Balon Artikulo Parad Panangigapo na Panangiyaral na Biblia
1. Anton balon artikulo so kabiangan la na pampublikon edisyon na Say Panag-Bantayan, tan parad anto so inkadesinyo na satan?
1 Onggapo no ontumbok ya bulan, walay balon artikulo a regular lan kabiangan na pampublikon edisyon na Say Panag-Bantayan ya ontulong ed sikatayon mangigapo na panangiyaral na Biblia. Satan et say “Paibangat ed Salita na Dios.” Anggaman seguradon panliketan na arum ed teritorya tayo a basaen so kada artikulo, satan et talagan denisinyo pian pantongtongan.
2. Antoray arum a kabiangan na sarayan artikulo?
2 Saray Kabiangan: Saray titulo tan subtitulo so ginawan tepet ya itepet ed unabung legan na pantongtong. Saray manunan teksto so nisita labat, ag-inaon, pian panliketan na unabung a direktan basaen iratan ed Biblia. Antikey labat iray parapo pian nayarin pantongtongan itan anggan diad puerta labat. Kada artikulo et manukoy ed libron Ibabangat na Biblia pian natulongan kan nisublay itan a libro no matukoy.
3. Sano mankabkaabungan, panon tayon nausar iyan artikulo pian makapangigapo na panangiyaral na Biblia anggan diad puerta?
3 No Panon ya Usaren: Sano iyopresi iray magasin nayarin mangitepet ka na makaalay interes nipaakar ed tema na interon artikulo. Singa bilang, ipapaliwawa na isyu na Enero 1 so kablian na Biblia. Nayarin itepet mo: “Parad sika, kasin say Biblia et Salita na Dios odino sakey labat a maong a libro? [Abuloyan ya onebat.] Walay makapainteres nipaakar ed sayan topic.” Ipaimano so unonan tepet, basaen so unonan parapo, tan basaen iray nisitan teksto. Basaen lamet so tepet insan pankomentoen so unabung. No matukoy, pigaran parapo so pantongtongan ya usaren iray tepet a pangibasian na tongtongan. Antis ya manpatanir, ipaimanoy ontumbok a tepet tan iyuksoy so ipawil pian pantongtongan itan. Ompawil pian ituloy a pantongtongan so artikulo kada simba anggad nisublay yo lay ontumbok ya isyu. Nayari met ya direktan iyopresi so panangiyaral na Biblia ed unabung. Insan usaren so artikulo ed magasin pian idemostra so panagaral.
4. Panon tayon usaren iyan artikulo sano ompawil?
4 Nayarin epektibo met no usaren yo iyan balon artikulo ed saray rota na magasin odino saray papawilen yo. Oniay nayarin ibaga yo: “Walay balon artikulo ed Say Panag-Bantayan. Ipanengneng ko’d sikayo no panon ya usaren ‘tan.” Ipikasi min dakel ni komon so ‘nawalaan na suston pikakabat ed katuaan’ lapud sayan balon artikulo.—1 Tim. 2:4.