Bayuboan so Abilidad Bilang Managbangat
ANTO so kalat mo bilang managbangat? No agano ka nin nagmaliw a manangipalapag na Panarian, andi-duaruwa a pilalek mon aralen no panon so pangikondukta na panangiyaral ed Biblia, lapud ginanggan nen Jesus iray patumbok ton manggawa na babangatan. (Mat. 28:19, 20) No walaan ka la na eksperiensya ed sayan kimey, nayarin say kalat mo et say pagmaliw a lalon epektibo diad panabi ed kapusoan na saraman so kaliktan mon tulongan. No sakey kan ateng, peteg a labay mo so magmaliw a nengneng na managbangat a makayarin mamakiwas ed ananak mo a mangidedika na bilay da ed Dios. (3 Juan 4) No sakey kan matatken odino manadampot ed pagmaliw ya ontan, nayarin labay moy magmaliw a managpaliwawa ed publiko a makapangipurek ed saray dumerengel na araldalem ya apresasyon ed si Jehova tan diad saray dalan to. Panon mon narapat irayan kalat?
Manaral manlapud Pangulon Managbangat, si Jesu-Kristo. (Luc. 6:40) Balanglan mitotongtong si Jesus ed sakey ya ulop ed alosadsar na palandey odino diad pigara lambengat a totoo legan a manaakar ed dalan, say imbaga to tan say paraan na impangibaga to so nipaslep a maong. Sinagyat nen Jesus so kanonotan tan kapusoan na saray dumerengel to, tan nanggawa na praktikal ya aplikasyon a natalosan da. Kasin nagawaan mo iray mipadparan bengatla?
Manmatalek ed si Jehova
Say abilidad nen Jesus a manbangat so apalaknab lapud maapit a relasyon to ed mangatatawen ya Ama to tan diad panamendisyon na espiritu na Dios. Kasin masimoon mon ipipikasi ed si Jehova a nayarian mo so mangikondukta na panangiyaral na Biblia diad epektibon paraan? No sakey kan ateng, kasin maparanay ya ipipikasim so madibinon panangiwanwan diad pangibabangat mo ed ananak mo? Kasin impapuso so pampipikasim sano manparaan kan mangiter na saray paliwawa odino mangikondukta na saray miting? Say ontan a sipipikasin panagmatalek ed si Jehova so ontulong ed sikan magmaliw a lalon epektibon managbangat.
Say pandependi ed si Jehova so nipatnag met diad panagmatalek ed Salita to, say Biblia. Diad pikakasi ed samay unor lan labi na bilay to bilang ayadyarin too, inkuan nen Jesus ed si Ama to: “Inter ko ed sikara so salitam.” (Juan 17:14) Anggaman malaklaknab lay eksperiensya nen Jesus, sikato so agbalot nansalita a nanlapud sikaton dili. Naynay ton sinalita so imbangat nen Ama to ed sikato, a diad ontan angitilak na uliran a tumboken tayo. (Juan 12:49, 50) Say salita na Dios, unong a nipreserba ed Biblia, so walaan na pakayarin mangimpluensya ed totoo—saray kiwas da, akindalem iran kaisipan da, tan saray liknaan da. (Heb. 4:12) Legan ya ombubulaslas ka diad pikakabat ed Salita na Dios tan naaralan mon usaren itan a maong ed ministeryom, nabayuboan mo so abilidad na panagbangat a mamaapit ed totoo diad Dios.—2 Tim. 3:16, 17.
Igalang si Jehova
Say pagmaliw a managbangat bilang pangalig ed si Kristo so aliwan basta sakey a pamaakaran na pakasarag a mangiter na makapainteres a paliwawa. Tua, saray totoo so mankelaw ed “saray makatangguyor a salita” nen Jesus. (Luc. 4:22, NW) Balet anto so gagala nen Jesus ed maong a panagsalita to? Pian igalang si Jehova, aliwan pian ipaarap so imano ed inkasikato. (Juan 7:16-18) Tan pinaseseg toray patumbok to: “Pasindagen yo komon so silew yo ed arap na saray totoo; pian nanengneng da so saray maong a gawa yo, et galgalangen da so Ama yo a wala ed tawen.” (Mat. 5:16) Satan a konseho so nepeg a mangimpluensya ed paraan na panagbangat tayo. Nepeg a say getma tayo et pian paliisan so antokaman a mangisuawi ed satan a gagala. Sirin sano iplano no anto so ibaga tayo odino no panon so pangibaga tayo, maabig no tepetan tayoy inkasikatayo, ‘Kasin saya so mamaaralem na apresasyon ed si Jehova, odino satan so mangipaarap na imano ed siak?’
Alimbawa, saray ilustrasyon tan saray peteg ed bilay ya ehemplo so nayarin nausar ya epektibo ed panagbangat. Anggaman ontan, sano atibukel so sakey ya andukey ya ilustrasyon odino say sakey ya eksperiensya so nisalaysay ed alablabas a detalye, nayarin nabalang so punto na instruksion. Mipadpara, say pangisalaysay ed saray estoryan panelekan lambengat so mangisuawi ed gagala na ministeryo tayo. Bilang resulta, ipapaarap na managbangat so imano ed sikaton dili imbes a susumpalen so peteg a kalat na teokratikon edukasyon.
“Manggawa na Panangibiig”
Pian tuan magmaliw a babangatan so sakey a too, nepeg a natalosan ton malinew so nibabangat ed sikato. Nepeg ton narengel so katuaan tan natalosan no panon so piduma na satan ed arum iran sisiaen. Say pangipaimano ed saray pandumaan so ontulong diad pakapanggawa ed saya.
Naulit-ulit a pinaseseg nen Jehova so totoo to a “manggawa na panangibiig” ed no anto so malinis tan no anto so marutak. (Lev. 10:9-11, NW) Inkuanto a saraman so manlingkor ed baleg ya espiritual a templo to so mangibangat ed totoo “ed pandumaan na masanton bengatla tan mabanday a bengatla.” (Eze. 44:23, NW) Say libro na Uliran so napno na pandurumaan ed baetan na inkatunong tan karelmengan, ed baetan na kakabatan tan kakulangkulangan. Anggan saray bengatlan agmansumlangan so napanbiigan. Impandumaan nen apostol Pablo so sakey a matunong a too tan maong a too, a singa nikurit ed Roma 5:7. Diad libro na Hebreos, impanengneng to so inkamatalona ed serbisyo na atagey ya inkasaserdote nen Kristo ed kinen Aaron. On, singa insulat nen edukador a John Amos Comenius: “Say pangibangat et simplin mankabaliksan na pangipanengneng no panon a saray bengatla so miduma ed sakey tan sakey diad nanduruman gagala, porma, tan lapuan da. . . . Sirin, saman so mangipaliwawan maong ed pandumaan na saray bengatla so manbabangat a maong.”
Alaen pan alimbawa so pangibangat ed sakey nipaakar ed Panarian na Dios. No agto natalosan no anto so Panarian, nayarian mon ipanengneng no panon a miduma so ibabaga na Biblia ed ideyan say Panarian so basta labat lan sakey a kondisyon ed puso na too. Odino nayarian mon ipanengneng no panon a say Panarian so miduma ed saray gobierno na totoo. Ingen, para ed saray totoo a kabat da irayan manunan katuaan, nayarin palaknaben mo ni. Nayarin ipanengneng mo ed sikara no panon so piduma na Mesianikon Panarian manlapud dilin sankatalbaan ya inkaari nen Jehova, ya adeskribe ed Salmo 103:19, odino manlapu ‘ed panariay Anak na aro na Dios,’ ya asalambit ed Colosas 1:13, odino manlapud ‘administrasyon,’ ya asaglawi ed Efeso 1:10. Say panangusar ed saray pandumaan so makatulong ed sikan mangipalinew ed sayan importantin bangat na Biblia a niyapasakey para ed saray dumerengel mo.
Aminpigan inusar nen Jesus so onian paraan na panagbangat. Impandumaan to so popular a pakatalos nipaakar ed Mosaikon Ganggan ed samay tuan gagala na Ganggan. (Mat. 5:21-48) Impandumaan to so tuan maridios a debosyon a manlapud mansimpisimpitan iran gawa na saray Fariseo. (Mat. 6:1-18) Impandumaan to so awawey na saraman so ‘pakakatawan’ ed arum ed dilin-panagsakripisyon espiritun ipapanengneng na saray patumbok to. (Mat. 20:25-28) Diad sananey ya inkagawa, a nikurit ed Mateo 21:28-32, inimbitaan nen Jesus iray dumerengel to a manggawa na dilin panangiduma ra ed baetan na dilin-inkatunong tan tuan panagbabawi. Satan so mangitonton ed sikatayo ed sananey a mabmablin nengneng na maong a panagbangat.
Pasesegen so Dumerengel a Manisip
Diad Mateo 21:28, nabasa tayo ya imparungtal nen Jesus so impangikompara to diad impantepet: ‘Anto so isipen yo?’ Say sakey a makayarin managbangat so aglabat basta mangibinsabinsa ed saray katuaan odino mangiter na saray ebat. Imbes, pinaseseg toray dumerengel to a mamayubo ed abilidad na panagnonot. (Uli. 3:21; Roma 12:1) Saya so nagawa, bilang kabiangan, diad pantepet. Singa naromog ed Mateo 17:25, intepet nen Jesus: “Anto so isisip mo, Simon? Saray arari dalin, siopa so pansingilan da na impuesto ono buis? Ed saray anak da, ono ed saray sankaili?” Saray makatenyeg-kanonotan a tepet nen Jesus so tinmulong ed si Pedro pian susto so nibaga to nipaakar ed panagbayar na buis ed templo. Mipadpara, sanen oneebat ed toon nantepet na, “Siopa so kaparak a too?”, impandumaan nen Jesus iray kiwas na sakey a saserdote tan sakey a Levita ed saray kiwas na sakey a Samaritano. Insan to impaarap iyan tepet: “Siopa ed sarayan talo so isipen mo ya angipatnag na kaparan too a naplag ed saray tulisan?” (Luc. 10:29-36) Dia lamet, imbes ya inonotan so dumerengel to, impaebatan nen Jesus so dili ton tepet.—Luc. 7:41-43.
Sabien so Puso
Saray managbangat a natebek da so kabaliksan na Salita na Dios so makamoria a say tuan panagdayew so aliwa lambengat a pamaakaran na pangipatlep ed pigaran katuaan tan pananumbok ed pigaran totontonen. Satan so nipaalagey ed maabig a relasyon ed si Jehova tan apresasyon ed saray dalan to. Lalanoren na satan a panagdayew so puso. (Deut. 10:12, 13; Luc. 10:25-27) Diad Kasulatan, say terminon “puso” so mabetbet a manutukoy ed interon akindalem a too, a pati saray bengatla a singa saray pilalek, panangaro, liknaan, tan motibasyon.
Kabat nen Jesus a manwarin saray totoo so onnengneng ed akinpaway ya indengan, say nenengnengen na Dios et say puso. (1 Sam. 16:7) Say serbisyo tayo ed Dios so nepeg a lapud panangaro tayo ed sikato, aliwan lapud labay tayon nidayew na kaparan totoo. (Mat. 6:5-8) Diad biek a dapag, saray Fariseo so nanggawa na dakel a bengatla pian nipasirayew ira. Say nagkalalo ran indanet et say katutulok ed saray detalye na Ganggan tan pitunosan ed saray ginawa ran totontonen. Balet ta agda nipatnag ed bilay da iray kalidad a mangipabidbir ed sikara ed say Dios ya ibabaga ran dadayewen da. (Mat. 9:13; Luc. 11:42) Imbangat nen Jesus ya anggaman importante so katutulok ed saray kakaukolanen na Dios, say kablian na ontan a katutulok so nadetermina unong ed saman so wala ed puso. (Mat. 15:7-9; Mar. 7:20-23; Juan 3:36) Sankaabigan so nagawaan na panagbangat tayo no aligen tayo so ehemplo nen Jesus. Importante a tulongan tayoray totoon manaral ed saray kakaukolanen na Dios ed sikara. Balet ta importante met ed sikaran kabaten tan aroen si Jehova bilang sakey a persona ta pian napatnagan ed kondukta ra a papablien da so naabobonan a relasyon ed tuan Dios.
Siempre, pian nagunggonaan ed ontan a panagbangat, nakaukolan ya arapen na totoo no anto so wala ed kapusoan da. Pinaseseg nen Jesus iray totoon mangusisa ed saray motibo ra tan surien iray liknaan da. Sano ipepetek to so lingon panmoria, tepetan toray dumerengel to no akin ya ontan so inisip da, imbaga ra, odino ginawa ran bengatla. Ingen, ta pian ag-ira kapa-kapa, tinekepan nen Jesus so tepet to na sakey a balikas, sakey ya ilustrasyon, odino sakey a kiwas a mamaseseg ed sikaran moriaen a susto iray bengatla. (Mar. 2:8; 4:40; 8:17; Luc. 6:41, 46) Natulongan tayo met iray dumerengel tayo diad pangisuheri a tepetan day inkasikara na singa saraya: ‘Akin a sayan inkiwas so makapasagyat ed siak? Akin a siak so onkiwas ed sayan kipapasen a singa gawaen ko?’ Insan pakiwasen iran manmoria ed saray bengatla unong ed punto-de-bista nen Jehova.
Mangiter na Aplikasyon
Kabat na maong a managbangat a say “kakabatan so manuna a bengatla.” (Uli. 4:7) Say kakabatan so abilidad a matalonan niyaplika so pikakabat pian solbaren iray problema, pian napaliisan so kaatapan, pian narapat iray kalat, pian natulongan so arum. Responsabilidad na managbangat a tulongan iray estudyanten manaral a manggawa ed satan balet agto ra idedesisyonan. Sano sisingbaten iray nanduruman prinsipyo na Biblia, tulongan a manrason so estudyante. Nayarin mamitla ka na sakey a kipapasen ed agew-agew a panagbilay insan tepetan so estudyante no panon a say kapkapanaral yon prinsipyo na Biblia so ontulong ed sikato no nipaarap ed ontan a kipapasen.—Heb. 5:14.
Diad samay paliwawa to nen Pentecostes 33 K.P., angiter si apostol Pedro na ehemplo ed praktikal ya aplikasyon ya anenyeg ed bilay na totoo. (Gawa 2:14-36) Kayari na impaningbat to ed taloran salaysay na Kasulatan ya ibabaga na ulop a sisiaen da, saraya so inyaplika nen Pedro unong ed saray agawgawa ya atasian dan amin. Bilang nansumpalan, alikna na ulop so pankaukolan na ikiwas ed nadngel da. Kasin say panagbangat mo so walaan na miulibay ya epekto ed totoo? Kasin papalaknaben moray katuaan tan tutulongan iray totoon mantalos no akin ya ontan iray bengatla? Kasin sikara so papasesegen mon mangonsidera no panon a saray bengatlan nanaaralan da so nepeg a mangapekta ed bilay da? Nayarin agda ikelyaw ya, “Antoy gawaen mi?” a singa samay karaklan ed Pentecostes, balet no maabig so impangusar mo ed kasulatan, sikara so onkiwas a matukoy unong ed satan.—Gawa 2:37.
Sano ibabasa yo so Biblia ed ananak yo, sikayon atateng so walaan na maabig a pankanawnawan mangipasal ed sikara nipaakar ed praktikal a panangiyaplika ed saray prinsipyo na Biblia. (Efe. 6:4) Alimbawa, nayarin mamili ka na pigaran bersikulo manlapud babasaen ed Biblia a niyeskedyul ed satan a simba, singbaten so kabaliksan da, insan itepet iray tepet a singa saraya: ‘Panon a saya so mangiwanwan ed sikatayo? Panon so nayarin pangusar tayo ed sarayan bersikulo ed ministeryo? Anto so ipaparungtal na saratan nipaakar ed si Jehova tan say paraan to diad panggawa ed saray bengatla, tan panon a satan so mamabiskeg na apresasyon tayo ed sikato?’ Pasesegen so pamilyam a mankomento ed sarayan punto legan na panisingbat ed saray manunan punto ed Biblia diad Teokratikon Eskuelaan Parad Ministeryo. Saray bersikulon komentoan da et nayarin saraman so natandaan da.
Mangiletneg na Maabig ya Alimbawa
Say ibangat mo et aliwa labat lan no anto so ibabagam noagta ontan met ed no anto so gagawaen mo. Saray kiwas mo so mangiter na praktikal ya alimbawa ed no panon so pangiyaplika ed saray bengatlan ibabagam. Onian paraan so pakaaralan na ananak. Sano aligen daray atateng da, ipapatnag dan labay day magmaliw a singa saray atateng da. Labay dan amtaen no anto so gagawaen na atateng da. Ontan met, sano saraman so babangatan mo et ‘magmaliw ya umaalig ed sika a singa sika ed Kristo,’ sikaray makaeksperiensya ed saray bendisyon ed panakar ed saray dalan nen Jehova. (1 Cor. 11:1) Say pidedeneng na Dios ed sikara so magmaliw a kabiangan na saray dilin eksperiensya ra.
Saya so sakey a seryoson panonot ed kaimportantian na pangiletneg na manepeg ya alimbawa. Say “nengneng na inkatoo [tayo] diad saray masanton ugali tan saray gawa na maridios a debosyon” so ontulong na baleg diad pangiter ed saramay babangatan tayo na mabilay a demostrasyon no panon ya iyaplika iray prinsipyo na Biblia. (2 Ped. 3:11, NW) No pasesegen moy sakey ya iyaaralan na Biblia a manbasan maparanay ed Salita na Dios, sikan dili met so maseet a manbasa. No labay mon makaaral iray ananak mo a manumbok ed saray prinsipyo na Biblia, seguroen a nanengneng dan saray kiwas mo so mitunosan ed linawa na Dios. No isisimbawam ed kongregasyon so pagmaliw a maseseg ed ministeryo, seguroen mon sika so walaan na sigpot a pibibiang ed satan a kimey. Sano gagawaen mo so ibabangat mo, wala ka ed magmaong a kipapasen a mamakiwas ed arum.—Roma 2:21-23.
Diad pamaaligwas ed panagbangat mo, tepetan mo so inkasika: ‘Sano siak so mangiter na instruksion, kasin mamaaligwas itan ed awawey, panagsalita, odino kakikiwas na saraman so ondengel ed satan? Pian napalinew so pamaakaran, kasin napandumaan ko so sakey ya ideya odino kakikiwas manlapud sananey? Anto so gagawaen ko pian natulongan iray iyaaralan ko, saray ana’ko, odino saray dumerengel ko ed sakey a miting a natandaan da so ibagak? Kasin nipalinew ko ed saray dumerengel ko no panon so pangiyaplika ed nanaaralan da? Kasin nanengneng da itan unong ed alimbawak? Kasin naapresya ra a say ikiwas da ed pamaakaran a nasisingbat so mangimpluensya ed relasyon da ed si Jehova?’ (Uli. 9:10) Itultuloy ya imanoen irayan bengatla legan a babayuboan mo so abilidad bilang sakey a managbangat. “Imatonan mo so kaabigan na laman mo tan say ibabangat mo. Mansiansia ka ed sarayan bengatla; ta no gawaen mo so saraya, nilaban mo so inkasika tan saray ondengel met ed sika.”—1 Tim. 4:16.