Saray Panontonan Para ed Saray Manangasikaso na Eskuelaan

DIAD kada kongregasyon, sakey a matatken so aturon manangasikaso na Teokratikon Eskuelaan Parad Ministeryo. No nimatalek ed sika iyan responsabilidad, say entusiasmom parad eskuelaan tan say personal ya interes mo ed aligwas na kada estudyante so nayarin makanakana iran letnegan ed nagawaan na eskuelaan diad lokal.

Sakey ya importantin parte na asainmin mo et say pangikondukta ed sinimban Teokratikon Eskuelaan Parad Ministeryo ed kongregasyon. Lawas nonoten a niarum ed saray estudyanten walaan na asainmin ed anggan dinan ya okasyon, walaray arum nin inmatendi. Ikondukta so eskuelaan ed paraan a say interon kongregasyon so makaawat na makapakiwas, praktikal iran panonot a misiglaotan ed anggano sakey ed saray gagala na eskuelaan ya asalambit ed pahina 5 anggad 8 na sayan libron-panaralan.

Ipatnag so interes ed amin ya estudyante, balanglan sikara so akaeskedyul a walaan na babasaen ya asainmin, mangiter na singa-demostrasyon iran presentasyon, odino manpaliwawa. Tulongan iran manmoria a say gagawaen da et aliwa labat ya asainmin noagta bilang pankanawnawan napaaligwas day serbisyo ra ed si Jehova. Siempre, say personal a pansagpot da so manunan letnegan na iyaligwas da. Balet ta importante met ya ipanengneng mo so maabig ya interes, tulongan iran mantalos ed kablian na saray punton pangonsehoan, tan ipaliwawa no panon ya iyaplika so ontan a konseho. Pian nagawaan itan, ontalineng a maong ed kada paliwawa ta pian niiter mo iray makanakanan obserbasyon.

Seguroen ya igapo tan sampotan so eskuelaan ed suston oras. Ipanengneng so maabig ya ehemplo diad pangibaga ed saray dilin komentom ed loob na nigeter ya oras para ed saratan. No linmampas ed oras so paliwawa na estudyante, sika odino say katambayan mo so nepeg a maninyas. Nepeg a sumpalen na estudyante so estansa to insan ontaynan la ed plataporma. No arum a parte ed programa so linmampas ed oras, patikey moray dilin komentom, insan isingbat mo so pamaakaran ed samay agi kayari na miting.

No presente ka, nepeg mon ikondukta so eskuelaan. No bilang ta no maminsan et anggapo ka, sananey a matatken a tinuro lan akauna na ulop na mamatatken so nepeg a mangimaton ed eskuelaan. No kaukolan mo so tulong ed panagparaan ed saray eskedyul, panangisulat tan panangibunog ed saray asainmin, odino panangiyareglo ed saray kasandi ed programa, nayarin ontulong so sakey a ministeryal ya aripen a tinuro na ulop na mamatatken ed sarayan bengatla.

Pangipalista ed Saray Estudyante. Pasesegen so amin a manangipalapag a manpalista ed eskuelaan. Arum iran aktibon mililimog ed kongregasyon so nayarin manpalista no mipakna ra ed saray bangat na Biblia tan mitunosan la so bilay da ed saray Kristianon prinsipyo. No imbalikas na sakey so pilalek ton manpalista, sikato so maligsan komendaan. No say too so aliwa nin sakey a manangipalapag, sika bilang manangasikaso na eskuelaan so nepeg a mangisingbat ed sikato ed saray kakaukolanen ed panagpalista ed eskuelaan, a magmaong a gawaen so ontan diad imaton na samay mangikokondukta ed sikato na panangiyaral ed Biblia (odino diad arap na mananisian ateng). Sarayan kakaukolanen so mipara ed pagmaliw na sakey ya agni abautismoan a manangipalapag. Saratan so naromog ed saray pahina 97 ya anggad 99 na Organized to Accomplish Our Ministry. Iyapiger so sankabaloan a listaan na amin a nampalista ed eskuelaan.

Pangusar ed Porman Pakakonsehoan. Say porman pakakonsehoan a para ed kada estudyante so wala ed personal a kopya to ed libron-panaralan, diad saray pahina 79 anggad 81. Singa napatnagan ed panandaan a kolor, anggan dinan a punton pangonsehoan manlapud 1 ya anggad 17 so nayarin usaren sano naikdan so sakey ya estudyante na asainmin ed panagbasa. Para ed saray singa demostrasyon a presentasyon, anggan dinan a punton pangonsehoan nilikud ed 7, 52, tan 53 so nayarin usaren. Say konseho para ed saray paliwawa so mangilaktip ed amin a punto nilikud ed 7, 18, tan 30.

No nipabtang so sakey a punton pangonsehoan, nepeg a nengnengen na manangasikaso na eskuelaan a wala so insulat ed lapis diad leksab na “Petsan Nipabtang” diad espasyon katalontonan na punto diad porman pangonsehoan ed libro na estudyante. Kayarin ginawa na estudyante so asainmin to, pribadan tepeten no kasin ginawa to so (say/saray) panagpasal a naromog ed sampot na diskusyon ed punton pangonsehoan. No ontan, nepeg a wala so marka ed kahon diad porma. No irerekomendam ya itultuloy ton kimeyan so parehon punto ed pangonsehoan, agla kaukolan so kaaruman a nota ed porman pangonsehoan; aglabat susulatan so blanko ed “Petsa na Impakasumpal.” Nepeg labat itan a markaan sano sikato la so akaparaan ya ombaliksat ed sananey a punto. Niarum ni, diad pahina 82 ed libro na estudyante, diad nikawigin eksena a nausar, nepeg ya inota so petsa ya ontumbok ed kada paliwawa na estudyante. Wala so espasyo ed porman pakakonsehoan tan diad listaan na saray eksena a mangipalugar ed kada sakey ya usaren a mamiddua. Nepeg a sankaegnaan na saray estudyante so libro ra kaleganan na programa.

Iyasain so sakey labat a punton pangonsehoan ed panagpaliwawa. Gendagendat, maabig a kobrian iray punton pangonsehoan unong ed inkaalasir na saratan. Anggaman ontan, no ipanengneng na arum ya estudyante so nikadkaduman abilidad, sikara so nayarin pasesegen mon manaral tan mangiyaplika ed saray leksion. Insan nayarian mo ran tulongan ed saratan a punto a sisiaen mon makatulong a maong diad iyaligwas da bilang epektibon managpaliwawa tan managbangat.

Anggano dakel lan taon a mibibiang ed eskuelaan so sakey ya estudyante, sikato so nagunggonaan nin tuloy diad panagaral tan panangiyaplika ed kada leksion. Pian natulongan iray estudyante ed espesipiko iran nakakaukolan, nayarin mamili ka na pigaran kalidad ed panagpaliwawa a kimeyan da imbes a danayen iray punton pangonsehoan a nilista.

Panangiter na Konseho. Usaren a maabig iray ehemplo tan prinsipyo na Biblia sano mangiiter na konseho. Nepeg a natebek na saray estudyante a say konsehon niiter tan say paraan na inkiiter to so iwawanwan na saray atagey a prinsipyo na Salitay Dios.

Lawas nonoten a sika so sakey a ‘kakimeyan’ na saray agagim a lalaki tan bibii. (2 Cor. 1:24) Singa sikara, kaukolan mon itultuloy ya iyaplika so iyaligwas bilang sakey a managpaliwawa tan managbangat. Personal ya aralen so libron Minabang ed Edukasyon na Teokratikon Eskuelaan Parad Ministeryo, iyaplika so konseho na satan, tan mangipanengneng na maabig ya ehemplo pian gawaen met na arum so ontan.

Diad panggawam ed ontan, gawam a kalat mo so panulong ed saray estudyante a magmaliw a maong a managbasa, makayarin managpaliwawa, tan epektibon managbangat. Pian nagawaan itan, panggunaetan ya itarya so antokaman a tulong a nakaukolan ta pian natalosan na saray estudyante no antoray nanduruman kalidad ed panagpaliwawa, no akin a sarayan bengatla so importante, tan no panon so pamayubo ed saratan. Sayan libron-panaralan so nigana ed paraan ya ontulong ed sika a manggawa na satan. Anggaman ontan, nagkalalo nin mabetbet a nakaukolan ed biang mo nen say basta pamasa ed saray salita ed libro. Isingbat so ideyan ibalikas na saratan tan no panon so pangiyaplika ed satan ya ideya.

No maong so agawaan na estudyante ed sakey a punto, sikato so komendaan. Antikey ya ibaga no anto so nanggawan epektibo ed satan odino no akin a say ginawa to so importante. No nagunggonaan ed pangiter na kaaruman nin imano ed sakey a pamaakaran, seguroen ya atalosan to no akin. Isingbat no panon ton nagemtan itan a kalat. Magmaliw ya espesipiko, tan ontan met, magmaliw a mapangasi.

Bidbiren a para ed dakel, say italindeg a mangiter na presentasyon ed arap na sakey a grupo so sankairapan. No liknaen na sakey a too ya aliwan maabig so agawaan to, nayarin umamengen to no kasin nepeg to nin itultuloy a salien. Aligen si Jesus, ya agto pinuter so “kawayan a betag” odino inerep so “pabilon manasewek.” (Mat. 12:20) Ikonsidera so emosyon na estudyante. Sano mangokonseho, itukoy no kasin say estudyante so medyo balo ni odino eksperiensyado lan manangipalapag. Say maligsa tan puron komendasyon so mamabiskeg ed totoon mantultuloy a manggawa ed sankaabigan da.

Tratoen tekep na dignidad so kada estudyante. Ibabaga ed sikatayo na Roma 12:10, unong ed New World Translation: “Mangidaulo ed panangipanengneng na pampapagalangan.” Agaylan matukoy a simbawa ed sakey a managkonseho ed Teokratikon Eskuelaan Parad Ministeryo! No mas panguloan nen say sika so estudyante, maalwar ya iyaplika so panangiwanwan a niiter ed 1 Timoteo 5:1, 2. Anggan anto so edad na sakey a too, anggaman ontan, no niyopresi ed maamon paraan so konsehon mankakaukolan na panangiyarunsa ed paraan na panggawa to ed saray bengatla, mabetbet a satan so mabulos ya awaten.​—Uli. 25:11.

Sano mangokonseho, idanet ed estudyante so gagala na kipapasal. Satan a gagala et aliwan basta pangawat na komendasyon ed paliwawan niiter tan mantultuloy ed ontumbok a punto na pangonsehoan. Say kalat et aliwan say pagmaliw a sakey a managpaliwawa tan managbangat a pandinayewan na arum. (Uli. 25:27) Say pilalek tayo et say pangusar ed langkap na panagsalita tayo diad pangidayew ed si Jehova tan diad panulong ed arum a mangamta tan mangaro ed sikato. Say panagpasal tayo et pian natulongan itayon makapanggawan epektibo ed kimey a nidatak ed Mateo 24:14 tan 28:19, 20. Saray bautismadon agagin lalaki ya onkualipika so nayarin nasabi panaon et naimbitaan iran mibiang diad panangasikaso ed “pulok na Dios” bilang managpaliwawa ed publiko tan managbangat.​—1 Ped. 5:2, 3.

Isuheri ed saray estudyante a basaen da so libron-panaralan a manisingbat ed ontumbok a punton pangonsehoan diad loob na pigaran agew kayari inkipabtang na satan. Pasesegen iran mangiyaplika ed naaralan da sano ipaparaan da so parte ra diad eskuelaan, diad inagew-agew a pitotongtong, diad pankokomento ed saray miting, tan diad lawak na kimeyan.

Panggawa na Saray Asainmin. Gendagendat a saya so kaukolan a gawaen nayarin taloran simba ed masasakbay. Kaukolan ya isulat so amin na saratan ya asainmin no nayari.

Saray parte a manasaglawi ed panangibangat ed kongregasyon so nepeg ya ipabtang ed saray mamatatken, magmaong no saraman so epektibon makapangiparungtal ed saratan a parte, tan diad saray ministeryal ya ariripen ya epektibon managbangat.

Diad panitermina no dinan iran paliwawa na estudyante so ipabtang ed agagin lalaki tan no dinan so para ed agagin bibii, tumboken so nitaryan instruksion a walad eskedyul ed eskuelaan. No pigpigara so agagin lalaki balet ta amayamay so agagin bibiin walaan na betang parad estudyante, asikasoen so pangiyabuloy ed saray agagin lalaki na magenap a pankanawnawan mangiter na saray paliwawa ya aliwan panagbasa labat ed Biblia.

Konsideraen iray sirkumstansya na sinansakey sano gagawaen iray asainmin. Kasin nakaukolan a pabtangan so sakey a matatken odino ministeryal ya aripen a mansalita ed eskuelaan diad parehon labi a walaan met na asainmin ed Service Meeting odino diad parehon simba a walaan na paliwawa ed publiko diad kongregasyon? Kasin nakaukolan a pabtangan so sakey ya agin biin mangiter na presentasyon diad parehon labi a walaan met na asainmin so sakey ed saray ankelag ya anak to a kaukolan ton tulongan? Nagkalautla ed kipapasen na sakey a walad kalangweran odino sakey ya estudyante na Biblia ya aliwa nin bautismado, kasin say tema so matukoy? Seguroen a say asainmin so matukoy ed punton pangonsehoan a kikimeyan na estudyante.

Para ed saray asainmin a niiter ed saray agagin bibii, kaslakan a say estudyante so manpili na dili ton eksena a mitukoyan ed saray instruksion ed pahina 78 tan 82. Nepeg a pabtangan na sakey a katulongan, balet nayarin nausar so sakey nin katulongan. No kerewen na estudyante so sakey a katulongan a matukotukoy a tuloy a mangiyakto ed abitlan eksena, nepeg ya ipanengneng so konsiderasyon ed satan a kerew.

Kaaruman Iran Klase. No wala so masulok a 50 estudyante a nampalista, nayarin labay mon konsideraen so pangusar na kaaruman a pasen para ed saray partin iparungtal na saray estudyante. Unong ed lokal a pankaukolan, nayarin usaren iyan uksoyan para ed amin a presentasyon na estudyante odino diad unor a duara lambengat.

Kada kaaruman a klase so nepeg a walaan na kualipikadon managkonseho, magmaong no sakey a matatken. No kaukolan, nayarin onsandi so sakey a kualipikadon maong a ministeryal a lingkor. Nepeg ya iter na ulop na mamatatken so panangabobon ed sarayan managkonseho. Kaukolan a mikimey a maapit so manangasikaso na eskuelaan ed saray kaaruman a managkonseho ta pian wala so epektibon pakasubaybay ed saray estudyante anggan iner a pasen so ontumbok a presentasyon da.

Espisyal a Klase ed Panagbasa. No nadetermina na ulop na mamatatken a kaukolan na pigaran indibidual ed kongregasyon so manunan instruksion ed panagbasa diad lenguahen uusaren ed kongregasyon, nayarin saya so iyuksoy a misiglaot ed Teokratikon Eskuelaan Parad Ministeryo. Sayan panagbangat so nayarin managlawi ed manuna iran abilidad ed panagbasa tan panagsulat, odino say gagala to et nayarin say pamaaligwas ed panagbasa.

Saratan a klase so ag-ibabansag ed pangiprepresenta na saray estudyante ed betang da ed Teokratikon Eskuelaan Parad Ministeryo. Ta pian niiter so magenap a tulong, nayarin kaukolan so malaem a panaon nen say posible legan na aral. Nayarin determinaen na lokal iran mamatatken so nakaukolan tan no kapigan so kiiter na ontan iran instruksion. Unong ed pankaukolan, nayarin gawaen iray areglo para ed inggrupon instruksion odino ed sansakey a panagbangat.

Nakaukolan so sakey a kualipikadon managbangat. Magmaong no say asainmin so niiter ed sakey ya agin laki a maong a manbasa tan mikabisadon maong ed lenguahe. No anggapo so agin laki, nayarin kerewen na mamatatken so sakey a makayari, maabig-ehemplon agin bii ya ontulong. Nepeg a sikato so akapandong sano manbabangat ed klase.​—1 Cor. 11:3-10; 1 Tim. 2:11, 12.

Say pulyeton Apply Yourself to Reading and Writing so wala ed dakel iran lenguahe. Satan so adesinyon mangibangat ed manuna iran abilidad ed panagbasa tan panagsulat. Nayarin nausar met so arum a materyal ed panagbangat, depende ed sukat na abilidad ed panagbasa na saray nampalista. No magenap la so inyaligwas na saray estudyante, nepeg a sikara so napaseseg a mibiang ed maparanay a programa na Teokratikon Eskuelaan Parad Ministeryo.

Bilang manangasikaso ed Teokratikon Eskuelaan Parad Ministeryo, baleg so nagawaan mo pian nagunggonaan so kongregasyon. Manparaan a maong, tan mitunosan ed simbawa diad Roma 12:6-8, sumpalen moy asainmin mo bilang mabmablin inmatalek ed sika na Dios.