Saray Panagpawil so Mangitonton ed Panangiyaral na Biblia
1. Akin ya importantin maong so panagpawil a kimey?
1 Ingganggan nen Jesus iray patumbok to ya ag-ira lambengat manpulong noagta sikara met so ‘manggawa na saray babangatan tan bangatan ira.’ (Mat. 28:19, 20) Say managpulong et mangiyaabawag, balet say managbangat et nagkalalo ni so gagawaen to. Sikatoy mamibilin, mangisasalaysay, tan mangiiter na prueba. Say sakey a paraan pian nibangat tayo so arum et diad ipawil ed saray interesado tekep na kalat a nigapo ed sikara so panangiyaral na Biblia.
2. Siopa iray nepeg tayon dalawen lamet?
2 Siopa iray nepeg yon pawilen? Seguroen a dalawen lamet so amin ya angawat na literatura odino angipanengneng na anggan samet ya interes ed maong a balita. No akaromog kayo na interesado diad impanpulong yo ed mapublikon pasen, panggunaetan ya alaen so address odino numeroy telepono to ta pian nabayuboan so interes. Magmaliw a positibo ed panangigapo na saray panangiyaral na Biblia. Mantultuloy ya anapen iramay mangawat ed opresin panagaral na Biblia, tan maseguron naromog yo ira.—Mat. 10:11.
3, 4. Anto so nalalanor ed epektibo iran panagpawil?
3 Mangipanengneng na Personal ya Interes: Say panagparaan parad epektibon panagpawil so onggapo la ed unonan dalaw. Saray matalonan ebanghelisador so mangiimano ed paninteresan na unabung ta satan so pinagkabasiyan da parad kaaruman iran diskusyon. Aromog na arum a makagunggona so pamalesa na tepet sakbay na panpatanir ta pian nasagyat so interes na unabung parad ontumbok ya ibisita. Lapud masimoon ya interes tayo ed totoo et sikaray nodnonoten tayo anggan kayarin tinaynan tayo la so unabung, tan dagdagen itayo na satan ya ondalaw lamet ya agla ibayanbayan. No posibli, panggunaetan so ipawil legan a say interes et ampetapetang ni—nayarin diad loob na sakey odino duaran agew.
4 Sano ompawil, panggunaetan a palaknaben so apalabas a nantongtongan yo. Gawa yon kalat so panginabang na anggan sakey a makapabiskeg a Makasulatan a punto kada dalaw, tan mabulos ya ontalineng. Nagkalalon kabaten so unabung. Insan diad onggendan iran ibibisita et inabang iray katuaan a manlalapud Salitay Dios a direktan nisisiglaot ed saray pampapagaan to.
5. Anton simplin paraan so nausar diad pangigapo na saray panangiyaral na Biblia?
5 Sinononot ed Pakapangigapoy Panangiyaral ed Biblia: Manggaway panagpawil diad getman mangigapo na panangiyaral na Biblia. Panon iyan nagawaan? Saglawien a labay yoy manginabang na sakey a makapainteres a punto, tan gapoan ed sakey a parapo diad libron Pikakabat odino brosyur a Kakaukolanen ya isipen yon managyat ed too. Basaen so parapo, konsideraen so tepet, tan maningbat na sakey odino duara ed saray nisitan teksto. Nagawaan iya diad pitongtong ed sikato diad mismon puerta diad loob na limara anggad samploran minuto. Sampotan itan diad pangitepet ed onsublay a tepet tan pangiyareglon ituloy so diskusyon diad ontumbok a panaon.
6. Panon tayon nipanengneng a natatalosan tayo so kaimportantian na panggawa na saray panagpawil?
6 Say pamayubo ed amin ya aromog tayon interes so importantin aspekto na ministeryo tayo. Kanian, mangigana na panaon ed sinimban eskedyul yo parad panggawa na saray panagpawil. Diad ontan et lalon epektibo so ministeryom tan petepeteg a manggayaga ka.