Tulongan Iramay “Suston Nikiling”
1. Siopara so ititipon nen Jehova ed inkasikato diad panaon tayo?
1 Kada too et walaan na disposisyon a nigalet ed piguratibon puso to. (Mat. 12:35) Sinalambit na Biblia so nipaakar ed sakey a too a say “bakal so wala nensaman ed dalem na puso to.” (Sal. 55:21) Arum so ‘mapetang a too.’ (Uli. 29:22) Balet, wala met iramay “suston nikiling ed andi-anggaan a bilay.” (Gawa 13:48, NW) Diad panaon tayo et ititipon nen Jehova ed inkasikato irayan indibidual a suston nikiling. (Ag. 2:7) Panon tayo ran natulongan a magmaliw a managdayew ed si Jehova?
2. Anto so nalalanor ed panumpal ed ganggan ed sikatayon manggawa na saray babangatan?
2 Pampelengan so Ompawil: Makana so pakawalaan na suston panmoria ed panggawa na saray panagpawil pian nasumpal tayo so ganggan ed sikatayon manggawa na saray babangatan. (Mat. 28:19, 20) Kasin maseet tayon babayuboan so interes ya aromog tayo? Kasin papawilen tayo iraman so angawat na literatura odino angipatnag na interes ed maong a balita? Kasin ag-itayo ontutundan mansasagpot pian tulongan iran onaligwas ed espiritual? Lapud bilay so nalalanor, nepeg tayon panggunaetan a bayuboan so amin ya interes ya aromog tayo.
3. Anto so nepeg tayon gawaen kayari na impitongtong ed sakey a too diad ministeryo?
3 Legan a tariwa ni ed nonot mo so impitongtong mo ed interesadon too, isulat mon magano so ngaran tan address to. Isulat so teman nantongtongan yo, saray teksto a binasa, tan no anton literatura so nipalima. Kayari na satan, seguroen ya ompawil kan tampol anggad posible.
4. Panon itayon makapanggawa na saray epektibon panagpawil?
4 Panggawa na Panagpawil: Sano ompawil ka, makatulong no sikay magmaliw a maligsa tan makaaro tan ipatnag mo so masimoon a personal ya interes ed unabung. Pansiansiaen a simpli tan Makasulatan so tongtongan. Mangiparaan na makapasagyat a tema ed Biblia a singbaten, tan sano manpatanir ka la, mamalesa na tepet ya ebatan ed ontumbok ya idalaw. Maabig no paliisan so pisangsangan ed saray agmakasulatan a panmoria ya imbalikas na unabung. Panggunaetan ya isentro so tongtongan ed saray bengatlan pampaknaan yo.—Col. 4:6.
5. Anton impansagpot so ginawa na sakey a payunir, tan antoray resulta?
5 Nakaukolan so sagpot ed panggawa na saray panagpawil, balet saray tumang so makapenek. Sakey a payunir ed Hapon so angiletneg na kalat a manggawa na dakel a panagpawil kada bulan. Ginapoan ton inrekord so amin ya akatongtong to diad panagkabkaabungan, insan diad loob na pitoran agew et pinawil to ira. Imparaan ton maong no anto so ibaga to tan sinumpal to so serbisyo to tekep na sigpot a kompiyansa ed tarok ton mensahe. Legan na sakey ed saray indalaw to, nigapo to so panangiyaral ed Biblia ed sakey a too ya angikuan ed sikaton: “Siak so naynay ya agmangaawat ed sikayoran totoo. Saya so primeron pankanawnawa a dinmengel ak.” Say maaron panag-anos na payunir so awalaan na maabig a resulta. Diad sampot na bulan, sikatoy akapangireport na samploran iyaaralan na Biblia.
6. Akin a nepeg itayon manseet a manggawa na saray panagpawil?
6 Lawas manguuman iray kipapasen na saray totoo. (1 Cor. 7:31) Mabetbet a nakaukolan so maminpigan ipawil pian naromog lamet so interesadon too diad ayaman to. Diad mapeleng a panggagawa tayo na saray panagpawil, natulongan tayo iraman so suston nikiling a mankurang ed dalan a mamaarap ed bilay ya andi-anggaan.—Mat. 7:13, 14.