Kapitulo 12
“Itultuloy a Bembenan a Malet so Wala ed Sika”
FILADELFIA
1. Say komanem a mensahe nen Jesus so nipaarap ed kongregasyon ed anton syudad, tan antoy kabaliksan na ngaran na satan a syudad?
INAAGIN ARO—agaylan kalkaliktan a kalidad! Seguradon sankanonot iya nen Jesus sanen impresenta to so komanem a mensahe to, a parad kongregasyon ed Filadelfia, lapud say kabaliksan na satan a ngaran et “Inaagin Aro.” Nanonotan ni na masiken lan Juan so inkagawa, masulok lan 60 a taon so apalabas, sanen amitlon danay ya impurek nen Pedro ed si Jesus a sikatoy walaan na ampetang a panangaro ed Katawan to. (Juan 21:15-17) Kasin diad biang na saray Kristiano ed Filadelfia et nipapanengneng so inaagin aro? Mapatnag ya impanengneng da!
2. Anton klase na syudad so Filadelfia, anton klase na kongregasyon so naromog ditan, tan anto so imbaga nen Jesus ed anghel ed sayan kongregasyon?
2 Say Filadelfia nen panaon nen Juan a walad ngalngali 45 kilometro ed abalaten-bukig na Sardis (diad pasen na modernon syudad na Turkey ya Alasehir), et maaligwas a syudad. Balet, say mas makatantanda et say inkaaligwas na Kristianon kongregasyon diman. Seguradon maliket iran angabrasa ed ministro a nambaroy a linma ed sikara, nayarin nanlapud Sardis! Say mensahen awit to so walaan na makapasagyat a simbawa parad sikara. Balet unona et tinukoy na satan so autoridad na samay matalonggaring ya Angipawit. Inkuanto: “Tan isulat mo ed anghel na iglesia dia ed Filadelfia: Saraya so kuan na Santo, say tua, say wala ed sikato so tombok nen David, say mangilukas, tan anggapo so makapangikapot, tan mangikapot et anggapo so makapangilukas.”—Apocalipsis 3:7.
3. Akin a matukoy a tawagen si Jesus a ‘masanto,’ tan panon a nibagan sikatoy “tua”?
3 Nadngel nen Juan si Pedro ya angibaga ed toon si Jesu-Kristo: “Wala ed sika so saray salita na maando a bilay. Et anisia kami tan amta mi a sika so Santo na Dios.” (Juan 6:68, 69) Lapud si Jehova a Dios so mismon kabaliksan na inkasanto, nepeg met a ‘masanto’ so bugbugtong ya Anak to. (Apocalipsis 4:8) Si Jesus met so “tua.” Say Griegon salitan nausar dia (a·le·thi·nosʹ) so mangisusuheri na inkapeteg. Diad sayan pantalos, si Jesus so tuan liwawa tan say tuan tinapay a nanlapud tawen. (Juan 1:9; 6:32) Sikatoy tuan sengeg na ubas. (Juan 15:1) Si Jesus so tua met diad pantalos a sikatoy napanmatalkan. Lawas ton sasalitaen so katuaan. (Nengnengen so Juan 8:14, 17, 26.) Peteg a sayan Anak na Dios so manepenepeg a manlingkor bilang Ari tan Ukom.—Apocalipsis 19:11, 16.
“Tombok nen David”
4, 5. Diad anton sipanan a misiglaotan “so tombok nen David”?
4 Wala ed si Jesus so “tombok nen David.” Diad pangusar to ed satan, sikatoy “mangilukas, tan anggapo so makapangikapot, tan mangikapot et anggapo so makapangilukas.” Anto iyan “tombok nen David”?
5 Si Arin David na Israel so akisipanan nen Jehova parad magnayon a panarian. (Salmo 89:1-4, 34-37) Say sankaabungan nen David so nanuley ed trono nen Jehova diad Jerusalem manlapud 1070 anggad 607 B.C.E., balet nipaakseb so panangukom na Dios ed saman a panarian lapud nagmaliw iman a marelmeng. Kanian inggapo nen Jehova a sumpalen so propesiya to ed Ezequiel 21:27: “Baliktaren ko, baliktaren ko, sikato [say mangaraldalin a Jerusalem] naani baliktaren ko: saya [say setro na inkaari ed linya nen David] anggapo met la naani, angga ed onsabi so akankanepegan; et sikato naani iter ko ed sikato.”
6, 7. Kapigan tan panon so ipatnag na samay walaan na legal a ‘kanepegan’?
6 Kapigan tan panon so ipatnag na sayan walaan na legal a ‘kanepegan’? Panon a niiter ed sikato so setro na panarian nen David?
7 Kalabas na ngalngalin 600 taon, sakey a kapolian nen Arin David, say Judion birhen a si Maria, so nanlukon panamegley na masanton espiritu. Imbaki na Dios si anghel Gabriel a mangipakabat ed si Maria a sikatoy nawalaan na anak a laki, a ngaranan na Jesus. Inyarum nen Gabriel: “Sikato naani baleg, et ningaran ya Anak na Sankatageyan; et iter na Dios a Katawan ed sikato so trono nen David ya ama to; et manari lawas ed abung nen Jacob; et say panarian to andi angga to.”—Lucas 1:31-33.
8. Panon a pinaneknekan nen Jesus so inkasikato a kualipikadon manawir ed Davidikon inkaari?
8 Sanen abautismoan si Jesus nen 29 C.E., diad Ilog na Jordan tan alanaan na masanton espiritu, sikatoy nagmaliw a Tinuron-Ari ed kapolian nen David. Impanengneng toy napanuliranan a seseg ed panangipulong ed maong balita na Panarian tan ingganggan to ray babangatan to a manpulong met. (Mateo 4:23; 10:7, 11) Impaabeba nen Jesus so inkasikato, ya anggad ipapatey ed panamairapan a kiew, diad ontan et pinaneknekan toy inkasikato a sigpot a kualipikadon manawir ed Davidikon inkaari. Pinaoli nen Jehova si Jesus bilang imortal ya espiritu tan intandoro to ed dilin nikawanan To diad katawenan. Diman et tinawir to so amin a kanepegan na Davidikon panarian. Nasabi panaon et agamilen nen Jesus so kanepegan to a “manuley . . . ed pegley na saray kakabusol [to].”—Salmo 110:1, 2; Filipos 2:8, 9; Hebreos 10:13, 14.
9. Panon so panguusar nen Jesus ed tombok nen David a mangilukas tan mangikapot?
9 Diad kaleganan et usaren nen Jesus so tombok nen David, a lukasan to ray pankanawnawa tan pribilehyo a misiglaotan ed Panarian na Dios. Diad panamegley nen Jesus, iliktar nen Jehova natan iray alanaan a Kristiano ed dalin “ed biskeg na kabilungetan,” a sikara so iyalis to “ed panariay Anak na aro to.” (Colosas 1:13, 14) Say tombok so nausar met pian kapotan iratan a pribilehyo ed siopaman a napaneknekan ya agmatoor. (2 Timoteo 2:12, 13) Lapud sayan permanentin mananawir ed panarian nen David et susuportaan nen Jehova, anggapo so pinalsan makayarin mangamper ed sikato diad panumpal ed saratan a kimey.—Ikompara so Mateo 28:18-20.
10. Anton panamaseseg so inter nen Jesus diad kongregasyon ed Filadelfia?
10 Peteg a nagkalautlan makaligliwa iray salita nen Jesus ed saray Kristiano ed Filadelfia lapud nanlapu itan ed ontan a walaan na autoridad! Sikaray kinomendaan to, a kuanto: “Siak amtak so saray gawam (nia, angiter ak na sakey a pinto a silulukas ed arap mo, ya anggapo so makapangikapot), ta wala so daiset a pakayarim, tan inunor mo so salitak, tan agmo imburi so ngaran ko.” (Apocalipsis 3:8) Say kongregasyon so aktibo, tan sakey a pinto odino puerta so nilukas ed satan—seguradon sakey a pankanawnawa parad serbisyo ed ministeryo. (Ikompara so 1 Corinto 16:9; 2 Corinto 2:12.) Kanian, papasesegen nen Jesus so kongregasyon a sigpot a manganamot ed pankanawnawan manpulong. Sikaray nansungdo tan impanengneng dan walaan ira na magenap a pakayari, diad tulong na espiritu na Dios, pian mantultuloy a manggawa ni na ‘saray gawa’ diad panaglingkor ed si Jehova. (2 Corinto 12:10; Zacarias 4:6) Tinulok da ray ganggan nen Jesus tan agda imburi si Kristo, balanglan diad salita odino gawa.
‘Ondakmomo Ira ed Sika’
11. Anton bendisyon so insipan nen Jesus ed saray Kristiano, tan panon iyan asumpal?
11 Kanian, isisipan nen Jesus ed sikara so pambunga: “Nia, siak iter ko ed sinagoga nen Satanas, so saray mankuan a Judios ira, et aliwa ra, ingen mantila ra; nia, siak gawaen ko ra ya ondago tan mikasi [“ondakmomo,” NW] ed arap na salisalim, et naamtaan a siak inaro ta ka.” (Apocalipsis 3:9) Singa ed Smirna, nayarin say kongregasyon so walaan na saray problema ed saray taga’d man a Judio. Tinukoy nen Jesus iraya bilang say “sinagoga nen Satanas.” Anggaman kuan, anggan panon et amoria na arum ed saraman a Judio a tua so ipupulong na saray Kristiano nipaakar ed si Jesus. Say ‘idakmomo’ ra so nayarin diad paraan a deneskribe nen Pablo ed 1 Corinto 14:24, 25, ta pian sikaray peteg a magbabawi tan magmaliw a Kristianos, a sigpot a mangaapresya ed matalonggaring ya aro nen Jesus diad impangisakripisyo to’d bilay to nisengeg ed saray babangatan to.—Juan 15:12, 13.
12. Akin a saray membro na Judion sinagoga ed Filadelfia so nayarin nikelawan ed pakaamta ya arum ed sikara so “ondakmomo” ed lokal a Kristianon komunidad?
12 Saray membro na Judion sinagoga ed Filadelfia so nayarin nikelawan ed impakaamta ya arum ed sikara so “ondakmomo” ed lokal a Kristianon komunidad. Lapud seguradon walaray dakel ya aliwan-Judio ed saman a kongregasyon, ilaloan da a nagawa so mismon kasunian. Akin? Lapud impasakbay nen Isaias: “[Saray aliwan-Judio] ya arari sikara naani so mantagibi ya atateng mo tan saray reyna mantagibi ya inam: ondakmomo ra naani ed sika [totoo na Israel] ya idunget da so lupa ra ed dalin.” (Isaias 49:23; 45:14; 60:14) Mipadpara, apuyanan si Zacarias a mangisulat: “Dia ed saraman ya agew nagawa naani a samploran lalaki [aliwan-Judio] ompeket ira naani, manlapu ed saray amin a pansasalita na saray nasyon, sikara naani ompeket ed saloy na kawes na saman so Judio, a kuan da, Sikami mila kami naani ed sikayo, ta sikami nadngelan mi a say Dios wala ed sikayo.” (Zacarias 8:23) On, saray aliwan-Judio so ondakmomo ed saray Judio, aliwan say kasunian!
13. Siopa iray Judio a makaeksperiensya ed kasumpalan na saray propesiyan parad Israel nensaman?
13 Saraman a propesiya so nipaarap ed pinilin nasyon na Dios. Sanen nibalikas iraman, say natural ya Israel so angukopa ed satan ya apagalangan a posisyon. Balet sanen impulisay na Judion nasyon so Mesias, sikaray impulisay met nen Jehova. (Mateo 15:3-9; 21:42, 43; Lucas 12:32; Juan 1:10, 11) Nen Pentecostes 33 C.E., pinili to bilang kasalat da so tuan Israel na Dios, say Kristianon kongregasyon. Saray membro na satan et saray espiritual a Judio a peteg ya agalsiman ed puso. (Gawa 2:1-4, 41, 42; Roma 2:28, 29; Galacia 6:16) Kayari na satan, say mogmon paraan a nayarin pakapawil na saray indibidual a natural a Judio ed paborablin relasyon ed si Jehova et say pangipatnag da na pananisia ed si Jesus bilang say Mesias. (Mateo 23:37-39) Mapatnag, onia so nagawa ed pigaran indibidual ed Filadelfia.a
14. Panon a say Isaias 49:23 tan Zacarias 8:23 so walaan na makabkabaliksan a kasumpalan ed modernon panaon?
14 Diad modernon panaon, saray propesiya a singa say Isaias 49:23 tan Zacarias 8:23 so walaan na makabkabaliksan a kasumpalan. Bilang resulta na panagpulong na Juan a klase, dakerakel a totoo so linmoob ed akalukas a puerta diad serbisyo ed Panarian.b Maslak ed saraya so pinmaway ed Kakristianoan, a saray relihyon da so sititilan mangibabaga a sikaray espiritual ya Israel. (Ikompara so Roma 9:6.) Saraya, bilang baleg ya ulop, so anguras ed saray kawes da tan pinaputi ra iratan diad impangagamil na pananisia ed sakripisyon dala nen Jesus. (Apocalipsis 7:9, 10, 14) Lapud katutulok ed uley na Panarian nen Kristo, maniilalo iran manawir ed saray bendisyon na satan dia ed dalin. Ondadago ira ed saray alanaan ya agagi nen Jesus tan “ondakmomo” ira ed sikara, diad espiritual a panangibaga, lapud ‘nadngelan da a say Dios so wala ed sikara.’ Manlilingkor ira ed sarayan alanaan, tan nikasakey ed sikara diad sankamundoan a panlilimog na sanaagi.—Mateo 25:34-40; 1 Pedro 5:9.
“Oras na Subok”
15. (a) Antoy insipan nen Jesus ed saray Kristiano ed Filadelfia, tan antoy akapasesegan dan gawaen? (b) Anton “balanget” so tatalaranan ya awaten na saray Kristiano?
15 Intuloy nen Jesus ya imbaga: “Lapu ed inunor mo so salita na kasungdoan ko, sika met ilaban ta ka ed oras na katukso [“subok,” NW] dia ed oras ya onla ed lapag na sansinakuban, pian salien da so saray manaayam ed dalin. Siak ondago ak a magano. Pokpokan mo [“Itultuloy a bembenan a malet,” NW] so wala ed sika, pian anggapo so mangala ed balanget mo.” (Apocalipsis 3:10, 11) Anggaman agla asabi na saray Kristiano ed panaon nen Juan so agew na Katawan (a ginmapo nen 1914), say talek da a si Jesus so onsabi so amabiskeg ed sikara pian mantultuloy a manpulong. (Apocalipsis 1:10; 2 Timoteo 4:2) Say “balanget,” odino premyon andi-anggaan a bilay, so manatalaran ed sikara diad tawen. (Santiago 1:12; Apocalipsis 11:18) No manmatoor ira anggad patey, anggapoy makasamsam ed satan a tumang ed sikara.—Apocalipsis 2:10.
16, 17. (a) Anto so ‘oras na [subok], ya onla ed lapag na sansinakuban [odino interon dalin]’? (b) Anto so kipapasen na saray alanaan diad gapo na “oras na subok”?
16 Balet, anto so “oras na subok”? Seguradon saraman a Kristiano ed Asia so nakaukolan a manalona ed nagkalalo nin pirmin panamasegsegang na empiryo na Roma.c Balet, say manunan kasumpalan et diad oras na panyakayak tan panangukom a sinmabi legan na agew na Katawan, ya amantok manlapud 1918 a manpatuloy. Say subok et pian determinaen no kasin say sakey so parad niletneg a Panarian na Dios odino parad mundo nen Satanas. Satan so antikey a panaon, sakey ya “oras,” balet ta agni asumpal. Anggad agni itan asumpal, nepeg ya agtayon balot lilingwanan a manbibilay itayo la ed “oras na subok.”—Lucas 21:34-36.
17 Nen 1918 et say Juan a klase na alanaan a Kristianos—a singa saman so mabiskeg a kongregasyon na Filadelfia—so kaukolan ya onarap ed isusumpa na modernon-agew a “sinagoga nen Satanas.” Saray relihyoson lider na Kakristianoan, a mankuan ya espiritual a Judios, so masilib ya angimaneobra ed saray manuley pian sebelan iray tuan Kristiano. Anggaman ontan, nanggunaetan na sarayan Kristiano ya ‘unoren so salita na panagsungdo nen Jesus’; kanian, lapud espiritual a tulong, salanti say makabkabaliksan a ‘daiset a pakayari,’ et akapansiansia tan asagyat iran onloob ed puerta a natan et akalukas ed arap da. Diad anton paraan?
‘Sakey ya Akalukas a Pinto’
18. Anton impanuro so ginawa nen Jesus nen 1919, tan panon a say aturo so nagmaliw a singa say matoor a mayurdumo nen Hezekias?
18 Nen 1919 et sinumpal nen Jesus so sipan to tan binidbir to so melag ya ulop na saray peteg ya alanaan a Kristiano bilang say “matoor tan makabat ya aripen” to. (Mateo 24:45-47) Saraya so linmoob ed sakey a pribilehyo a mipadpara ed saman so nanggayagaan na matoor a mayurdumon si Eliakim ed panaon nen Arin Hezekias.d Inkuan nen Jehova ed si Eliakim: “Say tombok na abung nen David nigaton ed abala [odino takeb] to; et sikato so mangilukas, tan anggapo so mangikapot; et sikato so mangikapot, tan anggapo so mangilukas.” Sinakbat nen Eliakim so ambelat iran responsabilidad parad si Hezekias, say maarin ilalak nen David. Mipadpara natan, inyan ed takeb na alanaan a Juan a klase so “tombok na abung nen David” lapud nimatalek ed satan iray mangaraldalin ya intereses na Mesianikon Panarian. Pinabiskeg nen Jehova iray lingkor to parad sayan pribilehyo, a say daiset a pakayari ra so impagmaliw ton dinamikon biskeg a magenap parad abalbaleg a sankagloboan a panagtasi.—Isaias 22:20, 22; 40:29.
19. Panon a sinakbat na Juan a klase iray responsabilidad ya inter nen Jesus ed saratan nen 1919, tan antoy resulta?
19 Manlapud 1919 a manpatuloy bilang pananumbok ed ehemplo nen Jesus, say alanaan a nakdaan so angigapo ed mabiskeg a kampanya a panangiyabawag ed maong a balita na Panarian ed lapag. (Mateo 4:17; Roma 10:18) Bilang resulta, arum ed modernon sinagoga nen Satanas, say Kakristianoan, so dinmago ed sayan alanaan a nakdaan, nagbabawi tan ‘dinmakmomo,’ a binidbir da so pakauley na aripen. Sikara met so dinmagon nanlingkor ed si Jehova a nikasakey ed saray mamasiken na Juan a klase. Saya so nantultuloy anggad atugyop so kompleton bilang na saray alanaan ya agagi nen Jesus. Kayari na saya, “sakey a baleg ya ulop . . . a nanlapu ed balang nasyon” so sinmabi pian “ondakmomo” ed alanaan ya aripen. (Apocalipsis 7:3, 4, 9) Mankaiba natan a manlilingkor so aripen tan sayan baleg ya ulop bilang sakey a pulok na saray Tasi nen Jehova.
20. Akin a nepeg a magmaliw a lalon mabiskeg ed pananisia tan aktibo ed panaglingkor ed Dios iray Tasi nen Jehova natan?
20 Bilang nankakasakey a singa saray Kristiano ed Filadelfia ed sakey a bedber na puron inaagin aroan, aapresyaen natan na saray Tasi nen Jehova so panagpulong a kimey da a nepeg a nagawa tekep na inkaganatan. Magano lan ileksab na baleg a kairapan so tilon ed marelmeng a mundo nen Satanas, a singa panangibaga. Diad satan a panaon, komon ta balang sakey ed sikatayo so nasabian a mabiskeg ed pananisia tan aktibo ed panaglingkor ed Dios, ta pian agnabural iray kangaranan tayo ed libro na bilay nen Jehova. (Apocalipsis 7:14) Ipapuso tayo so bilin nen Jesus ed kongregasyon diad Filadelfia ta pian nabembenan tayon malet iray pribilehyo tayo ed serbisyo tan nagamoran so tumang ya andi-anggaan a bilay.
Saray Bendisyon na Mananalo
21. Panon a saray alanaan a Kristiano natan so ‘angunor ed salita nipaakar ed panagsungdo nen Jesus,’ tan anton ilalo so manatalaran ed sikara?
21 Say Juan a klase natan so ‘angunor ed salita nipaakar ed panagsungdo nen Jesus,’ salanti, tinumbok da so ehemplo to tan nansungdo ira. (Hebreos 12:2, 3; 1 Pedro 2:21) Kanian apaseseg iran maong ed kaaruman niran salita nen Jesus ed kongregasyon diad Filadelfia: “Say manalo, sikato so gawaen ko a lusek na templo na Dios ko, tan kapiganman agla ompaway.”—Apocalipsis 3:12a.
22. (a) Anto so templo na Dios nen Jesus? (b) Panon a magmaliw iran lusek na sayan templo iray manalon alanaan a Kristiano?
22 Agaylan pribilehyo parad sakey so pagmaliw a sakey a lusek ed templo nen Jehova! Diad Jerusalem nensaman a panaon, say literal a templo so sentro na panagdayew ed si Jehova. Diad dalem na templo, say atagey a saserdote so angiyapay na dala na saray bagat ya ayayep, sakey agew ed kada taon, diad arap na mamilagron liwawa ya angirepresenta ed kiwawala nen Jehova ed “Sankasantosan a Pasen.” (Hebreos 9:1-7) Nen abautismoan si Jesus, niwala so sananey nin templo, sakey a baleg ya espiritual, singa-templon uksoyan diad panagdayew ed si Jehova. Say sankasantosan a pasen na sayan templo et diad tawen, a ditan et matukoy a pinmarungtal si Jesus ed “arap na Dios.” (Hebreos 9:24) Si Jesus so Atagey a Saserdote, tan walay saksakey lambengat a bagat a niyapay parad sigpot a pakabayar ed saray kasalanan: say nipaagus a dala na ayadyarin too a si Jesus. (Hebreos 7:26, 27; 9:25-28; 10:1-5, 12-14) Anggad mansiasiansia iran matoor, saray alanaan a Kristiano ed dalin so manserbi bilang katambayan iran saserdote ed mangaraldalin iran saban na sayan templo. (1 Pedro 2:9) Balet ta diad bektan manalo ira, onloob met ira ed satan a mangatatawen a sankasantosan a pasen tan magmaliw ya agnagiing iran seklang, singa ra lusek, na singa-templon uksoyan parad panagdayew. (Hebreos 10:19; Apocalipsis 20:6) Anggapoy posibilidad a sikaray ‘ompaway [ni ed satan] anggan kapigan.’
23. (a) Anto so ontumbok ya insipan nen Jesus ed saray alanaan a Kristiano a manalo? (b) Anto so resulta na inkisulat na ngaran nen Jehova tan say balon Jerusalem ed saray mananalon Kristiano?
23 Intuloy ya inkuan nen Jesus: “Tan isulat ko ed sikato so ngaran na Dios ko, tan say ngaran na syudad na Dios ko, say balo a Jerusalem, ya onlasor a manlapu ed tawen dia ed Dios ko, tan say ngaran ko a dili a balo.” (Apocalipsis 3:12b) On, nisulat ed sarayan mananalo so ngaran nen Jehova—say Dios da tan Dios nen Jesus. Ipapabitar na saya a si Jehova tan si Jesus so duaran nambiigan a persona tan aliwan duaran kabiangan na nankatlon Dios, odino Trinidad. (Juan 14:28; 20:17) Nepeg a natebek na amin a pinalsa a sarayan alanaan et kayarian nen Jehova. Sikaray tasi to. Nisulat met ed sikara so ngaran na balon Jerusalem, say mangatatawen a syudad ya onaakseb manlapud tawen diad pantalos ya onnatnat so mapalabon uley na satan ed amin a matoor a katooan. (Apocalipsis 21:9-14) Diad ontan et naamtaan met na amin a mangaraldalin a Kristianon karnero a sarayan alanaan a mananalo so mibabaley ed Panarian, say mangatatawen a Jerusalem.—Salmo 87:5, 6; Mateo 25:33, 34; Filipos 3:20; Hebreos 12:22.
24. Anto so irerepresenta na balon ngaran nen Jesus, tan panon a satan so nisulat ed saray matoor ya alanaan a Kristiano?
24 Kaunoran, nisulat ed saray alanaan a mananalo so balon ngaran nen Jesus. Ontutukoy iya ed balon betang nen Jesus tan saray nikadkaduman pribilehyo ya impabtang ed sikato nen Jehova. (Filipos 2:9-11; Apocalipsis 19:12) Anggapo ni so makaamta ed satan a ngaran, diad pantalos ya anggapo lay walaan na saratan ya eksperiensya odino nimatalekan na saratan a pribilehyo. Balet, sano isulat nen Jesus so ngaran to ed saray matoor ya agagi to, sikaray nawalaan na maapit a relasyon ed sikato diad satan a mangatatawen ya ayaman tan mibiang ed saray pribilehyo to. (Lucas 22:29, 30) Agpankelawan a sinampotan nen Jesus so mensahe to ed saratan ya alanaan diad impangulit to ed bilin: “Say walaan na pakadngel, dengelen to so kuan na espiritu ed saray iglesia.”—Apocalipsis 3:13.
25. Panon a niyaplika na kada indibidual a Kristiano natan so prinsipyo a naromog ed simbawa nen Jesus ed kongregasyon diad Filadelfia?
25 Agaylan makapaseseg itan a mensahe parad saray matoor a Kristiano ed Filadelfia! Tan peteg a walaan itan na mabiskeg a leksion parad Juan a klase natan, legan na agew na Katawan. Balet saray prinsipyo na satan so importante ed balang indibidual a Kristiano, balanglan kabiangan na nakdaan odino arum a karnero. (Juan 10:16) Maabig no balang sakey ed sikatayo et mantultuloy a mamawala na saray bunga na Panarian a singa ginawa na saraman a Kristiano ed Filadelfia. Anggan panon et amin tayo so walaan na daiset a pakayari. Amin tayo so makapanggawa na bengatla diad panaglingkor ed si Jehova. Usaren tayo sirin itan a pakayari! No nipaakar ed apadaak iran pribilehyo na Panarian, komon ta alerto itayon onloob ed anggan dinan a pankanawnawa ya akalukas ed sikatayo. Nipikasi tayo ni ingen ed si Jehova a lukasan to so ontan a puerta. (Colosas 4:2, 3) Legan a tutumboken tayo so padron na panagsungdo nen Jesus tan manmamatoor ed ngaran to, ipanengneng tayo a sikatayo met so walaan na layag ya ondengel ed ibabaga na masanton espiritu na Dios ed saray kongregasyon.
[Saray paimano ed leksab]
a Nen panaon nen Pablo, si Sostenes, say manangidaulon opisyal na Judion sinagoga ed Corinto, so nagmaliw a Kristiano.—Gawa 18:17; 1 Corinto 1:1.
b Say magasin a Panag-Bantayan, ya ipapalapag na Juan a klase, so mantutultuloy a mangipapabitar ed inkaganatan na panganamot ed sayan pankanawnawa tan sigpot a mibiang anggad posible ed panagpulong a kimey; alimbawa, nengnengen iray artikulon “Iyabawag Komon na Amin so Gloria nen Jehova” tan ‘Dia ed Amin a Dalin Pinmaway so Tanol Da’ ed Enero 1, 2004, ya isyu na Say Panag-Bantayan. Indanet ed Hunyo 1, 2004, ya isyu, ed artikulon “Nabendisyonan Iramay Mangiglogloria ed Dios,” so iloob ed ‘akalukas a pinto’ ed sigpot-panaon a serbisyo. Wala so pantok a 1,093,552 iran payunir a manrereport ed satan a serbisyo legan na sakey a bulan nen 2005.
c Onia so report na Cyclopedia nen McClintock tan Strong (Tomo X, pahina 519): “Impilit ya impaimano so Inkakristiano ed saray emperador panamegley na impanggugulo na totoo ya inggaulo na saray paganon papari, ya atalagnaw diad impakaimaton ed makatantandan inyaligwas na satan a pananisia, tan bilang resulta et apaskar si Trajan [98-117 C.E.] a mangipaakseb na saray ganggan a kalkalnan manebel ed balon bangat a nanggawa ed saray totoo a manggula ed saray dirios. Say administrasyon nen mas ugaw a Pliny bilang gobernador na Bithynia [a walad ketegan na Romanon probinsya na Asia ed amianen] so awetwet ed saray pamaakaran na maples ya ilalaknab na Inkakristiano tan say insanok na populasyon a pagano ed loob na probinsya to.”
d Say ngaran a Hezekias et kabaliksan toy “Si Jehova so Mamabiskeg.” Nengnengen so 2 Arari 16:20, paimano’d-leksab, New World Translation Reference Bible.
[Kahon ed pahina 63]
Panulong ed Dakel ya Ondakmomo
Diad 144,000 ya alanaan a manawir ed mangatatawen a Panarian, ompatnag a say nakdaan, say Juan a Klase, a kulang lan 9,000 so kaukolan nin mangompleto ed kurang na bilay da ed dalin. Kabansag na satan et, dinmakel so baleg ya ulop ed masulok lan 6,600,000. (Apocalipsis 7:4, 9) Anto so akatulong ed inkagawa na sayan abalbaleg ya indaak? Saray nanduruman eskuelaan ya ipapakurang na saray Tasi nen Jehova so akatulong na baleg. Sarayan eskuelaan na Tasi so mangipapaslep na aralem a pananisia ed Salita na Dios, kanian miduma iran tuloy ed saray seminaryo na Kakristianoan a mangibabangat na saray minumundon pilosopiya tan manmumudmora ed Salita na Dios. Ipapabitar da so praktikal ya aplikasyon na satan nipaakar ed kalinisan, moral a kabibilay tan dedikadon serbisyo ed Dios. Diad sankamundoan, nanlapu la nen 1943, kada kongregasyon na saray Tasi nen Jehova so mangikokondukta na Teokratikon Eskuelaan Parad Ministeryo diad saray Kingdom Hall. Minilyon so onaatendi ed sayan eskuelaan kada simba, a manutumbok ed saksakey a programa na panangibangat ed Biblia.
Nanlapu la nen 1959 et saray Tasi nen Jehova so mangikokondukta met na Kingdom Ministry Schools pian ipasal iray mamatatken tan ministeryal a lingkor ed kongregasyon. Tan nanlapu la nen 1977, say Pioneer Service Schools so akapangipasal la na nilasus nilibo iran agagin lalaki tan bibii, a sigpot-panaon a manlilingkor ed si Jehova ed panagpulong a kimey, a walaan na tuan espiritu na Filadelpia. Nen 1987 inggapo so Ministerial Training School pian ipasal iray lalaki a Tasi parad espisyal ya asainmin ed sankamundoan a lawak.
Say matalonggaring ed saray eskuelaan ya ipapakurang na saray Tasi nen Jehova et say Watchtower Bible School of Gilead. Nanlapu la nen 1943 et sayan eskuelaan parad panagmisionaryo, a naromog ed Estado na New York, so makapanpapagraduar na duaran grupo na saray estudyante ed kada taon lawari. Diad ami-amin, akapangipasal la itan na masulok a 7,000 a ministro nen Jehova parad panagmisionaryo. Saray nangraduar ed sayan eskuelaan so akapanlingkor la ed masulok lan sanlasus a bansa, a diad dakel ed saratan a bansa et sikaray instrumento ed inkalukasan na kimey na Panarian. Kayari na manga 60 taon, arum ed inmuna iran misionaryo so siansia nin manusumpal ed kimey da, a kaiba na saray balo iran misionaryo diad panangilaknab na organisasyon nen Jehova ed sankagloboan. Agaylan makapakelkelaw iyan inlaknab!
[Tsart ed pahina 64]
Nen 1919 say manuuley lan Ari a si Jesus so angilukas na puerta na pankanawnawa parad Kristianon serbisyo. Inanamot itan a pankanawnawa na ondaraak a bilang na saray debosyonadon Kristiano.
Daldalin Saray Kristiano Sigpot
ya Asabi na ya Akibiang ed Panaon Iran
1918 14 3,868 591
1928 32 23,988 1,883
1938 52 47,143 4,112
1948 96 230,532 8,994
1958 175 717,088 23,772
1968 200 1,155,826 63,871
1978 205 2,086,698 115,389
1988 212 3,430,926 455,561
1998 233 5,544,059 698,781
2005 235 6,390,022 843,234
[Saray paimano ed leksab]
e Saray walad tagey a bilang et binulan a promedyo.
f Saray walad tagey a bilang et binulan a promedyo.
[Tsart ed pahina 65]
Impapuso so kimey na saray Tasi nen Jehova. Alimbawa, imanoen so oras ya inusar da ed panagpulong tan panagbangat tan say baleg a bilang na libren panangiyaral ed Biblia ya inkondukta ra ed kaabungan na totoo.
Oras a Nausar Saray Panangiyaral
ed Panagpulong ed Biblia a
Taon (Tinaon a Dagup) Nikokondukta
(Binulan a Promedyo)
1918 19,116 Agnirekord
1928 2,866,164 Agnirekord
1938 10,572,086 Agnirekord
1948 49,832,205 130,281
1958 110,390,944 508,320
1968 208,666,762 977,503
1978 307,272,262 1,257,084
1988 785,521,697 3,237,160
1998 1,186,666,708 4,302,852
2005 1,278,235,504 6,061,534
[Litrato ed pahina 59]
Sakey a Romanon tombok nen inmunan siglo