“Unoren Mo, Kerewen Ko ed Sika, so Boses Nen Jehova”

1, 2. Anto so naynay a walad kanonotan na saramay manutumbok ed kabibilay na karaklan, tan akin a nepeg kayon miduma?

SAY katutulok et agla popular ed mundo natan. Saray desisyon na karaklan et aliwan unong ed inkalapagan a totontonen, a singa say ‘Gawam so duga.’ Imbes, nibaga tayon say kanonotan da et ‘Gawam so labay mo’ odino ‘Gawam labat, basta agka papaerel.’ Naimano iya sano agtutumboken na saray drayber iray ley na trapiko, susumlangen na saray managpoonan iray ley ed pinansyal, tan sano ag-uunoren na saray opisyal iray ley a sikaran mismoy nanggawa. Say ontan a manapurastan pananumbok ed kabibilay na karaklan, anggaman satan so mauges tan mapeligro et kaslakan met ed panaon nen Jeremias.​—Jer. 8:6.

² Amoriam ya aglabat basta ontutumbok ed kabibilay na karaklan iramay manpipilalek ed panangabobon na Makapanyarin-amin a Dios. Malinlinew so impresenta nen Jeremias a pandumaan na saramay ‘ag-angunor ed boses nen Jehova,’ tan saramay malabay a mangunor ed Sikato. (Jer. 3:25; 7:28; 26:13; 38:20; 43:4, 7) Nepeg ya usisaen na balang sakey no iner so dapagan to. Akin? Mas maruksa iray panangataki nen Satanas ed integridad na saray tuan managdayew. Sikatoy singa uleg a manaalagar na biktimaen to a biglan onataki tekep na makapatey a ketket. Sirin, no determinado itayon ontulok ed boses nen Jehova, makaarawi itayo ed pasingil na satan ya uleg. Panon tayo balet a napabiskeg itan a determinasyon tayo? Natulongan itayo na saray sulat nen Jeremias.

SAMAY NEPEG TAYON TULOKEN

3. Akin a makanepegan si Jehova ed katutulok tayo?

³ Akin a makanepegan si Jehova ed sigpot a katutulok tayo? Impaamta nen Jeremias so sakey a rason diad impangibagan, “ginawa [nen Jehova] so dalin lapu ed pakapanyari to, inletneg to so mundo lapu ed kakabatan to.” (Jer. 10:12) On, si Jehova so Soberano na uniberso. Nepeg sirin a sikatoy manunan takotan tayo nen saray manuley. Sikato labat so makanepegan a managdag ed sikatayon ontulok ed saray makabat a ganggan to, a parad magnayon a pankaabiganan tayo.​—Jer. 10:6, 7. 

4, 5. (a) Anton leksion so naaralan na saray Judio legan na kelang? (b) Panon a dinarak na saray manaayam ed Juda so “danum a mabilay” a nanlapud si Jehova? (c) Panon kayon makainum na “danum a mabilay” ya itatarya na Dios?

⁴ Ingen, aliwa labat a Mananguley na Uniberso si Jehova, sikato met so Mananustuni na Bilay, say mismon bilay tayo. Nipalinew iya ed saray Judio diad panaon nen Jeremias ed makapakelkelaw a paraan. Nandepende so dalin na Ehipto ed danum na ilog Nilo, balet ta aliwan ontan so kipapasen na Insipan a Dalin. Saray totoo na Dios so nandepende ed uran, a mabetbet dan ipapaagus ed saray ginawa ran bobon. (Deu. 11:13-17) Si Jehova labat so makapampauran pian nasalog so dalin tan manbunga. Balet ta nayarian to met itan a pugeran. Kanian, naeksperiensya na saray matungangan Judio ed panaon nen Jeremias iray nantutumbokan a makadesyang a kelang, a linmeletak-letak iray kaumaan tan kaubasan da, tan nakatan met iray bobon da.​—Jer. 3:3; 5:24; 12:4; 14:1-4, 22; 23:10.

⁵ Anggaman kakkaukolan na saraman a Judio so literal a danum, impulisay day daakan a “danum a mabilay” ya inyopresi nen Jehova ed sikara. Napatnagan iya diad sigagagalan impanumlang da ed Ganggan na Dios tan impialyansa ra’d kakaabay dan nasyon. Kanian sinagmak da iray mauges a nansumpalan, singa ira saramay totoo a sanen daiset so danum et nantipon ed alamatan a kargaan. (Basaen so Jeremias 2:13; 17:13.) Natural labat ya agtayo labay a pairapen so inkasikatayo a singa ed ginawa ra. Lawas itayon tataryaan nen Jehova na daakan a panangiwanwan base ed apuyanan a Salita to. Siempre, nagunggonaan itayo labat na satan a “danum a mabilay” no regular tayon aralen tan panggunaetan so pambilay unong ed satan.

6. (a) Deskribien so katutulok nen Arin Zedekias ed si Jehova. (b) Diad padesir yo, akin ya agmakabat so kiwas na ari?

⁶ Mas kakkaukolan so itulok legan a manasingger so agew na pikuekuentaan na Dios ed Juda. Pian nagamoran na kada Judio so abobon tan salimbeng nen Jehova, kaukolan day magbabawi tan ontulok ed sikato. Nipaarap si Arin Zedekias ed ontan a situasyon. Sikatoy agmapekder a manggaway maptek. Sanen imbaga na saray nasasakopan to a labay dan pateyen si Jeremias, anggapoy pakpel ton mangamper ed sikara. Singa naamtaan tayo la’d apalabas a kapitulo, aliktaran na propeta itan a getma ed bilay to diad tulong nen Ebed-melec. Diad saginonor et oniay bilin nen Jeremias ed si Zedekias: “Unoren mo, kerewen ko ed sika, so boses nen Jehova.” (Basaen so Jeremias 38:4-6, 20.) Parad pankaabigan na ari, kaukolan ton nonoten a maong so desisyon to: Kasin sikatoy ontulok ed Dios?

KAKKAUKOLAN SO ITULOK ED SI JEHOVA

7. Antoray pigaran situasyon a nasubok so katutulok mo?

⁷ Importanti natan so katutulok a singa met ed panaon nen Jeremias. Kaunongan kabiskeg so determinasyon mon ontulok ed si Jehova? No bilang ta aksidentin pinmarungtal so pornograpikon Internet Web site, itultuloy mo kasin nengnengen itan odino kasin resistian moy antokaman a tukso tan i-close la itan a tampol? Panon to no inimbitaan ka na agmananisian katrabahom odino kaeskuelam a mi-date? Kasin nayarian mon ipulisay itan? Kasin nasasagyat ka odino nadidimla ka ed saray literatura odino Internet site na saray apostata? No nipaarap ka’d saraya odino arum niran situasyon, tandaan moy ibabaga na Jeremias 38:20.

8, 9. (a) Akin a makabat so italineng ed saray elder no panggugunaetan da kan tulongan? (b) Anto so nepeg a panmoriam ed aminpigan impanimbawa na saray elder?

⁸ Aminpigan imbaki nen Jehova si Jeremias ed saray totoo To pian manimbawa, a singa onia: “Ompawil kayo natan balang sakey a manlapu ed mauges a dalan to, tan umanen yo so saray dalan yo tan saray gawa yo.” (Jer. 7:3; 18:11; 25:5; basaen so Jeremias 35:15.) Mipadpara, gagawaen na saray elder so anggaay nayarian da a tulongan iray kapananisian a walad espiritual a kapeligroan. Kanian, no simbawaen ka na saray elder a paliisay agmakabat odino aliwan kagagawa, talineng ka’d sikara. Say gagala ra et singa si Jeremias.

⁹ Nayarin ipanonot da lamet ed sika iray Makasulatan a prinsipyo ya impaimano da la’d sika. Aliwan mainomay so pangulit ed simbawa, lalo la no say awawey na samay sisimbawaen et singa ed awawey na dakel a Judion dinmengel ed kinen Jeremias. Moriaen a panangaro nen Jehova iray impansasagpot na saray elder a tulongan ka. Tandaan ya agla komon kaukolan ya uliten nen Jeremias iray pasakbay to no tinmulok ira. On, kaukolan ya iyaplikan tampol so simbawa pian agla nasimbawa lamet.

PANAMERDONA NEN JEHOVA​—MABULOS A NIITER BALET ALIWAN AUTOMATIKO

10. Akin ya ag-automatiko so panamerdona nen Jehova ed saray kasalanan?

¹⁰ Anggan antoy gawaen tayo ed sayan kaunoran iran agew, agtayo sigpot a natulok si Jehova. Kanian misalamat itayo ed sikato lapud mabulbulos ton peperdonaen iray kakulangan tayo. Balet, agto automatikon peperdonaen iray kasalanan. Akin? Lapud kagula nen Jehova so kasalanan. (Isa. 59:2) Sirin et labay ton seguroen no makanepegan itayo ed panamerdona to.

11. Akin ya imposiblin agnaamtaan iray inyamot a kasalanan?

¹¹ Singa naimano tayo la, kagagawa la na dakel a Judio ed panaon nen Jeremias so isumlang ed Dios, sirin et aabusoen day anos tan panangasi to. Posible kasi a magmaliw met ya ontan so sakey a lingkor na Dios natan? On, no ibabaliwala to iray panonot nen Jehova tan gapoan to lay mankasalanan. No maminsan et parungtalan iyan nagagawa, a singa sano mikalugoran so sakey. Balet anggaman anggapo so makaamta ed impankasalanan, walad kapeligroan imay ontunganga ed si Jehova. Nayarin ikatunongan na toon doble so estiloy kabibilay to ya, ‘Anggapoy makaamta ed saya.’ Ingen, say katuaan to et nababasa na Dios no antoy walad isip tan puso, tan nanenengneng to iray inyamot a kasalanan. (Basaen so Jeremias 32:19.) Anto so nepeg a gawaen no apaneknekan a tinmunganga ed Dios so sakey a too?

12. Anto so nepeg a gawaen na saray elder pian nasalimbengan so kongregasyon?

¹² Minudmora na dakel a Judio so aminpigapigan impangiyopresi nen Jehova na tulong panamegley nen Jeremias. Diad panaon tayo, say sakey a seryoson nankasalanan et nayarin agmagbabawi, ya ipupulisay toy tulong na saray elder. No ontan so nagawa, nepeg a tumboken na saray elder so Makasulatan a ganggan pian salimbengan so kongregasyon diad pandispelo ed nanggaway mauges. (1 Cor. 5:11-13; nengnengen so kahon a “Pambilay ya Anggapoy Ganggan,” ed pahina 73.) Balet kabaliksan kasi na satan ya anggapo lan balot so ilalo to, ya agla makapawil ed panangabobon nen Jehova? Andi. Saray Israelita et abayag lan rebelyoso, ingen siansia nin imbaga na Dios: “Ompawil kayo, sikayo manangibeneg ya anak, tambalen ko naani so inkamanangibeneg yo.” (Jer. 3:22)a Iimbitaan nen Jehova iray managkasalanan ya ompawil ed sikato. On, papasesegen to ira ya ontan so gawaen da.

TULOKEN SI JEHOVA DIAD IPAWIL ED SIKATO

13. Anto so nepeg ya aksobien na sakey no labay toy ompawil ed si Jehova?

¹³ Unong ed si Jeremias, pian makapawil so sakey ed Dios, kaukolan ton itepet iya ed inkasikato, ‘Antoy ginawak?’ Kayari ton usisaey inkasikato base’d prinsipyoy Biblia, nepeg ton awaten a sikatoy nankasalanan. Diad panaon nen Jeremias, talagan ag-intepet na saray agmagbabawin Judio itan ed inkasikara. Agda binidbir so kalaknab na impankasalanan da, kanian agto ira pinerdona tan agto ira nayarin perdonaen. (Basaen so Jeremias 8:6.) Duma balet ed magbabawin managkasalanan ta bibidbiren to a lapud agto intulok ed si Jehova et abalaw so ngaran na Dios tan say Kristianon kongregasyon. Panermenan na peteg a magbabawi so intarok ton sakit ed saray anggapoy kasalanan a totoo. Kaukolan ton bidbiren ya awaten labat nen Jehova so kerew ton panamerdona no aksobien ton amin so epekto na mauges iran ginawa to. Balet, wala ni kaukolan pian nipawil so panangabobon na Dios.

14. Panon a say sakey et ‘ompawil lamet ed si Jehova’? (Ilaktip so kahon ya “Anto so Panagbabawi?”)

¹⁴ Uusisaen na peteg a magbabawi iray motibo, pilalek, tan bisyo to. (Basaen so Tagleey 3:40, 41.) Amtaen to iray kakapuyan to, a singa say pikakaaro’d agkasekso, kakainum na alak odino panagsigarilyo, panag-usar na Internet, odino saray transaksion ed negosyo. No panon a say sakey ya ina et lilinisan to so anggad sukong na kusina pian napansiansian malinis so abung to, nepeg met a panggunaetan na magbabawi a linisay kanonotan tan ipetek iray gagawaen to ed maamot. Nepeg toy ‘ompawil lamet ed si Jehova’ diad panumpal ed saray kakaukolanen To tan pambilay unong ed saray estandarte To. Walaray Judio ed panaon nen Jeremias a say impawil da ed si Jehova et “nankinon.” Sikaray kunkunwarin magbabawi balet ta agdan balot inumay walad kapusoan odino kabibilay da. (Jer. 3:10) Aliwan singa sikara, agsasalien a palikdoen na tuan magbabawi si Jehova tan say kongregasyon. Imbes a say getma to et protektaay reputasyon to odino say pakapilimog lamet ed kakanayon odino ed arum nin kapananisiaan, desidido ton itunda iray mauges a kagagawa to pian onkanepegan ed panamerdona tan panangabobon na Dios.

15. Panon so nepeg a pampikasi ed Dios na tuan magbabawi?

¹⁵ Say pikakasi et importantin kabiangan na panagbabawi. Nensaman, kaslakan lan itatagey na totoo so lima ra no sikaray manpikasi. Diad panaon tayo, sano manpikasi so tuan magbabawi, ‘itangay to so puso to pati saray lima to ed Dios,’ a singa ed impangibalikas nen Jeremias. (Tag. 3:41, 42) Say pakaliknay pagbabawi so mamakiwas ed sakey ya itunos toy kondukta to unong ed kekerewen ton pakaperdona. Saray pikakasi to et masimoon, a manlalapud utel na puso to.

16. Akin a makabat so ipawil ed Dios?

¹⁶ Andi-duaruwan amoria yo a say managkasalanan a talagan aaksobien to iray lingo to et kaukolan to met a daegey inkamapaatagey to. Saya so importantin katuaan: Labay nen Jehova ya ompawil ed sikato iray managkasalanan. Sano nanengneng na Dios so tuan pagbabawi ed puso na too, natenyeg so puso To. Say ‘puso to et mailiw’ odino agmakareen, a walaay panangabagey lapud pirmin pilalek to a perdonaen so amin a magbabawi, a singa ginawa to ed saray Israelita a pinmawil manlapud impakautibo. (Jer. 31:20) Talagan makapaseseg a naamtaan ya iiter nen Jehova so kareenan tan ilalo ed saramay matulok ed sikato! (Jer. 29:11-14) Nayarin magmaliw lamet iran kabiangan na saray matoor a lingkor na Dios.

NASALIMBENGAN KA NA KATUTULOK

17, 18. (a) Sioparay Rekabita? (b) Singa nilitrato ed pahina 77, kabkabat ira ed anto?

¹⁷ Talagan sankaabigan so sigpot ya itulok ed si Jehova. Nanengneng itan ed alimbawa na saray Rekabita diad panaon nen Jeremias. Masulok a duanlasus a taon lay apalabas, angiter na pigaran ganggan so laki dan si Jonadab, sakey a Cineon matoor a dinmapag ed si Jehu. Say sakey et nipaakar ed kakainum na alak. Abayag lan inatey si Jonadab, balet siansia nin sikatoy tutuloken na saray Rekabita. Sinubok ira nen Jeremias diad impangitagar to’d sikara diad pananganan na templo, insan to ira inopresian na alak pian sagyaten iran oninum. Ingen ta oniay inkuan da’d sikato: ‘Agkami oninum na alak.’​—Jer. 35:1-10.

¹⁸ Importante ed saray Rekabita so itulok ed abayag lan inaatey ya atateng da. Nagkalalo sirin a panseetan na saray tuan managdayew so itulok ed saray ganggan ya inter na mabilay a Dios. Pandinayewan nen Jehova so determinadon katutulok na sarayan Rekabita, a talagan midumaan ed inkatunganga na saray Judio. Insipan na Dios a salimbengan to iray Recabita ed onsabin kalamidad. Mipadpara diad panaon tayo, agta makatunongan labat a salimbengan nen Jehova iramay sigpot ya ontutulok ed Sikato legan na baleg a kairapan?​—Basaen so Jeremias 35:19.

AGBUKBUKOR NA SARAMAY ONTUTULOK ED SI JEHOVA

19. Anton proteksion so iter na Dios ed sikayo no sikatoy tuloken yo?

¹⁹ Agtayo nepeg a moriaen a nensaman labat so panasalimbeng na Dios ed totoo to. Anggad natan et sasalimbengan nen Jehova iray matulok manlapud espiritual a kapeligroan. No panon a sinalimbengan na atagey a padir iray syudad nensaman manlapud ilulusob, sasalimbengan met na ganggan na Dios iramay manaaral tan mangiyaaplika ed satan. Kasin mansiansia kayo ed loob na singa padir iran pananontonan na Dios? No mansiansia kayo, maabig so pansumpalan yo. (Jer. 7:23) Papaneknekan itan na dakel ya eksperiensya.​—Nengnengen so kahon a “Proteksion so Katutulok ed si Jehova.”

20, 21. (a) Anto so naseguro tayo no manlingkor tayo ed si Jehova? (b) Antoy reaksion nen Arin Jehoiakim ed mensahe na Dios panamegley nen Jeremias?

²⁰ Balanglan saray onsusumpa et kapamilyaan, katrabaho, kaeskuelaan, odino saray autoridad ed panaayaman yo, papairapen day panaglingkor yo’d Dios. Balet, makaseguro kayo a no sigpot yon tuloken si Jehova, lawas to kayon tulongan anggan diad saray sankairapan a kipapasen. Tandaan ya insipan na Dios a salimbengan toy Jeremias anggan diad maruksan isusumpa a sagmaken to, tan satan so tinoor nen Jehova. (Basaen so Jeremias 1:17-19.) Say sakey a paneknek ed satan et say agawa’d panaon nen Arin Jehoiakim.

²¹ Sisasanok a kinontra na pigaran manuley ed Israel, a singa si Jehoiakim, iray pinagkasangiyan na Dios. Naimano tayo iya ed kinen propeta Urias, a kapanaonan nen Jeremias. Sikatoy labay a pausilan nen mauges ya Arin Jehoiakim anggad paway ni ingen na bansa. Sanen narel iyan propeta nen Jehova, sikatoy impapatey na ari. (Jer. 26:20-23) Diad komapat a taon na uley na ari, impaisulat nen Jehova ed si Jeremias so amin a sinalita To ed saman a panaon, insan To itan impabasan maksil ed loob na templo. Inala nen Jehoiakim itan a lukot tan impabasa to ed opisyal na korte. Legan na pambabasa, pepegpegen na ari so dokumento insan to sansakey ya ibubuntok ed apoy, anggaman ed pamabano na pigaran prinsipe. Insan angibaki na lalakin mangerel ed si Jeremias tan Baruc. Antoy agawa? “Si Jehova inyamot to ra.” (Jer. 36:1-6; basaen so Jeremias 36:21-26.) Ag-inyabuloy nen Jehova a sakitan nen Jehoakim irayan matoor a lalaki.

22, 23. Anto so naaralan mo ed eksperiensya na agin taga central Asia nipaakar ed tulong na Dios?

²² No parad si Jehova et talagan kaukolan, nayarian to met ya iyamot iray lingkor to natan manlapud kapeligroan. Balet mabetbet a sikaray iikdan to na pakpel tan kakabatan pian ontulok ed sikato tan mantultuloy ed panangipulong day maong a balita. Sakey a mansusulon ina a tawagen tayo ed ngaran a Gulistan so walaan na apatiran anak. Sikatoy akaawat na tulong nen Jehova. Abayag a bukbukor toy Tasi ed maawang a pasen na central Asia, a sumpa iray autoridad ed panangipulong na Panarian. Masulok a 400 a kilometro so sankaasinggeran a kongregasyon, kanian sikatoy mataltalag a makapiulop ed saray matatken ed espiritual a Kristiano. Anggaman walaray isusumpa tan problema, sikato nin siansiay mankakabkaabungan tan makakaromog na dakel ya interesado. Unong ed agano nin report, manga 20 so iyaaralan toy Biblia tan ontutulong ed grupo na ondarakel a karnero nen Jehova.

²³ No panon a tinulongan na Dios si Jeremias tan arum niran Tasi a singa si Gulistan, sikatoy akaparaan met ya ontulong ed sika tan ed arum niran matulok a lingkor to. Magmaliw ka sirin a determinadon ontulok ed sikato bilang Manuley mo imbes a diad totoo. Diad ontan et agka naamper na isusumpa tan arum niran babeng ed mapublikon panangidayew mo ed alenleneg a tuan Dios diad saramay walad teritorya yo.​—Jer. 15:20, 21.

24. Antoray nagamoran yon gunggona lapud katutulok?

²⁴ Agtayo nagamoran so tuan gayaga tan inkapnek no agtayo paiwanwan ed Manamalsa tayo. (Jer. 10:23) Kayari tayon inaral so mensahe nen Jeremias nipaakar ed katutulok, wala ta iray naimano yon aspekto ed bilay yo a lalon nigiya nen Jehova iray kurang yo? Saray ganggan to so alenleneg a giya ed bilay a mangitonton ed nagnap a liket tan itatalona. Oniay impaseseg nen Jehova: ‘Talinengen yo so boses ko, pian sikato so maong ed sikayo.’​—Jer. 7:23.