“Itultuloy Mo Ak a Tumboken”

1-3. (a) Panoy intaynan nen Jesus ed saray apostol to, tan akin ya aliwa itan a makapanangis a panagpatanir? (b) Akin a kaukolan tayon amtaen so bilay nen Jesus manlapu la’d impawil to ed tawen?

MANAL-ALAGEY ed sakey a palandey so labinsakey a lalaki. Sankanengneng da so wadman a koma-12 a persona ya inararo tan galgalangen da. Say indengan to et singa too, balet diad tua et sikato si Jesus a pinaoli, a nagmaliw lamet a sankamakapanyarian ed saray espiritun ananak nen Jehova. Tinipon nen Jesus iray apostol to pian diad unor a pankanawnawa et minengnengan ed sikato diad Palandey Olibo.

² Seguradon dakel so nanonotan nen Jesus ed sayan palandey, a kabiangan na atalunton a nipukpukdol a baton dena diad nibukig na Jerusalem kabeltang na Patar na Kidron. Diad sarayan nipukdol a pasen so kawalaan na baley na Betania ya amaolian nen Jesus ed si Lazaro. Asingger dia so Betfage, samay nanggapoan na matalonan inyentra nen Jesus ed Jerusalem pigara labat a simba so apalabas. Say Palandey Olibo met so nayarin kawalaan na hardin na Getsemani, a nila nen Jesus legan na makapagonigon iran oras sakbay na inkaaresto to. Natan, diad saya lanlamang a nipukdol a pasen so amataniran nen Jesus ed saray maapit a kakaaro tan papatumbok to. Sikatoy angibalikas na makapaseseg iran salita, kabebekta et sikatoy amaatagey! Tangtangayen na saray akatanyareg ya apostol so isesegep na Managbangat da ed tawen. Insan sikatoy asakbongan na lurem, tan agda la anengneng.​—Gawa 1:6-12.

³ Kasin nanlaok na liket tan ermen iman ya eksena, sakey a makapanangis a panagpatanir? Andi met. Diad tua, impanonot na duaran anghel ed saray apostol a say istorya nen Jesus et agditan angangga. (Gawa 1:10, 11) Walaray nanduruman rason no akin a say impawil to ed tawen et gapo ni labat. Ag-itayo pinaulyanan na Salita na Dios a kapa-kapa nipaakar ed sinmublay ya agawa ed si Jesus. Importantin aralen tayo so nipaakar ed bilay nen Jesus manlapu la nen pinmawil ed tawen. Akin ey? Tandaan imay imbaga to ed si Pedro: “Itultuloy mo ak a tumboken.” (Juan 21:19, 22, NW) Kaukolan tayon amin a tuloken itan a ganggan, aliwa labat a diad loob na antikey a panaon, noagta diad interon bilay tayo. Pian nagawaan tayo itan, kaukolan tayon talosan no anto so gagawaen na Katawan tayo natan tan no antoray naawat ton asainmin diad tawen.

Say Bilay nen Jesus Manlapu la nen Pinmawil ed Tawen

4. Panon ya abayag lan impasakbay na Biblia so nagawa ed tawen kayari ipawil nen Jesus diman?

⁴ Anggapo so ibabaga na Kasulatan nipaakar ed insabi nen Jesus ed tawen, say impangabrasa ed sikato diman, tan say malikeliket ya impakapilimog to lamet ed si Ama to. Anggaman ontan, abayag lan imparungtal na Biblia no anto so nagawa ed tawen tampol kayari isabi nen Jesus diman. Amta yo, masulok a 15 siglo a regular a naimatonan na saray Judio so sakey a masanton seremonya. Maminsan ed kada taon, onloloob so atagey a saserdote ed Sankasantosan a pasen na templo pian ipatedter ed arapan na kaban na sipan so dala na saray bagat diad Agew na Pananakbong. Diad satan ya agew, irerepresenta na atagey a saserdote so Mesias. Pinsanan a sinumpal nen Jesus so ipropropesiya na satan a seremonya sanen pinmawil ed tawen. Sikatoy linmoob ed engranden kawalaan nen Jehova diad tawen, say sankasantosan a pasen ed uniberso, tan impresenta to ed Ama to so balor na dondon bagat to. (Hebreos 9:11, 12, 24) Kasin inawat itan nen Jehova?

5, 6. (a) Anto so paneknek ya inawat nen Jehova so dondon bagat nen Kristo? (b) Sioparay minabang ed dondon, tan panon?

⁵ Naromog tayo so ebat diad pangusisa ed agawa pigaran agew kayari insegep nen Jesus ed tawen. Sanen nantitipon ed tagey a kuarto ed Jerusalem so melag a grupo na manga 120 a Kristiano, biglan walay mabanesbes a dagem ya amano ed satan. Insan walay singa diladilan apoy a dinmapo ed kauloan da, apano ira na masanton espiritu, insan ira nansasalita na nanduruman lenguahe. (Gawa 2:1-4) Sayan inkagawa et tanda na inkaporma na sakey a balon nasyon, say espiritual ya Israel, ya “apili [na Dios] a kapolian” tan “peteg ya inkasaserdote” a manumpal ed linawa to diad dalin. (1 Pedro 2:9) Malinew, inawat tan inabobonan nen Jehova a Dios so dondon bagat nen Kristo. Sayan impangikalbo ed masanton espiritu et sakey ed saray sankaunaan a bendisyon lapu ed dondon.

⁶ Manlapu la’d saman, minanabang la ed dondon nen Kristo iray papatumbok to ed interon mundo. Balang lan kabiangan itayo na alanaan a “daiset a papastolan” a kaiba to a manuley ed tawen, odino kabiangan na say ‘arum a karnero’ ya uleyan to diad dalin, minanabang itayo ed bagat to. (Lucas 12:32; Juan 10:16) Satan so basiyan na ilalo tayo tan kaperdona na saray kasalanan tayo. Basta itutultuloy tayon ipatnag so ‘panisia’ ed satan a dondon, tan tumboken ed inagew-agew si Jesus, nawalaan itayo na malinis a konsiensia tan seguradon alay abig ya ilalo ed arapen.​—Juan 3:16.

7. Kapawil nen Jesus ed tawen, anton pakauley so inter ed sikato, tan panon a sikatoy nasuportaan yo?

⁷ Anto so gagawaen nen Jesus ed tawen manlapu la’d impawil to diman? Sikatoy awalaan na baleg a pakauley. (Mateo 28:18) On, sikato so tinuro nen Jehova a manguley ed Kristianon kongregasyon, betang a susumpalen to diad maaro tan makatunongan a paraan. (Colosas 1:13) Unong a nipasakbay la, angitarya si Jesus na responsablin lalaki a mangasikaso ed saray pankaukolan na pulok to. (Efeso 4:8) Alimbawa, pinili to si Pablo a magmaliw “ya apostol . . . na saray Gentiles,” ya imbaki to ed ararawin lugar pian iyabawag so maong a balita. (Roma 11:13; 1 Timoteo 2:7) Diad pansamposampot na unonan siglo, angiter si Jesus na mensahen komendasyon, simbawa, tan panangipetek ed pitoran kongregasyon diad Romanon probinsya na Asia. (Apocalipsis, kapitulo 2-3) Kasin bibidbiren yon Ulo na Kristianon kongregasyon si Jesus? (Efeso 5:23) Pian sikatoy nitultuloy yon natumbok, kaukolan ya ipapaseseg yo ed kongregasyon yo so ugali a matulok tan makoopera.

8, 9. Nen 1914, anton pakauley so niiter ed si Jesus, tan antoy nepeg ya epekto na satan ed panagdesisyon tayo?

⁸ Nen 1914, naikdan si Jesus na mas baleg nin pakauley. Diad satan a taon, sikatoy aturo bilang Ari ed Mesianikon Panarian nen Jehova. Sanen ginmapo so uley nen Jesus, “agawa so sakey a baleg a bakal ed tawen.” Tan antoy resulta? Nibantak ed dalin si Satanas tan saray demonyo to, a sengegay inggapo na kairapan. Ipapanonot ed sikatayo na kasmak a bakabakal, krimen, gonigon, sakit, yegyegyeg, tan eraeras a mamapairap ed totoo natan, a manuuley la ed tawen si Jesus. Ingen ta si Satanas so siansia nin “prinsipe [odino manuley] na sayan mundo” ed ‘daiset a panaon.’ (Apocalipsis 12:7-12; Juan 12:31; Mateo 24:3-7; Lucas 21:11) Balet, iikdan nen Jesus na pankanawnawa so totoo ed sankamundoan ya awaten so pananguley To.

⁹ Importante ya ondapag itayo ed Mesianikon Ari. Diad inagew-agew a pandedesisyon tayo, nepeg tayon seguroen no anto so aabobonan to, aliwan say aabobonan na sayan marelmeng a mundo. Legan a susurien na sayan “Ari na saray arari tan Katawan na saray kakatawan” so katooan, say matunong a puso to so balanglan onsasanok odino manleppua ed liket. (Apocalipsis 19:16) Akin?

Say Sanok tan Liket na Mesianikon Ari

10. Anto so sipor lan awawey nen Jesus, balet anto so manepeg labat a pakasanokan na Katawan tayo?

¹⁰ Say Katawan tayo et sipor lan maliket a singa say Ama to. (1 Timoteo 1:11, NW) Sanen wadiad dalin si Jesus, sikatoy aliwan makritiko odino maanap. Balet, dakel so nagagawa ed dalin natan a manepeg labat a pakasanokan to. Seguradon sikatoy nasasanokan ed amin ya organisasyon na relihyon a sititilan mangibabaga a sikatoy irerepresenta ra. Oniay impasakbay to: “Aliwan balang sakey a mankuan ed siak na, Katawan, Katawan, et onloob naani ed panariay tawen; noag ingen say mangunor na linawa nen Amak a wala ed tawen. Dakel naani ray mankuan ed siak [ed] saman ya agew, Katawan, Katawan, [agta] . . . lapud ngaran mo nanggawa kami [na amayamay a] makapakelaw iran gawa? Et saman ko la ipaliwawa naani ed sikara, Agta kayo apikabkabatan a balot. Arawi kayo’d siak, sikayo a managgawa na kaugsan.”​—Mateo 7:21-23.

11-13. Akin a nayarin pankelawan na arum so ambelat iran salita nen Jesus ed saray ‘nanggawa na amayamay a makapakelaw iran gawa’ diad ngaran to, balet akin a sikatoy sinmanok? Iyilustra.

¹¹ Sarayan salita nen Jesus et nayarin pankelawan na karaklan ed saray mankuan a Kristiano. Akin et ibaga to so ontan iran ambelat iran salita ed totoo a manggagawa na “makapakelaw iran gawa” diad ngaran to? Saray simbaan na Kakristianoan et angisponsor na saray charity, tinmulong ed saray mairap-bilay, nampaalagey na dakel ya ospital tan eskuelaan, tan arum ni ra. Pian natalosan tayo no akin a manepeg labat ya onsanok ed sikara si Jesus, imanoen iyan ilustrasyon.

¹² Walay sanasawa a kaukolan day manbiahe. Agda nayarin ipila so ananak da, kanian angupa ira na managkomis. Simpli labat so bilin da ed sikato: “Asikasom iray anak mi. Pakan mo ra, kaukolan ya ag-ira amoringis, tan agmo ra papaulyanan a narisgo.” Balet, sanen sinmabi so sanasawa, abigbigla ira lapud nadnarasan iray anak da. Sikaray amoringis, maletletey, tan pakaskasi. Mikakasi kalamor iray ananak ed samay managkomis, balet agto ra im-imanoen. Akin ey? Sikatoy wala manaya ed takayan a manlilinis na bintana. Lapud sanok na saray atateng, papaipaliwawa ra ed sikato no akin et ontan so ginawa to. Et oniay ebat na managkomis: “Ni, nengneng yo pa iyay amin ya akimeyan ko! Malinlinis iray bintana yo, insan wala ni inapiger ko ed abung yo! Parad pamilya yo met iya!” Kasin naliketan so atateng? Seguradon andi! Agdan balot imbilin ed sikato a gawaen to iratan; say labay da labat et naasikaso iray anak da. Kanian asanokan ira ed agto intulok ed saray bilin da.

¹³ Say Kakristianoan et singa satan a managkomis. Imbilin nen Jesus ed saray manangilaman to a pakanen da ed espiritual iray totoo, panamegley na pangibangat da ed sikara ed katuaan na Salita na Dios tan panulong da ed sikaran magmaliw a malinis ed espiritual. (Juan 21:15-17) Balet, makapaermen ta agtinulok na Kakristianoan so ingganggan to. Pinaulyanan na Kakristianoan a naerasan ed espiritual so totoo, a winetwet na saray katilaan tan anggapoy amta ra ed saray manunan katuaan na Biblia. (Isaias 65:13; Amos 8:11) Anggano mansasagpot so Kakristianoan a paaligwasen so bilay na katooan, agda nikatunongan so inggagalan agda intulok. Diad tua, sayan sistema na mundo et singa sakey ya abung a nigeter lan gaygayen! Malinlinew ya ibabaga na Salita na Dios a say sistema na mundo nen Satanas et magano lan deralen.​—1 Juan 2:15-17.

14. Anton kimey so mamapaliket ed si Jesus natan, tan akin?

¹⁴ Diad biek a dapag, seguradon naliliketan a maong si Jesus sano nanengneng to manlapud tawen so minilyon a manusumpal ed panaggawa na babangatan ya ingganggan to ed saray papatumbok to antis ton tinmaynan diad dalin. (Mateo 28:19, 20) Agaylan pribilehyo a napaliket so Mesianikon Ari! Agtayon balot komon onsasawa a manuporta ed “matoor tan makabat ya aripen.” (Mateo 24:45) Aliwan singa say klero na Kakristianoan, sayan melag a grupo na alanaan ya agagi et matulotulok a mangidadaulo ed panagpulong a kimey tan matoor a mamapakan ed saray karnero nen Kristo.

15, 16. (a) Antoy nalilikna nen Jesus ed inka-andiay panangaro a kasmak natan, tan panon tayon amta itan? (b) Akin a sinmanok si Jesus ed Kakristianoan?

¹⁵ Segurado itayo a nasanokan so Ari sano nanengneng to so inka-andiay panangaro a kasmak ed dalin natan. Nayarin nanonotan tayo imay impankritiko na saray Fariseo ed si Jesus lapud impamaabig to ed agew na Sabaton. Agaylay awet na puso ra, tan inkabangar da, a nanmatalekan day makisir ya interpretasyon da ed Mosaikon Ganggan tan say insalitan ganggan. Diad tua et talagan dakel so kaabigan na saray milagro nen Jesus! Balet, baliwala ed saraman a lalaki so liket, inawa, tan say makapabiskeg ed pananisia a tarok na saratan a milagro. Antoy alikna nen Jesus ed sikara? Aminsan et “ninengneng to ra a . . . sisasanok, diad inkaermenan to ed kaawetan na puso ra.”​—Marcos 3:5.

¹⁶ Natan, mas dakel ni so nanenengneng nen Jesus a ‘pakaermenan’ to. Saray lider na Kakristianoan so binulag na debosyon da ed saray tradisyon tan doktrinan misumlangan ed Biblia. Niarum ni, kabkabusol da so panangipulong ed maong a balita na Panarian na Dios. Diad dakel a parte na mundo, insugsog na klero so maruksan panamasegsegang ed saray Kristianon manggugunaet a mangipulong ed mensahe ya impulong nen Jesus. (Juan 16:2; Apocalipsis 18:4, 24) Ontan met, kaslakan lan lalagyaten na saratan a klero iray dili ran papatumbok a mibakal tan mamatey ed arum​—a singano satan so makapaliket ed si Jesu-Kristo!

17. Panon a napapaliket na saray tudtuan papatumbok nen Jesus so puso to?

¹⁷ Diad kasunian, saray tudtuan papatumbok nen Jesus so mansasagpot a mangipanengneng na panangaro ed kapara ran too. Anggaman sikaray susumpaen, ipupulong da so maong a balita ed “saray amin a totoo,” a singa ed ginawa nen Jesus. (1 Timoteo 2:4) Tan makapadinayew so impanengneng dan panaaroan; satan so manunan pakabidbiran da. (Juan 13:34, 35) Peteg a sikaray papatumbok nen Jesus lapud atekepay panangaro, galang, tan dignidad so pidedeneng da ed kapara ran Kristiano, diad ontan et napapaliket da so puso na Mesianikon Ari!

18. Anto so mamaermen ed Katawan tayo, balet panon a sikatoy napaliket tayo?

¹⁸ Tandaan tayo met a naermenan so Katawan tayo no agmansungdo iray papatumbok to, a paulyanan dan ombetel so panangaro ra ed si Jehova tan ontunda laran manlingkor ed Sikato. (Apocalipsis 2:4, 5) Bangbalet, naliketan si Jesus ed saramay mansungdo anggad kasampotan. (Mateo 24:13) Lawas tayo sirin a tandaan so ganggan nen Kristo: “Itultuloy mo ak a tumboken.” (Juan 21:19, NW) Imanoen tayo so pigaran bendisyon ya iter na Mesianikon Ari ed saramay mansungdo anggad kasampotan.

Mantultuloy so Panamendisyon ed Saray Matoor a Lingkor na Ari

19, 20. (a) Antoran bendisyon so nagamoran natan diad panumbok ed panangiwanwan nen Jesus? (b) Panon a say panumbok ed si Kristo so mamenek ed pankaukolan tayo na ama?

¹⁹ Say panumbok ed si Jesus so paraan pian nawalaan na peteg a marakep a bilay natan. No awaten tayo si Kristo bilang Katawan tayo, a tumboken tayo so panangiwanwan to tan usaren tayon pinagkagiya so ehemplo to, naromog tayo so kayamanan ya aanapen na totoo ed mundo balet ta agda naromog. Nawalaan itayo na kimey a pakagamoran tayo na makabaliksan a bilay, pamilya na kapananisiaan a binedber na tudtuan panaaroan, malinis a konsiensia, tan kareenan na nonot. Diad antikey, nawalaan itayo na bilay a maliket tan makapenek. Tan dakel ni so nagunggona tayo.

²⁰ Inter nen Jehova si Jesus bilang “Andi-anggaan ya Ama” parad saramay maniilalon manbilay ya andi-anggaan diad dalin. Si Jesus so kasalat na toon ama a si Adan, ya angikaindan ed amin ya ilalak to. (Isaias 9:6, 7) Diad pangawat tayo ed si Jesus bilang say “Andi-anggaan ya Ama” tayo, tan diad panisia ed sikato, nawalaan itayo na seguradon ilalo a bilay ya andi-anggaan. Niarum ni, mas lalo itayon napaapit ed si Jehova a Dios. Unong a naaralan tayo la, say panggunaet a panumbok ed ehemplo nen Jesus ed inagew-agew so sankaabigan a paraan pian natulok iyan ganggan na Dios: “Aligen yo sirin so Dios, singa anak to kayon inararo.”​—Efeso 5:1.

21. Panon ya isisindag na papatumbok nen Kristo so liwawa diad ambilunget a mundo?

²¹ Legan tayon aaligen si Jesus tan say Ama to, si Jehova, walaan tayo na alay dakep a pribilehyo. Nisindag tayo so masnag a silew. Diad mundon asakbongan na kabilungetan, a binilyon so imbalang nen Satanas tan mangaalig ed saray walna to, sikatayoran manutumbok ed si Kristo so mangisisindag na sankaliwawaan a silew ed amin a pasen, salanti say liwawa na Makasulatan iran katuaan, say liwawa na maabig iran kalidad na saray Kristiano, say liwawa na tudtuan liket, kareenan, tan aro. Ontan met, lalo itayon napapaapit ed si Jehova, tan satan so sankatagyan lan nadampot na anggan siopan intelihentin pinalsa.

22, 23. (a) Antoran bendisyon ed arapen so nagamoran na saramay matoor a manutumbok ed si Jesus? (b) Anto so nepeg tayon panggunaetan?

²² Nonot yo met so kaliktan a gawaen nen Jehova parad sikayo diad arapen, panamegley na Mesianikon Ari to. Agla manbayag, satan ya Ari so matunong a mibakal ed marelmeng a sistema na bengabengatla nen Satanas. Tan segurado so panalo nen Jesus! (Apocalipsis 19:11-15) Kayari na satan, igapo la nen Kristo so Sanlibon Taon a Panguley to ed dalin. Iter na gobierno to a walad tawen so gunggona na dondon ed amin a matoor a totoo, a pagmaliwen to ran perpekto. Isip yo pa a mabunigas lay laman yo, ya uga-ugaw tan makmaksil kayo lan naynay, tan malikeliket a mikikimeyan ed nankakasakey a pamilya na too pian pagmaliwen a paraiso iyan dalin! Sano mangangga la itan a Milenyo, ipawil la nen Jesus so pananguley ed si Ama to. (1 Corinto 15:24) No itultuloy yon sitotoor a tumboken si Kristo, nagamoran yo so agaylan dakep a bendisyon, ya agyo naisip ed inkarakep, satan et say “kawayangan na gloria na saray anak na Dios”! (Roma 8:21) On, nagamoran tayo so amin a bendisyon ya abalang di Adan tan Eva. Bilang totoon anak nen Jehova, magnayon lan naandi ed sikatayo so mantsa na kasalanan nen Adan. Peteg, “anggapo la naani ipatey.”​—Apocalipsis 21:4.

²³ Nonot yo pa imay mayaman a kalangweran a manuley ya apantongtongan tayo ed Kapitulo 1. Agto inawat so imbitasyon nen Jesus a: “Gala magmaliw kan patumbok ko.” (Marcos 10:17-22, NW) Agyo aaligen so lingon ginawa to! Komon ta maliket tan maligsa yon awaten so imbitasyon nen Jesus. Komon ta pampelengan yoy mansungdo, ya itultuloy yon tumboken so Maabig a Pastol ed inagew-agew, tinaon-taon, tan imatonan so makapadinayew a panumpal to ed amin a gagala nen Jehova!