Panagparaan—Makatulong Pian Epektiboy Panagpawil
1. Diad anton paraan a napalaknab so ministeryo na saray inmunan Kristiano?
1 Imparaan a maong nen Jesus iray babangatan to pian magmaliw ya epektibon managpulong na “ebanghelyo na panarian.” (Mat. 4:23; 9:35) Agawa itan a panagpasal diad pasen na Palestina. Balet, antis a sinmegep ed tawen, impaamta nen Jesus a say Kristianon ministeryo so onlaknab ta pian ‘makapanggawa na saray babangatan ed amin a nasyones.’—Mat. 28:19, 20.
2. Antoy nalalanor ed pangunor ed ganggan nen Jesus a ‘manggawa na saray babangatan’?
2 Nalalanor ed satan a kimey so panagpawil ed saray totoo ya angipanengneng na interes ed maong a balita na Panarian na Dios tan ibangat iran mangunor ed amin a bengatlan inganggan nen Kristo. Pian epektibo so panagpawil, kaukolan tayoy manparaan a maong.
3. Anggan diad unonan ibisita, panon yon nilukas so panagpawil?
3 Manplanon Masakbay: Panggugunaetan na arum a manangipalapag so pantepet antis iran manpatanir insan isipan day ompawil pian pantongtongan so ebat. Naimano ra a say pangusar ed impormasyon a walad libron Ibabangat na Biblia diad panagpawil so akatulong ed sikaran nigapo a tampol so panagaral na Biblia.
4. Akin ya agtayo ipaleen so ompawil ya iyalagar ni ed saray balon isyu na magasin?
4 Anggaman sakey-pares labat so magasin kada bulan, agto kabaliksan a manalagar itayo ni anggad naawat tayo lamet so ontumbok iran isyu antis ya ompawil. Nayarin nasagyat a nagkalalo so interes na too diad pangitongtong ed saray lugan na magasin a nipalima tayo la’d sikato.
5. Anto so gunggona no walay gagala tayo sano ompawil?
5 Nawalaan na Gagala: Antis ya ompawil, mangigana na pigaran minuto pian repasoen iray rekord yo tan amtaen no anto so labay yon nagawaan. Alimbawa, singbaten so sakey a punto manlapud publikasyon ya intilak yo nen imbeneg. Odino mangitilak na kaaruman a literatura a mitukoyan ed apantongtongan yo nen imbeneg. No nantepet kayo nen imbeneg, seguradon say gagala yo et say pangebat ed satan. Sano ipapabitar so tekston mamekder ed punto a sisingbaten, panggunaetan a basaen a direkta ed Biblia.
6. Anto so kalat tayo ed panagpawil?
6 Say Kalat Tayo: Siempre, say kalat tayo et say pangigapo na panangiyaral na Biblia. Sakey ya agi so angiyopresi na panagaral na Biblia diad impawil to, balet ta ag-inmabuloy so laki. Pinmawil so agi a walay awit ton sankabaloan iran magasin tan inkuan to, “Legan a wadia kami, eebatan mi sakey a tepet ed Biblia parad totoo natan.” Kayarin nankomento so laki, binasa na agi so teksto tan say matukoy a parapo manlapud publikasyon ya uusaren ed panangiyaral na Biblia. Nanresulta itan ed regular a panangiyaral na Biblia.
7. Panon a say pamparaan a maong so ontulong ed sikayon makapangigapo na panangiyaral na Biblia?
7 Nabawbawi so pangigana na panaon pian manparaan ed panagpawil. Magmaliw itayon lalon maliket, tan nawalaan itayo na pribilehyon ontulong ed saray interesado a manakar ed dalan ya ompugta ed bilay.—Gawa 13:48.