Anton Klase na Kakaaro so Pilien Mo?

1, 2. (a) Antoran situasyon so nipapaarap ed saray Kristiano no nipaakar ed pipiulop? (b) Akin et nepeg tayon imanoen so impanpili nen Jeremias na kakaaro?

ANTO so gawaen mo no walaray katrabaho, kakaabay, odino kaeskuelaan mo a mangiimbita ed sika a mi-Krismas party? Panon to no inganggan kay amom a mantila odino manggawa na ilegal a bengatla? Odino, panon to no say pagagawa ed sika na saray opisyal na gobierno et mangikompromiso ed neutralidad mo? Seguradon idikta na konsiensiam ya agmo gawaen iraya, anggano pansengegan itan na panludlurey odino panmaltrato ed sika.

² Naaralan tayo ed sayan kapitulo a si Jeremias et mabetbet a nipaarap ed oniaran subok. Nagunggonaan kan maong no aralen mo so nipaakar ed pigaran indibidual tan grupo ya apilimogan nen Jeremias legan na impanlingkor to. Arum ed saratan so analin manismaya ed sikato pian agto nasumpal so asainmin to. Siempre, kaukolan toy sagpaminsan a milimog ed sikara, balet seguradon aliwan sikaray pinili ton kakaaro. Anggaman ontan, nagunggonaan kayo no imanoen yon maong no anton klase na kakaaro so pinili nen Jeremias, salanti, saramay anuporta tan amabiskeg ed determinasyon ton manmatoor. On, makaaral itayo ed saray desisyon nen Jeremias nipaakar ed kaulop.

ANTON PIKAKAARO SO BABAYUBOAN MO?

3. Antoy labay nen Zedekias a gawaen nen Jeremias, tan antoy reaksion nen Jeremias?

³ Aminpigan pinmanon si Arin Zedekias ed si Jeremias antis a naderal so Jerusalem. Akin? Lapud iilaloan na ari so pakaawat na panamaseguro ed saray tepet to nipaakar ed pansumpalay panarian to. Labay ton say iyabawag nen Jeremias et onsalet so Dios pian niliktar so Juda manlapud saray kalaban to. Panamegley na saray ibabaki to et oniay inyey-ey to’d si Jeremias: “Kerewen ko ed sika, ed kinen Jehova nipaakar ed sikami; ta si Nabucodonosor ya ari na Babilonia manggawa na bakal sumpa ed sikami. No bilang si Jehova managamil ed sikami unong na saray amin a makapakelaw a gawa to, pian [si Nabucodonosor et] onla a manlapu ed sikatayo.” (Jer. 21:2) Agtinulok na ari so imbaga na Dios ya isuko to lay panarian to ed Babilonia. Inyaliling na sakey ya iskolar si Zedekias ed “sakey a pasyenten pawil lan pawil ed doktor pian naseguroy iyabig to, balet agto labay a tomaren so inreseta ed sikato.” Komusta balet si Jeremias? Naala to komoy pabor nen Zedekias no say ibaga to et samay labay na arin narengelan. Akin balet ya agsinalatan nen Jeremias so mensahe to pian oninawa lay bilay to? Agto itan ginawa lapud say papaiyabawag nen Jehova ed sikato et say kaderal na Jerusalem.​—Basaen so Jeremias 32:1-5.

4. Antoray dedesisyonan tayo nipaakar ed pikakaaro, a singa diad pasen na trabaho?

⁴ Nayarin miparay kipapasen mo ed si Jeremias. Seguradon nakakatongtong mo iray kakaabay, katrabaho, odino kaeskuelaan mo, tan natural labat a napilimogan mo ra. Balet, paaralemen mo ni kasi itan ya ulopan, a mikaaro ka’d sikara anggano impatnag da la ya ag-ira interesadon ondengel odino ontulok ed Dios? Agsigpot a napaliisan nen Jeremias si Zedekias ta sikato ni so ari, anggaman agto labay a tumboken so simbawa na Dios. Balet, ag-obligado si Jeremias a mipakna ed lingon kanonotan na ari odino panggunaetan ya alaen so pabor to. No ginawa to labat komon so panlabayan na ari, seguradon sikatoy makaawat na dakel a regalo tan arum niran benepisyo. Ingen ta agnampaapekto ed antokaman a desdes odino tukso pian magmaliw a maapit ed ari. Akin? Lapud agton balot salatan so papaibaga nen Jehova ed sikato. Say alimbawa to so nepeg a mamakiwas ed sikatayon manusisa no kasin saramay pikakaaroan tayo et makatulong ed panmatoor tayo’d Dios. Agmo napaliisan so pitongtong ed saramay agmanlilingkor ed Dios a walad pantratrabahoan, eskuelaan, odino diad lugar mo. (1 Cor. 5:9, 10) Balet kabat mo a no saratan so pilien mon magmaliw a kakaaro, naderal so pikakaarom ed Dios.

KASIN MIKAARO KA ED SARAY MANDUARUWA?

5, 6. Antoy ginawa na saray totoo pian patundaen si Jeremias?

⁵ Aliwan si Zedekias labat so nanggunaet ya anesdes ed kinen Jeremias. Wadtan met so sakey a saserdoten manngaran na Fasur ya ‘angabil’ ed si Jeremias, anganko diad impangiganggan ton siplatan na 39 a danay. (Jer. 20:2; Deu. 25:3) Wala met iray Judion prinsipe ya angabil ed sikato tan kayari to et inloob da ed “panangipangawan.” Mair-irap so kipapasen to’d satan a kulongan, a kalabas na dakel ya agew et sikatoy natatakot ompan sikatoy ompatey la ditan. (Basaen so Jeremias 37:3, 15, 16.) Balet, kayari na aganon inkibulos to, wala lamet iray prinsipe ya anugsog ed ari a sikatoy pateyen. Diad panmoria ra et papakapuyen toy liknaan na saray armada na Juda. Kanian imbantak day propeta ed mapitek a bobon pian ompatey. (Jer. 38:1-4) Abasa yon aliktaran to itan a makapasinagem ya ipapatey. Balet saratan ya agawa so mangipapanengneng a saramay amta da komon so duga et ag-anisia ed imbagay propeta na Dios, imbes, sikara ni ingey sinmumpa ed sikato.

⁶ Aliwa labat a saray opisyal so sinmumpa ed kinen Jeremias. Diad sakey ya inkagawa, walaray lalakin taga Anatot, nayari pa lagin kakaabay to ni ingen, ya angibagan sikatoy pateyen da no ag-ontundan manpropesiya. (Jer. 11:21) Agda labalabay so ibabaga to kanian sikatoy pinagyaw da. Balet ta say pinili nen Jeremias a pikaaroan et si Jehova, imbes a saray kakaabay to. Wadtan met iray kapanaonan to ya analin mangabil ed sikato. Sanen angusar si Jeremias na pako bilang ilustrasyon diad impanangguyor to’d saray Judio a kaukolan day manpasakop ed ari na Babilonia pian manbilay ira, inala nen Ananias so kiew a pako ed tenger nen Jeremias tan pinuter to. Unong ed satan a palson propeta, say imbaga nen Jehova et: ‘Puteren ko so pako na ari ed Babilonia.’ Balet diad saman a mismon taon et inatey si Ananias, kanian amta yo la no siopay tuan propeta. (Jer. 28:1-11, 17) Kayari na inkaderal na Jerusalem unong ya impasakbay nen Jeremias, agtinulok di Johanan tan pigaran kapitan na saray sundalo so ganggan na Dios a mansiansia ira’d Juda. Oniay imbaga da ni ingen ed si Jeremias: ‘Sikay mansasalita a sititila. Agka imbaki na Dios tayo a mangikuan, “Agkayo naani onla ed Ehipto a manayam diman.”’ Lalon sinumlang day Jehova sanen inawit day Jeremias tan Baruc ed Ehipto.​—Jer. 42:1–43:7.

7. Anton angat so kipapaarapan mo no nipaakar ed katooran ed si Jehova?

⁷ Pigay taon ya apaliberan si Jeremias na saray manduaruwa tan onsusumpa. No nodnonoten moy kipapasen to et magmainomay to la komoy mikaaro ed totoon andian na respeto ed Dios tan ed Salita To. Anggan iner a laen to et wadtan ira. Komusta balet so kipapasen mo? Anganko et akapilimog ka la ed totoon mipara ed saramay walad kaliberliber nen Jeremias. Balanglan sikaray onsusumpan maong ed sika tan ed Dios mo odino singa makalakal met iran totoo, kasin pilien mo iran magmaliw a kaaro? Kasin makabat so piulop ed totoon mangibabaliwala ed saray propesiya na Dios? No si Jeremias so walad kipapasen mo, kasin pilien ton kakaaro iramay totoon say kabibilay da et mangipupulisay ed katuaan na Salitay Dios tan say panmamatalekan da et too? (2 Awa. 19:2) Malinew ya impaamta nen Jehova ed si Jeremias no antoy pansumpalan na panmatalek ed too imbes a diad Dios. (Basaen so Jeremias 17:5, 6.) Antoy nikuan mo’d satan?

8. Mangibaga na saray angat a nayarin kipaarapan na saray Kristiano diad lugar yo.

⁸ Ipapasen na arum a Kristiano a napaaligwas day negosyo odino propesyon da no sikaray milimog tan miliket ed saray kustomer dan agmandadayew ed si Jehova. Balet, agta satan so mangipaarap ed saray Kristiano ed mauges iran kaulop tan kapeligroan, a singa say mabanday a panagsalita odino alablabas a kakainum? Kanian natalosan mo no akin a pinaliisan na dakel a Kristiano iray mauges a kaulop, anggano agda la nadampot iray posiblin pakatuboan odino ibubulaslas ed mundo. Ontan met, nayarin normal la’d sakey ya amo odino katrabaho so mansaol ed saray kustomer. Balet, saray tuan Kristiano so agnaimpluensyaan na saray totoon walad kaliberliber da. No maminsan et mairap iratan a desisyonan. Maong labat ta walaray ehemplo tayo a singa si Jeremias, a lapud napanuliranan ya impanbilay to et sikatoy awalaan na malinis a konsiensia tan nagkalalo la’d amin, say maabig a relasyon ed Dios.

9. Antoy kapeligroan na pambilay unong ed kabibilay na karaklan?

⁹ Lapud talindeg tan kombiksion nen Jeremias, sikatoy minelmelag na saray kapara ton taga Judea. (Jer. 18:18) Anggaman ontan, siansian nanliketan toy magmaliw a duma ed saray kapanaonan to a nambilay unong ed kabibilay na karaklan. (Jer. 8:5, 6) Panliketan ni ingen nen Jeremias so manbukbukor no maminsan, a ‘manyudyurong a saksakey.’ Mas labay to ni itan nen say mikaaro tan milimog ed totoon mauges so impluensya ra. (Basaen so Jeremias 9:4, 5; 15:17.) Sika balet ey? Say panaon tayo et singa met ed panaon nen Jeremias, a say kabibilay na karaklan so pakapatnagay itutunganga ed Dios. Diad amin a panaon, kaukolan a maalwar iray lingkor nen Jehova diad panagpili na kaaro. Balet, agto labay ya ibagan anggapoy kaaro nen Jeremias. Wala pa met iray totoon angidepensa tan anuporta ed sikato. Siopa iraya? Nagunggonaan kan maong no nakabat mo ira.

ANTON KLASE NA KAKAARO SO PINILI NEN JEREMIAS?

10, 11. (a) Antoran prinsipyo so angibasiyan nen Jeremias diad impanpili toy kakaaro? (b) Sioparay kakaaro nen Jeremias, tan antoray nitepet tayo nipaakar ed sikara?

¹⁰ Siopara kasi pikaaroan nen Jeremias? Diad panangiwanwan nen Jehova, aminpiga ton kinondena iramay marelmeng, managpalikdo, agmakatunongan, bayolenti, agmangiyaansakit, tan imoral, ya angikaindan ed tuan panagdayew diad impandayew da ed talintao. Kanian malinew a sikaray akikalugoran ed espiritual a paraan. Sikatoy akikasi ed saray kapara ton taga Judea: “Ompawil kayo natan balang sakey a manlapu ed mauges a dalan to, tan umanen yo so saray dalan yo tan saray gawa yo.” (Jer. 18:11) Anggan kayari inkaderal na Jerusalem et indaydayew nen Jeremias so “abig na linawa nen Jehova,” “panangasi to,” tan “katooran” to. (Tag. 3:22-24) Say labay to labat a pikaaroan et saramay matoor a lingkor nen Jehova.​—Basaen so Jeremias 17:7.

¹¹ Kabat tayo iramay pinili nen Jeremias a kakaaro. Pigara ed saratan et di Ebed-melec, Baruc, Saraias, tan saray anak nen Safan. Nayarin itepet tayo: ‘Anton klase na totoo iraya? Panon iran akapiulop ed si Jeremias? Akin a nibagan sikaray maong a kakaaro to? Tan panon dan tinulongan si Jeremias pian napansiansia toy integridad to?’ Aralen tayo itan, legan tayon sankanonot so dilin kipapasen tayo.

12. (a) Anto so namparan responsabilidad di Jeremias tan Baruc, unong a nilitrato’d pahina 58? (b) Siopa si Saraias, tan anto so amta tayo nipaakar ed sikato?

¹² Mabitar a say maapit a kaaro na propeta et si Baruc ya anak nen Nerias. Matalek si Jeremias ya angipasakbat ed sikato na responsabilidad a mangisulat ed idikta ton mensahe nen Jehova. Kayari to, satan a lukot so basaen a maksil nen Baruc ed publiko tan diad saray prinsipe na Juda. (Jer. 36:4-8, 14, 15) Walaan na parehon pananisia tan kombiksion si Baruc tan Jeremias a nagawan-nagaway impasakbay na Dios. Namparay naeksperiensya ra diad kaunoran lan 18 taon na magulon kipapasen ed Juda. Abayag iran saniba a nankimey ed inter na Dios ya asainmin da. Asagmak dan dua iray kairapan tan kaukolan dan iyamotan iray kalaban da. Ontan met, akaawat iran dua na personal a panamaseseg nen Jehova. Mapatnag a si Baruc et nanlapud prominentin pamilya na saray eskriba ed Juda. Sikatoy tinawag na Kasulatan a “say eskriba” odino sekretaryo, tan say agi ton si Saraias so walaan na atagey a posisyon ed palasyo. Singa si Baruc, diad saginonor et nankimey si Saraias a kaibay Jeremias pian ipasabi iray mapropetikon mensahe nen Jehova. (Jer. 36:32; 51:59-64) Say inkamabulos na sarayan anak nen Nerais a mikimey ed si Jeremias ed saraman a mairap a panaon so seguradon amabiskeg tan amaseseg ed propeta. Napabiskeg tan napaseseg kayo met na saramay kaiba yon matoor a manlilingkor ed si Jehova.

13. Panon a pinaneknekan nen Ebed-melec a sikatoy maong a kaaro nen Jeremias a singa nilitrato ed pahina 63?

¹³ Si Ebed-melec so sakey met ed saray maapit a kaaro nen Jeremias. Sanen imbantak na mansyodot iran prinsipe si Jeremias ed nakatan a bobon pian ompatey, say nampakpel ya angiliktar ed sikato et sakey a dayo, si Ebed-melec ya Etiope. Sikatoy sakey ya eunoko ya opisyal ed palasyo na ari. Diad arap na totoo et inasinggeran toy Zedekias, ya akayurong ed Wangalan na Benjamin. Makpel ton kinerew so permiso na ari pian agwaten si Jeremias manlapud mapitek a bobon. Pian nagawaan to itan, sikatoy angitagar na 30 a lalaki, lapud iisipen to ya ompan walaray kalaban nen Jeremias a mangamper ed sikato. (Jer. 38:7-13) Agtayo amta no panon kabetbet so impakapanulop di Ebed-melec tan Jeremias. Balet, lapud pikakaaro ra’d si Jehova, makatunongan labat a nibaga tayon sankaaro ran maong. Amta nen Ebed-melec a si Jeremias et propeta nen Jehova. Imbaga ton “mauges” so ginawa na saray prinsipe tan akaparaan a mangirisga ed posisyon to pian gawaen so duga. Talagan maong a too si Ebed-melec. Kanian, si Jehova a mismo so amaseguro ed sikato: “Ilaban ta ka naani ed [agew na kaderal na Jerusalem] . . . lapu ed nanmatalek ka ed siak.” (Basaen so Jeremias 39:15-18.) Agaylan panamaseguro! Agta ontan a klase na kaaro so labay mo?

14. Anto so amta tayo nipaakar ed pamilya nen Safan, tan panon dan tinulongan si Jeremias?

¹⁴ Kaiba met ed saray kakaaro nen Jeremias so taloran anak tan sakey ya apo nen Safan. Pamilya ira na lalakin walaan na atagey a posisyon, lapud datin sekretaryo nen Arin Josias si Safan. Sanen implano na saray kalaban nen Jeremias a sikatoy pateyen, “say lima nen Ahikam ya anak a laki nen Safan, wala nensaman ed kinen Jeremias, pian sikato komon so agda yawat ed lima na baley.” (Jer. 26:24) Wala met so agi nen Ahikam a manngaran na Gemarias. Sanen binasa nen Baruc ed publiko iray panangukom na Dios, wadman si Micaya ya anak nen Gemarias. Kanian impasabi to itan ed ama ton Gemarias tan ed arum niran prinsipe. Lapud natatakot ira ed gawaen nen Arin Joacim, imbaga da ed Jeremias tan Baruc a sikaray onamot. Tan sanen ag-inawat na ari so mensahe na Dios, si Gemarias so sakey ed saramay akikasi ed ari ya agto popoolan so lukot. (Jer. 36:9-25) Si Elasa, ya anak nen Safan, so angimatalekan met nen Jeremias ed mapropetikon sulat parad saray Judion akautibo ed Babilonia. (Jer. 29:1-3) Kanian diad pamilya labat nen Safan et pigara lay anuporta ed propeta, taloran anak tan sakey ya apo. Agaylay pisasalamat nen Jeremias ed saratan a lalaki! Sikaray sankakaaro aliwan lapud parehoy labay dan kanen odino inumen, nisay pareho so labay dan panligliwaan odino hilig. Wala ni mas malet a basiyan na pankakaaro ra.

MAKABAT A PILIEN IRAY PIKAAROAN MO

15. Anton maabig ya ehemplo so impanengneng nen Jeremias diad panagpili na kakaaro?

¹⁵ Walaray naaralan tayo ed impideneng nen Jeremias ed saray kapanaonan to, maong man odino mauges a totoo. Sikatoy dinesdes na ari, dakel a prinsipe, palso iran propeta, tan saray kapitan na sundalo ya umanen so mensahe to. Balet ta sikatoy agbalot akikompromiso. Aglabay na sarayan totoo si Jeremias lapud talindeg to parad tuan panagdayew, ingen ta aliwan sikaray labay ton pikaaroan. Nanlapu la’d gapo, say sankaapitan a kaaro to et si Jehova. No say katooran to ed Dios to so sengegay pamasegsegang ed sikato na totoo, sikatoy akaparaan a managmak ed satan. (Basaen so Tagleey 3:52-59.) Anggaman ontan so agawa, naaralan tayon agbukbukor nen Jeremias so determinadon manlingkor ed si Jehova.

16, 17. (a) Anton tulong so naawat na lingkor nen Jehova manlapud maabig a kaaro? (b) Inerman so kawalaan mo, iner so pakaromogan moy maabig a kakaaro?

¹⁶ Si Ebed-melec so maong a kaaro lapud sikatoy walaan na pananisia tan panagmatalek ed si Jehova. Sayan laki so makpel a kinmiwas a tampol pian iliktar so bilay nen Jeremias. Maliket si Baruc ya angusar ed panaon to a mikimey ed si Jeremias tan sikatoy tinmulong pian ipasabi iray mensahe nen Jehova. No panon a pinabpabli irayan lalaki, ontan met iray maong a kakaaro diad Kristianon kongregasyon. Pisalsalamatan nen Cameron, sakey a regular payunir a manedad na 20 so maabig ya impluensya ed sikato nen Kara, sakey met a payunir. Inkuan nen Cameron: “Diad panamegley na alimbawa tan salita nen Kara et papasesegen to ak ya iyuna ed bilay ko si Jehova.” Nanarawian so panaayaman na sarayan agagin bibii, balet mabetbet ya ontatawag tan mansusulat si Kara pian seguroen a maabig so kipapasen na kaaro to tan makapanpapasesegan ira. “Kabisado toy kipapasen na pamilya mi,” kuan nen Cameron. “Amta toy nagagawa ed si atsik, tan say aliknak ya ermen sanen nanrebelde tan tinaynan nen atsik so katuaan. Diad amin na sayan agawa et sikatoy lawas a walad dikingan ko, tan no aliwa labat lan lapud maabig ya impluensya tan tulong to et agko amtay gawaen ko. Talagan pandinayewan koy impanulong to’d siak.”

¹⁷ Makaromog ka na saray maong a kaaro diad loob na Kristianon kongregasyon, kaedaran mo man odino andi. Say pananisiam, saray prinsipyom, panangarom ed si Jehova, saray ilalom, tan nayarin pigara’d saray pakakasubokan mo et mipara ed saray agagim a lalaki tan bibii. Makapankimey kayon saniiba diad Kristianon ministeryo. Nayarian da kayon pasesegen sano manasagmak kayoy kairapan, tan nagawaan yo met itan ed sikara. Miliket ira ed sikayo diad saray maabig a resulta na panaglingkor yo ed si Jehova. Niarum ni, say ontan a pankakaaro et nayarin mansiansia ed ando lan ando.​—Uli. 17:17; 18:24; 27:9.

18. Anto so naaralan mo ed impanpili nen Jeremias na kakaaro?

¹⁸ Nepeg a malinlinew ed sikatayo so naaralan tayo ed panagpili nen Jeremias na kakaaro. Tandaan iyan agniburin katuaan: Talagan agkayo makapansiansian matoor ed saray kombiksion yo no mikaaro kayo’d totoon saray sisisiaen da et sumlang ed ibabangat na Biblia. Say pambilay unong ed satan a katuaan so importantin maong natan, a singa ed panaon nen Jeremias. Pian matoor ton nagawaan so asainmin to tekep na pananulong nen Jehova, mabulos si Jeremias a magmaliw a duma ed saray maslak a kapanaonan to. Agta tua met itan ed kipapasen yo? Saray kaaron pinili nen Jeremias et saramay mipara ed pananisia to tan saramay anuporta ed sikato pian nasumpal so asainmin to. On, makaaral so balang matoor a Kristiano natan ed makabat a panagpili nen Jeremias na kakaaro!​—Uli. 13:20; 22:17.