LEKSION 4

Epektibon Pangipresenta ed Teksto

Mateo 22:41-45

SUMARYO: Iparaan so nonot na saray ondedengel antis ya basaen so teksto.

Nonoten no akin ya basaen so sakey a teksto. Ipresentam so kada teksto ed paraan ya imanoen na saray ondedengel so punto ya labay mon idanet ed bersikulo.

Ikonsidera so konteksto. No bitlaen mo no siopay nansalita ed basaen ya teksto odino siopay nansulat ed libro na Biblia, seguroen ya duga so ibagam.
Ipaimano so autoridad na Biblia. No manisia ed Dios iray ondedengel, ipaimano so Biblia bilang Salita na Dios, diad ontan et nipanengneng ya satan so sankamaongan ya lapuan na karunongan.
Tulongan iran nawalaay interes ed basaen ya teksto. Mangusar na tepet ya ebatan na teksto, mamitla na problema ya nasolusyonan diad tulong na satan ya teksto, odino mangibaga na prinsipyo ya nalinewan panamegley na sakey a salaysay ed Biblia.

Isipen no anto lay amta na saray ondedengel nipaakar ed topic tan ed teksto ya usaren mo. Gawam ya makapainteres so pangipresentam ed anggan saray pamilyar lan teksto, tan tulongan iray ondedengel ya ipasen ya walay balon naaralan da ed satan.