Paaligwasen Iray Abilidad Tayod Ministeryo​—Irekord no Walay Angipanengneng na Interes

“Imanom a naynay so inkasika tan say ibabangat mo.” (1 Tim. 4:16) Ipapanengneng na sayan impuyan ya simbawa nen apostol Pablo ed si Timoteo ya balanglan balo tayo nid katuaan odino abayag la, kaukolan tayoy mansagpot pian onaligwas. Pian nagawaan tayo itan, walay balon serye ed Ministeryo Tayo ed Panarian ya say tema to et “Paaligwasen Iray Abilidad Tayod Ministeryo.” Diad kada artikulo et pantongtongan so sakey ya importantin abilidad, tan walay pigaran suhestion no panon a napaaligwas itan. Legan na satan a bulan, amin tayo et napaseseg ya paaligwasen itan ya abilidad. Kayari na satan a bulan, diad sakey a parte diad Pantitipon Parad Panagserbi, walay pankanawnawa tayon mankomento no panon tayon agunggonaan ed impanpokus tayod satan ya abilidad. Diad sayan bulan, papasesegen itayon man-rekord no walay angipanengneng na interes.

No Akin ya Importante: Pian nasumpal tayoy ministeryo tayo, agti labat basta manpulong. Kaukolan tayon pawilen iramay interesado tan ibangat ira, salogen tayo ray bini na katuaan ya intanem tayo. (Mat. 28:19, 20; 1 Cor. 3:6-9) Kaukolan tayon anapen lamet imay too, pantongtongan iray paninteresan to, tan ituloy imay inmunan apantongtongan. Kanian no makalmo tayoy interesado, importantin man-rekord tayo.