Kapigan so Ipawil ed Saray Interesado?
1. Antoy kalaktip ed panaggaway babangatan?
1 Say panaggawa na babangatan et kalaktip toy ipawil ed siopaman ya angipanengneng na interes a makaaral ed gagala na Panarian nen Jehova. (Mat. 28:19, 20) Say sankaabigan a panggawa na panagpawil et akadepende ed eskedyul tayo tan ed samay interesado. Akin ya ompawil tayon tampol kayari na inmunan impitongtong tayo?
2, 3. Akin et kaukolan ya ompawil itayon tampol?
2 Akin ya Ompawil a Tampol? Say panangipulong ed sayan “ebanghelyo na panarian” et asingger lan mangangga, tan asingger met lay anggaan na sayan sistema na bengabengatla. (Mat. 24:14; 1 Ped. 4:7) Kanian, legan a wala ni “agew na panangilaban” parad saray interesado, kaukolan tayon tuloken so ganggan a ‘maganat ya ipulong so salita,’ a kalaktip toy ipawil a tampol pian bayuboan so nipanengneng ya interes.—2 Cor. 6:1, 2; 2 Tim. 4:2.
3 Labalabay nen Satanas a sukiten so bukel na Panarian a nayarin nitanem tayo ed puso na sakey ya interesado. (Mar. 4:14, 15) Mabetbet a babalawen na kapamilya, katrabaho tan arum ni iramay angipanengneng na interes. Say ipawil a tampol et ontulong ed sikatayon nabayuboan so interes to sakbay ya ontalona so arum a mangekal ed satan.
4. Antoy kaukolan tayon gawaen ed unonan impakapitongtong tayo pian napawil tayo lamet imay interesado?
4 Iyuksoy so Ipawil: Sakbay kayon onalis kayari na unonan impitongtong yo, maabig no ipaamta la no kapigan so ipawil yo. Mamalesa na tepet ya ebatan ed ipawil yo. Importantin isulat iray apantongtongan tan no kapigan kayo ompawil. No walay panaon yo, nayarin kerewen so ipawil ed onsublay ya agew odino diad ontumbok iran agew. No Sabado odino Simba imay unaan ya impakapantongtong yo, tan samay interesado et mantratrabaho manlapud Lunes anggad Biernes, ompan sikatoy onabuloy a diad ontan met lanlamang ya agew so ipawil yo. No insipan yon ompawil kayo, toor yo itan.—Mat. 5:37.
5. Panon a say ipawil a tampol et ontulong ed sikatayon nasumpal imay ganggan nen Jesus a manggawa na babangatan?
5 Talagan importante so ipawil a tampol ed saray interesado. Kanian ibaga yo no kapigan kayo ompawil tan pawil kayon tampol, lapud say nakekeraan a panaon et “apatikeyan la.” (1 Cor. 7:29) No pawilen tayon tampol iramay angipanengneng na interes ed mensahe na Panarian, magmaliw a mas epektibo so kimey tayo.