Saray Reperensya Parad Workbook ed Aral
PEBRERO 4-10
KAYAMANAN ED SALITA NA DIOS | ROMA 1-3
“Itultuloy Mon Ipasal so Konsiensiam”
(Roma 2:14, 15) Ta sano saray totoo na saray nasyon ya andian na ganggan et sipor a manggagawa na saray bengatlan walad ganggan, diad sikara et walaan ira na ganggan, anggano andian ira na ganggan. 15 Sikaran mismo so mangipapatnag a nisulat ed kapusoan da so nipaakar ed ganggan, legan a say konsiensia ra so mantatasi a kaiba ra, tan diad kanonotan da et balanglan sikaray nankasalanan odino agnankasalanan.
6. Akin et nibaga tayon say konsiensia et regalo ya inter na Dios?
6 Anggan saray totoo ya agda kabat si Jehova et amta da met ya ibiig so duga ed aliwa. Ibabaga na Biblia: “Diad kanonotan da et balanglan sikaray nankasalanan odino agnankasalanan.” (Roma 2:14, 15) Singa bilang, amta na maslak a totoo ya mauges so mamatey odino mantakew. Anggano agda nalilikas, diad tua et dedengelen day konsiensia ra—say inter nen Jehova ed sikara ya nisipor a pakatebek ya ibiig so duga tan aliwa. Tutumboken da met iray prinsipyo na Dios, odino saray manunan katuaan ya inter nen Jehova pian makapanggawa tayo na saray dugan desisyon.
(Roma 2:15) Sikaran mismo so mangipapatnag a nisulat ed kapusoan da so nipaakar ed ganggan, legan a say konsiensia ra so mantatasi a kaiba ra, tan diad kanonotan da et balanglan sikaray nankasalanan odino agnankasalanan.
8. (a) Panon ya naimpluensyaan na liknaan tayo so konsiensia tayo? (b) Antoy nepeg tayon itepet ed sarili tayo antis tayon manggaway desisyon?
8 Iisipen na arum ya dedengelen day konsiensia ra no uunoren day liknaan da. Iisipen da ya sarag dan gawaen so amin ya labay da basta maliket ira. Balet aliwan perpekto so liknaan tayo tan nayarin napalikdo itayo na satan. Mapuersa so liknaan tayo tan sarag na satan ya impluensyaan so konsiensia tayo. Oniay ibabaga na Biblia: “Say puso et agnapanmatalkan nen say antokaman a bengatla tan desperado. Siopay makatebek ed satan?” (Jeremias 17:9) Kanian nayarin isipen tayo ya duga so sakey a bengatla anta aliwa manaya. Singa bilang, antis ya nagmaliw a Kristiano si Pablo, grabe so impamairap tod saray totoo na Dios tan inisip to ya duga so gagawaen to. Say amta to et malinis so konsiensia to. Balet onia lanlamang so imbaga to: “Say manguusisa ed siak et si Jehova.” (1 Corinto 4:4; Gawa 23:1; 2 Timoteo 1:3) Nen naamtaan nen Pablo no antoy nalilikna nen Jehova ed gagawaen to, atalosan to ya kaukolan toy manguman. Malinew sirin ya antis tayon gawaen so sakey a bengatla, nepeg tayon tepetan so sarili tayo, ‘Antoy labay nen Jehova ya gawaen ko?’
9. Antoy kabaliksan na itakot ed Dios?
9 No inarom so sakey a too, agka manggawa na panermenan to. Inaro tayoy Jehova kanian agtayo manggawa na antokaman ya mamaermen ed sikato. Nepeg ya talagan antakot tayon napaermen si Jehova. Balibali so alimbawa nen Nehemias ed satan. Agto inusar so posisyon to bilang gobernador pian manpayaman. Akin? Impaliwawa to ya say rason et ‘lapud takot tod Dios.’ (Nehemias 5:15) Aglabay nen Nehemias so manggawa na antokaman ya panermenan nen Jehova. Singa si Nehemias, antakot tayo met ya napaermen si Jehova diad panggawa tayoy mauges. Pian naamtaan tayo no anto ray mamaliket ed si Jehova, nepeg tayon basaen so Biblia.—Nengnengen so Kaaruman ya Impormasyon 6.
Pankotkot na Espiritual a Kayamanan
(Roma 3:4) Andin balot! Balet say Dios so napaneknekan a tua, anggano napaneknekan a matila so kada too, ta unong a nisulat: “Pian sika so napaneknekan a matunong ed saray salitam tan manalo ka sano aakusaan da ka.”
Saray Pabitar ed Libro a Roma
3:4. No midumaan so ibabaga na too ed no antoy ibabaga na Dios a walad Salita to, ‘naromog tayon say Dios so matua’ diad panmatalek ed mensahe na Biblia tan ikiwas a mitunosan ed linawa to. Diad maseseg a panagpulong na Panarian tan panaggaway babangatan, natulongan tayoy arum pian naamtaan da a say Dios so matua.
(Roma 3:24, 25) tan sikaray iyaabawag na Dios a matunong lapud dondon a binayaran nen Kristo Jesus pian nibulos ira. Saya et sakey a regalon inter na Dios lapud agnaparaan a kaabigan to. 25 Say Kristo et inter na Dios bilang apay parad pipupulangan diad panamegley na pananisia ed dala to. Ginawa iya na Dios pian ipanengneng toy inkatunong to, ta diad pantetepel to et peperdonaen to ray kasalanan ya agawad apalabas.
Saray Pabitar ed Libro a Roma
3:24, 25—Panon a say “inkarondon a wala ed Kristo Jesus” so anakbong ed “saray kasalanan ya apalabas” sakbay ni itan ya imbayar? Say inmunan Mesianikon propesiya, a walad Genesis 3:15, so asumpal nen 33 C.E. sanen impapatey si Jesus diad panamairapan a kiew. (Gal. 3:13, 16) Anggaman ontan, diad samay mismon impangibaga nen Jehova ed satan a propesiya, singa la abayaran so dondon ed panmoria to ta anggapon balot so makaamper ed sikato diad panumpal na gagala to. Kanian base ed arapen a panondon nen Jesu-Kristo, sarag a perdonaen nen Jehova iray kasalanan na saray anak nen Adan a manisia ed satan a sipan. Tan lapud dondon, saramay inaatey sakbay na panaon na saray Kristiano et walaay ilalon napaoli ed arapen.—Gawa 24:15.
Panagbasa ed Biblia
(Roma 1:1-17) Siak, si Pablo, ya aripen nen Kristo Jesus tan tinawag pian magmaliw ya apostol, say tinuro a mangiyabawag ed maong a balita na Dios, 2 ya insipan to la nensaman ed panamegley na saray propeta to diad masanton Kasulatan, 3 nipaakar ed Anak to, a niyanak bilang too manlapud ilalak nen David, 4 balet diad pakayari na masanton espiritu et sikatoy niyabawag ya Anak na Dios sanen sikatoy pinaoli manlapud inaatey—on, si Jesu-Kristo a Katawan tayo. 5 Diad panamegley to et naawat mi so agnaparaan a kaabigan tan say inka-apostol pian saray totoo ed amin a nasyon et ontulok lapud pananisia parad kigloriaan na ngaran to, 6 a diad saratan a nasyon et tinawag kayo met pian magmaliw a kayarian nen Jesu-Kristo— 7 parad sikayon amin ya inad-aro na Dios a walad Roma, a tinawag pian magmaliw a masanto: Nawalaan kayo komon na agnaparaan a kaabigan tan kareenan a manlalapu ed Dios ya Ama tayo tan ed Katawan a Jesu-Kristo. 8 Manuna ed amin, misasalamat ak ed Dios ko diad panamegley nen Jesu-Kristo nipaakar ed sikayon amin, lapud pantotongtongan ed interon mundo so pananisia yo. 9 Ta say Dios, a panlilingkoran ko ed interon pusok diad pangiyaabawag koy maong a balita nipaakar ed Anak to, so mamaneknek a lanang ta kayon sasalambiten ed saray pikakasik, 10 a kekerewen ko a no nayari komon et makakar ak a siansia ed sikayo no linawa iya na Dios. 11 Ta pipirawaten kon nanengneng kayo, pian ninabang kod sikayo iray espiritual a bendisyon a mamabiskeg ed sikayo; 12 odino pian makapanpapasesegan itayo, a napaseseg yo ak ed pananisia yo tan napaseseg ta kayo ed pananisiak. 13 Balet labay kon naamtaan yo, agagi, ya aminpigak lan ninonot so onlad sikayo—ingen ta walay mangaamper ed siak anggad natan—pian nawalaan ak met komon na pigaran bunga ed limog yo a singa diad limog na arum ni ran nasyon. 14 Diad saray Griego tan diad saray dayo, diad saray marunong tan diad saray andiay pakatalos, et walay utang ko; 15 kanian pirpirawat ko met ya iyabawag so maong a balita ed sikayo ran wadtan ed Roma. 16 Ta agko ibabaing so maong a balita; diad tua, satan so paneknek na pakayari na Dios pian niliktar so amin a walaay pananisia, unona saray Judio insan saray Griego. 17 Ta diad saya et nipaparungtal so inkatunong na Dios lapud pananisia tan parad pananisia, unong a nisulat: “Balet say matunong et manbilay lapud pananisia.”
PEBRERO 11-17
KAYAMANAN ED SALITA NA DIOS | ROMA 4-6
“Ipapanengneng na Dios so Panangaro To ed Sikatayo”
(Roma 5:8) Balet ipapanengneng na Dios so panangaro to ed sikatayo, ta anggano makasalanan itayo ni et inatey si Kristo parad sikatayo.
(Roma 5:12) Kanian no panon a diad panamegley na sakey a too et linmoob ed mundo so kasalanan, tan say patey ed panamegley na kasalanan, ontan met a say patey et kinmayat ed amin a totoo lapud nankasalanan iran amin—.
Impatnag na Dios so Panangaro Tod Sikatayo
5 Impaliwawa itan nen Pablo diad oniaran salita: “Linmoob so kasalanan ed mundo lapud sakey a too tan say ipapatey lapud kasalanan, tan ompapatey so amin a totoo lapud nankasalanan iran amin.” (Roma 5:12) Natalosan tayo iya ta impairekord na Dios no panon so inggapo na bilay na too. Pinalsa nen Jehova so duaran too, si Adan tan Eva. Perpekto so Amalsa, tan perpekto met iray inmunan atateng tayo. Saksakey labat so insebel na Dios ed sikara tan imbaga ton say isumlang da et manresultad sentensian ipapatey. (Gen. 2:17) Balet, ginagala ray nanrebelde, ya sinumlang day makatunongan a ganggan na Dios, kanian sikatoy impulisay da bilang Manangiter na Ganggan tan Soberano.—Deu. 32:4, 5.
(Roma 5:13, 14) Ta say kasalanan et wala la ed mundo antis na Ganggan, balet anggapoy siopaman a nipasen a nankasalanan sano anggapoy ganggan. 14 Balet, say patey et nan-ari manlapud si Adan anggad si Moises, anggan diad saramay say kasalanan da et aliwan singa ed insumlang nen Adan, a walay piparaan to ed samay sakey ya onsabi.
Impatnag na Dios so Panangaro Tod Sikatayo
6 Nankasalanan lay Adan antis nin nanilalak, kanian nipatawir toy kasalanan tan saray epekto na satan ed amin ya ilalak to. Siempre, agginagala na saray ilalak nen Adan so manrebelde tan mankasalanan a singa sikato, kanian agmiparay kasalanan da ed sikato. Sakey ni, anggapo met niray niiter a ganggan diad saman. (Gen. 2:17) Ingen, siansian akatawir iray kasalanan. Kanian, say kasalanan tan patey et nanuley anggan sanen inter na Dios ed saray Israelita so Mosaikon Ganggan, ya angipamoria ed sikaran makasalanan ira. (Basaen so Roma 5:13, 14.) Say epekto na atawir a kasalanan et singa sakit ya natawir ed atateng. Tua, diad ontan iran kaso, walaray ananak ya makatawir, wala met iray andi. No diad kasalanan balet, amin tayo et akatawir ed si Adan, kanian amin tayo et ompatey. Panon itayon naagwat ed satan a pakaskasin kipapasen?
(Roma 5:18) Kanian sirin, no panon a diad panamegley na sakey ya impakasumlang et niyabawag a nankasalanan so amin a klase na totoo, ontan met a diad panamegley na sakey a matunong a gawa et niyabawag a matunong parad bilay so amin a klase na totoo.
(Roma 5:21) Anto so gagala? Pian no panon a nan-ari so kasalanan tan patey, ontan met a say agnaparaan a kaabigan et man-ari diad panamegley na inkatunong a mangitonton ed bilay ya andi-anggaan diad panamegley nen Jesu-Kristo a Katawan tayo.
Impatnag na Dios so Panangaro Tod Sikatayo
9 Antoy kabaliksan na saray Griegon salita a nipatalos ya “niyabawag a matunong”? Oniay insulat na sakey a managpatalos na Biblia nipaakar ed satan: “Sakey iyan panangikompara ya walay koneksion tod legal iran pamaakaran. Tutukoyen toy panguman na panmoria na Dios ed sakey a too, aliwan say panguman na mismon inkatoo to . . . Nikompara so Dios ed sakey ya ukom a say desisyon to et pabor ed akusado ya aliling to et inawit ed korte na Dios ta naakusaan na ag-inkatunong. Balet ta inabsuelto na Dios.”
10 Antoy basiyan na matunong ya “Ukom na amin a dalin” diad pangabsuelto tod agmatunong iran totoo? (Gen. 18:25) Bilang unonan kundang, imbaki na Dios so bogbogtong ya Anak to diad dalin. Sigpot a ginawa nen Jesus so linawa nen Ama to, anggano sikatoy tinukso, binalawbalaw, tan pinairap. Sikatoy nansiansian matoor anggan sanen manpapanabos lad panamairapan a kiew. (Heb. 2:10) Diad impangisakripisyo nen Jesus ed perpekton bilay to, inyapay toy sakey a dondon a makapangibulos ed saray ilalak nen Adan manlapud kasalanan tan ipapatey.—Mat. 20:28; Roma 5:6-8.
Pankotkot na Espiritual a Kayamanan
(Roma 6:3-5) Odino agyo ta amta a sikatayon amin ya abautismoan ed si Kristo Jesus et abautismoan ed ipapatey to? 4 Kanian niponpon itayo a kaiba to sanen abautismoan tayo ed ipapatey to, pian manakar itayo ed sakey ya apasimbalon bilay, no panon a si Kristo et pinaoli manlapud inaatey diad panamegley na gloria na Ama. 5 No mikasakey itayo ed sikato diad ipapatey a singa ed impatey to, segurado met a mikasakey itayo ed sikato diad kioli a singa ed inkioli to.
Saray Pabitar ed Libro a Roma
6:3-5—Anto so kabaliksan na bautismo ed Kristo Jesus tan bautismo ed impatey to? Sanen saray papatumbok nen Jesus et nilanaan nen Jehova na masanton espiritu, nikasakey ira ed si Jesus tan nagmaliw iran membro na kongregasyon na saray alanaan a Kristiano. Satan a kongregasyon so laman nen Kristo, a diad satan et sikato so Ulo. (1 Cor. 12:12, 13, 27; Col. 1:18) Saya so kabaliksan na bautismo ra ed Kristo Jesus. Saray alanaan a Kristiano so abautismoan odino ‘abinyagan ed impatey nen Kristo,’ lapud nambilay ira a masakripisyo tan intalirak da so ilalon andi-anggaan a bilay diad dalin. Say impatey da sirin et masakripisyo a singa say impatey nen Jesus, anggaman agmakarondon so impatey da. Sayan bautismo ed impatey nen Kristo so nakompleto sano ompatey ira tan paolien diad tawen.
(Roma 6:7) Ta say sakey ya inatey la et nibulos la ed kasalanan to.
Antoy Ilalo na Saray Inmuunan Atateng Ko?
No nabilay lamet iray agmatunong, kasin ukomen ira base ed saray apalabas ya ginawa da? Andi. Oniay ibabaga na Roma 6:7: “Say inatey la et nibulos la ed kasalanan to.” Nabayaran la na saray agmatunong iray kasalanan da no ompatey ira. Kanian, ukomen ira base ed gawaen da no nabilay lamet ira, aliwan lapud saray ginawa ra nen agda ni naaralan so nipaakar ed Dios antis iran inatey. Panon iran nagunggonaan?
Panagbasa ed Biblia
(Roma 4:1-15) No ontan sirin, antoy nibaga tayon agunggona nen ama tayon Abraham? 2 Singa bilang, no si Abraham et niyabawag a matunong lapud saray gawa, walay rason ton manpasirayew, balet aliwan diad arapan na Dios. 3 Ta anto so ibabaga na kasulatan? “Impatnag nen Abraham so pananisia ed si Jehova, tan sikatoy impasen a matunong lapud satan.” 4 Natan, diad sakey a toon mankikimey, say upa to et ag-ipapasen ya agnaparaan a kaabigan noagta sakey a bengatlan nepeg ya iter ed sikato. 5 Balet, say toon agmankikimey ingen ta mangipapatnag na pananisia ed Dios, samay iyaabawag ton matunong so makasalanan, et ipapasen a matunong lapud pananisia to. 6 Imbaga met nen David so nipaakar ed liket na toon ipapasen na Dios a matunong aliwan lapud saray gawa, a kuan to: 7 “Maliket iramay totoon aperdona la ray mauges a ginawa ra tan saramay asakbongan la ray kasalanan da; 8 maliket so too a say kasalanan to et agla nonoten nen Jehova.” 9 Sirin, kasin sayan liket et para labat ed saray totoon asegat odino dia met ed saray totoon ag-asegat? Ta ibabaga tayo: “Si Abraham et impasen a matunong lapud pananisia to.” 10 Kanian, kapigan impasen a sikatoy matunong? Sanen sikatoy asegat odino sanen agni asegat? Aliwan sanen asegat, noagta sanen agni asegat. 11 Tan inawat to so sakey a tanda—salanti, say panagsegat—bilang sakey a tatak na inkatunong lapud pananisia to sanen agni asegat, pian sikatoy magmaliw ya ama na amin a walaan na pananisia anggaman ag-ira asegat, diad ontan et ipasen iran matunong; 12 tan pian sikatoy magmaliw ya ama na saray asegat ya ilalak, aliwa labat ya ama na saramay ontutumbok ed panagsegat noagta pati saramay ontutumbok ed dalan na pananisia ya impatnag na ama tayon si Abraham sanen agni asegat. 13 Ta aliwan diad panamegley na ganggan ya insipan ed si Abraham odino ed ilalak to a tawiren to so sakey a mundo, noagta diad panamegley na inkatunong lapud pananisia. 14 Ta no saramay ontutumbok ed ganggan so manawir, magmaliw ya andi-kakanaan so pananisia tan naandi la so sipan. 15 Diad tua, say Ganggan et mamapawalay sanok na Dios, balet no anggapoy ganggan, anggapo met so isusumlang.
PEBRERO 18-24
KAYAMANAN ED SALITA NA DIOS | ROMA 7-8
“Kasin ‘Manpirpirawat Kan Manaalagar’?”
(Roma 8:19) Ta saray pinalsa et manpirpirawat a manaalagar ed kiparungtal na ananak na Dios.
Paitonton Kad si Jehova ed Tuan Kawayangan
17 Oniay insulat nen Pablo nipaakar ed kawayangan ya iter nen Jehova ed saray totoo to: “Saray pinalsa a manaalagar ed kiparungtal na ananak na Dios et maniilalon maong.” Insan to intuloy: “Nibulos met iray pinalsa ed impakaaripen ed kabubulok pian magmaliw iran ananak na Dios a walaan na maglorian kawayangan.” (Roma 8:19-21) Say tutukoyen ya “saray pinalsa” et saray totoon walaan na ilalon manbilay ed dalin, a minabang ed “kiparungtal” na saray alanaan ya ananak na Dios. Satan a panangiparungtal et onggapo sano sarayan alanaan a walad tawen et ontulong ed si Kristo a maneral ed amin a mauges a totoo tan mangiliktar ed “baleg ya ulop” parad sakey a balon mundo.—Apo. 7:9, 14.
(Roma 8:20) Ta saray pinalsa et nipasakop ed kaapaan, aliwan lapud panlabay da, noagta diad panamegley na samay angipasakop ed saratan, unong ed ilalo
Manliket ed Ilalo Tayo
11 Inikdan nen Jehova na “ilalo” so katooan sanen insipan to ya diad panamegley na “bini” et iliktar to ra manlapud “daan ya uleg,” si Satanas a Diablo. (Gen. 3:15, NW; Apo. 12:9) Say manunan kabiangan na satan a “bini” et si Jesu-Kristo. (Gal. 3:16) Diad impatey tan inkioli nen Jesus, sikatoy angitarya ed katooan na malet ya ilalo, say kibulos manlapud impakaaripen ed kasalanan tan ipapatey. Say pakasumpal na sayan ilalo et mikonektaan ed “kiparungtal na ananak na Dios.” Saray niglorian alanaan so onkokomaduan kabiangan na “bini.” Sikaray ‘iparungtal’ sano nakaiba ray Kristo a maneral ed mauges a sistema nen Satanas. (Apo. 2:26, 27) Saya so manresulta ed kiliktar na arum a karnero a nanlapud baleg ya irap.—Apo. 7:9, 10, 14.
(Roma 8:21) a saray pinalsa et nibulos met manlapud impakaaripen ed kabubulok tan nawalaan na maglorian kawayangan bilang ananak na Dios.
Manliket ed Ilalo Tayo
12 Seguradon nainawaan iray totoon “pinalsa” legan na Sanlibon Taon ya Uley nen Kristo! Diad satan, saray “ananak na Dios” et nagkalalon ‘niparungtal’ sano onkiwas la ra bilang saserdoten kaiba nen Kristo, tan ipagamor dad totoo iray bendisyon na dondon bagat nen Jesus. Bilang sakop na mangatatawen a Panarian, naeksperiensya lad satan na totoon “pinalsa” so kibulos manlapud saray epekto na kasalanan tan patey. Saray matulok a totoo et kalkalnan “nibulos . . . ed impakaaripen ed kabubulok.” No manmatoor ira ed si Jehova ed loob na Sanlibon Taon tan legan na unor a subok diad sampot na satan, permanentin nisulat so kangaranan da diad “lukot na bilay.” Tan makaloob ira ed ‘maglorian kawayangan na ananak na Dios.’ (Apo. 20:7, 8, 11, 12) Agaylan dakep ya ilalo!
Pankotkot na Espiritual a Kayamanan
(Roma 8:6) Ta say pangiteen na nonot ed laman et mangitonton ed ipapatey, balet say pangiteen na nonot ed espiritu et mangitonton ed bilay tan kareenan;
Kasin Nanonotan Yo?
Antoy pandumaan na “pangiteen na nonot ed laman” tan “pangiteen na nonot ed espiritu”? (Roma 8:6)
Samay mangiteteen na nonot ed laman et pakokontrol ed pilalek tan tendensia na agperpekton too, ya lanang ton itotongtong tan irarayew iray bengatlan nipaakar ed laman. Samay mangiteteen na nonot ed espiritu et akasentroy bilay to ed saray bengatlan nipaakar ed Dios tan ed kanonotan To; sikatoy igigiya na masanton espiritu. Samay unaan et mansumpal ed ipapatey, samay sakey et nawalaan na bilay tan kareenan.—w16.12, p. 15-17.
(Roma 8:26, 27) Diad ontan a paraan, say espiritu et ontutulong met ed sikatayo diad kakapuyan tayo; ta wala ray panaon a kaukolan tayoy manpikasi balet agtayo amta no antoy ipikasi tayo. Balet, say espiritu a mismo so mikasi parad sikatayo sano agtayo nibesngaw iray ey-ey tayo. 27 Ingen ta samay manguusisa ed kapusoan et amta to no anto so espiritu, lapud mikakasi itan unong ed linawa na Dios parad saray masanto.
Antoy Ipapatnag na Saray Pikakasim Nipaakar ed Sika?
20 No maminsan et agtayo amtay ibaga tayo ed saray personal a pikakasi tayo. Oniay insulat nen Pablo: “Walaray panaon a nakaukolan tayoy manpikasi balet agtayo amtay ipikasi tayo. Balet, say [masanton] espiritu a mismo so ontulong ed sikatayo anggano agtayo amta so ibalikas tayo ed saray ey-ey tayo. Ingen ta samay manguusisa ed kapusoan et amta to so kabaliksan na espiritu.” (Roma 8:26, 27, NW) Impaisulat nen Jehova iray dakel a pikakasi diad Kasulatan. Sarayan pinuyanan a pikakasi et ipapasen ton kerew a manlalapud sikatayon mismo, kanian ebatan to iratan. Kabkabat itayo na Dios tan amta to so kabaliksan na saramay salitan impuyan to panamegley na espiritu to ed saray managsulat na Biblia. Ebatan nen Jehova iray kerew tayo no say espiritu so “ontulong” odino mikasi parad sikatayo. Balet, legan ya ondarakel so kakabatan tayo ed Salita na Dios, mas mainomay tayo lan nanonotan no antoray nepeg ya ipikasi tayo.
Panagbasa ed Biblia
(Roma 7:13-25) Sirin, kasin samay maong et nanresulta ed ipapatey ko? Andin balot! Say kasalanan so makasengeg. Diad panamegley na samay maong, say kasalanan et mamapawala ed siak na ipapatey pian nipanengneng no anton talaga so kasalanan, diad ontan et magmaliw a lalon mauges so kasalanan diad panamegley na ganggan. 14 Ta amta tayo a say Ganggan et nanlapud Dios, balet too ak labat, a nilako ed kasalanan. 15 Ta agko natatalosan so gagawaen ko. Ta samay labay ko et agko gagawaen, balet say gagawaen ko et samay bubusolen ko. 16 Balet, no gagawaen ko may agko labay, onabobon ak a maabig so Ganggan. 17 Balet natan et aliwa lan siak so manggagawa ed satan, noagta say kasalanan a manaayam ed siak. 18 Ta amtak ya anggapoy maong a manaayam ed siak, salanti, diad laman ko; ta walay pilalek kon manggawa na maong, balet anggapoy pakayarik a gawaen itan. 19 Ta agko gagawaen so maong a labay ko, balet say mauges ya agko labay so gagawaen ko. 20 Sirin, no gagawaen ko so agko labay, aliwa lan siak so manggagawad satan, noag say kasalanan a manaayam ed siak. 21 Kanian, diad kipapasen ko et aromog ko iyan ganggan: Sano labay kon gawaen so duga, say mauges so walad siak. 22 Diad pusok et talagan panliliketan koy ganggan na Dios, 23 balet nanenengneng ko ed laman ko so sananey a ganggan a milalaban ed ganggan na nonot ko. Sayan ganggan et say kasalanan a walad laman ko tan mangokontrol ed siak. 24 Pakaskasi ak lan too! Siopa so mangisalba ed siak ed laman a mamapawala ed sayan ipapatey? 25 Salamat ed Dios diad panamegley nen Jesu-Kristo a Katawan tayo! Kanian sirin, diad nonot ko et aripen ak na ganggan na Dios, balet diad laman ko et aripen ak na ganggan na kasalanan.
PEBRERO 25–MARSO 3
KAYAMANAN ED SALITA NA DIOS | ROMA 9-11
“Say Ilustrasyon Nipaakar ed Kiew ya Olibo”
(Roma 11:16) Niarum ni, no masanto so kabiangan na masa ya inyapay bilang unona iran bunga, masanto met so interon masa; tan no masanto so lamot, ontan met iray sanga.
‘O Agaylay Kaaralem na Karunongan na Dios!’
13 Inkompara nen apostol Pablo iramay magmaliw a kabiangan na bini nen Abraham ed saray sanga na simbolikon kiew na olibo. (Roma 11:21) Irerepresenta na sayan aasikasoen ya kiew na olibo so pakasumpal na gagala na Dios nipaakar ed impisipanan tod Abraham. Say lamot na kiew et masanto tan mangirerepresentad Jehova bilang say angiter na bilay ed espiritual ya Israel. (Isa. 10:20; Roma 11:16) Say irerepresenta na sengeg et si Jesus, say manunan kabiangan na bini nen Abraham. Saray sanga et say “suston bilang” na saramay komaduan kabiangan na bini nen Abraham.
(Roma 11:17) Balet, no say arum ed saray sanga et pinuter, tan sika, anggaman sakey kan balang ya olibo, et insuldong ed sikara tan minanabang kad inkabuna na lamot na olibo,
(Roma 11:20, 21) Tua ’tan! Pinuter ira lapud anggapoy pananisia ra, balet mansiasiansia ka lapud pananisia. Agka manpapaatagey, noagta ontakot ka. 21 Ta no saray peteg a sanga et ag-inabuloyan na Dios a mansiansia, agto ka met abuloyan a mansiansia.
‘O Agaylay Kaaralem na Karunongan na Dios!’
15 Anto siri’ ginawa nen Jehova pian nasumpal so gagala to? Impaliwawa nen Pablo ya walaray sanga na olibon balang ya insuldong ed samay aasikasoen ya kiew na olibo bilang kasalat na saramay pinuter. (Basaen so Roma 11:17, 18.) Kanian, saray alanaan ya Kristianon aliwan Judio, a singa saramay walad kongregasyon na Roma, et aliling day sangan nisuldong ed simbolikon kiew na olibo. Nagmaliw la ra sirin ya kabiangan na bini nen Abraham. Dati et singa ra sangasanga na olibon balang, ya anggapoy pankanawnawa ran magmaliw a kabiangan na sayan espisyal a sipanan. Balet ta inikdan ira nen Jehova na pribilehyon magmaliw ya espiritual ya Judio.—Roma 2:28, 29.
(Roma 11:25, 26) Ta agko labay, agagi, ya anggapoy amta yo ed sayan sagradon sekreto, pian agkayo magmaliw a marunong ed dilin pakanengneng yo: Naepel iray sentido na arum ed saray Israelita ya anggad akompleto lay bilang na saray totoo na saray nasyon, 26 tan diad onian paraan makaliktar so interon Israel. Ta unong a nisulat: “Say manangiliktar et ompaway ed Sion tan iyarawi to ed Jacob iray mauges a kagagawa ra.
‘O Agaylay Kaaralem na Karunongan na Dios!’
19 On, makapakelkelaw so pakasusumpal na gagala nen Jehova parad “Israel na Dios.” (Gal. 6:16) Singa ed inkuan nen Pablo, “nilaban so interon Israel.” (Roma 11:26) Diad inggeter ya panaon nen Jehova, say “interon Israel”—say kompleton bilang na espiritual ya Israelita—et manlingkor bilang arari tan saserdote diad tawen. Anggapon balot so makaamper ed pakasumpal na gagala nen Jehova!
Pankotkot na Espiritual a Kayamanan
(Roma 9:21-23) Anto? Agta say managdamili et walaay pakauley a manggaway duaran banga manlapud saksakey a masa na pitek, a say sakey et onkana ed kagalangan, tan say sananey et onkana ed kababaingan? 22 Sirin, panon to no labay na Dios ya ipatnag so sanok to tan ipaamtay pakapanyari to, balet ta mantetepel tan aanosan ton maong iray banga na sanok a makanepegan ed kadederal? 23 Tan no ginawa to iya pian nipaamta to ray kayamanan na gloria to ed saray banga na panangasi, ya akauna lan intarya to pian nigloria,
Abuloyan so Disiplina nen Jehova a Manmoldi ed Sika
5 Panon to no talagan aglabay na totoo so manpamoldi ed Sankatalonggaringan a Domadamili? Panon ton usaren so autoridad to? No nairapan so domadamili ya moldien so pitek ed labay ton pagmaliwan, sarag ton gawaen ya sananey a pananginan odino ibantak itan. Kaslakan a nagagawa iya lapud nalilingo so domadamili. Balet agbalot nalilingo so Domadamili tayo, si Jehova. (Deu. 32:4) No aglabay na sakey so manpamoldid sikato, kasalanan to la itan. Uusaren nen Jehova so autoridad to bilang domadamili depende ed ikiwas na momoldien to. Saramay matulok et magmaliw a mausa-usar ed sikato. Singa bilang, saray alanaan a Kristiano et “saray banga na panangasi” a minoldi ya “onkana ed kagalangan.” Saraman balet so agda labay so manpamoldi ed Dios, sikaray “banga na sanok a ginawan makanepegan ed kadederal.”—Roma 9:19-23.
(Roma 10:2) Lapud tatasian ko a maseseg ira parad Dios, balet aliwan unong ed suston kakabatan.
it-1 1260 ¶2
Mangimon, Imon
Aliwan Dugan Inkaseseg. Nayarin say sakey et impapuso so inkaseseg odino pangimon to parad sakey ya gagala balet diad tua et ag-itan duga tan makapaliket ed Dios. Ontan so agawa ed dakel iran Judio nen inmunan siglo. Inisip dan magmaliw iran matunong diad pangunor dad Mosaikon Ganggan. Balet impaimano nen Pablo ya aliwan duga so inkaseseg da lapud anggapoy suston kakabatan da. Kanian agda agamoran so tuan inkatunong manlapud Dios. Kaukolan dan namoria so lingo ra tan manilalod Dios panamegley nen Kristo pian nagamoran day inkatunong tan nibulos irad pankasalanan ed Ganggan. (Rom 10:1-10) Say sakey ed saratan et si Saulo na Tarso, lapud grabe so inkaseseg to ed Judaismo “pinairap [ton] maong so kongregasyon na Dios pian naderal itan.” Estrikto ton tinumbok so Ganggan ya ‘pinaneknekan ton anggapoy nabalaw ed sikato.’ (Gal 1:13, 14; Fil 3:6) Balet say impangimon to parad Judaismo et aliwan duga. Anggaman ontan, nababasa nen Jehova so walad puso to kanian impanengneng nen Jehova so agnaparaan ya kaabigan ed sikato panamegley nen Kristo pian nipaarap ed dugan panagdayew.—1Ti 1:12, 13.
Panagbasa ed Biblia
(Roma 10:1-15) Agagi, say pipirawaten na pusok tan say masimoon ya ipipikasik ed Dios nipaakar ed sikara et say pakaliktar da. 2 Lapud tatasian ko a maseseg ira parad Dios, balet aliwan unong ed suston kakabatan. 3 Ta agda aamtaen so inkatunong na Dios noagta sasalien dan paneknekan a sikaray matunong, kanian ag-ira nampasakop ed inkatunong na Dios. 4 Ta si Kristo so anggaan na Ganggan, pian magmaliw a matunong so balang sakey a mangipapatnag na pananisia. 5 Ta oniay insulat nen Moises nipaakar ed inkatunong ya unong ed Ganggan: “Say toon manggagawa ed sarayan bengatla et manbilay ed panamegley na saratan.” 6 Balet oniay ibabaga na inkatunong a resulta na pananisia: “Agmo ibabaga ed sarilim, ‘Siopay onsegep ed tawen?’ salanti, pian mangileksab ed Kristo, 7 odino, ‘Siopay onlasur ed kaaralman?’ salanti, pian mangagwat ed Kristo manlapud inaatey.” 8 Balet antoy ibabaga na satan? “Say salita et asingger ed sika, walad sangim tan walad pusom”; salanti, “say salita” na pananisia, ya ipupulong tayo. 9 Ta no diad sangim et iyaabawag mon si Jesus so Katawan, tan diad pusom et ipapatnag moy pananisia a sikatoy pinaoli na Dios manlapud inaatey, niliktar ka. 10 Ta say sakey et nepeg ton ipatnag so pananisia diad puso to pian magmaliw a matunong, tan say salita et nepeg ton iyabawag ed publiko diad panamegley na sangi to pian sikatoy niliktar. 11 Ta ibabaga na kasulatan: “Siopaman a mangipapatnag na pananisia ed sikato et agnadismaya.” 12 Ta anggapoy pandumaan na Judio tan Griego. Saksakey so Katawan a manuuley ed amin, a mabunbunlok ed amin ya ontatawag ed sikato. 13 Ta “balang sakey ya ontatawag ed ngaran nen Jehova et niliktar.” 14 Balet, panon iran ontawag ed sikato no agda papanisiaan? Tan panon iran manisia ed sikato no agda ni nadngelan? Tan panon dan narengel no anggapoy manpulong? 15 Tan panon iran manpulong no ag-ira imbaki? Ta unong a nisulat: “Agaylay dakep iray sali na saramay mangiyaabawag na maong a balita nipaakar ed saray maong a bengatla!”