Imbaki nen Jehova si Jeremias ya Manpulong

Pinili nen Jehova si Jeremias pian magmaliw ya propeta diad Juda. Ingganggan nen Jehova ya pulongan to ray totoo tan ibaga tod sikara ya tundaan da lay manggawa na mauges. Balet, imbaga nen Jeremias ed si Jehova: ‘Ugaw ak ni. Agko amtay ibagak ed totoo.’ Imbaga nen Jehova ed sikato: ‘Agka natatakot. Ibangat ta ka no antoy ibagam. Tulongan ta ka.’

Imbaga nen Jehova ed si Jeremias ya tiponen to ray mamatatken tan betagen tod arapan da so sakey a buyog, insan to ibaga: ‘Nabetag met so Jerusalem ya singa sayan buyog.’ Nen ginawa nen Jeremias so imbaga nen Jehova, mamapasnok ya maong iray mamatatken. Walay saserdote ya say ngaran to et Pasur ya pinekpek toy Jeremias tan sinigpit to na tabla iray lima tan sali nen Jeremias. Kanian sanlabi ya agmakagalaw si Jeremias. Kaimbuasan to, imbulos la nen Pasur si Jeremias. Imbaga nen Jeremias: ‘Agko la sarag. Agak la manpulong.’ Balet talaga kasin tinmunda ya nampulong? Andi. Nanisip lamet si Jeremias, insan to imbaga: ‘Say mensahe nen Jehova et singa apoy ya walad loob ko. Kaukolan koy manpulong.’ Kanian tuloytuloy ya nampulong si Jeremias.

Kalabas na pigaran taon, sananey la so ari na Juda. Kakkabusol na saray saserdote tan palson propeta si Jeremias lapud samay ipupulong to. Imbaga dad saray prinsipe: ‘Pateyen tayo la yan too.’ Imbaga nen Jeremias: ‘No pateyen yo ak, mankasalanan kayo ta anggapoy ginawak ya mauges. Amin ya ibabagak ed sikayo et manlalapud si Jehova, aliwan diad siak.’ Nen arengel itan na saray prinsipe, imbaga ra: ‘Agtayo nayarin pateyen iyan too.’

Agtinmundan nampulong si Jeremias, kanian mamapasnok iray prinsipe. Imbaga dad ari ya ipapatey toy Jeremias. Imbaga na ari ya akauley la ra no antoy labay dan gawaen ed si Jeremias. Inala day Jeremias insan da impelag ed aralem tan mapitek ya bobon, pian ditan la ompatey. Kalkalnan linmereg si Jeremias.

Nen naamtaan itan nen Ebed-melec a sakey ya opisyal ed palasyo, imbaga tod ari: ‘Impelag na saray prinsipe si Jeremias diad bobon! No paulyanan tayo, ompatey diman.’ Ingganggan na ari si Ebed-melec ya mangipila na 30 ya lalaki tan agwaten dad bobon si Jeremias. Agtinmundan nampulong si Jeremias anggan antoy nagawa. Balibalin aligen so ginawa to, awa?