Tepet

◼ Antoy kaukolan ya naaralan na ananak pian ontatken irad espiritual?

Mansasagpot a maong iray Kristianon ateng pian napabaleg iray anak da “diad panagdisiplina tan panamilin nen Jehova.” (Efe. 6:4) Singa bilang, naimano na saray ateng ya makagunggonay kinabuasan ya pangonsiderad teksto kaibay ananak da. Diad panagdayew na pamilya tan arum nin pankanawnawa, nayarin bantayan na pamilya so sakey a video insan da itan pantongtongan, aralen day sakey a topic diad saray artikulo na Young People Ask, iyakto so sakey ya istorya ed Biblia, odino man-practice session ira. Balet, pian ‘tuloytuloy ya ontatken’ iray anak, kaukolan ya ibangat ed sikara iray aralem a katuaan na Biblia.​—Heb. 6:1.

Isipen pa iray ibabangat tayod saray totoo ed teritorya tayo. Diad unonan pitongtong odino diad ipawil, kaslakan et pansasagpotan tayon igapo so panagaral na Biblia ya usaren so libron Anto so Peteg ya Ibabangat na Biblia? No nasumpal itan, usaren tayoy libron “Mansiansia Kayo ed Panangaro na Dios.” Akin? Naaralan dad libron Ibabangat na Biblia iray manunan bangat na Kasulatan. Ibangat ira na libron “Panangaro na Dios” no panon ya iyaplikad inagew-agew a panagbilay iray prinsipyod Biblia. Say panaral ed saratan ya publikasyon et makatulong ed saray balo ni pian ‘onlamut’ irad Kristo tan ‘napabiskeg irad pananisia.’ (Col. 2:6, 7) Agta makatulong met irayan libro ed saray anak tayo? Kaukolan da met ya naaralan so nipaakar ed dondon, say Panarian, tan say kipapasen na saray inatey. Nepeg ya naamtaan na ananak no akin ya aabuloyan na Dios so paniirap tan no panon dan nibaga ya manbibilay tayo lad kaunoran iran agew na sayan sistema na mundo. Kaukolan ya kombinsido ran walad saray Tasi nen Jehova so katuaan. Kaukolan met ya natalosan na saray kalangweran iray prinsipyo na Biblia tan nipasal so “pakayari ran mantalos.” (Heb. 5:14) Siempre, kaukolan ya ikonsidera na atateng so edad tan pakatalos na saray anak da. Balet, wala ray anak ya sarag da lan naaralan ya tampol iray aralem a katuaan na Biblia anggano ugaw ni ra.​—Luc. 2:42, 46, 47.