Saray Reperensya Parad Workbook ed Aral
AGOSTO 5-11
KAYAMANAN ED SALITA NA DIOS | 2 TIMOTEO 1-4
“Say Espiritun Iiter ed Sikatayo na Dios et Agmamawala na Takot”
(2 Timoteo 1:7) Ta say espiritun iiter ed sikatayo na Dios et agmamawala na takot, noagta mamawala na pakayari, aro, tan limpion kanonotan.
Sikayoran Kalangweran—Ipanengneng Yon Onaaligwas Kayo
9 Pian natulongan si Timoteo, oniay impanonot nen Pablo: “Aliwan say espiritu na inkamatakot so inter na Dios ed sikatayo, noagta say pakayari tan aro tan limpion kanonotan.” (2 Tim. 1:7, NW) Say “limpion kanonotan” et kabaliksan toy pakawalaan na dugan pakatebek tan panagkatunongan. Kalaktip ed satan so pananos anggano say situasyon mo et aliwan unong ed iilaloan mo. Walaray kalangweran ya angipanengneng na “espiritu na inkamatakot,” tan inisip dan natakasan day problema ra diad alablabas ya iyugip, pambantay na TV, pandruga, pambuanges, mabetbet a pam-party, odino pagmaliw ya imoral. Nasisimbawa iray Kristiano ya ‘ibeneg so ag-inkamaridios tan saray ib-ibeg a mangaraldalin, a manbilay ed sayan panaon a sidarangka tan situtunong.’—Tito 2:12.
(2 Timoteo 1:8) Kanian agmo ibabaing so pantasi nipaakar ed Katawan tayo, odino nipaakar ed siak ya apriso nisengeg ed sikato, noagta itepel mo met so irap parad maong a balita diad panmatalek mo ed pakayari na Dios.
‘Manpakpel tan Manpabiskeg Kayo!’
7 Si Pablo, a nansulat ed si Timoteo, so angikuan: “Ag-itayo inikdan na Dios na espiritu na katakotan; noag say pakayari . . . Agmo sirin ibaing so pamatua na Katawan tayo.” (2 Timoteo 1:7, 8; Marcos 8:38) Diad impakabasa tayo ed saratan a salita, tepetan tayoy inkasikatayo: ‘Kasin ibabaing ko so pananisiak, odino makpel ak? Diad pantratrabahoan (odino paneeskuelaan) ko, kasin ipapakabat ko so inkasiak bilang Tasi nen Jehova, odino iyaamot ko itan? Ambaing ak kasin magmaliw a miduma ed arum, odino ikikinon ko so inkadumak lapud relasyon ko ed si Jehova?’ No pilekpilek so sakey nipaakar ed panangipulong na maong a balita odino ed panayakup ed aglabalabay a sisisiaen, nodnonoten to komon so simbawa nen Jehova ed si Josue: “Manpakpel tan manpabiskeg ka.” Agbalot lilingwanan a say importante et say panmoria nen Jehova tan si Jesu-Kristo, aliwan say nibaga na saray katrabaho odino kaeskuela tayo.—Galacia 1:10.
Pankotkot na Espiritual a Kayamanan
(2 Timoteo 2:3, 4) Itepel mo met so irap bilang maong a sundalo nen Kristo Jesus. 4 Anggapoy sundalo a legan a walad serbisyo et mibibiang ed pananap na pambilay, pian nagamoran toy panangabobon na samay angilistad sikato bilang sundalo.
Anapen so Tuan Kayamanan
13 Si Timoteo et mabiskeg so pananisia to. Kayarin tinawag nen Pablo si Timoteo ya “maong a sundalo nen Kristo Jesus,” imbaga to: “Anggapoy sundalo a legan a walad serbisyo et mibibiang ed pananap na pambilay, pian nagamoran toy panangabobon na samay angilistad sikato bilang sundalo.” (2 Tim. 2:3, 4) Saray patumbok nen Jesus natan, kaiba lay masulok a sakey milyon ya walad full-time, et uunoren da iyan bilin nen Pablo anggad iyabuloy na kipapasen da. Ag-ira manpapatukso ed saray advertisement tan ed mundo, ya sankanonot da iyan prinsipyo: “Say akautang et aripen na samay amautang.” (Pro. 22:7) Labalabay nen Satanas ya upoten tayoy panaon tan biskeg tayo pian magmaliw tayon aripen na komersyo na mundo to. Ompan lapud saray arum ya desisyon tayo et pigay taon tayon nalubog ed utang. Nayarin manproblema tayo ed pinansyal lapud baleg ya pepelagan parad abung, edukasyon, mablin luluganan, odino baleg ya gastos ed engranden kasal. Ipapanengneng tayon marundunong tayo no papasimplien tayoy bilay tayo tan iiwasan tayoy onutang tan manggastos na baleg pian mansiansia tayon aripen na Dios imbes ya naaripen na sayan sistema na komersyo.—1 Tim. 6:10.
(2 Timoteo 2:23) Niarum ni, ipulisay mo ray makulangkulang tan andiay-kabaliksan a pandedebati, ta pansesengegan iratan na pankokolkol.
Saray Lingkor nen Jehova et ‘Ipupulisay Day Ag-inkatunong’
10 Diad panaon tayo, mataltalag la tay walay man-apostata diad kongregasyon. Balet ta ompan siansia nin wala ray narengelan tayon bangat ya kontrad ibabangat na Biblia. Inerman so nanlapuan na satan, nepeg tayon ipulisay ya tampol. Makapuy no midebati tayod saray apostata, diad personal man, diad Internet, o diad arum nin paraan. Anggano say intension tayo et tulongan itan ya too, susumlangen tayo imay isisimbawa na Biblia ya kakkayari tayon inkonsidera. On, igaganggan itayo nen Jehova ya sigpot a paliisan tan ipulisay so apostasya.
Panagbasa ed Biblia
(2 Timoteo 1:1-18) Siak, si Pablo, ya apostol nen Kristo Jesus diad linawa na Dios unong ed sipan a bilay a nagamoran diad panamegley nen Kristo Jesus, 2 et nansulat ak ed sika, Timoteo, ya ana’kon inad-aro: Nawalaan ka komon na agnaparaan a kaabigan, panangasi, tan kareenan a manlalapu ed Dios ya Ama tayo tan ed Kristo Jesus a Katawan tayo. 3 Misasalamat ak ed Dios, a panlilingkoran ko a singa ginawa na inmuunan atateng ko, tan gagawaen ko iya a walaay malinis a konsiensia, tan agta kan balot lilingwanan diad masimoon a pikakasik ed agew tan labi. 4 Sano nanononotan ko ray luam, pirpirawat ta kan nanengneng, pian manliket ak a maong. 5 Ta nanononotan koy pananisiam ya andiay pankunkunwari, ya unonan impatnag nen baim a Loida tan inam a Eunice, tan matalek ak a wala met iya ed sika. 6 Lapud saya, ipapanonot kod sika a pandarlang mon singa apoy so regalo na Dios a niiter ed sika sanen intapew ko ray limak ed sika. 7 Ta say espiritun iiter ed sikatayo na Dios et agmamawala na takot, noagta mamawala na pakayari, aro, tan limpion kanonotan. 8 Kanian agmo ibabaing so pantasi nipaakar ed Katawan tayo, odino nipaakar ed siak ya apriso nisengeg ed sikato, noagta itepel mo met so irap parad maong a balita diad panmatalek mo ed pakayari na Dios. 9 Inliktar tan tinawag to itayo pian magmaliw a masanto, aliwan lapud saray gawa tayo, noagta lapud gagala tan agnaparaan a kaabigan to. Saya et niiter ed sikatayo diad panamegley nen Kristo Jesus antis a ginmapoy andukerukey a panaon, 10 balet natan et mabitabitar la itan sanen pinmatnag so Manangiliktar tayo, si Kristo Jesus, a pinaandi to so ipapatey tan impalinew to so nipaakar ed bilay tan agkabubulok diad panamegley na maong a balita, 11 a nipaakar ed saya et aturo ak a managpulong tan apostol tan managbangat. 12 Saya so rason a nasasagmak ko irayan irap, balet agak ombabaing. Ta kabat ko so Dios a papanisiaan ko, tan matalek ak a nayarian ton alwaran so bengatlan impauleyan ko lad sikato anggad satan ya agew. 13 Itultuloy mon tumboken so pangaligan a maabig iran salita a nadngel mod siak pati say pananisia tan panangarom a resulta na pagmaliw a nikasakey ed Kristo Jesus. 14 Alwaran mo iyan maabig a bengatlan nimatalek ed sika diad panamegley na masanton espiritu a walad sikatayo. 15 Amtam ya imbeneg ak na amin a totoo diad probinsya na Asia, kaibay Figelo tan Hermogenes. 16 Kasian komon na Katawan so sankaabungan nen Onesiforo, ta naynay to ak a papasesegen, tan agto ak imbaing anggano akagulonggulong ak. 17 Imbes, sanen akakar ed Roma, sikatoy maseet a nananap ed siak tan aromog to ak. 18 Komon ta sikatoy kasian na Katawan a Jehova diad satan ya agew. Tan amtam so amin ya impanlingkor to diad Efeso.
AGOSTO 12-18
KAYAMANAN ED SALITA NA DIOS | TITO 1–FILEMON
“Manuro na Saray Mamatatken”
(Tito 1:5-9) Intilak ta ka ed Creta pian asikasoen mo ray bengatlan nepeg ya ipetek tan manuro ka na saray mamatatken ed kada syudad, unong ya imbilin kod sika: 6 no walay lakin anggapoy pakaakusaan ed sikato, saksakey so asawa to, saray anak to et mananisia tan ag-ira naakusaan a rebelyoso odino alablabas so kagagawa ra. 7 Ta say sakey a manangasikaso et nepeg ya anggapoy pakaakusaan ed sikato bilang manag-asikaso a tinuro na Dios, aliwan awet, aliwan mipepetang so ulo to, aliwan buanges, aliwan bayolenti, aliwan maagum a manaanap na agmanepeg a nabang, 8 noagta maparawes, maaro ed kamaongan, limpioy kanonotan to, matunong, matoor, walay kontrol tod sarili to, 9 maapit ton tutumboken so napanmatalkan a salita diad paraan na panagbangat to, pian nayarian toy mamaseseg diad panamegley na maabig a bangat tan mangipetek ed saramay onkokontra.
Tepetepet na Saray Manbabasa
Anggano aliwan detalyado so Kasulatan nipaakar ed no panon ya tuturoen iray brother nensaman, anggan panon et walay ideya tayo. Nabasa tayon nen pasempet lay Pablo tan Bernabe ed inmunan impanbiahe da bilang misionero, “anuro ra na mamasiken diad kada kongregasyon, tan kayari ran nampikasi tan nanayunal, inmatalek da ra ed si Jehova ya anisiaan da.” (Gawa 14:23) Kalabas na pigaran taon, insulat nen Pablo ed kaiba ton ombiabiahe ya si Tito: “Intilak ta ka ed Creta, pian asikasoen mo iray bengatlan nepeg ya ipetek tan manuro ka na saray mamasiken ed kada syudad, unong ya ingganggan ko la ed sika.” (Tito 1:5) Si Timoteo ya abayag ya akaiba nen apostol Pablo et inikdan met na ontan ya autoridad. (1 Tim. 5:22) Malinew sirin ya saray ombiabiahen manangasikaso so anuro na saray brother, aliwan saray apostol tan mamatatken ed Jerusalem.
Pian naalig iyan ginawa ra nensaman, inuman na Mananguley ya Ulop na Saray Tasi nen Jehova so uksoyan no panon ya turoen iray elder tan ministeryal a lingkor. Manlapud Setyembre 1, 2014, onia lay proseso: Repasoen a maong na kada manangasikaso na sirkito so rekomendasyon na saray elder ed sirkito to. Diad ibisita tod saray kongregasyon, kabaten to iramay inrekomenda, ya no nayari et miulop ed sikara diad ministeryo. Mitongtong so manangasikaso na sirkito ed ulop na mamatatken nipaakar ed rekomendasyon da, insan kayari to et sikato so akanresponsabilidad ya manuro na saray elder tan ministeryal a lingkor ed saray kongregasyon ed sirkito to. Sayan uksoyan et mas miparad samay ginawa nen inmunan siglo.
Siopa ray kaibad sayan proseso? Siempre, say “matoor tan makabat ya aripen” so manunan akanresponsabilidad ya pakanen iray lingkor na sankaabungan. (Mat. 24:45-47) Diad tulong na masanton espiritu et uusisaen day Kasulatan pian makapangiter iray instruksion no panon ya praktikal ya niyaplika iray prinsipyod Biblia ya walay koneksion tod paraan na pangoorganisa ed kongregasyon ed interon mundo. Say matoor ya aripen met so manuturo na amin ya manangasikaso na sirkito tan membro na Branch Committee. Ontutulong so kada branch office pian naunor iray instruksion ya nanlapud Mananguley ya Ulop. Obligasyon na kada ulop na mamatatken ya repasoen a maong iray Makasulatan ya kualipikasyon na saray brother ya irerekomenda da. Seryoson responsabilidad na kada manangasikaso na sirkito ya aralen a maong tekep na pikakasi iray rekomendasyon na saray elder, insan sikato so manuro na saray kualipikadon brother.
Pankotkot na Espiritual a Kayamanan
(Tito 1:12) Walay sakey ed sikara, a propeta ran mismo, ya angibagan: “Saray taga Creta et matitila, masesebeg ya atap ya ayayep, masisiban mangingiras.”
w89 5/15 31 ¶5
Tepetepet na Saray Manbabasa
Seguradon ag-inabobonan nen Pablo so anggan anton klase na panag-insulto ed lahi odino bansa na saray taga Creta. Makaseguro tayod satan lapud amta to ya diad Creta et wala ray maong ya Kristiano ya inabobonan na Dios tan nilanaan na masanton espiritu To. (Gawa 2:5, 11, 33) Dakel iray matoor ya Kristiano a kabiangan na saray kongregasyon ed “kada syudad.” Anggaman ag-ira perpekto, segurado tayon aliwa ran matitila tan masisiban mangingiras; ta no andi et ag-ira komon tuloytuloy ya inabobonan nen Jehova. (Filipos 3:18, 19; Apocalipsis 21:8) Tan no panon ya wala ray matuan impanpuso ya totoo diad amin a bansa natan, seguradon wala met iray ontan ya totoo ed Creta ya paneermenan day abebbeban moralidad ed kaliberliber da tan akaparaan iran mangawat ed mensahe na saray Kristiano.—Ezequiel 9:4; ikompara so Gawa 13:48.
(Filemon 15, 16) Ompan sayan talaga so rason no akin a sikatoy tinmaynan ya agano, pian sano ompawil ed sika et lawas mo lan nakaiba, 16 ya aliwa lan sakey ya aripen noagta mas maabig ni nen say aripen, sakey ya agin inad-aro, lalo la ed siak, ingen ta nagkalalo ni ed sika, ta sikatoy aripen mo tan agim ed Katawan.
Saray Pabitar ed Libro a Tito, Filemon, tan Hebreos
15, 16—Akin ya agkinerew nen Pablo ya ikdan nen Filemon na kawayangan si Onesimo? Labay nen Pablo ya iteen so imano to ed kimey ton ‘pangipulong na panarian na Dios, tan pangibangat ed saray bengatla nipaakar ed Katawan a Jesu-Kristo.’ Kanian, agto la akibabali ed saray isyu, a singa say panangaripen.—Gawa 28:31.
Panagbasa ed Biblia
(Tito 3:1-15) Itultuloy mo ran panonotan a manpasakop tan ontulok irad saray gobierno tan autoridad, akaparaan parad amin a maabig a gawa, 2 agda pansasalitaan na mauges so anggan siopa, ag-ira makolkol, noagta magmaliw iran makatunongan, ya ipatnag day inkaulimek ed amin a totoo. 3 Ta sikatayo met nensaman et makulangkulang, agmatulok, nibabalang, naaaripen ed nanduruman pilalek tan panliliket, naynay a manggagaway kaugsan tan maibeg, makapadimla, tan manbubusolan. 4 Balet, sanen nipatnag so kaabigan na Dios a Manangiliktar tayo tan say panangaro to ed too 5 (aliwan lapud saray matunong a ginawa tayo, noagta lapud panangasi to), inliktar to itayo diad panamegley na panaglinis ya amilay ed sikatayo tan diad impamasimbalo to ed sikatayo diad panamegley na masanton espiritu. 6 Mabunbunlok ton inkalbo ed sikatayo iyan espiritu diad panamegley nen Jesu-Kristo a Manangiliktar tayo, 7 pian sano niyabawag itayo lan matunong diad panamegley na agnaparaan a kaabigan na Dios et magmaliw itayon tomatawir unong ed ilalon bilay ya andi-anggaan. 8 Napanmatalkan irayan salita, tan labay ko ya itultuloy mon idanet irayan bengatla, pian saramay manisia ed Dios et naynay dan isentroy nonot da ed panggawa na saray maabig a bengatla. Saraya et maabig tan makagunggona ed totoo. 9 Balet agkan balot mibabali ed saray andi-kabaliksan a pisasangsangan tan panag-usisa ed saray kapolian tan pankokolkol tan panlalaban nipaakar ed Ganggan, ta saraya et agmakagunggona tan andi-kakanaan. 10 Samay toon mangikakayat na bangat na sakey a sekta et agmo la pipiulopan no amiduam lan sinimbawa, 11 lapud satan a too et sinmian ed dugan dalan tan mankakasalanan tan inukom la na dilin kasalanan to. 12 Sano ibakik ed sika si Artemas odino si Tiquico, gawam so anggaay nayarian mo ya onlad siak diad Nicopolis, ta diman so labay kon pamalabasan na ambetel a panaon. 13 Seetan mon itarya iray nakaukolan ed pambiahe di Zenas, a marunong ed Ganggan, tan si Apolos pian ag-ira nakulangan na antokaman. 14 Balet nepeg a naaralan na saray agagi tayo a mantultuloy iran manggaway maabig pian makatulong ira sano walay biglaan a pankaukolan, diad ontan et ag-ira magmaliw ya agmabunga. 15 Manpapakumusta ed sika so amin a kaibak. Ikumustaan mo ak ed saray kapananisiaan a mamapabli ed sikatayo. Niwala komon ed sikayon amin so agnaparaan a kaabigan.
AGOSTO 19-25
KAYAMANAN ED SALITA NA DIOS | HEBREO 1-3
“Aroen so Inkatunong tan Busolen so Kaugsan”
(Hebreo 1:8) Balet nipaakar ed Anak, inkuan to: “Say Dios so tronom ya anggad angga, tan say setro na Panarian mo et setro na kaptekan.
Igalang so Kristo, say Maglorian Ari!
8 Introno nen Jehova so Anak to bilang Mesianikon Ari ed tawen nen 1914. ‘Say setro na panarian to et sakey a maptek a setro,’ kanian segurado ya matunong tan patas so uley to. Legal so autoridad ya walad sikato ta si Jehova so angiletneg na panarian to. Ontan met, say trono nen Jesus et mansiansia ed “ando lan ando.” Agta maliket kan manlingkor ed si Jehova tan ed makapanyarin Ari ya pinili to?
(Hebreo 1:9) Inarom so inkatunong, tan binusol mo so kaugsan. Kanian say Dios mo et nilanaan to ka na larak na panliket a nagkalalo nen saray kakaibam.”
Igalang so Kristo, say Maglorian Ari!
7 Basaen so Salmo 45:6, 7. Inad-aron maong nen Jesus so inkatunong tan kabusol toy antokaman ya agmamapagalang ed Ama to, kanian sikato so nilanaan nen Jehova bilang Ari na Mesianikon Panarian. Si Jesus et nilanaan na “larak na inkaliket” tan mas ‘niyatagey nen saray kaiba to,’ saray ari na Juda ya nanlapud poli nen David. Akin et ontay nibaga tayo? Unona, si Jehova a mismo so nanlana ed si Jesus. Sakey ni, sikatoy nilanaan nen Jehova bilang Ari tan Atagey a Saserdote. (Sal. 2:2; Heb. 5:5, 6) Ontan met, si Jesus et nilanaan na masanton espiritu, tan say uley to et aliwan diad dalin noagta diad tawen.
Pankotkot na Espiritual a Kayamanan
(Hebreo 1:3) Iyaaninag to so gloria na Dios tan sikato so mismon kaulibay na Dios, tan pansiasiansiaen to so amin a bengatla diad panamegley na makapanyarin salita to. Tan kayari to tayon nilinisan ed saray kasalanan tayo, sikatoy yinmurong ed nikawanan na Sankatagyan diad tawen.
it-1 1185 ¶1
Indengan
Kasin naynay ya ipapatnag nen Jesus so piulibayan tod si Ama to diad pare-parehon paraan?
Say panguloan ya Anak na Dios, ya nagmaliw ya toon si Jesus, et kaulibay na Ama to. (2Co 4:4) Lapud mapatnag ya sayan Anak so katongtong na Dios nen imbaga ton, “Mamalsa ta na too unong ed indengan ta,” say Anak sirin et miulibayan ed Ama to, say Manamalsa, manlapu la nen sikatoy pinalsa. (Ge 1:26; Jn 1:1-3; Col 1:15, 16) Sanen wadiad dalin si Jesus bilang perpekton too, impatnag to iray kualidad tan personalidad na Ama to diad sigpot a paraan ya nasarag na too, kanian nibaga ton “siopaman ya akanengneng ed siak et anengneng to met lay Ama.” (Jn 14:9; 5:17, 19, 30, 36; 8:28, 38, 42) Balet segurado ya lalon apatnagan iyan piulibayan nen Jesus ed Ama to sanen sikatoy pinaolid bilay bilang espiritu tan inter ed sikato nen Ama to, si Jehova a Dios, so “amin a pakauley ed tawen tan diad dalin.” (1Pe 3:18; Mat 28:18) Lapud intandoro na Dios si Jesus ed “mas atagey a posisyon,” ipapatnag la natan na Anak na Dios so gloria na Ama to diad sankaabigan lan paraan kompara ed samay antis to nin linmeksab diad dalin manlapud tawen. (Fil 2:9; Heb 2:9) Sikato la natan so “mismon kaulibay na Dios.”—Heb 1:2-4.
(Hebreo 1:10-12) Tan: “Diad gapo, O Katawan, et inletneg mo ray pundasyon na dalin, tan say katawenan et ginawa na saray limam. 11 Naderal iratan, balet mansiansia ka; tan amin da et singa kawes ya ondaan, 12 tan balkoten mo ran singa balabal, a singa kawes, tan nasalatan ira. Balet agka manguman, tan agbalot manampot iray taon mo.”
it-1 1063 ¶7
Tawen
Saray salita ed Salmo 102:25, 26 et onaplika ed si Jehova a Dios, balet inaon iratan nen Pablo sanen binitla toy nipaakar ed si Jesu-Kristo. Say rason et lapud say bogbogtong ya Anak so inusar na Dios ya Komikimey To diad impamalsa ed uniberso. Impaimano nen Pablo so pidumaan na inkapermanente na Anak ed pisikal a palsa, ya nayarian na Dios ya ‘balkoten a singa balabal’ tan sarag ton ipireg, no labayen to.—Heb 1:1, 2, 8, 10-12; ikompara so 1Pe 2:3.
Panagbasa ed Biblia
(Hebreo 1:1-14) Nensaman, say Dios et akitongtong ed saray inmuunan atateng tayo ed panamegley na saray propeta diad dakel a pankanawnawa tan dakel a paraan. 2 Natan, diad sayan panaon et sikatoy akitongtong ed sikatayo ed panamegley na Anak to, a tinuro ton manawir ed amin a bengatla, tan diad panamegley to et ginawa to iray sistema na bengabengatla. 3 Iyaaninag to so gloria na Dios tan sikato so mismon kaulibay na Dios, tan pansiasiansiaen to so amin a bengatla diad panamegley na makapanyarin salita to. Tan kayari to tayon nilinisan ed saray kasalanan tayo, sikatoy yinmurong ed nikawanan na Sankatagyan diad tawen. 4 Kanian sikatoy nagmaliw a mas atagey nen saray anghel, ta tinawir to so sakey a ngaran ya alay abig nen say ngaran da. 5 Alimbawa, siopa ed saray anghel so angibagaan na Dios: “Sika so ana’ko; diad sayan agew et nagmaliw ak ya amam”? Tan inkuan to ni: “Siak so magmaliw ya ama to, tan sikatoy magmaliw ya anak ko”? 6 Balet sano ibaki to lamet diad dalin so Panguloan to, ibaga to: “Tan sikatoy igalang na amin ya anghel na Dios.” 7 Ontan met, inkuan to nipaakar ed saray anghel: “Gagawaen ton makapanyarin puersa iray anghel to, tan mandarlang ya apoy iray lingkor to.” 8 Balet nipaakar ed Anak, inkuan to: “Say Dios so tronom ya anggad angga, tan say setro na Panarian mo et setro na kaptekan. 9 Inarom so inkatunong, tan binusol mo so kaugsan. Kanian say Dios mo et nilanaan to ka na larak na panliket a nagkalalo nen saray kakaibam.” 10 Tan: “Diad gapo, O Katawan, et inletneg mo ray pundasyon na dalin, tan say katawenan et ginawa na saray limam. 11 Naderal iratan, balet mansiansia ka; tan amin da et singa kawes ya ondaan, 12 tan balkoten mo ran singa balabal, a singa kawes, tan nasalatan ira. Balet agka manguman, tan agbalot manampot iray taon mo.” 13 Balet siopa ed saray anghel so angibagaan to: “Yurong kad nikawanan ko anggad iyan ko ray kakabusol mo a toonan na saray salim”? 14 Agta amin da et espiritu a parad masanton panaglingkor, ya imbakin manlingkor parad saramay manawir na kililiktar?
AGOSTO 26–SETYEMBRE 1
KAYAMANAN ED SALITA NA DIOS | HEBREO 4-6
“Gawam so Anggaay Nayarian Mo ya Makaloob ed Painawa na Dios”
(Hebreo 4:1) Kanian, lapud wala nin siansia so sipan ya onloob ed painawa to, manalwar itayo ompan walad sikatayo so ipasen ya agmakanepegan ed satan.
(Hebreo 4:4) Ta diad sakey a pasen ed kasulatan et oniay imbaga to nipaakar ed komapiton agew: “Tan say Dios et nampainawa ed komapiton agew manlapud amin a kimey to,”
Painawa na Dios—Anto Itan?
3 Walay duaran rason no akin et nibaga tayon siansia nin komapiton agew nen unonan siglo C.E. Unona, ikonsidera tayo pay imbaga nen Jesus ed saramay sinmumpa ed sikato sanen walay tinambal to legay Sabaton. Inisip dan aliway ginawa to ta unong ed Mosaikon Ganggan, satan ya agew et panaoy painawa. Ingen, oniay imbaga nen Jesus ed sikara: “Say Amak et mankikimey ni anggad natan, tan ontan ak met.” (Juan 5:16, 17) Kinuestion day Jesus no akin a mankikimey anta Sabaton. Diad samay ebat ton “Say Amak et mankikimey ni,” singa to ibabagan: ‘Pareho so kimey mi nen Amak. Mankikimey si Amak diad loob la na nilibon taon na Sabaton to, kanian anggapoy uges to no mankimey ak met anggano Sabaton.’ Ipapanengneng sirin na saya a samay komapiton agew et nantultuloy ni diad panaon nen Jesus. Anggaman nampainawa so Dios ed impamalsa to, siansia nin mankikimey pian sumpaley gagala to parad totoo tan ed dalin.
4 Impaamta nen apostol Pablo so komaduan rason. Sanen inaon to so Genesis 2:2 nipaakar ed painawa na Dios, oniay pinuyanan ya insulat to: “Sikatayoran angipatnag na pananisia so makaloob ed pampainawaan.” (Heb. 4:3, 4, 6, 9) Kanian ipapanengneng na saya a siansia nin komapiton agew sanen panaon nen Pablo. Balet, anggad kapigan so pantultuloy na satan ya agew?
5 Pian naebatan itan a tepet, nepeg tayon tandaan no antoy gagala na komapiton agew. Impaliwawa itan na Genesis 2:3: “Say Dios benendisyonan to so komapito ya agew, tan sinantipika to.” Satan ya agew et “sinantipika” nen Jehova—a pinasantos odino imbiig to pian nasumpal so gagala ton say dalin et panayaman na matulok iran totoo a mangasikaso ed satan tan ed amin a bilay ditan. (Gen. 1:28) “Mankikimey ni anggad natan” si Jehova tan si Jesus, say “Katawan na sabaton,” pian nasumpal itan a gagala. (Mat. 12:8) Kanian say painawa na Dios et mantultuloy anggad sigpot a nasumpal so gagala to diad sampot na Sanlibon Taon ya Uley nen Kristo.
(Hebreo 4:6) Kanian, lapud wala ni ran siansia so onloob ed satan, tan saramay inmunan angipasabian na maong a balita et ag-akaloob lapud ag-ira matulok,
Painawa na Dios—Anto Itan?
6 Malinew ya impaliwawa na Dios so gagala tod si Adan tan Eva, balet ta sinumlang da itan. Tan minilyon so angalig ed sikara. Anggan say nasyon na Israel a pinilin totoo na Dios et aminpigapigan sinmunggay ed sikato. Pinasakbayan nen Pablo iray Kristiano nen unonan siglo ya posiblin naalig da iray Israelita. Insulat to: “Gawaen tayo sirin so anggaay nayarian tayo a makaloob ed satan a pampainawaan, ta pian anggapoy napelag tan mangalig ed satan ya alimbawa na agkatutulok.” (Heb. 4:11) Ipapanengneng na sayan imbaga nen Pablo ya agmakaloob ed painawa na Dios iray agmatulok. Antoy labay ya ibaga na satan? Kasin agtayo makaloob ed painawa na Dios no sumlangen tayoy gagala to anggan diad saray angkekelag a pamaakaran? Importantin amtaen tayoy ebat, tan aralen tayo itan diad sayan artikulo. Balet ta pantongtongan tayo nin unona so mauges ya alimbawa na saray Israelita tan no akin ya ag-ira akaloob ed painawa na Dios.
(Hebreo 4:9-11) Kanian wala nin siansia so painawa ed sabaton parad totoo na Dios. 10 Ta say toon akaloob la ed painawa na Dios et nampainawa met la ed saray dilin kimey to, no panon a say Dios et nampainawa met ed saray kimey to. 11 Gawaen tayo sirin so anggaay nayarian tayo ya onloob ed satan a painawa, pian anggapoy napelag tan mangalig ed satan ya alimbawa na agkatutulok.
Painawa na Dios—Anto Itan?
16 Diad sayan panaon tayo, anggapo la tay Kristianon mangibaga a nepeg tayon unorey Mosaikon Ganggan pian nilaban. Oniay malinew ya insulat nen Pablo ed saray taga Efeso: “On, diad sayan agnaparaan a kaabigan et nilaban kayo ed panamegley na pananisia; tan aliwa iyan lapud sikayo, noagta saya so regalo na Dios. Andi, aliwa itan a lapud saray gawa, ta pian anggapoy toon nawalaan na sengegan pian manpasirayew.” (Efe. 2:8, 9) Panon sirin a makaloob iray Kristiano ed painawa na Dios? Tandaan ya imbiig nen Jehova so komapiton agew bilang painawa to pian sumpaley gagala to parad dalin tan parad matulok a totoo. Ibabaga nen Jehova ed sikatayo so gagala to tan say panlabayan to panamegley na organisasyon to. Makaloob odino makapibiang itayod painawa nen Jehova no matulok itayon mikimey ed organisasyon to parad pakasumpal na gagala to.
17 Balet, no melmelagen tayoy simbawa na matoor tan makabat ya aripen odino pilien tayo labat so labay tayon unoren, susumlangen tayoy gagala nen Jehova. No ontan, ipepeligro tayoy maapit a relasyon tayod sikato. Diad onsublay ya artikulo, konsideraen tayoy pigaran situasyon a nipanengneng tayo no kasin matulok itayo. Saray desisyon tayo ed sarayan situasyon so mangipatnag no kasin talagan akaloob itayo la ed painawa na Dios.
Pankotkot na Espiritual a Kayamanan
(Hebreo 4:12) Ta say salita na Dios et mabilay tan makapanyari tan mas makdem nen say dinanman a duaray-tarem ya espada tan ontalos anggad pansianen toy kamarerwa tan espiritu, tan saray pukel tan utek na saratan, tan natebek to ray kanonotan tan intension na puso.
Tepetepet na Saray Manbabasa
Anto so “salita na Dios” ya ibabaga na Hebreo 4:12 ya “mabilay tan makapanyari”?
▪ Ipapanengneng na konteksto ya say tutukoyen nen apostol Pablo et say mensahe odino imbalikas na Dios a gagala to ya walad Biblia.
Mabetbet ya uusaren so Hebreo 4:12 ed saray publikasyon tayo pian ipanengneng ya say Biblia et walay pakayari ton umaney bilay, tan susto itan ya pakatalos tayo. Balet, mas maabig no amtaen tayoy mas malaknab ya kabaliksan na Hebreo 4:12. Papasesegen nen Pablo iray Hebreon Kristiano ya onkiwas base ed saray gagala na Dios. Dakel ed saratan so walad masanton sulsulat. Inusar nen Pablo ya alimbawa iray Israelita ya akaliktar ed Ehipto. Walay ilalo dan onloob ed insipan ya dalin a “manag-agus so gatas tan dilo,” tan talagan makapanpainawa ira ditan.—Exo. 3:8; Deu. 12:9, 10.
Atan so imbalikas na Dios ya gagala to. Balet, inmawet so puso na saray Israelita tan anggapoy pananisia ra, kanian dakel ed sikara so ag-akaloob ed satan ya painawa. (Num. 14:30; Jos. 14:6-10) Pero, inyarum nen Pablo ya “wala nin siansia so sipan ya onloob ed painawa” na Dios. (Heb. 3:16-19; 4:1) Satan ya “sipan” et malinew ya kabiangan na imbalikas na Dios ya gagala to. Singa saray Hebreon Kristiano, sarag tayon amtaen itan ya gagala tan onkiwas base ed satan. Pian pruebaan ya sayan sipan et base ed Kasulatan, inusar nen Pablo so Genesis 2:2 tan Salmo 95:11.
Seguradon malikeliket tayo ta “wala nin siansia [itan ya] sipan ya onloob ed painawa” na Dios. Manisia tayo ya say base ed Biblian ilalo ya onloob ed painawa na Dios et talagan tua, tan manggagawa tayo lay paraan pian makaloob ed satan. Agtayo itan nagamoran diad panamegley na Mosaikon Ganggan odino arum ni ran sakripisyo o kimey pian naalay pabor nen Jehova. Imbes lapud pananisia, malikeliket itayon tuloytuloy a mikoopera ed saray imbalikas na Dios ya gagala to. Niarum ni, singa nipaimano la, nilibon totoo ed interon mundo so ginmapon manaral na Biblia tan naamtaan day imbalikas na Dios ya gagala to. Dakel ed sikara so apakiwas ya umaney kabibilay da, ipanengneng so pananisia, tan magmaliw ya bautismadon Kristiano. Papaneknekan na impanguman da ya “say salita na Dios et mabilay tan makapanyari.” Say imbalikas na Dios ya gagala to a walad Biblia et baleg lay nitulong to ed sikatayo tan siansia nin walaan na pakayari ed bilay tayo.
(Hebreo 6:17, 18) Mipadpara, sanen denesidi na Dios so mangiter na mas malinew ya ebidensya ed saray tomatawir na sipan ya agmanguman so gagala to, ginarantiyaan to itan ed panamegley na sakey a samba, 18 pian diad panamegley na duaran agmanguman a bengatla a nipaakar ed saraya et imposiblin mantila so Dios, sikatayo ran oonlad panagsalimbengan et napaseseg a maong ya ombemben a malet ed ilalo a nitarya ed sikatayo.
it-1 1139 ¶2
Ilalo
Say ilalon bilay ya andi-anggaan tan agkabubulok parad saramay “kabiangan ed saray atawag ya onlad tawen” (Heb 3:1) et walaan na malet a basiyan tan talagan napanmatalkan. Susuportaan itan na duaran bengatla ya imposiblin mantila so Dios, salanti, say sipan to tan say sinambaan to, tan seguradon nagawa so amin ya iilaloan tayo lapud si Kristo, ya natan et walaan la na imortal a bilay ed tawen. Kanian sayan ilalo et tinukoy ya “angkla na kamarerwa tayo, a segurado tan malet, tan saya so mangiloob ed sikatayo ed lampas na kurtina [ya singa iloloob na atagey a saserdote ed Sankasantosan diad Agew na Pananakbong], a nilooban na samay inmuna la parad sikatayo, si Jesus, a nagmaliw ya atagey a saserdote ed andi-anggaan a mipadpara ed si Melquisedec.”—Heb 6:17-20.
Panagbasa ed Biblia
(Hebreo 5:1-14) Ta balang atagey a saserdote a pinili ed limog na totoo et tinuro parad sikara pian mangasikaso ed saray bengatlan nipaakar ed Dios, diad ontan et niyapay to ray regalo tan bagat parad saray kasalanan. 2 Nayarian toy mideneng a mapangasi ed saray mankakasalanan a kulang na kakabatan, ta amta ton wala met iray kakapuyan to, 3 tan lapud satan et kaukolan toy mangiyapay parad saray dilin kasalanan to a singa gagawaen to parad saray kasalanan na totoo. 4 Say too a naiikdan na sayan kagalangan et aliwan lapud dilin panlabayan to, noagta naawat to labat itan sano sikatoy tinuro na Dios, a singa si Aaron. 5 Ontan met, say Kristo et agto inggloriay sarili to diad impagmaliw ton atagey a saserdote, noagta sikatoy inggloria na samay Sakey ya angibagad sikato: “Sika so ana’ko; diad sayan agew et nagmaliw ak ya amam.” 6 Ta onia met so inkuan tod sananey a pasen ed kasulatan, “Sakey kan saserdote ed andi-anggaan a mipadpara ed si Melquisedec.” 7 Sanen manbibilay diad dalin si Kristo, sikatoy masimoon a nampikasi tan kinmerew tekep na maksil ya akis tan saray lua diad Dios a makapangiliktar ed sikato ed ipapatey, tan naebatan iray pikakasi to lapud walay takot tod Dios. 8 Anggano sikato so anak, naaralan toy katutulok lapud saray asagmak to. 9 Tan sanen nagnap la, sikatoy nagmaliw a dalan pian makaawat na andi-anggaan a kililiktar so amin ya ontutulok ed sikato, 10 lapud sikatoy tinuro na Dios bilang atagey a saserdote a mipadpara ed si Melquisedec. 11 Dakel so nibaga mi nipaakar ed sikato, balet mairap itan ya ipaliwawa lapud nagmaliw ya epel so pakadngel yo. 12 Ta natan et managbangat kayo la komon, balet kaukolan a walay mangibangat lamet ed sikayo ya igapo to ed saray manunan aaralen nipaakar ed saray sagradon mensahe na Dios, tan pinmawil kayod dati a singa sakey a mankaukolan na gatas, imbes ya anawet a naakan. 13 Ta say siopaman a gatas nin siansia so iinumen to et agto amta so salita na inkatunong, lapud sikatoy melag nin ugaw. 14 Balet say anawet a naakan et parad saray matatken la, a diad panguusar dad pakayari ran manebek et nipapasal itan a mangibiig ed duga tan aliwa.