Kasin Lanang Mon Itetepet, “Iner so Kawalaan nen Jehova?”

1, 2. (a) Antoy kipapasen ed espiritual na saray Judio diad panaon nen Jeremias? (b) Panon komon so inkiwas na saray taga Juda nipaakar ed kipapasen da?

MANTERTER so lua nen Jeremias. Sikatoy apektado ed peles a kipapasen na saray kabaleyan to tan ed say impaipasakbay na Dios ed sikato nipaakar ed arapen da. Pinirawat ton say ulo to et singa lapuan na danum tan saray mata to et singa subol pian agnaupotay lua. Walay rason nen Jeremias a panermenan so kipapasen na nasyon. (Jer. 9:1-3; basaen so Jeremias 8:20, 21.) Naynay ya ipupulisay na saray Judio so ganggan nen Jehova tan agda uunoren so ibabaga to, kanian walay nagawan mauges ed sikara.​—Jer. 6:19; 9:13.

² Balet, saray taga Juda, a labalabay dan narengel so ibabaga na saray relihyoson lider da a ‘maong ya amin so kipapasen,’ et anggapoy pibabali ra ed panmoria nen Jehova ed kagagawa ra. (Jer. 5:31; 6:14) Singa ra pasyente a manaanap na sakey a doktor a mangibaga’d sikara na maabig iran bengatla balet ta ibabaliwala da iray seryoson sintomas. No grabe sakit mo, agmo ta labay a naamtaan no anton talagay sakit mo pian natambal ka? Diad espiritual a paraan, nepeg ya inamta komon na saray Judio ed panaon nen Jeremias so peteg a kipapasen da ed espiritual. Intepet da komon ya “Iner so kawalaan nen Jehova?”​—Jer. 2:6, 8.

3. (a) Panon a naebatan na saray Judio so tepet ya “Iner so kawalaan nen Jehova?” (b) Anto so sakey a paraan a pananap na saray Judio ed si Jehova?

³ Say pangitepet na saray Judio ya “Iner so kawalaan nen Jehova?” et mankabaliksan a sikaray paigiya ed Dios sano mandesisyon ira, baleg man itan odino melag. Ag-itan ginawa na saray Judio. Balet, kayarin ataynanan so Jerusalem tan pinmawil ira manlapud Babilonia, nepeg dan ‘anapen si Jehova.’ No gawaen da itan, sikatoy naromog da tan naamtaan da iray dalan to. (Basaen so Jeremias 29:13, 14.) Panon dan nagawaan itan? Diad masimoon a pampikasi ra ed Dios, a paiwanwan ira ed sikato. Ontan si Arin David. Kinerew to ed Dios: “Iparungtal mo ed siak so saray dalan mo, O Jehova; ibangat mo ed siak so saray basbas mo.” (Sal. 25:4) Diad koma-samplon taon ya uley nen Arin Zedekias, imanoen pay impangimbita na Dumerengel na pikakasi ed si Jeremias: “Ontawag ka ed siak et ebatan ta ka naani, tan ipanengneng ko naani ed sika so saray baleg a bengabengatla, tan mairap, a sikara so agmo amta.” (Jer. 33:3) No say ari tan say apostatan nasyon et ontawag ed Dios, nayarian Ton iparungtal iray bengatlan “mairap” dan talosan​—nataynanan so Jerusalem tan apigeren kayari na 70 taon.

4, 5. Diad anto niran paraan ya inanap komon na saray Judio si Jehova?

⁴ Say sakey nin paraan ya inanap komon na saray Judio si Jehova et diad impanaral da ed saray agawgawa’d apalabas tan ed impideneng to ed totoo to. Diad ontan et nanonotan da no panon ya agamoran so panangabobon na Dios tan no antoy sengegan na insanok to. Wala’d sikara iray sulat nen Moises tan pigaran nipuyan a salaysay ed saray agawa’d apalabas ontan met na saray rekord nipaakar ed arari ed Israel tan Juda. No dinalepdep komon iratan na saray Judio ed panaon nen Jeremias tan no dinengel da iray tuan propeta na Dios, naamtaan da so ebat ed tepet ya “Iner so kawalaan nen Jehova?”

⁵ Say komatlon paraan ya inanap komon na saray Judio si Jehova et diad pakaaral da manlapud saray eksperiensya ran mismo tan eksperiensya na arum. Agkabaliksan na satan a makaaral ira panamegley na panag-eksperimento, balet agunggonaan ira komon no inusisa da iray ginawgawa ra ed apalabas tan say panmoria nen Jehova ed inkiwas da. No maimano ra, atalosan da komon no antoy panmoria na Dios ed kagagawa ra.​—Uli. 17:10.

6. Panon kan napaseseg manlapud alimbawa nen Job?

⁶ Iyaplika tayo pa ‘ya diad panaon tayo. Kasin lanang mon itetepet ya “Iner so kawalaan nen Jehova?” sano mandedesisyon ka odino manpipili ka no antoy gawaen mo’d bilay? Nayarin liknaen na arum ya agda tanto nagagawaan itan. No bilang ta ontan ka, agka nadidismaya. Anggan say matoor a patriarkan Job et nairapan ed saya. Sanen nadedesdes, sikatoy nagmaliw lan makasarili. Impanonot ed sikato nen Elihu imay kaslakan lan tendensia na too: “Anggapo so mankuan, Iner so kawalaan na Dios ya Akanggawa ed siak?” (Job 35:10) Tan pinaseseg to met: “Isipen mo so saray makapakelaw a gawa na Dios.” (Job 37:14) Kaukolan ya imanoen nen Job iray makapanyarin gawa nen Jehova ed saray palsan walad kaliberliber to tan ed impideneng na Dios ed totoo. Manlapud dilin eksperiensya to et atalosan to iray dalan nen Jehova. Kayari ton intepel iray dinalan ton irap tan atalosan no panoy impangasikaso nen Jehova ed satan, inkuan to: “Binitlak so agko atalosan, bengabengatla a makapakelaw a tuloy ed siak, ya agko naamtaan. Nadngel ko so nipaakar ed sika lapu ed panamegley na pakadngel na layag; balet natan say matak nanengneng to ka.”​—Job 42:3, 5.

7. Antoy onsublay a pantongtongan tayo, a singa nanengneng ed litrato diad pahina 116?

⁷ Si propeta Jeremias balet et intultuloy ton inanap si Jehova tan aromog to. Aliwan singa saray kanasyonan to, lanang ton itetepet ya “Iner so kawalaan nen Jehova?” diad dakel a taon na matoor ya impanlingkor to. Diad sayan kapitulo, nanengneng tayo ed alimbawa nen Jeremias no panon tayon naanap tan naromog si Jehova panamegley na pikakasi, panag-aral, tan personal iran eksperiensya.​—1 Awa. 28:9.

INMASINGGER SI JEREMIAS ED SI JEHOVA DIAD PIKAKASI

8. Diad antoran kipapasen ya inmasingger ed Dios si Jeremias diad pikakasi?

⁸ Diad saray taon a nanlingkor si Jeremias bilang mensahero na Dios diad nasyon na Juda, inanap toy Jehova panamegley na impapuson pikakasi. Sikatoy kinmerew ed Dios na tulong sanen iyabawag to la iray mensahen aglabay a dengelen na karaklan, sanen liknaen ton agto la sarag, tan sanen agto natalosan no akin ya agawa so pigaran bengatla. Tan sikatoy inebatan na Dios tan binilin to no panoy gawaen to. Imanoen pa so pigaran alimbawa.

9. (a) Diad Jeremias 15:15, 16, panon ya imbalikas nen Jeremias so liknaan to tan panon ya inebatan nen Jehova? (b) Akin ya importantin ibalikas moy liknaan mo diad pikakasi?

⁹ Sanen niganggan si Jeremias a mangiyabawag na mensahe na panangukom, say pakalikna to et pipirawaten na amin a walay mauges a nagawa’d sikato. Kanian akikasi ed Dios a sikatoy nodnonoten To. Imanoen pay pikakasi to a naromog diad Jeremias 15:15, 16, ya imbaga to no antoy alikna to ed inyebat na Dios. (Basaen.) Diad satan a pikakasi, imbalikas nen Jeremias so kagogonigon to. Ingen sanen aromog to iray salita na Dios tan inyan to iratan ed sangi to, a singa panangibaga, sikatoy aliketan! Sikatoy tinulongan nen Jehova a napabli so pribilehyo ton mantasi ed ngaran na Dios tan mangiyabawag ed mensahe To. Amoria nen Jeremias a talagan ontutulong si Jehova. Antoy naaralan tayo ed saya?

10. Panon ya inebatan na Dios si Jeremias sanen inkuan ton agla mansalita diad ngaran nen Jehova?

¹⁰ Diad sananey nin inkagawa, kayarin sikatoy kinabil na saserdoten si Fasur ya anak nen Imer, inkuan to ya agto la mansalita diad ngaran nen Jehova. Panon ya inebatan nen Jehova so masimoon a pikakasi to? (Basaen so Jeremias 20:8, 9.) Ag-ibabaga na Biblia a nansalitay Dios manlapud tawen pian ebatan si Jeremias. Balet say salita na Dios et nagmaliw a singa mandarlang ya apoy ya apukok ed saray pukel to, tan agto nayarian ya ag-iyabawag itan. On, lapud imbalikas nen Jeremias ed Dios so peteg a nalilikna to tan impaiwanwan ed amta ton linawa To, sikatoy apakiwas ya ituloy so pagagawa To ed sikato.

11, 12. Panon a naebatan so tepet nen Jeremias nipaakar ed ompatnag ya itatalona na saray mauges?

¹¹ Agonigon si Jeremias sanen naimatonan ton ontatalona iray mauges. (Basaen so Jeremias 12:1, 3.) Anggaman agton balot kinuestion so inkatunong nen Jehova, pinirawat ton naebatan so ‘isasangsang’ odino irereklamo to. Napatnagan ed inkaprangka to a malet so relasyon to’d Dios, a singa sakey ya ugaw ed inad-aro ton ama. Aglabat natatalosan nen Jeremias no akin ya onaaligwas so dakel a Judio anggaman mauges ira. Kasin akaawat si Jeremias na makapenek ya ebat? Sikatoy pinaseguroan nen Jehova a deralen to iray mauges. (Jer. 12:14) Legan ton nanenengneng so pakakasumpal na saray impikasi to, seguradon binmiskeg so kompiyansa to ed hustisya na Dios. Kanian lalon sineetan toy manpikasi ed Dios, ya ibabalikas toy liknaan to’d Ama to.

¹² Sanen magano lan manampot so uley nen Zedekias, legan a pinaliberan na saray taga Babilonia so Jerusalem, imbaga nen Jeremias a “saray mata [nen Jehova] akalukas ira ed saray amin a dalan na saray anak a lalaki na saray totoo, a mangiter ed balang sakey na unong ed dalan to, tan unong ed bunga na saray gawa to.” (Jer. 32:19) Nipaakar ed hustisya, sankanengneng nen Jeremias no iner so pasen nen Jehova, a talagan babantayan to so gagawaen na kada sakey ed saray lingkor to tan dedengelen to iray masimoon a pikakasi ra. Diad ontan et nanengneng da so dakel nin ebidensya a Sikatoy mangiiter ed “balang sakey na unong ed dalan to, tan unong ed bunga na saray gawa to.”

13. Akin a matalek kan nasumpal so linawa na Dios?

¹³ Nayarin agtayo met panduaruwaan so inkahustisya na Dios tan say karunongan to ed panusumpal tan panumpal to ni ed linawa to. Balet nagunggonaan tayo no dalepdepen tayo iray irap a dinalan nen Jeremias, tan no ipikasi tayo so peteg a nalilikna tayo. No ontan so gawaen tayo, ombiskeg so talek tayo’d si Jehova a seguradon nasumpal so linawa to. Anggano agtayo ni natatalosan a maong iray nagagawa ed kaplesan, o no akin a singano matantan so pakasusumpal na linaway Dios, nayarian tayon ibalikas ed pikakasi so kompiyansa tayo a kontrolado to iray bengatla. Nagawan nagawa so linawa to diad paraan tan kapeles ya amta ton sankaabigan. Segurado itan; anggapoy rason pian manduaruwa tayo. Kanian itultuloy tayon itepet ya “Iner so kawalaan nen Jehova?” diad masimoon a pangipikasi tayon natalosan so linawa to tan nanengneng so ebidensya na kasusumpal na satan.​—Job 36:5-7, 26.

PINANO NEN JEREMIAS SO PUSO TO NA KAKABATAN

14. Panon tayon amta ya inaral nen Jeremias iray agawgawa ed totoo na Dios diad apalabas?

¹⁴ Nipaakar ed tepet ya “Iner so kawalaan nen Jehova?” kabat nen Jeremias a kaukolan ton ‘amtaen si Jehova.’ (Jer. 9:24) Maseguron inaral to iray agawgawa ed totoo na Dios diad apalabas sanen tinugyop to iray libro a kabkabat natan bilang 1 tan 2 Arari. Espisipikon sinalambit to so “libro na saray gawa nen Solomon,” “libro na saray cronica na saray arari ed Israel,” tan “libro na saray cronica na saray arari ed Juda.” (1 Ara. 11:41; 14:19; 15:7) Lapud satan et atalosan to no panoy impangarap nen Jehova ed nanduruman situasyon. Naamtaan to met no antoy makapaliket ed si Jehova tan no panon Ton momoriaen iray desisyon na totoo. Diad saman et wala met iray nipuyan a sulsulat a natuplegan to, a singa saray sulat di Moises, Josue, Samuel, David, tan Solomon. Maseguron dakel so amta to nipaakar ed saray akauna tan kapanaonan ton propeta. Panon ya agunggonaan si Jeremias ed personal a panagaral to?

15. Antoy nayarin agunggona nen Jeremias diad impanaral to ed propesiya nen Elias?

¹⁵ Insulat nen Jeremias so agawa’d si Jezebel, say mauges ya asawa nen Ahab ya ari na Samaria. Inlaktip to ditan imay impasakbay nen Elias a si Jezebel et kanen na saray aso diad dalin na Jezreel. (1 Ara. 21:23) Tan amta tayo a kayari 14 a taon, si Jezebel et impelag ed bintana, ginatin-gatinan na saray kabayo nen Jehu, tan inakan na saray aso. Mitunosan itan ed insulat nen Jeremias. (2 Ara. 9:31-37) Say detalyadon impanaral to’d propesiya nen Elias tan say kasumpalan na satan et maseguron amabiskeg ed pananisia to’d salitay Dios. On, sikatoy akapantultuloy lapud pananisian apabiskeg diad impanaral to’d saray ginawgawa nen Jehova ed apalabas.

16, 17. Akin ya akapantultuloy si Jeremias ya amasakbay ed saray mauges ya arari ed panaon to?

¹⁶ Imanoen tayo pay sakey nin alimbawa. Antoy akatulong ed si Jeremias ya anggano napapasegsegang et intultuloy ton pinasakbayan iray mauges ya ari, a singa si Joacim tan Zedekias? Say manunan rason et sikatoy ginawa nen Jehova a “sakey a kinutaan a syudad, tan sakey a balatyang a seklang, tan sakey a gansa a bakor” ed saray arari na Juda. (Jer. 1:18, 19) Balet agtayo lilingwanan ya inaral a maong nen Jeremias so nipaakar ed uley na inmuunan arari ed Juda tan Israel. Inrekord to a si Manases et angipaalagey na “saray altar nipaakar ed amin ya ehersito ed tawen dia ed dua a saban na abung nen Jehova,” imbagat toy mismon anak to diad apoy, tan dakdakel so pinatey ton andiay-kasalanan. (2 Ara. 21:1-7, 16; basaen so Jeremias 15:4.) Ingen, maseguron naamtaan nen Jeremias a sanen nampaabeba si Manases tan nantultuloy a nampikasi ed Dios, “[si Jehova et] akerewan,” tan impawil to ed trono.​—Basaen so 2 Awaran 33:12, 13.

¹⁷ Agbinitla nen Jeremias ed saray sulat to so impangipatnag nen Jehova na panangasi ed si Manases. Balet si Manases et manga 15 taon ni labat ya inatey sanen ginapoan nen Jeremias so kimey to bilang propeta. Kanian, maseguron abalitaan to no antoy agawa sanen nagbabawian na ari iray mauges a ginawa to. Say impanaral to nipaakar ed mauges a kagagawa nen Manases tan no antoy nansumpalan et maseguron akatulong ed sikaton nanengneng so kaimportantian na pamaseseg ed saray arari, a singa si Zedekias, pian anapen da so panangasi tan maaron-kaabigan nen Jehova. Anggan say sakey ya ari a kabkabat a manag-idolatriya tan managpatey et nayarian toy magbabawi tan naperdona. No sika si Jeremias, kasin napaseseg ka ed saray agawa’d si Manases, pian makapantultuloy ka legan na uley na arum nin mauges ya arari?

MAKAARAL MANLAPUD EKSPERIENSYA

18. Antoy nayarin naaralan nen Jeremias ed agawa’d si Urias, tan akin ya ontan so ebat mo?

¹⁸ Legan na pampropropesiya nen Jeremias, seguradon walay naaralan to diad impangimano to’d inkiwas na saray kapanaonan ton propeta ed nanduruman situasyon. Sakey lay propetan Urias, a nampropesiya sumpad Jerusalem tan Juda legan na uley nen Joacim. Balet, lapud takot nen Urias ed si Arin Joacim, sikatoy binmatik ed Ehipto. Kayari na satan, sikatoy impaerel na ari manlapud Ehipto, insan to pinatey. (Jer. 26:20-23) Wala kasi naaralan nen Jeremias ed eksperiensya nen Urias? Say impantultuloy nen Jeremias ya amasakbay ed saray Judio nipaakar ed manasingger lan kadederal, a ginawa to itan anggan diad loob na templo, so mamaneknek a sikatoy akaaral na sakey a leksion. Pinansiansia toy inkakpel to, kanian agpinaulyanan nen Jehova. Maseguron pinakiwas na Dios si Ahikam, ya anak nen Shafan, pian protektaan iyan makmakpel a propeta.​—Jer. 26:24.

19. Antoy naaralan nen Jeremias ed aminpigan impangibaki nen Jehova na saray propeta ed saray totoo To?

¹⁹ Akaaral met si Jeremias ed eksperiensya to sanen sikatoy inusar nen Jehova a mamasakbay ed totoo To. Nen komapat a taon na uley nen Arin Joacim, impaisulat nen Jehova ed si Jeremias so amin a sinalita To manlapud panaon nen Josias ya anggad satan a taon. Akin et ontan so ingganggan na Dios? Pian pasesegen so kada sakey ya ontunda lan manggaway mauges, diad ontan et naperdona ra. (Basaen so Jeremias 36:1-3.) Si Jeremias, ya ombabangon a masakbay pian ipasabi iray mensahe na Dios, so akikasi ni ingen ed totoo a tundaan da lay mabanday a kagagawa ra. (Jer. 44:4) Agta mapatpatnag a naaralan nen Jeremias manlapud eksperiensya to ya imbaki na Dios iray propeta lapud panangabagey ed totoo To? Agta amawala itan ed si Jeremias na parehon panangabagey? (2 Awa. 36:15) Natalosan tayo sirin a sanen akaliktar si Jeremias ed inkaderal na Jerusalem et nikuan to: “Sikato so abig na linawa nen Jehova ya ag-itayo naupot, ta saray panangasi to ag-onkulang. Sikara so balo a kinabuasan.”​—Tag. 3:22, 23.

KASIN LANANG MON ITETEPET, “INER SO KAWALAAN NEN JEHOVA?”

20. Panon mon naalig si Jeremias diad pangamta ed panmoria nen Jehova?

²⁰ Diad saray dedesisyonan mo ed inagew-agew, seseguroen mo kasi ya amtaen so linawa na Dios, ya itetepet mon, “Iner so kawalaan nen Jehova?” (Jer. 2:6-8) Aliwan singa saray Judio ed panaon to, naynay a patutulongan si Jeremias ed Makapanyarin-amin pian natebek no dinan a dalan so nepeg ton laen. Sano say sakey et mandesisyon, andi-duaruwan sankaabigan so pangalig ed si Jeremias, a naynay ya amtaen so panmoria nen Jehova.

21. Anton klase na pikakasi so makatulong ed sika diad ministeryom, singa bilang no walay nansalitay makapasakit ed sika?

²¹ Agkaukolan a say dedesisyonan et sakey a seryoson pamaakaran odino nipaakar ed baleg a pananguman ed bilay. Alimbawa, komustay desisyon mon manpulong diad agew ya implanom? Nayarin kabangon mo’d kabuasan et naimanom a singano aliwan marakep so panaon. Sakey ni, say aka-eskedyul a teritorya ed satan ya agew et mabetbet lan nakikimeyan. Nayarin nanonotan mo met a walaray totoon ag-amatuloy ed sika, diad paraan a singa marespeto odino diad makapasakit a salita. Diad satan ni labat, kasin ipikasim lan “Iner so kawalaan nen Jehova?” Diad pampikasim, nayarin nanonotan moy karakpan na mensahen ipulong mo tan lalon natebek mo a talagan linaway Dios ya iyabawag mo itan. Naliknam ed satan a say salita nen Jehova et lapuan na liket tan gayagam, a singa met ed si Jeremias. (Jer. 15:16, 20) No bilang ta manpupulong ka la et walay nakatongtong mon ansakit so panagsalita to odino pagyawen to ka, sarag mon ipikasi ed Dios so naliliknam. Ontan kasi gawaen mo? Nonoten a nayarian to kan ikdan na masanton espiritu ta pian dugay niyebat mo, tan say pilalek mon nipulong so mensahe na Dios et agnatalonaan na negatibon liknaan.​—Luc. 12:11, 12.

22. Akin a walaray pikakasin agdedengelen na Dios?

²² Tandaan tayo a walaray pikakasin agdedengelen na Dios. (Basaen so Tagleey 3:44.) Agdinengel nen Jehova iray pikakasi na saray rebelyoson Judio lapud ‘inyarawi day layag da ed sikato’ tan nantultuloy ira’d mauges a kagagawa ra. (Uli. 28:9) Malinlinew so leksion ed si Jeremias, tan nepeg ya ontan met ed sikatayo: No say sakey et agto gagawaen so unong ed ipipikasi to, naermenan so Dios tan bilang resulta et nayarin agto la dengelen iratan a pikakasi. Seguradon agtayo labay a gawaen so antokaman a mamaermen ed si Jehova.

23, 24. (a) Antoy nakaukolan pian naamtaan tayoy linawa nen Jehova? (b) Panon mon nagawaan a lalon makagunggona so personal a panag-aral mo?

²³ Nilikud ed masimoon ya ikerew na panangiwanwan nen Jehova, kaukolan ya itultuloy tayoy personal a panagaral. Sakey iyan importantin paraan pian naamtaan so linawa nen Jehova. Diad saya et magmaong so kipapasen tayo nen si Jeremias. Wala’d sikatayoy kompleton Biblia. Singa si Jeremias, a nansukimat a maong pian natugyop to iray nipuyan a salaysay nipaakar ed saray agawa’d apalabas, makapansukimat ka met ed Salitay Dios tan paigiya ka, ya itepet mon, “Iner so kawalaan nen Jehova?” Diad panggugunaet mon naamtaan so linawa to, manmamatalek ka ed sikato, tan “singa [ka] sakey a kiew a nitanem ed abay na saray danum, ya ikayat to so saray lamot to ed abay na ilog.”​—Basaen so Jeremias 17:5-8.

²⁴ Legan mon babasaen tan dadalepdepen so Masanton Kasulatan, panggunaetan mon talosan no antoy labay nen Jehova a gawaen mo ed nanduruman situasyon. Nayarian mon anapen iray prinsipyo a labay mon tandaan tan niyaplika ed bilay mo. Diad pambabasam ed saray agawgawa’d apalabas, saray ganggan tan prinsipyo na Dios, tan saray proverbio ed Salita to, nonoten mo no panon a mangapekta iratan ed inagew-agew a panagdesisyon mo. Pian naebatan so tepet mon “Iner so kawalaan nen Jehova,” ipanengneng to’d sika panamegley na nisulat a Salita to no panon mon arapen so anggan mair-irap iran situasyon. On, say Biblia so ontulong ed sika pian natalosan mo iray ‘mairap a bengabengatla ya agmo amta’ odino datin agmo natatalosan.​—Jer. 33:3.

25, 26. Akin a makagunggona ed sikatayo iray eksperiensya?

²⁵ Niarum ni, makaaral ka ed eksperiensyam tan ed eksperiensya na arum. Alimbawa, nayarin naamtaan mo a walaray tinmundan manmatalek ed si Jehova, a singa si Urias. (2 Tim. 4:10) Makaaral ka ed ginawa ra pian agmo nasagmak so mauges ya asagmak da. Agmo lilingwanan so maaron-kaabigan ya ipapatnag nen Jehova ed sika, a nonot mon pinabli met nen Jeremias so panangasi tan panangabagey na Dios. Anggan panon lan kadesperado so situasyon mo, agmo iisipen ya agka iyaansakit na Dios a Sankatageyan. Iyaansakit to ka, a singa ginawa to’d si Jeremias.

²⁶ Legan mon dadalepdepen so pidedeneng nen Jehova ed kada sakey natan, natebek mo a sikatoy lanang a mangiwawanwan diad nanduruman paraan. Si Aki, a sakey ya agin Haponesa, et liknaen ton anggapoy-kana to bilang Kristiano. Sakey ya agew, sanen manpupulong a kaiba toy asawa na manangasikasoy sirkito, inkuan to: “Say pakaliknak et agnaliliketan si Jehova ed panlilingkor ko tan ngalngali to ak la ipulisay, balet gagawaen koy anggaay nayarian ko pian makapantultuloy.” Sikatoy pinaseguroan na asawa na manangasikasoy sirkito, a kuan to: “Agkon balot alikna ya aliwan sigpot-pusoy panlilingkor mo bilang Kristiano!” Inisip a maong nen Aki itan ya imbaga to. Diad tua et anggapon balot so pakapatnagan a sikatoy impasen nen Jehova ya agsigpot-puson manlilingkor. Kayari na satan, oniay impikasi nen Aki ed si Jehova: “Ibaki mo ak ed iner man a labay mo. Gawaen koy antokaman a pagawam ed siak.” Diad saman et nambakasyon si Aki diad arum a bansa a diman et walay melag a grupon mansasalitay Hapones a mankaukolan na manangipalapag a makasalitay lenguahe ra, makapanpirmi ditan tan makapitulongan ed sikara. Nibanbana a ditan nianak si Aki, kanian main-inomay toy onalis tan ontulong ditan. Balet iner kasi napanayaman to? Walay agin bii a kaali-alis na anak to ya angiyopresi na napanpundoan. Inkuan nen Aki: “Singano impantutuop iran piraso na sakey a puzzle; inlukas nen Jehova ed siak so pankanawnawa.”

27. Akin a nepeg a mamaseseg ed sika so tepet ya “Iner so kawalaan nen Jehova?”

²⁷ Dakel ya agagi so makapangibagan alikna ran mismo so panangigiya na Dios, nayarin diad pambabasa ray Biblia odino personal a panag-aral da. Nayarin walaan ka met na ontan iran eksperiensya. Talagan mamaelet itan na relasyon mo’d si Jehova tan mamakiwas ed sikan onasingger ed sikato diad pikakasi a lalon mabetbet tan masimsimoon. Manmatalek itayo a no lanang tayon itetepet ya “Iner so kawalaan nen Jehova?” ipanengneng to’d sikatayo so dalan to.​—Isa. 30:21.