Agtinmunda si Jeremias ya Istoryaen si Jehova

No maminsan, eelek-elekan itayo na totoo o mansyodot ira no istoryaen tayod sikara si Aman Jehova. Kanian singa agtayo la labay ya istoryaen ed sikara so Dios. Asalim met la tan?— Nabasa tayod Biblia so istorya na sakey a balolaki ya inaro toy Jehova balet agto la lawari labay ya bitlaen si Jehova. Say ngaran to et Jeremias. Amtaen tay istorya to.

Nen medyo ugaw ni si Jeremias, imbaga nen Jehova ed sikato ya dapat ton bagaan iray totoo ya ontunda la ran manggawa na mauges. Mairap iya parad si Jeremias ta natatakot. Imbaga tod si Aman Jehova: ‘Agko amtay ibagak ta ugaw ak ni.’ Pero imbaga nen Jehova: ‘Agka natatakot ta tulongan ta ka.’

Kanian binagaan nen Jeremias iray totoo ya naparusaan ira no ag-ira manguman. Dinengel kasi na totoo si Jeremias?— Andi. Inelek-elekan da tan mansyodot irad sikato. Labay ingen na arum ya pateyen si Jeremias! Anto kasi alikna to?— Natatakot kanian imbaga ton: ‘Agko la bitlaen si Jehova.’ Pero sinmuko la kasi?— Andi. Ta inad-aro toy Jehova kanian aga tinmundan istoryaen si Jehova. Tan lapud agsinmuko, sikatoy inligtas nen Jehova.

Singa bilang, aminsan et imbantak na mauges a lalaki si Jeremias diad aralem ya abot ya mapitek. Anggapoy naakan tan nainum to. Labay dan ompatey lad man. Pero tinulongan nen Jehova ya makaligtas!

Antoy naaralan mod si Jeremias?— Anggano no maminsan et natatakot si Jeremias, agtinmundan istoryaen si Jehova. Sika met, no istoryaen moy Jehova, nayarin elek-elekan ka na totoo o mansyodot irad sika. Ompan nabaingan ka o nataktakot ka. Pero, agka ontutundan istoryaen si Jehova. Lanang to kan tulongan, ya singa si Jeremias.