Kapitulo 15

‘Siopa so Manepeg a Mamuskag ed Lukot?’

1. Anto so nagagawa natan ed pasingawey nen Juan?

ALAY ABIG! MAKAPADINAYEW! Ontan so makapainteres a pasingawey nipaakar ed trono nen Jehova diad kawalaan na satan ed pegley na saray lampara na apoy, saray kerubin, saray 24 a mamasiken, tan say dayat a singa salming. Balet Juan, anto so ontumbok ya anengneng mo? Inteen nen Juan so imano to ed mismon sentro na sayan mangatatawen ya eksena, ya ibabaga to ed sikatayo: “Tan anengneng ko ed lima a kawanan na manyurong ed tapew na trono so sakey a libro a sinulatan ed dalem tan paway, ya alukot na malet tan atatakan na pitora a selyo. Tan anengneng ko so sakey a mabiskeg ya anghel a manpupulong ed baleg a boses, Siopa so manepeg a mamuskag na libro [odino lukot], tan mangekal na selyo to ra? Tan anggapo so makayari anggan dia ed tawen, anggan dia ed dalin, anggan dia ed dalem na dalin, a mamuskag ed libro, anggan onnengneng. Tan siak nannangis ak a maong, ta anggapo so aromog a manepeg a mamuskag ed libro, anggan onnengneng ed sikato.”​—Apocalipsis 5:1-4.

2, 3. (a) Akin a pirawrawat nen Juan a wala komoy naromog a manlukas ed lukot, balet anto so ompatnag a posibilidad na satan? (b) Anto so magunaet ya aalagaren na saray alanaan a totoo na Dios ed panaon tayo?

² Si Jehova a mismo, say Soberanon Katawan na amin a palsa, so mangeegna ed satan a lukot. Seguradon napno itan na saray makanan impormasyon, lapud nantupag ya asulatan. Nasasagyat la so inkamausisa tayo. Anto kasi so lugan na lukot? Nanonotan tayo so imbitasyon nen Jehova ed si Juan: “Segep ka dia, tan ipanengneng ko ed sika so saray bengatlan nakaukolan a nagawa ed kayari na saraya.” (Apocalipsis 4:1) Tatalaranan tayo, tekep na pantamitam so pakaaral ed saratan a bengatla. Balet ta agay met la, say lukot so sinaraan a malet, ya aselyoan na pitora!

³ Kasin walay naromog na mabiskeg ya anghel a manepeg a mamuskag ed lukot? Unong ed Kingdom Interlinear, say lukot so walad “tapew na kawanan a lima” nen Jehova. Isusuheri na saya ya idederew to itan panamegley na lukas a dakulap to. Balet ompatnag ya anggapo ed tawen odino diad dalin so manepeg a mangawat tan manlukas ed satan a lukot. Anggapo, anggan diad dalem na dalin, diad limog na saray matoor ya ariripen na Dios ya inatey la, so kualipikado parad sayan atagey a galang. Agpankelawan a si Juan so mapatpatnag ya agonigon! Anganko ta agto met lanlamang manaya naaralan ‘iray bengatlan nakaukolan a nagawa.’ Diad panaon tayo met, sigugunaet ya aalagaren na saray alanaan a totoo na Dios so pangipasabi nen Jehova ed liwawa tan katuaan to nipaakar ed Apocalipsis. Saya so progresibon gawaen to ed aturon panaon parad kasumpalan na propesiya, ta pian niwanwan so totoo to diad dalan na “engranden kilalaban.”​—Salmo 43:3, 5, NW.

Say Manepeg

4. (a) Siopa so aromog a manepeg a mamuskag ed lukot tan ed saray selyo na satan? (b) Anton tumang tan pribilehyo so pibibiangan natan na Juan a klase tan saray kakaiba ra?

⁴ On, wala so makapangibuskag ed lukot! Insalaysay nen Juan: “Tan sakey ed saray mamasiken kuan to ed siak, Agka onnangis: nia so Leon ed poli nen Juda, say Lamot nen David, ya analo, pian buskagen to so libro tan ekalen to so pitora a selyo to.” (Apocalipsis 5:5) Kanian Juan, punas mo laray luam! Say Juan a klase tan saray matoor a kakaiba ra natan et nansungdo met ed pigaran dekada na pirmi iran subok legan ya aalagden dan siaanos so pakaliwawaan. Agaylan makaligliwan tumang so walad sikatayo natan diad impakatalos ed pasingawey, tan agaylan pribilehyo so pakapibiang ed kasumpalan na satan diad pangiyabawag ed mensahe na satan ed arum!

5. (a) Anton propesiya so nibalikas nipaakar ed si Juda, tan iner so nanuleyan na saray kapolian nen Juda? (b) Siopa so Siloh?

⁵ Ah, say “Leon ed poli nen Juda”! Si Juan so mikabisado ed propesiya ya inyabawag nen Jacob, a nanlapuan na Judion rasa, nipaakar ed komapat ya ilalak to, si Juda: “Si Juda sikato so sakey a kilaw na leon; nanlapu ed tapang ana’ko nipatatdang ka. Sikato dinmomorom, dinmukol a singa leon. Tan singa sakey a kabatyan a leon; siopa so nanliing ed sikato? Say setro ag-ontaynan ed Juda naani, nisay tayukor na mananguley agnaekal ed leet na saray salisali to, angga ed isabi nen Siloh; tan dia ed sikato wala naani katutulok na saray katooan.” (Genesis 49:9, 10) Say maarin linya na totoo na Dios et nanlapud Juda. Onggapo ed si David, amin na saray ararin nanuley ed Jerusalem anggad samay impaneral na saray taga-Babilonia ed satan a syudad et kapolian nen Juda. Balet anggapo ed sikara imay Siloh ya impropesiya nen Jacob. Say Siloh et mankabaliksan na “Sikato ya [Akankanepegan] ed Satan.” Diad mapropetikon paraan, sayan ngaran so manutukoy ed si Jesus, samay permanente la natan ya akankayarian ed Davidikon Panarian.​—Ezequiel 21:25-27; Lucas 1:32, 33; Apocalipsis 19:16.

6. Diad anton dalan a si Jesus et namparan “simit” nen Jesse tan “lamot nen David”?

⁶ Naimano a tampol nen Juan so impanukoy ed “lamot nen David.” Say insipan a Mesias so mapropetikon atawag a “simit a manlapu ed sengeg nen Isai [odino Jesse ya ama nen Arin David] . . . say sanga” tan “say lamot nen Jesse, ya akaalagey a nipaakar a tanda na saray baley.” (Isaias 11:1, 10) Si Jesus et simit nen Jesse, lapud sikatoy inyanak ed maarin linya nen David, ya ilalak nen Jesse. Sakey ni, bilang lamot nen Jesse, sikato imay amasimit lamet ed Davidikon dinastiya, a mangiiter na bilay tan sustento ed satan ed ando lan ando.​—2 Samuel 7:16.

7. Anto so nanggawa ed si Jesus a manepeg a mangala ed lukot manlapud lima na samay akayurong ed trono?

⁷ Si Jesus, bilang ayadyarin too, so sankatalonggaringan a nanlingkor ed si Jehova ed katooran tan diad makapaot-ot iran subok. Inter to so nagnap ya ebat ed angat nen Satanas. (Uliran 27:11) Kanian, nayarian ton ibaga so singa imbaga to ed samay labi antis na masakripisyon impatey to, “tinalok so mundo.” (Juan 16:33) Nisengeg ed saya, inmatalek nen Jehova ed sayan apaolin Jesus so “amin a pakauley . . . ed tawen tan dia ed dalin.” Diad amin a lingkor na Dios et sikato lambengat so kualipikadon mangawat ed lukot, diad gagalan ipakabat to so importantin mensahe na satan.​—Mateo 28:18.

8. (a) No nipaakar ed Panarian, anto so mangipanengneng ed inkamanepeg nen Jesus? (b) Akin a matukoy a sakey ed saray 24 a mamasiken so mangiparungtal ed si Juan no siopa so manepeg a mamuskag ed lukot?

⁸ Talagan matukotukoy a si Jesus so nepeg a mamuskag ed lukot. Nanlapula’d 1914 et sikatoy nitrono bilang Ari ed Mesianikon Panarian na Dios, tan dakerakel so ipaparungtal na satan a lukot nipaakar ed Panarian tan no antoy gawaen na satan. Sitotoor si Jesus a nantasi ed katuaan na Panarian legan a wadia ed dalin. (Juan 18:36, 37) Imbangat to ray papatumbok to a mangipikasi ed isabi na Panarian. (Mateo 6:9, 10) Inggapo to so panangipulong ed maong a balita na Panarian diad kagapo na Kristianon panaon tan impropesiya to so kapantokan na satan a kimey a panagpulong legan na panaon na anggaan. (Mateo 4:23; Marcos 13:10) Matukoy met a sakey ed saray 24 a mamasiken so nepeg a mangiparungtal ed si Juan a si Jesus imay mangekal ed saray selyo. Akin? Lapud sarayan mamasiken so akayurong ed saray trono tan akoronaan, unong a sikara so kaiban mananawir nen Kristo ed Panarian to.​—Roma 8:17; Apocalipsis 4:4.

‘Say Kordero a Pinatey’

9. Imbes a sakey a leon, anto so anengneng nen Juan a manal-alagey “ed pegley na trono,” tan panon so impaneskribe to ed satan?

⁹ Si Juan so ninmengneng pian nanengneng iyan “Leon ed poli nen Juda.” Balet agaylan makapabigla! Sigpot a nikadkaduman simbolikon itsura so pinmatnag: “Tan anengneng ko, a dia ed pegley na trono tan saray apatira a mabilay ya ayep, tan dia ed pegley na saray mamasiken, so sakey a Kordero a manal-alagey a singa pinatey a wala so pitora a saklor to, tan pitora a mata to, a sikara so pitora ya espiritu na Dios, a nibaki ed lapag na dalin.”​—Apocalipsis 5:6.

10. Siopa so “kordero” ya anengneng nen Juan, tan akin a matukotukoy itan a termino?

¹⁰ Diad mismon sentro, diad asingger ed trono, a sigpot ya apaliberan na apatiran mabilay ya ayep odino pinalsa tan 24 a mamasiken, wala so sakey a kordero! Seguradon insiglaot a tampol nen Juan iyan kordero ed “Leon ed poli nen Juda” tan ed “say lamot nen David.” Kabat to a masulok lan 60 taon ed asasakbay, si Juan a Managbautismo so angiparungtal ed si Jesus ed imaton na saray Judios bilang “Korderoy Dios, a mangekal na kasalanay mundo!” (Juan 1:29) Legay bilay to ed dalin, si Jesus so nansiansian ag-amatikan na mundo​—singa sakey ya andiay matik a kordero—​ta pian nayarian ton iyapay so andiay tilol a bilay to bilang bagat a parad katooan.​—1 Corinto 5:7; Hebreos 7:26.

11. Akin ya aliwan agpanangigalang so pangirepresenta ed niglorian Jesus bilang “sakey a Kordero a manal-alagey a singa pinatey”?

¹¹ Kasin singa panagmelmelag odino agpanangigalang so pangirepresenta ed niglorian Jesus bilang “sakey a Kordero a manal-alagey a singa pinatey”? Andin balot! Say katuaan a si Jesus so nansiansian matoor anggad patey et sakey a baleg ya inkatalo parad si Satanas tan sakey a baleg ya impanalo parad si Jehova a Dios. Say impangirepresenta ed si Jesus ed onian paraan so mabitar a mangililitrato ed impanalo to ed mundo nen Satanas tan sakey a panonot ed aralem a panangaro nen Jehova tan si Jesus parad katooan. (Juan 3:16; 15:13; ikompara so Colosas 2:15.) Kanian si Jesus so atukoy bilang insipan a Bini, a matalonggaring a kualipikadon mamuskag ed lukot.​—Genesis 3:15.

12. Anto so ililitrato na pitoran saklor na Kordero?

¹² Anto ni so mamaaralem na apresasyon tayo ed sayan “kordero”? Sikatoy walaan na pitoran saklor. Diad Biblia, say saklor so mabetbet a simbolo na pakapanyari odino autoridad, tan say pitora so mangipapatnag na inkagnap. (Ikompara so 1 Samuel 2:1, 10; Salmo 112:9; 148:14.) Kanian, say pitoran saklor na Kordero so mangirerepresenta ed inkagnap na pakapanyari ya inmatalek nen Jehova ed si Jesus. Sikato so “sankatageyan nen say amin ya uley, tan manuley, tan pakayari, tan nanarian, tan dia ed amin a ngaran ya abitla, aliwa labat ed sayan mundo, noag dia met ed onsabi ni.” (Efeso 1:20-23; 1 Pedro 3:22) Si Jesus so nagkalautlan angagamil na pakapanyari, pakapanyari ed pananguley, nanlapula’d 1914 sanen sikatoy introno nen Jehova bilang mangatatawen ya Ari.​—Salmo 2:6.

13. (a) Anto so ililitrato na saray pitoran mata na Kordero? (b) Anto so ginawa na Kordero?

¹³ Sakey ni, si Jesus so sigpot a napno na masanton espiritu, a singa inlitrato na pitoran mata na Kordero, a mankabaliksan na “pitora ya espiritu na Dios.” Si Jesus so sakey a paralanan a diad panamegley to et say aktibon puersa nen Jehova so sigpot ya onaagus ed saray lingkor To ed dalin. (Tito 3:6) Mapatnag, diad panamegley na saya lanlamang ya espiritu et nanenengneng to manlapud tawen no antoy nagagawa dia ed dalin. Singa si Ama to, si Jesus so walaan na naspot a pakatebek. Anggapo so makalegyas ed imano to. (Ikompara so Salmo 11:4; Zacarias 4:10.) Malinlinew, sayan Anak​—say manamasiansia na katooran ya anaeg ed mundo; say Leon ed tribu nen Juda; say lamot nen David; say sakey ya angiyapay na bilay to parad katooan; say sakey a walaan na nagnap ya autoridad, napno na masanton espiritu, tan ayadyarin pakatebek manlapud si Jehova a Dios—​on, sayan sakey so matalonggaring a manepeg a mangala ed lukot manlapud lima nen Jehova. Kasin sikatoy nanduaruwa a mangawat ed sayan nipabtang a serbisyo ed matalonggaring ya organisasyon nen Jehova? Andi! Imbes, “sikato so dinmago, tan inala to man so [odino lukot] libro ed lima a kawanan na manyurong ed trono.” (Apocalipsis 5:7) Agaylan maabig ya ehemplo na mabulos a katutulok!

Saray Kanta na Panagdayew

14. (a) Antoy reaksion na apatiran mabilay a pinalsa tan saray 24 a mamasiken diad impangala nen Jesus ed lukot? (b) Panon a say impormasyon ya inawat nen Juan nipaakar ed saray 24 a mamasiken so mamekder ed pakabidbiran tan posisyon da?

¹⁴ Antoy reaksion na saray arum a walad arap na trono nen Jehova? “Tan sanen nala to so libro, saray apatira a mabilay ya ayep, tan saray duamplo tan apat a mamasiken dinmunget ira ed arap na Kordero, a balang sakey wala so arpa to, tan kopa ra a balitok a napno ra na insenso, a sikara so pikakasi na saray sasantos.” (Apocalipsis 5:8) Singa saray apatiran kerubin a mabilay a pinalsa ed arap na trono na Dios, saray 24 a mamasiken so ondadakmomo ed si Jesus bilang panamidbir ed autoridad to. Balet sarayan mamasiken labat so walaan na saray arpa tan saray kopa odino yaong na insenso.a Tan sikara lambengat so mankakanta natan na sakey a balon kanta. (Apocalipsis 5:9) Sirin kapadpara ra so 144,000 a santo na “Israel na Dios,” ya akaawit met na saray arpa tan mangakanta na sakey a balon kanta. (Galacia 6:16; Colosas 1:12; Apocalipsis 7:3-8; 14:1-4) Sakey ni, saray 24 a mamasiken so nipanengneng a manumpal na kimey na saserdote diad tawen, ya inlitrato na saramay saserdote ed kadaanan ya Israel a nampasob na insenso parad si Jehova diad tabernakulo​—sakey a kimey ya anampot ed dalin sanen inekal na Dios so Mosaikon Ganggan, diad impangipasak to ed satan ed panamairapan a kiew nen Jesus. (Colosas 2:14) Anton konklusyon so naala tayo ed amin na saya? Dia et anengneng iray alanaan a mananalo ed ultimon kimey da bilang ‘saserdote na Dios tan nen Kristo, a miaari ed sikato ed sanlibon taon.’​—Apocalipsis 20:6.

15. (a) Diad Israel, siopa lambengat so apribilehyoan ya onloob ed Sankasantosan na tabernakulo? (b) Akin a sakey a pamaakaran a mankabaliksay bilay odino patey parad atagey a saserdote so pampasob na insenso antis ya onloob ed Sankasantosan?

¹⁵ Diad kadaanan ya Israel, say aabuloyan labat ya onloob ed Sankasantosan ed arap na simbolikon kiwawala nen Jehova et say atagey a saserdote. Parad sikato, say pangawit ed insenso et pamaakaran a mankabaliksay bilay odino patey. Inkuan na ganggan nen Jehova: “Mangala [si Aaron] na sakey a panamoolan na insenso a napno na ngalab ed altar ed arap nen Jehova, tan say lima to napno na ambalingit ya insenso a tinemek, tan awiten to ed loob na kurtina. Tan iyan to so insenso ed apoy diman ed arap nen Jehova, ta pian say lurem na insenso sakbongan to so yurongan na panangasi a say wala ed sipan, ta pian ag-ompatey.” (Levitico 16:12, 13) Imposible a makaloob so atagey a saserdote ed Sankasantosan likud no sikatoy manpasob na insenso.

16. (a) Diad Kristianon sistema na saray bengatla, siopa so onloob ed antitipikon Sankasantosan? (b) Akin a saray alanaan a Kristiano so nakaukolan a ‘manpool na insenso’?

¹⁶ Diad Kristianon sistema na bengabengatla et aliwa lambengat a say antitipikon Atagey a Saserdote, si Jesu-Kristo, noag ontan met ed balang sakey ed 144,000 a katambayan a saserdote so diad kaunoran et makaloob ed antitipikon Sankasantosan, say pasen a kawalaan nen Jehova ed tawen. (Hebreos 10:19-23) Imposible ed sarayan saserdote, ya irerepresenta dia na 24 a mamasiken, so iloob ed sayan Sankasantosan, likud no sikara so ‘manpool na insenso,’ salanti, naynay a mangiyapay na saray pikakasi tan pikekerew ed si Jehova.​—Hebreos 5:7; Judas 20, 21; ikompara so Salmo 141:2.

Sakey a Balon Kanta

17. (a) Anton balon kanta so kakantaen na 24 a mamasiken? (b) Panon so kaslakan a panguusar na Biblia ed balikas a “balon kanta”?

¹⁷ Sakey a maabig a kanta so narerengel natan. Satan so kakantaen parad Kordero na saray saserdoten kakaiba to, saray 24 a mamasiken: “Tan mankankanta’ra na sakey a balon kanta a kuanda, Manepeg ka a mangala ed libro, tan mangekal ed saray selyo to ra: ta sika pinatey ka tan sinaliw mo ya inggana ed Dios, lapu ed dalam, so totoo ed balang kailalakan, tan salita tan baley tan nasyon.” (Apocalipsis 5:9) Say balikas a “balon kanta” so nausar ed pigaran danay diad Biblia tan mabetbet a manutukoy ed panangidayew ed si Jehova lapud makapanyarin panangiliktar to. (Salmo 96:1; 98:1; 144:9) Sirin, say kanta so balo lapud say managkanta so makapangiyabawag natan na kaaruman iran makapakelaw a gawa nen Jehova tan makapangibalikas na apasimbalon apresasyon ed maglorian ngaran To.

18. Idadayew na 24 a mamasiken si Jesus ed balon kanta ra lapud anto?

¹⁸ Balet, dia et saray 24 a mamasiken so mangakanta na sakey a balon kanta ed si Jesus imbes a diad si Jehova. Ingen say prinsipyo so pareho. Idadayew da si Jesus nisesengeg ed saray balon bengatla a ginawa to, bilang Anak na Dios, nisengeg ed sikara. Diad panamegley na dala to, sikatoy kinmanan manamegley parad balon sipanan sirin et ginawa ton posible so pamawala na sakey a balon nasyon bilang espisyal a kayarian nen Jehova. (Roma 2:28, 29; 1 Corinto 11:25; Hebreos 7:18-25) Saray membro na sayan balon espiritual a nasyon so nanlapud dakel iran silalaman a nasyon, balet sikara so impankakasakey nen Jesus ed sakey a kongregasyon bilang sakey a nasyon.​—Isaias 26:2; 1 Pedro 2:9, 10.

19. (a) Anton bendisyon so ag-atawayan na natural ya Israel nisesengeg ed agda impanmatoor? (b) Anton bendisyon so napanggayagaan na balon nasyon nen Jehova?

¹⁹ Sanen tinugyop nen Jehova iray Israelita pian pagmaliwen iran sakey a nasyon diad panaon nen Moises, sikatoy nanggawa na sakey a sipanan ed sikara tan insipan to a no mansiansia iran matoor ed satan a sipanan, magmaliw iran sakey a panarian na saray saserdote ed arap to. (Exodo 19:5, 6) Saray Israelita so aliwan matoor tan agdan balot atawayan so inkasumpal na saman a sipan. Diad biek a dapag, nansiansian matoor so balon nasyon, ya atugyop lapu ed balon sipanan a si Jesus so manamegley. Saray membro na satan sirin so makapanuley ed dalin bilang arari tan ontan met a manserbi bilang saserdote, ya ontulong ed maptek-impanpuso iran indibidual ed limog na katooan a mipulangan ed si Jehova. (Colosas 1:20) Ontan a mismo so imbalikas na balon kanta: “Tan ginawam ira a panarian tan saserdote nipaakar ed Dios mi; et manari ra ed tapew na dalin.” (Apocalipsis 5:10) Agaylay gayaga na saray 24 a mamasiken diad pangakanta ed sayan balon kanta na panagdayew ed niglorian Jesus!

Sakey a Mangatatawen a Koro

20. Anton kanta na panagdayew ed Kordero so nipapaknol natan?

²⁰ Panon so inkiwas na arum ed abalbaleg a mangatatawen ya ulop na organisasyon nen Jehova ed sayan balon kanta? Si Juan so aliketan a makanengneng ed impapuson pantutunosan da: “Tan ninmengneng ak, tan nadngel ko so boses na dakel ya angheles ed kaliberliber na trono tan saray mabilay ya ayayep, tan saray mamasiken; tan say bilang da samplon libo a samplon libo tan libolibo na libolibo. A kuan da ed baleg a boses, Say Kordero a pinatey la sikato so manepeg a mangala ed pakayari, tan kayamanan, tan kakabatan, tan kabiskegan, tan dayew, tan gloria, tan say bendisyon.” (Apocalipsis 5:11, 12) Agaylan makapadinayew a kanta na panagdayew!

21. Kasin nababawasan na pangidadayew ed Kordero so inkasoberano odino posisyon nen Jehova? Ipaliwawa.

²¹ Kasin kabaliksan na saya a natan et sinandian la nen Jesus si Jehova a Dios tan say amin a pinalsa so mandadayew la ed sikato imbes a diad Ama to? Arawin ontan! Imbes, sayan kanta na panagdayew so mitukoyan ed samay insulat nen apostol Pablo: “Kanian say Dios met sankatageyan so impangidayew to ed sikato [Jesus], tan inter to ed sikato so ngaran ya analonggaring ed ami-amin a ngaran; a dia ed ngaran a Jesus so talimukoran na amin a pueg, na saray wala ed tawen, tan wala ed dalin tan wala ed dalem na dalin, tan pian ganagana a dila nepeg da a patuaen a si Jesu-Kristo sikato so Katawan, a kidayewan na Dios Ama.” (Filipos 2:9-11) Si Jesus so nitandoro dia lapud betang to ed impanolbar ed manunan isyu diad imaton na amin a pinalsa​—say panangalangon ed makanepegan ya inkasoberano nen Jehova. Peteg, agaylan gloria so intarok na saya ed Ama to!

Makmaksil a Kanta

22. Diad anton kanta so akikasakeyan na saray boses manlapud mangaraldalin ya ayaman?

²² Diad eksenan deneskribe nen Juan, say abalbaleg ya ulop ed tawen so mangisasaklang na kanta na panangitandoro ed si Jesus bilang panamidbir ed katooran tan mangatatawen ya autoridad to. Diad saya, sikaray akikasakeyan na saray boses manlapud mangaraldalin ya ayaman lapud saraya so mibibiang met ed panangidayew ed Ama tan say Anak. No panon a saray agawaan na sakey ya anak a too et makapangitarok na baleg a kagalangan ed saray atateng to, ontan met a say matoor a kurang nen Jesus so niyabawag ed limog na amin a palsa diad “kidayewan na Dios Ama.” Kanian, intuloy nen Juan ya imbalita: “Tan amin a bengatla a pinalsa a wala ed tawen, tan dia ed dalin, tan dia ed leksab na dalin, tan wala ra ed dayat, tan lapag na bengatla a wadman, nadngel ko a kuanda, Diad samay manyurong ed trono, bendisyon, tan dayew, tan gloria, tan pakayari tan diad Kordero dia ed ando lan ando.”​—Apocalipsis 5:13.

23, 24. (a) Anto so pakapatnagan no kapigan so igapo na kanta ed tawen, tan no kapigan ed dalin? (b) Panon a say kanta so onkakasil legan ya onlalabas iray taon?

²³ Kapigan so inkipaknol na sayan sankarakpan a kanta? Ginmapo itan diad gapo na agew na Katawan. Kayari na inkibasileng nen Satanas tan saray demonyo to manlapud katawenan, “amin a bengatla a pinalsa a wala ed tawen” so akapikasakey la ed sayan kanta na panagdayew. Tan, singa ipapanengneng na rekord, nanlapula’d 1919 et sakey ya ombabaleg ya ulop ed dalin so angikasakey ed boses da diad panangidayew ed si Jehova, ya ondaraak ira manlapud pigara labat a libo ya anggad masulok ya anemiran milyon ed taon 2005.b Kayari kaderal na mangaraldalin a sistema nen Satanas, “amin a bengatla a pinalsa . . . ed dalin” so mangikanta na saray dayew ed si Jehova tan ed Anak to. Diad aturon panaon nen Jehova, say kioli na saray agnabilang a minilyon ya inaatey so onggapo, tan insan “amin a bengatlan pinalsa . . . ed leksab na dalin” a walad pakanodnonotan na Dios so nawalaan na pankanawnawan mibiang diad pankanta ed kanta.

²⁴ “Manlapu ed sampot na dalin . . . ed dayat, tan . . . saray pulpulo,” minilyon a totoo so mankakanta la na balon kanta diad pililimog ed sankagloboan ya organisasyon nen Jehova. (Isaias 42:10; Salmo 150:1-6) Sayan magayagan panangidayew so makasabi ed pantok to diad sampot na Milenyo, sano say katooan so makarateng la ed inkayadyari. Insan saman a daan ya uleg, say manunan managpalikdo, si Satanas a mismo, so naderal la’d satan bilang sigpot a kasumpalan na Genesis 3:15, tan diad mananalon kapantokan, amin a mabilay a pinalsa, espiritu man odino too, so manbabansag a mangikanta: “Diad samay manyurong ed trono, bendisyon, tan dayew, tan gloria, tan pakayari tan diad Kordero dia ed ando lan ando.” Anggapoy antokaman a boses ed interon talba ya onsumlang.

25. (a) Say pamasa ed salaysay nen Juan nipaakar ed sankatalbaan a kanta so mamakiwas ed sikatayon manggawa na anto? (b) Anton alay abig ya ehemplo so inletneg ed sikatayo na saray apatiran mabilay a pinalsa tan saray 24 a mamasiken legan a manasampot so pasingawey?

²⁵ Agaylan magayagan panaon itan naani! Peteg, say dedeskribien dia nen Juan so mamapaligsa ed kapusoan tayo tan manasagyat ed sikatayon mibiang ed mangatatawen ya ulop diad pankanta na saray impapuson panagdayew ed si Jehova a Dios tan si Jesu-Kristo. Agta lalon determinado itayo natan a mansungdo ed duga iran gawa? No gawaen tayo itan, nailaloan tayo a diad tulong nen Jehova, wadman itayo bilang indibidual ed maliket a kapantokan, ya iyarum tayo iray boses tayo ed satan a sankatalbaan a koro na panagdayew. Peteg, saray apatiran kerubin a mabilay a pinalsa tan saray apaolin alanaan a Kristiano so sigpot a nankakasakey, lapud say pasingawey so anampot ed saray salitan: “Tan saray apatira a mabilay ya ayep kuan da: Amen. Tan saray mamasiken dinmakmomo ra, tan inggalgalang da.”​—Apocalipsis 5:14.

26. Diad anto itayo nepeg a mangagamil na pananisia, tan anto so ipaparaan na Kordero a gawaen?

²⁶ Komon ta sika, pinabpablin manbabasa, so mangagamil na pananisia ed bagat na Kordero​—samay “manepeg”—​tan napapalar ed saray mapaabeban sagpot mo pian mandayew tan manlingkor ed si Jehova​—Samay “manyurong ed tapew na trono.” Patulongan ka komon natan ed say Juan a klase legan ya itatarya na satan so nakaukolan ya ‘[espiritual] a tagano ed kinepeg to.’ (Lucas 12:42) Balet nia! Say Kordero so manpaparaan a mangilukas ed pitoran selyo. Anto kasin makapainteres a panangiparungtal so manatalaran ed sikatayo?

[Saray paimano ed leksab]

[Interon-pahina a litrato ed pahina 86]