Tinmunda Ira Pian Ontulong

Manda-drive si Bob na manga 100 kilometro kada oras legan ya mani-snow tan maragem diad Alberta, Canada. Manga limaran kilometro ni so abung to nen biglan kinmepes so beneg ya kawigin dalig na van to. Ag-apansin nen Bob so agawa kanian agtinmunda.

Diad samay sulat ya impawit nen Bob ed sakey a Kingdom Hall na Saray Tasi nen Jehova, inistorya to so agawa. “Walay limaran kabataan ya akalugan ed kotse so tinmapat ed abay na van ko tan nilukasan day bintana ra,” so insulat to. “Imbaga ra ya flat so dalig ko. Kanian tinmunda kami, insan imbaga ran salatan da. Agko amta ingen no walay reserbak ya dalig odino jack. Legan ya akayurong ak ed wheelchair ko ed gilig na karsada, kinmurong ira ed silong na kotsik, inala da so reserba ya dalig tan jack, insan sinalatan day dalig. Manyeyelo ed saman tan maksil so dagem. Akapormal ira, pero sinalatan day dalig na luganan ko pian labat makasempet ak. Agko iman nagawaan no anggapo ra.”

“Salamat ed limaran kabataan ya Tasi ya tinmulong ed siak, anggano paarap ira komon pian manpulong. Talagan gagawaen da no antoy ibabangat da. Agko amtay gawaen ko no anggapo ra, kanian misalsalamat ak ya maong. Agko ilaloan ya wala ray ugugaw ya anghel diad dalan ed saman ya agew.”