Natalosan na Arum

SANO mansalita ka, mas ni so gawaen mo nen say basta pangipresenta ed impormasyon. Panggunaetan mon natalosan na saramay onderengel so ibabagam. Saya so ontulong ed sikan mitalosan ya epektibo, balanglan mansasalita ka ed arap na kongregasyon odino diad saray aliwan Tasi.

Walaray dakel a paraan parad natalosan a panagsalita. Arum ed saratan so asingbat ed Aralen 26, “Lohikal ya Inkatibukel na Materyal.” Arum so nipaliwawa ed Aralen 30, “Nipanengneng so Interes ed Arum a Too.” Diad sayan aaralen, singbaten tayo so pigaran kaaruman a punto.

Simple Iran Salita, Inkasimple na Estilo. Saray simplin salita tan antikey iran estansa so sankaepektiboan ed pitatalosan. Samay Sermon nen Jesus ed Palandey so sankaabigan ya ehemplo na paliwawan natalosan na siopa man iran totoo odino taga iner man ira. Saray ideya so nayarin balo ed sikara. Ingen, natalosan da so imbaga nen Jesus lapud pamaakaran iratan a manasaglawi ed sikatayon amin: no panon so pagmaliw a maliket, no panon so pamaaligwas na saray relasyon ed arum, no panon so panalona ed kapagaan, tan no panon so pananap na kabaliksan ed bilay. Tan imbalikas toray kanonotan to ed diretsaan a panagsalita. (Mat., kap. 5-7) Siempre, say Biblia so mangitatarya na dakel iran ehemplo na panduruma ed karukey tan inkaalasir na saray estansa. Say manunan gagalam et nepeg a pian ibalikas iray kanonotan mo diad malinew tan natalosan a paraan.

Anggan sano say singbaten mo et mairap a materyal, say inkasimple na estilo so mamainomay ed satan a natalosan. Panon a nagawaan so inkasimple? Agmo bubuntonan iray dumerengel mo na saray agnakaukolan a detalye. Iyuksoy so materyal mo ta pian nakompleto iray manunan puntom. Pilim a maong iray manunan kasulatan. Imbes a pantutumboken iray teksto, saraya so basaen tan singbaten. Agmo pakikiloten iray maabig a punto panamegley na maselewet a panagsalita.

Sano mangikokondukta ka na panangiyaral ed Biblia, ontan met so gawaen mo. Agmo sasalien ya ibinsabinsa so amin a detalye. Tulongan so iyaaralan a natalosan ton malinew iray manunan ideya. Saginonor, diad personal a panagaral tan diad saray miting ed kongregasyon, saray detalye so naaralan to.

Ta pian nipresenta so materyal ed simplin paraan, nakaukolan so maabig a panagparaan. Nepeg a natalosan mon malinew so suhetom pian nagawaan mon natalosan na arum. No talagan natatalosan mo so sakey a bengatla, nibagam iray rason no akin ya ontan. Nayarian mo met itan ya ibalikas ed dili iran salitam.

Ipaliwawa Iray Agkabisadon Termino. Pian natalosan iray bengatla, nakaukolan no maminsan ya ipaliwawam so kabaliksan na saray terminon agkabisado na saray dumerengel mo. Agmo ipapasen a malaklaknab so pikakabat na saray dumerengel mo, balet agmo met melagmelagen so katudioan da. Bilang resulta na panagaral mo ed Biblia, nayarin usaren moray pigaran terminon agkabisado na arum a totoo. No anggapoy panangipaliwawa et agnatalosan na saramay agmililimog ed saray Tastasi nen Jehova a say “nakdaan,” “matoor tan makabat ya aripen,” ‘arum a karnero,’ tan “baleg ya ulop” so manutukoy ed espesipikon grupo na totoo. (Roma 11:5, NW; Mat. 24:45; Juan 10:16; Apoc. 7:9) Mipadpara, likud no say too so mikabisado ed organisasyon na saray Tastasi nen Jehova, nayarin agto natalosan no anto so kabaliksan na saray terminon singa say “manangipalapag,” “payunir,” “manangasikaso na sirkito,” tan “Memoryal.”

Arum a balikas ed Biblia ya uusaren met na anggan saray aliwan Tasi so nayarin mankaukolan na panangipaliwawa. Parad dakel a totoo, say “Armagedon” et kabaliksan to so nuklear a panagderal. Nayarin isiglaot da so “Panarian na Dios” ed sakey a kondisyon a walad akindalem na too odino ed tawen balet ta aliwan nipaakar ed gobierno. Say panukoy ed “kamarerwa” so nayarin mangipaliing ed punto a tatawagey espiritual a kabiangan na totoo a mantultuloy a manbilay kayari ipatey na laman. Unong ed pakaamta na minilyon a totoo, say “masanton espiritu” so sakey a persona, a kabiangan na Trinidad. Lapud kinarakel la na totoon angipulisay ed estandarte na Biblia ed moral, nayarin kaukolan da ni so tulong pian talosan so labay ya ibaga na Biblia sanen ibabaga to: ‘Ibatikan so pilalawanan.’​—1 Cor. 6:18.

Likud no saray totoo so maparanay a managbasa ed Biblia, nayarin agda natalosan no basta ibagam so, “insulat nen Pablo . . .” odino “inkuan nen Lucas . . .” Nayarin walaray kakaaro ra odino kakaabay ya ontan so ngaran da. Nayarin nakaukolan mon aruman na panangipaliwawa pian ipaamta so tutukoyen a too bilang sakey a Kristianon apostol odino sakey a managsulat na Biblia.

Saray modernon-agew a dumerengel so mabetbet a mankaukolan na tulong pian natalosan daray kasulatan a manasaglawi ed saray sukat odino kustombre ed inmuna iran panaon. Alimbawa, say balikas a samay biong nen Noe so 300 kasiko ed karukey, 50 kasiko ed kaawang, tan 30 kasiko ed kaatagey so nayarin aliwan tanton makabaliksan ed sikara. (Gen. 6:15) Balet no saratan a sukat so deskribien mo unong ed saray kabkabisadon pakatandaan ed lugar, tampol a niretrato ed kanonotan na saray dumerengel mo so kabaleg na biong.

Itarya so Nakakaukolan ya Eksplinasyon. Pian nipalinew so sakey a bengatla ed saray dumerengel mo, mas ni so nayarin nakaukolan nen say dugan uker na sakey a termino. Diad Jerusalem ed panaon nen Esdras, say panangibasa ed Ganggan so tinekepan na panangipaliwawa. Ta pian natulongan so totoon makatebek ed kabaliksan to, saray Levita so angitarya na panangipatalos ontan met ed kiyaplikaan na Ganggan ed saray sirkumstansyan aarapen na totoo ed saman. (Neh. 8:8, 12) Diad mipadparan nengneng, mangigana na panaon ed pangipaliwawa tan pangiyaplika ed saray kasulatan a binasam.

Kayari na impatey tan inkioli nen Jesus, impaliwawa to ed saray babangatan to a samay kasumsumpal ya agawa so kasumpalan na Kasulatan. Indanet to met so responsabilidad da bilang akatasi ed saratan a bengatla. (Luc. 24:44-48) Sano tulongan mo so totoo a makamoria no panon a say naaral da so nepeg a mangimpluensya ed mismon bilay da, lalon mainomay dan natalosan so peteg a kabaliksan na satan.

No Panon a Nalalanor so Puso. Siempre, anggano malinew iray panangipaliwawam, saray arum ya aspekto so nayarin mangimpluensya ed no kasin natatalosan na sananey a too odino andi. No aliwan maawat so puso na sakey a too, magmaliw itan a babeng diad pakatebek to ed walan nibabaga. (Mat. 13:13-15) Parad saraman so determinadon mapeget a manmoria ed saray pamaakaran manlapud pisikal a punto-de-bista, saray espiritual a bengatla so kakulangkulangan. (1 Cor. 2:14) Sano ipatnag na sakey a too so ontan ya awawey, makabat so basta agla pangituloy ed singbatan​—ya anggad maminsan lamet.

Ingen, diad arum a kipapasen et aliwan maawat so puso lapud mairap iran sirkumstansya ed bilay. No naikdan na pankanawnawan ondengel ed katuaan na Biblia ed sakey a panat na panaon, say puso na ontan a too so nayarin magmaliw a maawat. Sanen imbaga nen Jesus ed saray apostol to a sikato so pairapen tan pateyen, agda atalosan. Akin ya andi? Aliwan ontan so inilaloan da tan peteg a satan so agda labay a nagawa! (Luc. 18:31-34) Anggaman ontan, asabi panaon, 11 ed saray apostol so akatalos, tan satan so impanengneng da diad inkiwas dan mitunosan ed samay imbangat nen Jesus ed sikara.

Epekto na Maabig ya Ehemplo. Natulongan iray totoon mantalos aliwan diad saray salita tayo lambengat noagta ontan met ed saray kiwas tayo. Nipaakar ed primeron inyakar da ed Kingdom Hall, ibaga na dakel a totoo a say atandaan da et say mapatnag ya aroan, aliwan samay paliwawa. Mipadpara, say liket ya ipapatnag tayo so akatulong ed dakel lan unabung a mangawat ed katuaan na Biblia. Diad pakakanengneng da ed maaron-panangasin ipapanengneng na saray totoo nen Jehova ed balang sinansakey tan say maabig a konsiderasyon parad arum sano nidunget ed kairapan so anagdag ed arum a mangibagan saray Tastasi so walaan na tuan relihyon. Kanian legan a panggugunaetan mon tulongan so totoo a natalosan so katuaan na Biblia, nonoten mo so paraan na pangipaliwawam ed satan tan say ehemplom.