Tepetepet Manlapud Saray Managbasa

Panon kaseryoso so nepeg a panmoria na saray Kristiano ed pisipanan a mangasawa odino miasawa?

Say pisipanan a mangasawa so lapuay liket, balet ta seryoso met itan a pamaakaran. Anggapo komoy matatken ed espiritual a Kristiano a manleglemew ed pisisipanan, a liknaen ton sarag ton paksoten itan ed anggan anton panaon tan diad antokaman met a rason. Say peryodo na pisisipanan so panaon met a lalon makapankabatan so san-inaro sakbay na pankasal da.

Diad paningbat ed sayan tema, kaukolan tayon moriaen a walaray kaugalian a nasasaglawi ed panangasawa, tan saray kundang a mangitonton ed satan so mandudumaan ed nanduruman pasen tan panaon. Iyiilustra na Biblia iya.

Say duaran mamarikit nen Lot, ya “agda nin balot naamtaan [“akiakdol,” NW] . . . ed laki”, so akisipanan la ed duaran lalakin kalugaran da. ‘Saray manugang a lalaki nen Lot so mangasawa ed saray bibii ya anak to,’ ingen anggapoy ibabaga na Biblia ed sikatayo no akin odino no panon a niwalay pisisipanan. Kasin saray mamarikit so wala la’d edad? Walaan ta ira na bosis a pilien so piasawaan da? Kasin akisipanan ira diad panamegley na mapublikon kundang? Anggapoy amta tayo nipaakar ed saratan. (Genesis 19:8-14) Amta tayo a si Jacob et personal ya akipaknaan ed ama nen Raquel a panlingkoran to ed loob na pitoy taon pian naasawa toy Raquel. Anggaman sinaglawi nen Jacob si Raquel bilang “asawak,” andian ira na relasyonan ed sekso kaleganan na saraman a taon. (Genesis 29:18-21) Singa met ed sakey nin alimbawa, sakbay a naasawa toy marikit nen Saul, kaukolan a natalo nen David iray Filisteo. Sano nakapet toy kerew nen Saul, naasawa la’d satan nen David so marikit, si Micol. (1 Samuel 18:20-28) Saratan a “pisisipanan” so mandurumaan. Tan midumaan met ed saray kaugalian la natan ed dakel a daldalin.

Say Mosaikon Ganggan so walaan na saray pananontonan nipaakar ed panangasawa tan pisisipanan. Alimbawa, nayarian na sakey a lakin nawalaan na masulok a sakey ya asawa;makapandiborsyo ed nanduruman sengegan, balet ta ag-itan nagawaan na sakey a bii. (Exodo 22:16, 17; Deuteronomio 24:1-4) Kaukolan a say lakin anukson miakdol ed sakey a birhin ya andian na kasipanan ni et asawaen to no onabobon so ama na bii, tan sikatoy agton balot nidiborsyo. (Deuteronomio 22:28, 29) Walaray ganggan met a niyaplika ed panangasawa, a singa no kapigan a paliisay pirelasyonan ed sekso. (Levitico 12:2, 5; 15:24; 18:19) Antoran pananontonan so nisisiglaot ed pisisipanan?

Dumay panangipasen base’d ley ed Israelitan biin wala lay kasipanan ed samay andiay kasipanan ni; diad arum a pamaakaran et sikatoy ipapasen lan walay asawa. (Deuteronomio 22:23-29; Mateo 1:18, 19) Walaray Israelitan mankanayon ya agnayarin mansipanan odino manasawaan. Gendagendat a saraya so kadalaan, balet walaray pisisipanan tan panangasawan nisebel nisesengeg ed saray kanepegan lapud tawir. (Levitico 18:6-20; nengnengen so The Watchtower na Marso 15, 1978, pahina 25-8.) Malinew a kaukolan ya agleglemewen na saray lingkor na Dios so pisisipanan.

Nisilong iray Israelita ed amin na saratan a pananontonan na say Ganggan, balet agnisilong iray Kristiano ed satan a Ganggan, pati saray pananontonan to nipaakar ed pisisipanan odino panangasawa. (Roma 7:4, 6; Efeso 2:15; Hebreos 8:6, 13) Diad tua et imbangat nen Jesus a say Kristianon estandarten mitukoyan ed panamaley so midumaan ed samay walad Ganggan. (Mateo 19:3-9) Siansia, agto nileglemew so inkaseryoso na panangasawa, nisay samay pisisipanan. Kanian, komustay teman kokonsideraen tayo, say pisisipanan ed limog na Kristianos?

Diad dakel a daldalin et akauley iray indibidual a manpili no siopay asawaen da. Diad bektan nampaknaan lay laki tan bii a mankasal, sikara lay nipapasen a nansipanan. Gendagendat yaanggapo lay arum a pormal a kundang a kakaukolanen ta pian niletneg so pansipanan. On, walaray lugar a kaslakan la so pangiter na laki ed asawaen to na singsing na pansipanan. Odino kaugalian lay pangiyanunsio na pisisipanan ed kakanayon tan ed kakaaro, a singa diad pandurongoy pamilya odino ed arum a melag a panduroypo. Saratan so personal la, aliwa iratan a Makasulatan a kakaukolanen. Niwalay pisisipanan lapud panpaknaan na duara.a

Kaukolan a say sakey a Kristiano et agmaganat a miinaroan, misipanan, odino mangasawa. Mangipapalapag kami na nibased-Biblian materyal a makatulong ed saray walad kasuloan a mandeside no kasin makabat lay piinaroan odino alaen laray kundang ed pisipanan odino pangasawa.b Say manunan punto na konseho et permanenti so Kristianon panangasawa.​—Genesis 2:24; Marcos 10:6-9.

Nepeg a mankabatan a maong so duaran Kristiano sakbay a nonoten day pansipanan. Nayarin tepetan na balang sakey so inkasikato, ‘Segsegurado ak ta la ed espiritualidad tan debosyon to ed Dios? Kasin naiisip kon sikamin duay manulop ed legay bilay a panserbi ed Dios? Kasin kabisado mi lay personalidad na balang sakey? Matalek ak ta’n magmaliw a magnayon so panbagayan mi? Magenap ta lay kabat mi no nipaakar ed apalabas iran agawa tan kaplesan iran sirkumstansia na balang sakey?

Bektan nansipanan laray duaran Kristiano, manepeg labat ya ilaloan da tan saray arum met a manumtumbok met lay pankasal da. Insimbawa nen Jesus: “Onia so panagsalita yo, On, on; Andi, andi.” (Mateo 5:37) Kaukolan a tooren itan na saray nansipanan lan Kristiano. Balet, mataltalag no bilang ta wala, a walay naamtaan a bengatlan seryoso na sakey ya akisipanan lan Kristiano ya ag-asaglawi odino niyamot sakbay na pankasal. Nayarin makabaliksan a katuaan so nipaakar ed abenegan na sakey, ompan gawan krimen odino imoral ni ingen. Nepeg a desisyonan na Kristianon akaamta ed saya no antoy gawaen to. Anganko ta pantongtongan dan duan maong so pamaakaran no ituloy da ni impansipanan da. Odino ompan desisyonan dan dua a paksoten so impansipanan. Anggaman say panggawa ed satan et pribadon pamaakaran​—bengatlan agnepeg a pibabalian na arum, panggunaetan a palbengan, odino husgaan​—satan so ambelat a dedesisyonan. Diad biek a dapag, nayarin samay akaamta ed seryoson problema et nayarin liknaen ton kaukolan ton paksoten so impisipanan, anggan labay nin ituloy na sakey.​—Nengnengen so “Tepetepet Manlapud Saray Managbasa” diad The Watchtower na Hunyo 15, 1975.

Walay makatunongan a rason ed panresolbi ed saratan a problema sakbay na pankasal. Inkuan nen Jesus a say Makasulatan labat a basiyan na pandiborsio a sarag na sakey so mangasawa lamet et say por·neiʹa, graben seksual ya imoralidad diad biang na sakey a kapareha. (Mateo 5:32; 19:9) Agto imbagan say sakey a kasal unong ed ley so napaksot diad pandiborsio lapud akabatan na sakey a walay seryoson problema odino gawan-mauges sakbay na impankasal da.

Alimbawa, talagan posiblin makaalis so kating ed agew nen Jesus. No naamtaan na asawan lakin Judio a say akulaw to (naamtaan odino agnaamtaan) et akating sanen inkasal to, kasin pangibasiyan to la itan na pandiboriyo? Nayari sirin a mangidiborsio so sakey a Judion walad silong na Ganggan, balet ta ag-imbaga nen Jesus a matukoy iya parad saray patumbok to. Isipen paray pigaran situasyon ed panaon tayo. Say lakin walaay syphilis, genital herpes, HIV, odino arum nin makaalis a sakit et akapangasawa lan agto impaamtay katuaan. Anganko ta say sakit to et nisesengeg ed seksual ya imoralidad ya agawa sakbay odino kaleganay pisisipanan. Say saginonor ya impakaamta na asawan bii nipaakar ed sakit to odino ed apalabas ya imoralidad (anggano say inkalepes odino inkainutil ed sekso) so agmakapanguman ed katuaan a sikara lay sanasawa. Say agmarakep ya agawa sakbay na kasal so aliwan Makasulatan a basiyan pian panganggaen lay panamaley no panon met a say impakaalisan to na sakey a sakit odino impangiyamot to’d lukon to ed sananey a laki diad kasal da. Sikara lay sanasawa natan tan nanpaknaan la ra ed sakey tan sakey.

Iyan lan mataltalag iratan a makapaermen a situasyon, balet ta sarayan alimbawa so talagan mangidadanet ed importantin punto: Nepeg ya agleglemewen so pisisipanan. Sakbay tan kaleganan na pisisipanan et kaukolan a pambanikelan na saray Kristiano so pankabatan a maong. Nepeg day magmaliw a matua ed labay ya amtaen na sakey odino ed makanepegan ton naamtan. (Diad arum a daldalin et kakaukolanen na ley a saray nansipanan et manpa-medikal eksams sakbay na pankasal da. Nayarin labay na arum so ontan a check-up pian naamtaan.) Kanian say gayaga tan inkaseryoso na pisisipanan et nawalaan na mapagalang a gagala legan a sikaran dua so mamapaarap ed lalon magayaga tan seryoson kipapasen na panamaley.​—Uliran 5:18, 19; Efeso 5:33.

[Saray paimano ed leksab]