Seguroen ya Ompawil Kayo!
1 “Balibali impitongtong ko! Ompawil ak ya ompawil diman.” Kasin nibalikas yo la iratan, insan alingwanan yo la so panaayaman na toon akatongtong yo? No ontan, say saksakey labat a dalan pian naseguro yon makapawil kayo et say pangisulat ed satan.
2 Isulat ya Amin: Leleg a presko ni ed nonot yo so impitongtong ed interesadon too, isulat a magano so amin ya importantin impormasyon nipaakar ed indalaw. Ilista so ngaran na too tan say pakabidbiran yo ed sikato. Isulat so address to, balet ta agpapalbengan—seguroen yon dugay insulat yo. Ilista so tema a nantongtongan yo, dinanman a tekston binasa yo, tan say nipalima a literatura.
3 No intilakan yo na tepet so too pian ebatan ed ipawil yo, isulat itan. Kasin walay naamtaan yo nipaakar ed too, say pamilya to, odino say relihyon to? No ontan, ilista itan. Insan diad ipawil yo, say pamitla yo ed satan so mangipatnag na personal ya interes yo ed indibidual. Kaunoran, ilaktip so agew tan oras na inmunan indalaw yo tan no kapigan so ipawil yo. Diad suston panlista, nawalaan kayo na malinew a panonot tan mairap yo lan nalingwanan so insipan yon ompawil.—1 Tim. 1:12.
4 Bektan kompleto la so rekord yo, yan itan ed arum ya usaren yo parad lawak na kimeyan—say bag, Biblia, libron Reasoning, tan literatura—ta pian kakaalan naynay. Sankaabigan so pangirekord ed andi’d-abung diad house-to-house record a biig ed saramay pangisusulatan yo na saray papawilen yo. Siempre, nilikud ed kimey ya insimpen yon suston rekord na saray papawilen, say importantin bengatla et seguroen ya ompawil kayo!
5 Nonoten so Nipaakar ed Too: Sano manparaan a manpulong, repasoen yo iray inlista yon pawilen. Nonoten so nipaakar ed indibidual tan no anton iyaasingger so nayarin sankaabigan ya usaren sano ompawil. Isipen no panon a nabayuboan so interes na too diad panagaral na Biblia. Say ontan a panplano so mamadaak na inkamabunga yo bilang ministro na maong a balita tan, ontan met ed dilin gayaga yo.—Uli. 21:5a.
6 Kanian no ontumbok a makaromog kayo na madengedengel, agyo irarason a mainomay yon nanonotan so indalaw yo. Imbes, isulat itan, repasoen iray inlista yo, nodnonoten so nipaakar ed too, insan seguroen ya ompawil kayo!