa ed apresasyon na saray Kristiano ed Sardis? (b) Antoy nagawa no ag-onkiwas iray Kristiano ed Sardis ed simbawa nen Jesus?

⁵ Diad kaplesan, say apresasyon da tan panangaro ra ed katuaan et singa apoy a ngalngali la naerep. Pigpigara lay ngalab ya akera. Pinaseseg ira nen Jesus a paypayan da so ngalab, padalangen lamet itan, magbabawi ed saray kasalanan da a resulta na inkamapaulyan da, tan magmaliw lamet a mabilay ed espiritual a kongregasyon. (Ikompara so 2 Timoteo 1:6, 7.) No andi, sano onsabi si Jesus—a “singa matakew”—pian ipaakseb so panangukom, et ag-akaparaan so kongregasyon ed Sardis.—Mateo 24:43, 44.

Onsabi a “Singa Matakew”

6. Panon a sinmabi si Jesus a “singa matakew” nen 1918, tan anton situasyon so asabian to ed limog na saray mankuan a papatumbok to?

⁶ Say pasakbay nen Jesus a sikatoy onsabi a “singa matakew” et onaplika anggad panaon tayo. Walaan itan na nikabiig ya aplikasyon ed saray Kristiano a makaliktar ed agew na Katawan. Agnambayag kayari na 1914, wala so kasumpalan na propesiya nen Malaquias: “Onsabi naani a bigla ed templo to; et say igaganggan na sipan, a sikato so pilalek yo, nia, onsabi, kuan nen Jehova na saray ehersito.” (Malaquias 3:1; Apocalipsis 1:10) Bilang “igaganggan [odino mensahero] na sipan,” si Jesus so sinmabi pian mangusisa tan mangukom ed saramay mankuan a papatumbok to. (1 Pedro 4:17) Diad saman a panaon, nen 1918, say Kakristianoan so pirmin akibabali ed panamaagus na dala nen Guerra Mundial I tan sigpot ya inatey ed espiritual. Anggan saray tuan Kristiano, a sanen antis na bakal et magunaet a nampulong, so dinmalan ed sakey a panaon na espiritual a pantemeg. Arum ed saray prominentin mamatatken da so impriso, tan ngalngali tinmunda so panagpulong a kimey. Sanen niliing na espiritu nen Jehova irayan Kristiano ed tinmumbok a taon, aliwan amin et akaparaan. Arum so ag-akinlongan ed espiritual parad pribilehyon panlingkor ed si Jehova, a singa saramay makulangkulang a birhen ed parabolo nen Jesus. Balet, makapaliket ta singa saramay makabat a birhen et dakel so tinmalineng ed pasakbay nen Jesus: “Manpuyat kayo sirin, ta agyo amta so agew ono oras.”—Mateo 25:1-13.

7. Akin a nakaukolan a mansiansian aliing iray Kristiano natan?

⁷ Say pankaukolan a pagmaliw ya alerto na sakey a Kristiano so ag-anampot ed gapo na agew na Katawan. Diad baleg a propesiya to nipaakar ed ‘tanda na sarayan bengatla ya asingger lan nasumpal,’ angiter si Jesus na mabiskeg a pasakbay: “Balet ed satan ya agew ono satan ya oras anggapo so makapikabat . . . Manlikas kayo, manbantay tan mikasi kayo: ta agyo amta no kapigan a panaon. Et no anto so kuan ko ed sikayo, kuan ko ed amin, Manpuyat kayo.” (Marcos 13:4, 32, 33, 37) On, anggad sayan mismon oras, balang sakey ed sikatayo, balanglan kabiangan na nakdaan odino ed baleg ya ulop, so nakaukolan a mansiansian alerto tan labanan so pakateglep ed espiritual. Sano onsabi so agew nen Jehova a “singa matakew ed labi,” komon ta naromogan itayon peteg ya aliing pian naawat tayo so paborablin panangukom.—1 Tesalonica 5:2, 3; Lucas 21:34-36; Apocalipsis 7:9.

8. Panon a say Juan a klase natan so anagyat ed totoo na Dios a mansiansian mabilay ed espiritual?

⁸ Say Juan a klase natan so aliing a mismo ed pankaukolan a pamakiwas ed saray totoo na Dios a mansiansian mabilay ed espiritual. Lapud saya, niyuuksoy iray espisyal a pantitipon ed interon dalin a maminpiga ed kada taon. Diad agano nin taon, say dagup na inmatendi ed 2,981 iran distriton kombension et 10,953,744, tan walay abautismoan a 122,701 iran balon mananisia. Diad masulok lan sanlasus taon, say Juan a klase so manguusar ed magasin a Panag-Bantayan ed pangipapalapag ed ngaran tan gagala nen Jehova. Bilang kiwas ed pirmi iran panamasegsegang legan na duaran guerra mundial, sinagyat na Say Panag-Bantayan iray Tasi nen Jehova a pasimbaloen so seseg da panamegley na impangipalapag ed saray artikulo a singa say “Maliket Iray Andiay Takot” (1919), “Imbitasyon ya Onkiwas” (1925), tan “Inkatalo na Panamasegsegang” (1942).

9. (a) Anto so nepeg ya itepet na amin a Kristiano ed inkasikara? (b) Anton panamaseseg so inter na Say Panag-Bantayan?

⁹ Singa diad Sardis, importante met ed saray Kristiano ed kongregasyon natan so pantultuloy a panangusisa ed dili. Nepeg ya itultuloy tayon amin a tepetan so inkasikatayo: Kasin ‘ayadyari iray gawa tayo’ ed arap na Dios tayo? Kasin personal tayon papaaligwasen so espiritu na dilin-panagsakripisyo tan panggugunaetan so pangisaklang na interon-kamarerwa a panaglingkor ed Dios ya aghuhusgaan so arum? Misiglaotan ed saya, say magasin a Panag-Bantayan so amaseseg diad impaningbat ed saray tema a singa say “Mantultuloy Yon Salien so Inkasikayon Dili” tan “Ag-itayo la Manbilay Parad Inkasikatayon Dili.”a Lapud sayan Makasulatan a tulong, komon ta usisaen tayoy utel na inkatoo tayo legan a panggugunaetan tayoy manakar a mapaabeba tan sipipikasi diad panmatoor ed si Jehova.—Salmo 26:1-3; 139:23, 24.

“Pigaran Ngaran”

10. Anton bengatlan makapaseseg so naimano nen Jesus ed kongregasyon ed Sardis, tan panon itayon naapektaan na saya?

¹⁰ Makapaseseg a maong iray ontumbok iran salita nen Jesus ed kongregasyon ed Sardis. Inkuanto: “Balet wala ed sika so pigaran ngaran ed Sardis ya agda dinutakan so [akinpaway a] kawekawes da: et kaulop ko ra naani a manakar ya akawesan na amputi; ta makana ra. Say manalo nakawesan naani na [akinpaway a] kawekawes ya amputi; tan agko punasen naani so ngaran to ed libro na bilay, noag ingen ipatnag ko so ngaran to ed arap nen Amak, tan ed arap na saray angheles to.” (Apocalipsis 3:4, 5) Agta sarayan salita so managyat ed sikatayo tan mamabiskeg ed determinasyon tayon manmatoor? Lapud inkamapaulyan ed biang na ulop na mamatatken, nayarin say interon kongregasyon so maitlep a makaugip ed espiritual. Ingen, arum iran indibidual ditan so nayarin makpel a manbabanikel pian napansiansian puro tan andiay matik so Kristianon pakabidbiran da diad ontan et mantultuloy iran nawalaan na maabig a ngaran ed si Jehova.—Uliran 22:1.

11, 12. (a) Anggan diad kaleganan na pirmin apostasya, panon a maseguron walaray singa saramay matoor a “pigaran ngaran” ed Sardis? (b) Anton inawa so sinmabi ed saray singa-trigon Kristiano legan na agew na Katawan?

¹¹ On, saratan ya “[akinpaway a] kawekawes” et manutukoy ed matunong a pakabidbiran ed sakey a too bilang Kristiano. (Ikompara so Apocalipsis 16:15; 19:8.) Anggaman ed kaandian na interes na karaklan, maseguron makapaligsay-puso ed si Jesus so pakanengneng a walaray “pigaran ngaran,” pigaran alanaan a Kristiano ed Sardis, ya ayarian dan apansiansia iyan pakabidbiran. Ontan met, sanen saray mankuan a Kristiano so nagmaliw a kabiangan na Babilonia a Baleg, say sankamundoan ya empiryo na palson relihyon, legan na dakel iran siglo na pirmin apostasya, maseguron lawas a walaray pigaran indibidual a nanggunaet a nanggawa ed linawa na Dios, anggaman ed dakel a kairapan. Saraya so matunong a singa trigon asakbongan na mapalet a sektaryanon sisanyas.—Apocalipsis 17:3-6; Mateo 13:24-29.

¹² Insipan nen Jesus a sikatoy wala naani ed sarayan singa-trigon Kristiano “angga ed kasampotan na mundo.” Amta to no siopa ira tan no antoran maong a ngaran so ginawa ra parad inkasikara. (Mateo 28:20; Eclesiastes 7:1) Isipen pa so gayaga na saratan a matoor a ‘pigara’ a siansia nin mabilay diad gapo na agew na Katawan! Sikaray nibiig a siansia manlapud inatey ed espiritual a Kakristianoan tan apitipon ed matunong a kongregasyon a singa say kongregasyon ed Smirna.—Mateo 13:40-43.

13. Antoran bendisyon so nitarya parad saray alanaan a Kristiano ya “agda dinutakan so [akinpaway a] kawekawes da”?

¹³ Alay abig ya ilalo so nagamoran na saramay walad Sardis a matoor ya anggad kasampotan tan agda dinutakan so Kristianon pakabidbiran da. Kayarin niletneg so Mesianikon Panarian nen Jesus nen 1914, apaoli ira ed maespiritun bilay tan bilang mananalo et sikaray akawesan na amputi ya akinpaway iran kawes bilang simbolo na andiay tilol, andiay matik ya inkatunong da. Lapud sikara so nanakar ed mainget a dalan ya ompugta ed bilay, panggayagaan da so maandon tumang.—Mateo 7:14; nengnengen met so Apocalipsis 6:9-11.

Magnayon ed Libro na Bilay!

14. Anto so “libro na bilay,” tan say kangaranan na siopa so nirekord ditan?

¹⁴ Anto so “libro na bilay,” tan say kangaranan na siopa so mansiansia ditan? Say libro, odino lukot, na bilay so manutukoy ed rekord na saray lingkor nen Jehova a walaan na ilalon mangawat na andi-anggaan a bilay. (Malaquias 3:16) Dia ed Apocalipsis, say espesipikon tinukoy et saray kangaranan na alanaan a Kristiano. Balet nirekord met ditan iray kangaranan na saramay walaan na ilalon andi-anggaan a bilay ed dalin. Sakey ni, nayarin ‘napunas’ odino nabural iray kangaranan ed satan a libro. (Exodo 32:32, 33) Anggaman kuan, saramay kabiangan na Juan a klase, a saray kangaranan da so mansiansia ed libro na bilay ya anggad ipatey da, so mangawat na imortal a bilay ed tawen. (Apocalipsis 2:10) Saraya so kangaranan ya espesipikon ipatnag odino bidbiren nen Jesus ed arap nen Ama to tan ed arap na saray anghel To. Agaylan abig itan a tumang!

15. Panon a napagmaliw na saray membro na baleg ya ulop ya agnabural a nisulat ed libro na bilay so kangaranan da?

¹⁵ Say baleg ya ulop, a saray kangaranan da so nirekord met ed libro na bilay, so makaliktar ed baleg a kairapan. Diad pangagamil na pananisia legan na interon Milenyon Uley nen Jesus tan kaleganan na unor a subok ya ontumbok, saraya so natumangan na bilay ya andi-anggaan ed Paraiso diad dalin. (Daniel 12:1; Apocalipsis 7:9, 14; 20:15; 21:4) Saray kangaranan da ed satan so mansiansia lan agnabural a nisulat ed libro na bilay. Lapud sikakabat kayo la ed no anto so impresenta dia panamegley na masanton espiritu, agta onkiwas kayo a tekep na seseg ed aminpigan panamilin nen Jesus: “Say walaan na pakadngel, denglen to so kuan na espiritu ed saray iglesia”?—Apocalipsis 3:6.

[Paimano ed leksab]

[Litrato ed pahina 57]

Komon ta say ngaran mo so mansiansia ed libro na bilay