LEKSION 7

Susto tan Makakombinse

Lucas 1:3

SUMARYO: Mangusar na napanmatalkan ya ebidensya pian natulongan iray ondedengel ya nawalaay dugan konklusyon.

Usaren iray napanmatalkan ya reperensya. Saray komentom et nepeg ya akabase ed Salita na Dios, tan direktan basaen itan no posible. No bilang ta mangusar kay reperensya nipaakar ed science, balita, eksperiensya, odino arum nin onsuportan ebidensya, i-research mo ni no kasin napanmatalkan tan sankabaloan itan ya impormasyon.
Usaren ed suston paraan iray reperensya. Ipaliwawa iray teksto base ed konteksto, mensahe na interon Biblia, tan saray publikasyon ya manlalapud “matoor tan makabat ya aripen.” (Mat. 24:45) No usaren iray reperensyan agnanlapud saray publikasyon tayo, ag-uumanen so kabaliksan tan agmangibabaga na duma ed samay labay ya ibaga na nansulat.

Agsosobraan so impormasyon odino saray bilang. Aggagawaen ya “karaklan a totoo” so “arum a totoo,” tan “lanang” so “no maminsan.”
Pannonoten iray ondedengel base ed ebidensya. Kayarin basaen so sakey a teksto odino sakey a reperensya, mangusar na saray agmakaopendi ya tepet odino iyilustra so punto pian natulongan iray ondedengel ya manggaway sarili ran konklusyon.