Anto so Naaralan na Arum Diad Pangobserba Ra ed Sika?
1. Anto so naaralan na saray disipulo nen Jesus diad impangobserba ra’d sikato?
1 Inkuan nen Jesus: “Sakbat yo so pakok tan manaral kayo ed siak.” (Mat. 11:29) Malinew a sikatoy nambangat aliwan diad salita labat, noagta diad impangiletneg toy maabig ya alimbawa. Isipen pa no panon ya akaaral iray disipulo diad impangobserba ra ed kinen Jesus. Sikatoy mauyamo, maong, tan maaro. (Mat. 8:1-3; Mar. 6:30-34) Sikatoy talagan mapaabeba. (Juan 13:2-5) Legan a kaulop na saray disipulo si Jesus ed ministeryo, naobserbaan dan sikatoy makulin komikimey ya epektibo ed panangibangat toy katuaan ed arum. (Luc. 8:1; 21:37, 38) Panon a naapektoan so arum diad pangobserba ra’d sikatayo diad ministeryo?
2. Panon a say maabig a kondukta tayo ed ministeryo et makapangiter na maabig ya impresyon ed saray unabung?
2 Saray Unabung: Say masimpit a panangawes, maabig ya ugali, tan say peteg a personal ya interes ed totoo so walaan na baleg ya epekto ed saray unabung. (2 Cor. 6:3; Fil. 1:27) Naiimano ra so mabetbet a panguusar tayo na Biblia. Aapresyaen na arum so marespeton idedengel tayo sano mansasalita ira. Say panggawa tayo ed amin na saraya et importanti pian nakombinsi iray totoo ed mensahe na Panarian.
3. Panon tayon makapangiter na maabig ya impluensya ed saray agagi?
3 Saray Agagi: Nonoten met so maabig ya impluensya tayo ed saray agagi. Say inkaseseg tayo ed ministeryo so mamakiwas met ed arum. No panon ya utokan na balatyang so kapara ton balatyang, say niparaan a maong a presentasyon tayo so mamakiwas met ed arum pian paaligwasen so abilidad dan manbangat. (Uli. 27:17) Say inkaseet tayon mangilista ed impormasyon na saray interesado tan say pamawil tayon tampol ed sikara so mamaseseg met ed arum a mangalig ed satan. Maabig so impluensya tayo ed saray agagi no sigpot tayon susumpalen so ministeryo tayo.—2 Tim. 4:5.
4. Akin et pana-panaon tayon usisaen iray kiwakiwas tayo?
4 Maabig no pana-panaon tayon usisaey kakikiwas tayo tan no panon tayon naiimpluensyaan so arum panamegley na alimbawa tayo. Say maabig ya ehemplo tayo so mamaliket ed si Jehova tan lapud satan et sarag tayo met ya ibalikas imay alikna nen apostol Pablo sanen inkuan to: “Alig yo ak komon, a singa pangaalig ko ed si Kristo.”—1 Cor. 11:1.