Tepetepet na Saray Manbabasa
Kasin say Eclesiastes 5:8 et ontutukoy labat ed saray totoon manuuley, odino kaiba met si Jehova?
Talagan pan-isipen itayo na sayan teksto: “Agmo pankelawan no nanenengneng mon papairapen so pobri tan susumlangen so hustisya tan inkatunong diad distritom. Ta samay atagey ya opisyal et babantayan na sakey a mas atagey nen sikato, tan wala ray arum a mas atagey ni nen sikara.”—Ecl. 5:8.
No nabasa tayo itan ya teksto, nayarin isipen tayon tampol ya ontutukoy labat itan ed saray totoo ya walaan na posisyon diad gobierno. Balet diad tua et nanengneng tayo met ed satan so sakey a katuaan nipaakar ed si Jehova. Satan ya katuaan et makaligliwa tan ontulong ed sikatayon mas manmatalek ed sikato.
Say Eclesiastes 5:8 et ontutukoy ed sakey ya opisyal a mamapairap ed saray pobri tan agto iiter so hustisya ed sikara. Balet nepeg ton tandaan ya sikatoy babantayan na sakey ya opisyal a mas atagey so posisyon to ed gobierno nen say sikato. Diad tua et ompan wala ni ingen iray arum ya mas atagey so posisyon da. Makapaermen ta amin lawarin walaan na autoridad ed gobierno na too et kurakot, tan saray ordinaryon totoo ya walad sakop da et manaanos kalamor ed aliwliwan panuuley da.
Lapud sayan situasyon ed gobierno, singa nanaekalan la na ilalo iray totoo. Balet ag-itayo nepeg ya naandian na ilalo ta amta tayo ya si Jehova et ‘babantayan to iray atagey ya opisyal’ na gobierno. Kanian sarag tayoy onkerew na tulong ed Dios tan ipasakbat ed sikato iray ambelat ya awit tayo. (Sal. 55:22; Fil. 4:6, 7) Amta tayo ya “saray mata nen Jehova et onnenengneng ed interon dalin pian ipatnag toy biskeg to parad saramay matoor so puso rad sikato.”—2 Awa. 16:9.
Ipapanonot na Eclesiastes 5:8 no anton talagay situasyon diad gobierno na too—walan walay sakey ya mas baleg so autoridad to. Balet say mas importantin ipapanonot ed sikatayo na satan ya bersikulo et say katuaan ya si Jehova so Sankatagyan ya Autoridad. Sikatoy manuuley la natan panamegley na tinuro ton Ari na Panarian, say Anak to ya si Jesu-Kristo. Lapud si Jehova so Sankamakapanyarian, nanenengneng ton amin so nagagawa. Segurado tayo ya patas so uley da nen Anak to.