Saray Reperensya Parad Workbook ed Aral
© 2025 Watch Tower Bible and Tract Society of Pennsylvania
SETYEMBRE 1-7
KAYAMANAN ED SALITA NA DIOS PROVERBIO 29
Ipulisay Iray Kustombre ya Agmakapaliket ed si Jehova
wp16.06 6, kahon
Saray Walad Tawen—Impanengneng Panamegley na Milagro
Singa saray priso ya akagulonggulong, minilyon ya totoo natan so aripen na saray pamahiin tan takot ed mauges iran espiritu. Manguusar ira na saray anting-anting, iinumen ya walay magic to, tan arum ni parad proteksion da. Agmo kaukolan ya gawaen iratan. Oniay ipapaseguro na Biblia: “Saray mata nen Jehova et onnenengneng ed interon dalin pian ipatnag toy biskeg to parad saramay matoor so puso rad sikato.” (2 Awaran 16:9) Say tuan Dios, si Jehova, et mas makapanyari nen si Satanas tan protektaan To ka no mantiwala ka ed Sikato.
Pian protektaan ka nen Jehova, kaukolan mon amtaen no antoy makapaliket ed sikato tan nepeg mon gawaen itan. Alimbawa, nen inmunan siglo, tinipon na saray Kristiano ed syudad na Efeso so amin ya libro ra ed magic tan pinoolan da iratan. (Gawa 19:19, 20) Ontan met, no labay mon naprotektaan na Dios, kaukolan mon ekalen iray anting-anting, pampasuerte, libron parad magic, “pangontra” ya purselas, tan antokaman ya walay koneksion to ed demonyo.
Suportaan so Katuaan Nipaakar ed Ipapatey
13 No agka segurado ed sakey ya kustombre odino tradisyon, manpikasi kad si Jehova tan kerew kad sikato na karunongan. (Basaen so Santiago 1:5.) Insan ka man-research ed saray publikasyon tayo. No kaukolan, mantepet kad saray elder ed kongregasyon yo. Agda ibagad sika no antoy gawaen mo, balet nayarin ipaimano dad sika iray makatulong ya prinsipyo ed Biblia, a singa saray walad sayan artikulo. No oniay gawaen mo, ipapasal mo so ‘pakayarim ya manebek,’ tan satan so ontulong ed sikan “mangibiig ed duga tan aliwa.”—Heb. 5:14.
“Manakar Ak Unong ed Katuaan Mo”
12 Agmakasulatan iran kustombre tan kagagawa. Nayarin piliten itayo na saray kapamilya, katrabaho, tan kaeskuela tayo ya mibiang ed saray selebrasyon da. Panon tayon nalabanan so desdes ya mibiang ed saray kustombre tan selebrasyon ya agmamapagalang ed si Jehova? Nagawaan tayo itan no sankanonot tayon naynay no antoy panmoria nen Jehova ed saratan ya kagagawa. Makatulong no basaen lamet iray publikasyon tayo ya mangipapaliwawa no iner so nanlapuan na saratan ya popular a selebrasyon. No nonoten tayo ray Makasulatan ya rason no akin ya agtayo mibibiang ed saratan ya selebrasyon, naseguro tayo ya manaakar tayod paraan ya “makapaliket ed Katawan.” (Efe. 5:10) Say panmatalek ed si Jehova tan ed Salita to so manprotekta ed sikatayo manlapud “panggiwgiw ed arap na totoo.”—Pro. 29:25.
Saray Espiritual a Kayamanan
“Mangaro Itayo . . . Diad Gawa tan Katuaan”
11 Masimoon ya komendaan iray agagi. Nepeg ya mananap tayoy pankanawnawan komendaan so sakey tan sakey, ta “makapabiskeg” itan. (Efe. 4:29) Balet nepeg ya nanlapu itan ed puso. Ta no andi, singa tayo labat ira lalarogan odino papaliisan tayoy responsabilidad ya mangiter na nakaukolan ya simbawa. (Pro. 29:5) No komendaan tayoy sakey balet balbalawen tayo no akabeneg la, pansimpisimpitan itan. Pinaliisan itan nen apostol Pablo tan sikatoy maabig ya alimbawa no panon ya ipanengneng so tuan panangaro diad paraan na impangomenda to ed arum. Singa bilang, masimoon ton kinomendaan iray Kristiano ed Corinto ed saray maong ya kagagawa ra. (1 Cor. 11:2) Balet nen walay ginawa ra ya agnepeg ya komendaan, malinew ton imbaga ed sikara so rason diad maaron paraan.—1 Cor. 11:20-22.
SETYEMBRE 8-14
KAYAMANAN ED SALITA NA DIOS PROVERBIO 30
“Agmo Ak Komon Aabuloyan a Manirap Odino Onyaman”
Anton Klase na Aro so Panlapuan na Tuan Liket?
10 Siempre, kaukolan tayon amin so kuarta. Proteksion met itan. (Ecl. 7:12) Balet tua kasi ya maliket so too no say wala labat ed sikato et dugarugan pambilay to? On! (Basaen so Eclesiastes 5:12.) Insulat nen Agur ya anak nen Jakeh: “Agmo ak komon aabuloyan a manirap odino onyaman. Say kanen ko labat komon et samay betang ko.” Mainomay tayon natalosan no akin ya agto labay ya onirap so bilay to. Imbaga to ya agto labay so natukson mantakew ta napabanday so Dios no gawaen to itan. Balet akin et impikasi to met ya agto labay so onyaman? Insulat to: “Pian agak napesel tan iburi ta ka, ya ibagak, ‘Siopa ’tay Jehova?’” (Pro. 30:8, 9) Nayarin wala ray kabat mo ya manmamatalek ed kayamanan da imbes ya diad Dios.
11 Saray maaro ed kuarta et agda napaliket so Dios. Imbaga nen Jesus: “Anggapoy toon nayarian toy manpaaripen ed duaran katawan; ta balanglan busolen to imay sakey tan aroen to imay sananey, odino sikatoy mansiansia ed sakey tan balawen to imay sananey. Agyo nayarian so manpaaripen ed Dios tan ed Kayamanan.” Antis na satan imbaga to ni: “Agkayo la mantitipon na saray kayamanan diad dalin, a deralen na bigis tan lati, tan natakew. Imbes, mantipon kayo na saray kayamanan ed tawen, ya agderalen na bigis tan lati, tan agnatakew.”—Mat. 6:19, 20, 24.
12 Parad dakel, say simplin bilay et aliwa labat ya makapaliket noagta mangiiter met ed sikara na mas dakel a panaon ya manlingkor ed si Jehova. Si Jack, ya manaayam ed United States, et inlako toy baleg ya abung to tan negosyo to pian makapanpayunir kaibay asawa to. Oniay imbaga to: “Aliwan mainomay parad sikami ya ilako so balibalin abung tan dalin mi. Balet, pigay taon ya kada no onsesempet ak ed abung et dismayado ak lapud problema ed trabaho. Say asawak ya regular payunir et lanang ya maliket. Ibabaga to, ‘Sankamaongan so boss ko!’ Natan ta payunir ak met la, saksakey lay Boss mi, si Jehova.”
“Kasin Mas Inarom Ak Nen Saraya?”
15 Labalabay na dakel ya totoo natan so nawalaan na sankabaloan iran kawes, gadyet, tan arum ni. Kanian nepeg ya regular ya usisaen na kada Kristiano no anto ray pipirawaten to tan tepetan toy sarili to: ‘Kasin importante lan maong ed siak iray materyal a bengatla kanian mas dakel so oras ko ya man-research tan mannonot no anto ray sankabaloan ya luganan odino kawes nen say pamparaan parad aral? Kasin masyado ak lan busy ed inagew-agew ya kimey ko kanian daiset lay panaon kon manpikasi o manbasa na Biblia?’ No nanengneng tayo ya naaandi lay panangaro tayo ed si Kristo lapud panangaro tayo ed materyal iran bengatla, kaukolan tayon nodnonoten iyan imbaga nen Jesus: “Manalwar kayo ed amin a klase na inkaagum.” (Luc. 12:15) Akin ya impasakbay itan nen Jesus?
16 Imbaga nen Jesus ya “anggapoy toon nayarian toy manpaaripen ed duaran katawan.” Imbaga to ni: “Agyo nayarian so manpaaripen ed Dios tan ed Kayamanan.” Say rason et labay na sayan duaran “katawan” ya sikara labat so panlingkoran. Balanglan ‘busolen tayo imay sakey tan aroen imay sananey, odino mansiansia tayo ed sakey tan balawen imay sananey,’ kuan nen Jesus. (Mat. 6:24) Lapud aliwa itayon perpekto, kaukolan tayon itultuloy ya labanan iray “pilalek na laman tayo,” kaiba lay materyalismo.—Efe. 2:3.
17 Saray totoon akapokus ed pilalek na laman da et naiirapan ya magmaliw ya balanse ed pangipapasen dad materyal iran bengatla. Akin? Lapud kinmapuy so espiritual ya pakatalos da. (Basaen so 1 Corinto 2:14.) No naepel lay pakayari ran manebek, mas nairapan la ran ibiig no antoy duga tan aliwa. (Heb. 5:11-14) Bilang resulta, agla nakontrol na arum so pampilalek dad materyal iran bengatla—pilalek ya agbalot napenek. (Ecl. 5:10) Maong labat ta no nasasamalan lay nonot tayo na materyalismo, walay pangontra: say regular ya pambasa na Salita na Dios, say Biblia. (1 Ped. 2:2) No panon ya say impandalepdep nen Jesus ed katuaan ya nanlapud Dios et amabiskeg ed sikaton labanan so tukso, say pangiyaplika ed saray prinsipyo na Biblia so ontulong ed sikatayon nalabanan so pampilalek tayod materyal iran bengatla. (Mat. 4:8-10) No gawaen tayo itan, ipapanengneng tayo ya mas inaro tayoy Jesus nen say antokaman ya materyal a bengatla.
g19 No. 3 10 ¶4-5
Panag-budget na Kuarta
● Man-budget. Isulat mon amin so panggastosan mo, tan apag mo itan ed nanduruman kategorya. Insan ka mandesisyon no piga so gastosen mo ed kada kategorya. No asobraan moy ginastos mo ed sakey ya kategorya, mangala ka ed arum ya kategorya. Singa bilang, no sobra so agastos mo ed gasolina, mangala kay kuarta ed kategorya ya agtanton importante—singa say pangan ed restaurant.
● Iwasan moy onutang. Anggad posible, iwasan moy onutang. Mantipon ka ni antis mon saliwen so kaukolan mo. No manguusar kay credit card, bayaran mon amin so utang mo kada bulan pian agka manbayar na interes. No walay utang mo, iplanom no panon mon bayaran tan tumbok moy planom.
Mansiansia Kad Tolda nen Jehova Anggad Angga!
18 Marakep sirin no usisaen tayoy sarili tayo no kasin balanse so pakanengneng tayo ed kuarta. Tepetan moy sarilim: ‘Kasin puros kuarta so sankanonot ko tan no antoy onsublay ya saliwen ko? No akautang ak, kasin manbabayar ak ya tampol odino andi ta iisipen kon makuarta met may inutangan ko? Kasin atagtagey so pakanengneng kod sarilik ta dakel so kuartak? Kasin mair-irap koy mangiter? Kasin materyalistiko so pakanengneng ko ed sakey ya agi lapu labat ta mayaman? Kasin say labalabay ko labat ya kaaro et iramay makuarta tan agko masyadon papansinen iray mairap-bilay?’ Importante ya itepet tayo iraya ed sarili tayo ta labay tayoy mansiansia ed tolda nen Jehova bilang sangkaili to. Balbaleg itan ya kagalangan. Agtayo labay ya naandi itan ed sikatayo lapu labat ed kuarta. No aliwa tayon maaro ed kuarta, agto tayon balot paulyanan nen Jehova.—Basaen so Hebreo 13:5.
Saray Espiritual a Kayamanan
Napatnagan ed Saray Palsa so Kakabatan nen Jehova
11 Say rock badger (NW, balet nipatalos a “koneho” diad PBS) et sananey nin melag a pinalsa a pakaaralan tayoy makanakanan leksion. (Basaen so Uliran 30:26.) Kapadpara na saya so baleg a koneho, balet ta say layag to et melag tan malimpek, tan antikey iray sali to. Diad mabato iran pasen so pakaromogan ed saya. Say makdem a pakanengneng to, tan saray abot tan letak ed mabaton ayaman to, so onkakanan proteksion to ed saray managsibar. Pian manbilay, adesinyo iraya a mansisimpok, ya onkakana met a salimbeng da tan ontutulong ed sikaran agnaketel no panaoy yelo.
12 Antoy naaralan tayo ed rock badger? Unona, imanoen ya agpapaulyan na sayan ayep so inkasikaton niparungtal ed peligro. Imbes, uusaren toy makdem a pakanengneng to pian nanengneng to laray managsibar anggan arawi nira. Tan agmet onaarawi ed saray abot tan letak a sarag ton batikan pian nasalimbengan. Mipadpara, kaukolan met a makdem so espiritual a pakanengneng tayo pian natebek tayoray kaatapan ed mundo nen Satanas. Oniay insimbawa nen apostol Pedro ed saray Kristiano: “Mandangka kayo, manbantay kayo, ta say kabusol yo, say Diablo wala ed kaliberliber yo a singa omoang a leon a mananap na buagen to.” (1 Ped. 5:8) Si Jesus, sanen wadiad dalin et nansiansian alerto ed amin ya impanali nen Satanas a buyaken so integridad To. (Mat. 4:1-11) Maabig so inter ton ehemplo ed saray papatumbok to!
13 Say sakey a paraan pian magmaliw itayon alerto et diad panganamot ed saray probisyon nen Jehova a manalimbeng ed espiritualidad tayo. Nepeg ya agtayo papaulyanan so panagaral na Salitay Dios tan pipiaral. (Luc. 4; Heb. 10:24, 25) Sakey ni, no panon a say pansisimpok et baleg a pankaabigan na saray rock badger, kaukolan tayo met so mansiansian maapit ed saray agagi pian ‘makapanpapasesegan’ itayo. (Roma 1:12, NW) No anamoten tayo irayan probisyon nen Jehova a pakasalimbengan tayo, ipapatnag tayoy panangabobon ed insulat nen salmistan David: “Si Jehova sikato so baton dampay ko, tan salimbeng ko, tan mangiliktar ed siak. Dios ko, dampay ko, a dia ed sikato manmatalek ak.”—Sal. 18:2.
SETYEMBRE 15-21
KAYAMANAN ED SALITA NA DIOS PROVERBIO 31
Saray Naaralan ed Maaron Bilin na Sakey ya Ina
g16 No. 5 9 ¶1-6
No Panon Yon Ibangat ed Anak Yo so Tungkol ed Sex
Sikayo so mangibangat. Anggano singa kababaing ya itongtong ed anak yo so tungkol ed sex, awat yo ya responsabilidad yo itan.—Prinsipyo ed Biblia: Proverbio 22:6.
Itongtong anggan magano labat. Imbes ya ipanaon so andukey ya tongtongan, sambot yo ran katongtongen ya aliwan masyadon pormal, singa bilang no saniba kayod luganan odino legan yon mankikimey ed abung. Tepetan yo ray anak yo diad paraan ya naamtaan yoy nononoten da. Alimbawa, imbes ya say itepet et “Labay mo ray ontan ya advertisement?” mas maong no tepeten mon, “Akin kasi et uusaren na saray negosyante so ontan iran litrato pian i-promote so produkto da?” Kayari ton onebat, tepetan yo, “Antoy nibagam ed satan ey?”—Prinsipyo ed Biblia: Deuteronomio 6:6, 7.
Say ibangat ed sikara et depende ed edad da. Anggano angkekelag ni ray anak yo, sarag yo lan ibangat ed sikara so dugan tawag ed saray sex organ, tan no panon dan protektaan so sarili da ed saray managmolestya. Diad ibabaleg da, ibangat yod sikara no panon ya manlulukon so nanay. No manmarmarikit o manbalbalolaki la ra, nepeg ya natatalosan da la no panon ya nagagawa so sex tan no siopa labat so manepeg ya manggawa ed satan.
Ibangat no antoy manepeg tan agmanepeg. Anggano ugaw ni ray anak yo, ibangat yo lad sikara ya importante so pagmaliw ya matua, matoor, tan marespeto. Pian no itongtong yo lay tungkol ed sex, mas mainomay dan natalosan no antoy manepeg tan agmanepeg. Tan malinew yon ibagad sikara no anto ray prinsipyo yod bilay. Alimbawa, no parad sikayo et aliwan manepeg so pi-sex antis na kasal, ibaga yod sikara. Tan ipalinew yo no akin ya agnayari tan mauges itan. “No amta na saray tinedyer ya agkompormi iray ateng da ya mi-sex iray tinedyer, baleg so posibilidad ya agda gawaen itan,” kuan na libron Beyond the Big Talk.
Ipanengneng so maong ya alimbawa. Ipanengneng ya uunoren yon mismo so prinsipyon ibabangat yo. Singa bilang, kasin oneelek ka no walay manlurey na bastos? Kasin makapaakit iray sulong mo? Kasin mikakarinyoan ka ed agmo asawa? No ontan so gagawaen yo, nayarin ag-unoren na ananak yo so prinsipyon ibabangat yo.—Prinsipyo ed Biblia: Roma 2:21.
Ibangat ya aliwan mauges so sex. Say sex et regalo na Dios, tan no gawaen labat itan na sanasawa, panlapuan itan na liket. (Proverbio 5:18, 19) Ibangat yod anak yo ya na-enjoy to lanlamang itan no wala lay asawa to, tan agto la kaukolan ya nasali so ermen tan problema ya naeeksperiensya na saramay misi-sex ya agni kasal.—1 Timoteo 1:18, 19.
ijwhf artikulo 4 ¶11-13
Itongtong ed Anak Mo so Nipaakar ed Alak
Sika so mangigapo na tongtongan. “Ompan agnatalosan a tampol na ugugaw so nipaakar ed iyinum na alak,” so imbaga nen Mark, sakey ya ama ed Britain. “Tinepetan koy waloran taon ya anak kon laki no kasin duga odino aliwa so iyinum na alak. Kinatongtong ko ya singa kami labat maniistoryaan, kanian agnababaingan ya ibaga no anto ray naiisip to.”
Mas natandaan na anak mo so ibabagam no maminpiga yon pantongtongan so nipaakar ed alak. Depende ed edad na anak mo, sarag mon ipila ed tongtongan yo so arum ni ran importantin topic, singa bilang, no panon ya naiwasan iray disgrasya ed karsada tan say nipaakar ed sex.
Ipanengneng moy maong ya alimbawa. Mipara iray ugugaw ed espongha o sponge—naesep dan amin so walad kaliberliber da—tan ipapanengneng na impan-research ya saray atateng so walaan na sankabalegan ya impluensya ed ananak da. Kanian no say iyinum na alak so paraan mo pian onkalma tan nasarag moy stress, isipen na anak mo ya say alak so solusyon ed saray problema ed bilay. Maabig no sikan mismo et maong ya alimbawa ed kakainum na alak.
Ibangat so Ananak ya Manpaabeba
Pasesegen ya mangiter. Ipanengneng mod anak mo ya “mas makapaliket so mangiter nen say mangawat.” (Gawa 20:35) Panon? Nayarin manggawa kayon dua na listaan no siopa ray sarag yon tulongan ya mitindaan, no siopa ray mankaukolan na piluganan, odino no siopa ray walay aapigeren ed abung da. Insan ipilam so anak mo diad itulong mod sikara. Ipanengneng mod anak mo ya maliket ka tan balibali liknaan mo no ontutulong kad arum. Diad ontan, nibangat moy anak mo ya manpaabeba diad sankaepektiboan ya paraan—panamegley na alimbawam.—Prinsipyo ed Biblia: Lucas 6:38.
Saray Espiritual a Kayamanan
Asawan Lalaki, Pagalangan Yo ray Kaasawaan Yo
16 Ibalikas moy apresasyon mo ed si asawam. Napagalangan na asawan laki so misis to no imanoen to ray maong ya nagagawaan to tan komendaan to. Singa bilang, komon ta agto lilingwanan ya pisalamatan so amin ya gagawaen na misis to parad sikato. (Col. 3:15) Seguradon malikeliket so asawan bii no narengel toy apresasyon tan komendasyon na asawa to. Nalikna to ya sikatoy papagalangan, inar-aro, tan papablien na mister to.—Pro. 31:28.
SETYEMBRE 22-28
KAYAMANAN ED SALITA NA DIOS ECLESIASTES 1-2
Ituloy Yon Ipasal Iray Onsublay ya Henerasyon
“Imatalek Mo ed Saray Matoor a Lalaki”
3 Maslak ed sikatayo et labalabay tayoy trabaho tayo tan no nayari et mansiansia itan. Makapaermen balet ta manlapu lad panaon nen Adan, ontatatken so amin tan nasasalatan na sananey ya henerasyon. (Ecl. 1:4) Diad apalabas iran taon, nagmaliw iyan subok ed saray tuan Kristiano. Linmaknab tan nagmaliw ya komplikado so kimey na saray totoo nen Jehova. Lapud saray balon proyekto, wala met iray balon proseso na pankimey ed saratan—mabetbet ya kaibad satan so pangusar na teknolohiyan maples ya manguuman. Nayarin nairapan iray maedad la ya mibansag ed sarayan pananguman. (Luc. 5:39) Anggano ag-ira bilang nairapan, siansia nin mas mabiskeg tan mapaot iray mas ugaw ni. (Pro. 20:29) Kanian panangipanengneng na panangaro tan mas praktikal parad saray maedad la no iparaan da ray mas ugaw ni parad kaaruman iran responsabilidad.—Basaen so Salmo 71:18.
4 Nayarin aliwan mainomay parad saray walaan na pribilehyo tan autoridad so mangiter na responsabilidad ed saray mas ugaw ni. Ompan natatakot so arum ya naandi ed sikara so papablien dan pribilehyo. Posiblin napapagaan so arum ya naandi so autoridad da, tan iisipen dan agnasarag na saray mas ugaw ni so kimey da. Nayarin irason na arum ya anggapoy panaon dan mangipasal. Saray mas ugaw ni balet et nepeg iran manalwar ta ompan agla ra makaanos no agni ra naikdan na responsabilidad.
Saray Espiritual a Kayamanan
Sikayon Kabataan, Labay na Manamalsa Yo ya Magmaliw Kayon Maliket
14 Si Solomon ya mayamyaman tan makapanyarin too et nan-eksperimento, ya ‘sinali toy manliket pian nengnengen no antoy maabig a nagawa.’ (Ecl. 2:1-10) Sikatoy angipaalagey na saray abung, saray hardin tan parke, tan ginawa to so amin ya labay to. Antoy alikna to? Kasin sikatoy aliketan tan apenek? Agtayo la kaukolay mannonot ta imbaga lan mismo nen Solomon ed sikatayo. Insulat to: “Sanen ninodnonot koy amin a kimey a ginawa na saray limak . . . , anengneng ko ya amin a bengatla et andi-kakanaan . . . Anggapoy bengatlan peteg a makana diad dalin.” (Ecl. 2:11) Talagan makaaral tayo ed satan!
SETYEMBRE 29–OKTUBRE 5
KAYAMANAN ED SALITA NA DIOS ECLESIASTES 3-4
Pabiskeg Yoy Relasyon Yon Sanasawa tan Say Relasyon Yod si Jehova
ijwhf artikulo 10 ¶2-8
No Panon Kan Magmaliw a Balanse ed Panangusar Mo ed Gadyet
● No duga so pangusar ed gadyet, maong so epekto na satan ed relasyon na sanasawa. Singa bilang, wala ray asawan lalaki tan bibii ya uusaren da itan pian nakontak day sakey tan sakey no ag-ira saniba.
“Say simplin pangibaga ed text ya ‘I love you’ odino ‘Sankanonot ta ka’ et baleg so epekto to.”—Jonathan.
● No aliwan duga so pangusar ed gadyet, makapuy so epekto na satan ed relasyon na sanasawa. Singa bilang, wala ray totoo ya naynay lan diad gadyet da so kawalaay imano da, kanian napapaulyanan da lay asawa da ta anggapo lay panaon da.
“Seguradon wala ray panaon ya labay nen asawak so mitongtong ed siak no agko uusaren so cellphone ko.”—Julissa.
● Ibabaga na arum ya sarag dan pambansagen so pakawalaan na marakep ya tongtongan ed asawa ra tan say pangusar da na gadyet da. Unong ed sakey a sociologist ya si Sherry Turkle, imposiblin gawaen ya bansag so nanduruman bengatla. Anggano iisipen na totoo ya marakep no dakel so sabay-sabay ya gawaen, diad tua et aliwan epektibo itan. Imbaga to ya, “onabeba so kalidad na trabaho no pambansagen ya gawaen so kada balon trabaho.”
“Naliliketan ak no mitongtong ed siak so asawak, basta no anggapoy arum ya gagawaen to. No legan ak ya mitotongtong et walay arum ya gagawaen to, pakaliknak et mas maliket ni ed gadyet to.”—Sarah.
Tandaan: Say paraan na pangusar mod gadyet mo et nayarin maong odino makapuy so epekto to ed relasyon yon dua nen asawam.
Pansiansia Yon Marlang so “Apoy nen Jah”
12 Panon ya naalig na saray sanasawa so alimbawa nen Aquila tan Priscila? Kasin wala ray naisip yon kimey o arum nin responsabilidad ya sarag yon gawaen ya saniba, imbes ya mankanya-kanya kayo? Pawilen tayo pay Aquila tan Priscila. Saniba ran nampulong. Kasin wala met so regular ya eskedyul yo ya man-partner kayod ministeryo? Saniba met ya nantrabaho si Aquila tan Priscila. No bilang ta mandumaan kayoy trabaho, sarag yo kasin gawaen ya saniba iray kimey ed abung? (Ecl. 4:9) No mantulongan kayo ed sakey ya kimey, teamwork kayo tan makapan-istoryaan kayo ni. Atan kuno so sekreto nen Brother Robert tan Sister Linda ya masulok lan 50 taon ya kasal. Oniay imbaga nen Robert: “Diad tua, matalag ya walay panaon min manrelaks odino ompasyar. Pero no mansisinop ak, nitan met lay asawak ya manpunas na plato. Odino no manpapalin ak na dika, nagunoyan wadtan met la pian tulongan to ak. Naliliketan ak no onman la. No saniba kamin mankikimey, lalon onaapit so liknaan mid sakey tan sakey, tan oneelet so aroan mi.”
13 Tandaan balet ya aliwan lapud saniba so sanasawa et automatic la ya onapit so liknaan da ed sakey tan sakey. Oniay imbaga na sakey ya asawan bii ya taga Brazil: “Dakdakel so nayarin mangupot na panaon tayo. Kanian anggano saniba kami nen asawak ed saksakey ya abung, ompan sananey balet so kawalaan na atension mi. A-realize ko ya no saniba kami, dapat seguradoen ko met ya walad sikato so atension ko.” Imanoen met so imbaga nen Bruno ya gagawaen dan sanasawa: “No saniba kami nen misis, ipipireg mi ni cellphone mi pian talagan nasulit mi so oras mid sakey tan sakey.”
14 Panon to balet no agyo nai-enjoy nen asawam so panaon ya sankaiba kayo? Ompan mandumaan kayoy labay, tan naiirita kayo laingen ed sakey tan sakey. No ontay situasyon yo, antoy gawaen yo? Isip yo pa may ilustrasyon ed gapo tungkol ed apoy. Di ba, no kakkagapom nin sungloran so apoy, agmet ni masyadon marlang? Pero no sandaraiset mon aruman so itungom, mas ondalang itan. Ontan met ed sanasawa. Anto kasi no iplano yoy makapaniba kada agew anggan magano labat? Manpili kayoy activity ya na-enjoy yon dua, amay agyo pankolkolan. (Sant. 3:18) On, anggano magano labat so pam-bonding yo, baleg so nitulong to pian ompawil lamet so aroan yon dua.
Pansiansia Yon Marlang so “Apoy nen Jah”
3 Importante ya pabiskegen na sanasawa so relasyon da ed si Jehova pian napansiansia ran marlang so “apoy nen Jah.” No mabiskeg so relasyon da ed si Jehova, mabiskeg met so aroan da. Akin ey? On ta no inaro day Aman Jehova, unoren da iray bilin to, kanian naiwasan tan nasarag da iray problema ya nayarin manpabetel ed aroan da. (Basaen so Eclesiastes 4:12.) Tan no maespiritual so sanasawa, gawaen day anggaay nayarian dan aligen si Jehova tan saray ugali to—singa say kaabigan, inkaanos, tan say mabulos ya pameperdona to. (Efe. 4:32–5:1) No ontan so ugali da, mas naaro day sakey tan sakey. Oniay imbaga nen Sister Lena ya masulok lan 25 taon ya kasal: “Main-inomay ya aroen tan respetoen so maespiritual ya too.”
Saray Espiritual a Kayamanan
mwbr25.09—it-2 278 ¶9
“Aro”
“Panaon na Pangaro.” Say panangaro et dapat ya ipanengneng ed amin puera labat ed saramay ipapasen nen Jehova ya agmakanepegan ya aroen, odino iramay totoon gagagalaen da lay manggaway mauges. Kaukolan tayo nin siansian aroen so amin ya totoo puera labat no ipanengneng da lan talagan kabusol day Dios. Ditan la manampot so panaon na pangaro ed sikara. Parehon inaro nen Jehova a Dios tan nen Jesu-Kristo so inkatunong tan kabusol day kaugsan. (Sal 45:7; Heb 1:9) Saramay kabusol dan maong so tuan Dios et agnepeg ya panengnengay panangaro. Duga met ta anggapo lanlamang so gunggona no tuloytuloy ni ran aroen ta agda lanlamang awaten so panangaro na Dios. (Sal 139:21, 22; Isa 26:10) Manepeg labat sirin ya busolen ira na Dios tan onsabi panaon ya deralen to ra.—Sal 21:8, 9; Ec 3:1, 8.
OKTUBRE 6-12
KAYAMANAN ED SALITA NA DIOS ECLESIASTES 5-6
No Panon Tayon Nipanengneng ya Talagan Rerespetoen Tayoy Makapanyarin Dios Tayo
No Akin ya Importante so Panangawes tan Panag-ayos Tayo
1 Anto ran prinsipyo so makatulong pian makapampili tayo na dugan panangawes tan panag-ayos? Dapat manpili tayo na “matukoy a panangawes, a mangipatnag na kasimpitan tan limpion kanonotan,” tan pansiansiaen tayon malinis so itsura tayo a pakanengnengan ya “mandadayew [tayo ed] Dios.” (1 Timoteo 2:9, 10) Nia ray apatiran prinsipyo: (1) Dapat “matukoy” so panangawes tayo. Anganko nanenengneng mod aral ed kongregasyon ya nandurumay panangawes na totoo nen Jehova, pero nanengneng nin siansia ed panangawes tan ayos na buek mi ya rerespetoen mi so Dios. (2) Say labay ya ibaga na ‘masimpit’ ya panangawes et aliwan manaakit tan agto alaen so atension na arum. (3) Nipapanengneng tayoy “limpion kanonotan” no agtayo misasabayan ed uso. (4) Dapat lanang tayon ipanengneng ed panag-ayos tan panangawes tayo ya “mandadayew [tayod tuan] Dios.”—1 Corinto 10:31.
Pablim so Pribilehyom ya Manpikasi
18 Saray brother so aka-assign ya mangidaulo na pikakasi parad pantitipon antis ya manpulong tan diad aral na kongregasyon. No apribilehyoan ka ya mangidaulo na pikakasi, tandaan mo no antoy gagala na ontan iran pantitipon. Agtayo uusaren so pikakasi pian simbawaen iray agagi odino singa tayo mangibabaga na announcement. Diad saray aral tayo, maslak et limaran minuto labat so parad kansion tan pikakasi. Kanian no sikay mangidaulo na pikakasi, iwasan moy “dakel a salita,” lalo la diad panlukas ya pikakasi.—Mat. 6:7.
“No Antoy Insipan Mo, Toor Mo”
12 Balet say bautismo et gapo ni labat. Kayari na satan, labay tayon itultuloy ya tooren so dedikasyon tayo diad matoor ya panlingkor ed Dios. Kanian itepet tayod sarili tayo: ‘Kasin onaaligwas so espiritualidad ko manlapu la nen abautismoan ak? Kasin tuloytuloy ak ya manlilingkor ed si Jehova ya interon puso? (Col. 3:23) Kasin manpipikasi ak, manbabasa ak na Salitay Dios, mimiaral, tan manpupulong ak ya naynay anggad posible? Odino abawasan lay seseg kod espiritual iran aktibidad?’ Impaliwawa nen apostol Pedro ya napaliisan tayoy magmaliw ya inaktibo ed panaglingkor no iyarum tayod pananisia tayo so kakabatan, panagsungdo, tan debosyon ed Dios.—Basaen so 2 Pedro 1:5-8.
Saray Espiritual a Kayamanan
Tepetepet na Saray Manbabasa
3 Say Eclesiastes 5:8 et ontutukoy ed sakey ya opisyal a mamapairap ed saray pobri tan agto iiter so hustisya ed sikara. Balet nepeg ton tandaan ya sikatoy babantayan na sakey ya opisyal a mas atagey so posisyon to ed gobierno nen say sikato. Diad tua et ompan wala ni ingen iray arum ya mas atagey so posisyon da. Makapaermen ta amin lawarin walaan na autoridad ed gobierno na too et kurakot, tan saray ordinaryon totoo ya walad sakop da et manaanos kalamor ed aliwliwan panuuley da.
4 Lapud sayan situasyon ed gobierno, singa nanaekalan la na ilalo iray totoo. Balet ag-itayo nepeg ya naandian na ilalo ta amta tayo ya si Jehova et ‘babantayan to iray atagey ya opisyal’ na gobierno. Kanian sarag tayoy onkerew na tulong ed Dios tan ipasakbat ed sikato iray ambelat ya awit tayo. (Sal. 55:22; Fil. 4:6, 7) Amta tayo ya “saray mata nen Jehova et onnenengneng ed interon dalin pian ipatnag toy biskeg to parad saramay matoor so puso rad sikato.”—2 Awa. 16:9.
5 Ipapanonot na Eclesiastes 5:8 no anton talagay situasyon diad gobierno na too—walan walay sakey ya mas baleg so autoridad to. Balet say mas importantin ipapanonot ed sikatayo na satan ya bersikulo et say katuaan ya si Jehova so Sankatagyan ya Autoridad. Sikatoy manuuley la natan panamegley na tinuro ton Ari na Panarian, say Anak to ya si Jesu-Kristo. Lapud si Jehova so Sankamakapanyarian, nanenengneng ton amin so nagagawa. Segurado tayo ya patas so uley da nen Anak to.
OKTUBRE 13-19
KAYAMANAN ED SALITA NA DIOS ECLESIASTES 7-8
“Onlad Abung na Inateyan”
Anto ray Naaralan Tayo ed Inyakis nen Jesus?
9 Tulongan tan ligliwaen iray inateyan. Aglabat akiakis si Jesus ed si Marta tan Maria. Dinengel tan niligliwa to met ira. Maabig no aligen tayoy ginawa nen Jesus. Oniay imbaga nen Dan ya elder ed Australia: “Nen inatey si asawak, kakkaukolan koy tulong tan ligliwa. Wala ray brother ya anggan anton oras et akaparaan iran ondengel ed siak, tan ipipila day asawa ra. Agda ak pipigilan no labay koy onakis tan no labay kon ipaway so naliliknak. Tinulongan da ak diad kimey ed abung—inlinisan da ak na kotse, ingrocery-an da ak, tan inlutoan da ak ni ingen. Tan no pasyaren da ak, seseguroen da ya makapanpikasi ira ya kaiba ak. Apaneknekan ko ya tua iran kakaaro ya ‘nailaloan diad panaon na gonigon.’”—Pro. 17:17.
Tulongan Iramay Onkakapuy so Liknaan Da
15 Si William, ya inateyan na asawa pigaran taon lay apalabas, et imbaga to: “Apresyaen ko no istoryaen na arum iray balibalin nanonotan da ed si asawak; naliliknak ya sikatoy inaro tan rerespetoen da. Akatulong itan ya maong ed siak. Naliligliwa ak ed saray istorya da, ta talagan inarok si asawak tan nagmaliw lan parte na bilay ko.” Oniay imbaga na sakey ya abalo ya si Bianca: “Naliligliwa ak no manpikasi so arum ya kaiba ak tan no inabang dad siak so sakey odino duaran teksto. Makakatulong ed siak no mangiistorya ira nipaakar ed si asawak tan no ondedengel ira ed istoryak nipaakar ed sikato.”
“Miakis Kayo ed Saramay Onaakis”
16 Baleg so nitulong na pampikasi a kaibay inateyan tan say pangipikasi ed sikato. Anggano singa mairap mon ibalikas ed pikakasi iray nononoten mo ed onia ran makapaermen ya situasyon, say nanlapud puso a pikakasim parad sikato, anggano makaakis ka tan onggaralgal so boses mo et nayarin mamalemew na liknaan to. Nanonotan ni nen Dalene: “No wala ray sister ya ompasyar ed siak pian ligliwaen ak, kekerewen kod sikara ya ipikasian da ak. Mabetbet ya no manpipikasi la ra, naiirapan iran mansalita ed gapo, balet agmanbayag et mankasil lay boses da tan nibabaga da lay impapuson pikakasi ra. Say mabiskeg ya pananisia, panangaro, tan say malasakit da et talagan makapabiskeg na pananisia.”
“Miakis Kayo ed Saramay Onaakis”
17 Agpare-parehoy kabayag na paneermen na kada sakey. Kanian mas maabig no naynay kan akaparaan, aliwan diad pigaran agew labat sano wadtan iray kakaaro tan kakanayon na inateyan, noagta pati diad ontumbok ni ran bulan ya pinmawil la rad normal ya rotina ra. “Say tuan kaaro et mangaaro ed amin a panaon, tan sakey ya agi a nailaloan diad panaon na gonigon.” (Pro. 17:17) Baleg a lapuan na ligliwa iray kaagian no wadtan iran lanang anggad agni linmabas so paneermen na sakey.—Basaen so 1 Tesalonica 3:7.
18 Tandaan tayo ya sagpaminsan et nayarin ompawil so ermen ya nalilikna na saray inateyan lapud anibersaryo, musika, litrato, aktibidad, odino anggan say angob, tanol, odino klima. Nayarin ansakisakit ed sakey ya abalo no first time ton gawaen a bukor so sakey ya bengatla, singa say iyatendi ed asemblea odino Memoryal. Imbaga na sakey ya brother: “Iilaloan ko lan say unonan anibersaryo na kasal mi kayari impatey to et ansaki-sakit, tan talagan mair-irap iman. Balet walay pigaran agagi ya namplano na simplin gathering ya kaiba iray maapit ya kakaarok pian agko bukbukor.”
19 Balet tandaan tayo met ya kaukolan na saray inateyan so panamaseseg aliwa labat ya no wala ray espisyal ya okasyon. “Naynay ya baleg so nagawaan na itulong tan pangiba na arum ed sika anggano anggapoy espisyal ya anibersaryo,” so imbaga nen Junia. “Saray ontan ya ag-iilaloan a gawaen na arum et naapresya tan makaligliwan maong.” Tua ya agtayo naekal ya amin so ermen ya nalilikna na saray inateyan odino napanoan so antokaman ya nalilikna ran kakulangan lapud impatey na inad-aro da, balet sarag tayo ran ligliwaen diad pangiter na praktikal iran tulong. (1 Juan 3:18) Nanonotan ni nen Gaby: “Talagan misalamat ak ed si Jehova lapud wadtan a naynay iray maaron elder diad amin ya irap ya dinalan ko. Impalikna ra ya singa akalakap si Jehova ed siak.”
Saray Espiritual a Kayamanan
“Diad Saya et Naamtaan na Amin a Sikayo Iray Disipulok”
18 No asakitan ka ed imbaga o ginawa na sakey ya agi, ompan say naisip mon tampol et katongtongen mo. Pero antis kan mandesisyon no kasin katongtongen mo o andi, tepetan mo ni so sarilim: ‘Kasin amtak so amin ya detalye?’ (Pro. 18:13) ‘Kasin ginagala to ak ya sakitan o andi met?’ (Ecl. 7:20) ‘Kasin ayay ginawa tod siak et ginawak met lad arum?’ (Ecl. 7:21, 22) ‘No katongtongen ko, kasin naayos so problema, o ombaleg laingen?’ (Basaen so Proverbio 26:20.) No isipen mon maong iratan, ompan na-realize mo ya agmet la kailangan ya katongtongen imay agi, tan mas maabig no palampasen mo lay agawa.
OKTUBRE 20-26
KAYAMANAN ED SALITA NA DIOS ECLESIASTES 9-10
Nepeg ya Dugay Pangipasen Tayo ed Saray Problema Tayo
Agbalot ‘Onsasanok ed si Jehova’
20 Nonoten no anton talagay sengegan na problema. Akin? Ompan sikatayo met lanlamang so sengegan na arum a problema tayo. No talagan ontan, awat moy katuaan. (Gal. 6:7) Agmo teteteley Jehova. Akin? Oniay alimbawa to ’tan: Iyan tayo lan adesinyoy sakey a kotse a sarag ya pabatiken a mapmaples. Balet panon to no say drayber et linmampas ed speed limit anta kurbada, kanian naaksidente laingen? Kasin samay nanggawad kotse so akankasalanan? Siempre andi! Ontan met ed si Jehova, pinalsa to itayon bulos a mandesisyon. Balet inikdan to itayo na saray instruksion pian duga iray desisyon tayo. Kanian akin et tetelen tayoy Amalsa no akagawa tayoy lingo?
21 Siempre, aliwan amin ya problema tayo et lapud lingo o makapuy ya desisyon tayo. Wala ray probleman resulta na “panaon tan ag-iilaloan a nagawa.” (Ecl. 9:11, NW) Balet, agtayon balot lilingwanan ya si Satanas a Diablo so manunan sengegan na kaugsan. (1 Juan 5:19; Apo. 12:9) Sikato so nepeg tayon busolen—aliwan si Jehova!—1 Ped. 5:8.
Papablien nen Jehova Iray Mapaabeban Lingkor To
10 Mas mainomay tayon nasungdoan iray kipapasen ed bilay no mapaabeba tayo. No maminsan et wala ray nanengneng odino naeksperiensya tayo ya singa aliwan duga odino patas. Oniay imbaga na makabat ya ari a si Solomon: “Makakanengneng ak na saray lingkor ya akalugan ed kabayo balet saray prinsipe et manaakar a singa ra lingkor.” (Ecl. 10:7) Wala ray totoo ya maabilidad ya agnapapagalangan. Balet wala ray agmasyadon maabilidad ya sikara laingen so napapagalangan. Anggaman ontan, impaimano nen Solomon ya maabig no awaten tayo ya ontan a talagay bilay ed sayan mundo, imbes ya pansakitan tayo ni ulo iray aliwliwan nagagawa. (Ecl. 6:9) No mapaabeba tayo, mas mainomay tayon awaten iray kipapasen ed bilay anggano aliwan satan so labay tayon nagawa.
Kasin Makagunggona so Pipilien Mon Panagligliwaan?
DIAD Biblia, walaray nabasa tayon mangipapanengneng a labay nen Jehova ya na-enjoy tayoy bilay. Alimbawa, ibabaga na Salmo 104:14, 15 ya iiter nen Jehova so “tagano a manlapu ed dalin, tan say alak a mamaliket ed puso na too, tan larak a pamasileng to na lupa, tan tinapay a mamabiskeg na puso na too.” On, iiter nen Jehova so taganon kaukolan tayo pian manbilay itayo. Iikdan to itayo met na alak anggano ag-itan kakkaukolan pian nasustuni bilay. Inter to itan a “mamaliket ed puso na too.” Kanian aliwan saray nakaukolan tayo labat so inter nen Jehova, noagta pati saray bengatlan makaarum ed liket tayo. (Ecl. 9:7; 10:19) Talagan labay nen Jehova a napenek so puso tayo na “maabig a panliliket.”—Gawa 14:16, 17.
2 Agtayo sirin iisipen a makapuy so sagpaminsan a pangiganay panaon parad makapaligsa tan makapaliket iran aktibidad, a singa say ‘pangimano ed saray ontitikyab a kamanokan’ tan saray “lirio ed uma.” (Mat. 6:26, 28; Sal. 8:3, 4) Say maliket a bilay et regalo o ‘langkap na Dios.’ (Ecl. 3:12, 13) Kaibad satan a regalo so panaon ya uusaren tayo parad panagligliwaan o panagrelaks. Kanian manepeg labat ya usaren tayo itan diad paraan a mamaliket ed Dios.
Saray Espiritual a Kayamanan
‘Mansalita na Makapabiskeg’
11 Tsismis, panagpauges. Labalabay tayon pantongtongan so bilay na arum. Kasin mauges itan? Andi met no say pantotongtongan tayo et positibo odino maong a balita. Singa bilang, no siopa ray abautismoan odino mankaukolan na panamaseseg. Anggan saray Kristiano nen inmuna siglo et interesado ran maong ed pankaabigan na sakey tan sakey tan ipapaamta da no antoy situasyon na saray agagi. (Efeso 6:21, 22; Colosas 4:8, 9) Balet no aliwa lan tua so amin ya detalye odino pribadon bilay la na arum so nalalanor, panag-tsismis la itan. Tan nayarin mansumpal itan ed panagpauges. Say panagpauges et “pangibaga na palson akusasyon . . . ya mangiter na kababaingan tan pakaderalan na reputasyon na arum.” Singa bilang, pinauges na saray Fariseo si Jesus pian agpanisiaan na totoo. (Mateo 9:32-34; 12:22-24) Say panagpauges et mabetbet ya pansengegan na kolkolan.—Proverbio 26:20.
12 Diad pakanengneng nen Jehova et ambelat ya kasalanan so pamauges ed arum. Kabusol to iramay pansesengegan na inkaapag-apag tan saramay “mangigagapo na saray kolkolan ed saray sanaagi.” (Proverbio 6:16-19) Say Griegon salita ya impatalos ya “managpauges” et di·aʹbo·los, ya sakey ed saray tawag ed si Satanas. Sikato so “Diablo,” lapud pinauges to so Dios. (Apocalipsis 12:9, 10) Kanian no paugesen tayo so arum, singa tayo met la diablo. Agnayari ed kongregasyon so panagpauges ta panlapuan itan na saray gawa na laman a singa say “sangsangan” tan “inkaapag-apag.” (Galacia 5:19-21) Kanian, antis mon ipasabi ed arum so sakey a balita, tepetan moy sarilim: ‘Tua kasi ’ya? Maong kasi so epekto na saya no istoryaen kod arum? Kaukolan ni kasin naamtaan iya na arum?’—Basaen so 1 Tesalonica 4:11.
OKTUBRE 27–NOBYEMBRE 2
KAYAMANAN ED SALITA NA DIOS ECLESIASTES 11-12
Asikasom so Laman Mo tan Enjoy Moy Bilay
Pampaagew tan Pamparagem—Natural ya “Antibiotic”?
Natural met ya papateyen na agew iray mikrobyo. Impaliwawa na Journal of Hospital Infection ya “maslak ed saray mikrobyon mangiiter na sakit et ompatey ed agew.”
Kanian antoy naaralan mod saya? Makatulong no ompaway ka pian manpaagew tan manparagem anggan magano. Baleg so nagawaan na satan ed sika.
Alwaran Moy Bilay Mo—Regalo Itan na Dios
6 Say Biblia et aliwan libro tungkol ed nutrisyon o pangasikaso ed laman, pero naamtaan ditan no anto ray bilin nen Jehova tungkol ed saraya. Singa bilang, bibilinen to tayo ya “ipulisay [tayo] ray bengatlan mauges ed laman.” (Ecl. 11:10) Bibilinen to tayo met ya ag-itayo masiba tan mainum na alak, ta panlapuan itan na sakit. (Pro. 23:20) Labay nen Aman Jehova ya kontrolen tayoy sarili tayo pian naalwaran tayoy panangan tan kakainum tayo.—1 Cor. 6:12; 9:25.
7 Nipanengneng tayon papablien tayoy bilay tayo no usaren tayoy “abilidad [tayon] mannonot” no mandedesisyon tayo. (Basaen so Proverbio 2:11; Sal. 119:99, 100) Singa bilang, usaren tayo itan ya abilidad no manpipili tayoy kanen tayo. No paborito tayo so sakey ya naakan pero amta tayon makapuy so epekto tod laman tayo, iwasan tayo la. Regular tayo met ya man-exercise, agtayo puyat lan puyat, tan mapalinis tayo dapat ed laman tan ed abung tayo ta atan so dugan gawaen.
“Magmaliw Kayon Mananumpal na Salita”
2 Dakel so rason no akin ya maliket tayo ran lingkor nen Jehova. Tan say sakey ed saratan ya rason et lapud inagew-agew tayon babasaen so Salita na Dios, say Biblia. Tan pansasagpotan tayon iyaplika iray nababasa tayo.—Basaen so Santiago 1:22-25.
3 Dakel so bendisyon no iyaplika tayo iray nababasa tayod Biblia. Singa bilang, napapaliket tayoy Jehova no uunoren tayo ray ganggan to. Amay antam ya napapaliket moy Jehova, balibali itan ed liknaan! (Ecl. 12:13) Tan seguro, naimanom ya kada no uunoren mo ray bilin na Biblia, lalon oneelet so aroan ed pamilya yo tan mas onaapit so liknaan na saray agagi ed sika. Nipapaliis ka met ed saray problema ya dadalanen na saramay agmanguunor ed si Jehova. On, duga may inkansion nen Arin David ya nabasa ed Salmo 19:7-11. Imbaga to ya ‘no unoren tayo ray ganggan, totontonen, tan panangukom nen Jehova, makaawat tayo na baleg a tumang.’
Saray Espiritual a Kayamanan
mwbr25.09—it-1 1204 ¶2
“Panangipuyan”
Ipapanengneng na saray ebidensya ya saray lalakin inusar na Dios ya mangisulat ed Biblia et aliwa ran singa robot ya basta da labat insulat no antoy indikta ed sikara. Singa bilang, nen impaisulat na Dios ed si apostol Juan so Apocalipsis, angibaki na anghel pian ipaamta itan ed si Juan “panamegley na saray simbolo.” Insan tinasian nen Juan so “salita ya inter na Dios tan say impantasi nen Jesu-Kristo, on, amin a bengatlan anengneng to.” (Apo 1:1, 2) “Diad panamegley na masanton espiritu, niyakar [si Juan] diad agew na Katawan” tan oniay instruksion ed sikato: “Isulat mo ed sakey a lukot no antoy nanengneng mo.” (Apo 1:10, 11) Ompapaway sirin ya inabuloyan na Dios iray nansulat na Biblia ya manisip na saray salitan usaren da pian ideskribe iray pasingawey ya nanenengneng da (Hab 2:2), pero naynay to met iran igigiya pian say nisulat da et aglabat susto tan tua noagta unong met ed gagala to. (Pro 30:5, 6) Ipapanengneng na Eclesiastes 12:9, 10 itan ya gagawaen na saray managsulat. Mandadalepdep ira, uusisaen dan maong, tan titiponen da so ‘makapaliket iran salita tan susto so pangisusulat da ed saray salita na katuaan.’—Ikompara so Luc 1:1-4.