“Tutulongan Kami na Dios ya Onabig”

SI Natalya tan say siameran taon ya anak ton si Aslan et kinmebkeb ed abay nen Zarina tan say dose años ya anak ton si Anzhelika. Masulok ya 1,000 nin ugugaw tan adulto so sanaabay ya akayurong legan iran guaguardiaan na saray linmusob ya armado.

Antis na satan, nen Mierkoles, Setyembre 1, 2004, manpaparaan iray ugugaw tan atateng diad paway na eskuelaan pian selebraan so unonan agew na klase diad Beslan, melag a baley diad Alania, Russia. Biglan nilusob ira na saray armadon lalaki tan saray suicide bomber, nampaputok iray paltog tan maneyag ira. Tinipon na masulok ya 30 ya inmataki iray natatakot ya totoo diad gymnasium na eskuelaan tan pinaliberan da itan na bomba.

Say Enkuentro tan say Gulo

Satan so gapo na teriblin taloran agew ya enkuentro ed baetan na saray inmataki tan saray sundalo. “Grabe so impanpikasik ed saman,” so kuan nen Natalya, ya diad saman et manaaral na Biblia ed Saray Tasi nen Jehova.

Ngalngali la manampot so summer, kanian agaylay petang ed gymnasium. Diad kabuasan na komaduan agew, agpinakan tan agpinainum na saray inmataki iray hostage da, tan diad komatlon agew​—Biernes—​apilitan so arum ya a-hostage ya inumey sirit da tan kanen iray rosas ya inawit na ugugaw parad saray titser da. “Walay ugaw a lakin asingger ed sikami ya angikarga na bulong ed limak,” kuan nen Natalya. “Pinalduak iman tan inter koy kapaldua ed si Anzhelika tan kapaldua ed si Aslan.”

Diad komatlon agew, ginmapoy graben gulo. “Wala ray sinmabog ed petek ko,” kuan nen Natalya. “Makapakapal so asewek, tan ginmapoy putukan.” Legan na putukan ed baetan na saray sundalo tan terorista, kinmurong si Natalya tan Aslan. Walay Ossetian ya manngaray Alan ya angiguyor ed sikara pian naligtas ira. Dakel so ag-akabatik.

Say Resulta

Nilasus ya ugugaw tan adulto so inatey, kaiba lay Anzhelika. Pigay simban sankarengel so panak-akis tan panurangal ed Beslan. Diad apartment nen Natalya et sankabantag so eskuelaan, tan anggano wala lay balon eskuelaan, agnin siansia labay nen Aslan so onloob ditan. Ag-ingen ompapaway ya manggalaw. “Impikasi mid si Jehova ya tulongan ton nalabanay takot to,” kuan nen Natalya. Ag-abayag, wala lay pakpel ton maneskuela lamet.

Mairap parad si Natalya so onatendid saray Kristianon pantitipon ed Kingdom Hall. “Basta no nakaibak so dakel a totoo ed sakey a lugar, pakaliknak et walay onsabin mangataki,” so inkuan to. “Ipipikasik ya anggapo komoy mauges a nagawa. Balet asabi panaon ya agak la inmatendi. Naguguloan ak met lapud amayamay so inatey, balet sikami et akaligtas.”

Say Inyabig

“Misalsalamat ak ed saray agagid kongregasyon ta intultuloy da ak ya tinulongan,” kuan nen Natalya. “Walay Tasi ya manngaray Tatyana ya bibisitaen to ak ya lanang kada kayari taloy agew. Insan angitagar na sakey nin Tasi​—maomaong, mataktika, tan mauyamon si Ulyana—​ya kabisado toy Biblia. Kinomendaan toy impansagpot ko, tan talagan dedengelen to ak no mansasalita ak.

“Imbasa nen Ulyana ed siak imay imbaga na Kristianon si apostol Pablo diad 2 Corinto 1:9. Kayari na impanirap tod Asia, inkuan nen Pablo: ‘Inisip mi ya asentensiaan kami lay ipapatey.’ Imbasa to met so Isaias 40:31: ‘Saray manalagar ed Jehova pasimbaloen to so biskeg da, mamaatagey ira naani ya akapayak a singa say agila.’ Saratan ya teksto, ontan met ed regular ya emosyonal a suporta nen Ulyana tan arum ni, so amabiskeg ed siak ya onatendi lamet ed saray Kristianon pantitipon, kaiba iray ana’ko. Balet, siansia nin agak komportable ed loob na hall.”

Nagmaliw ya sakey ed Saray Tasi nen Jehova si Zarina tan pitalaran toy pangabet lamet ed si Anzhelika no onoli lad bilay diad marakdakep tan mareen ya mundo, ya uleyan na Panarian na Dios. (Mateo 6:9, 10; Gawa 24:15) Si Natalya tan saray anak to et abautismoan nen 2009. Asingger nin siansiad aderal ya gymnasium so panaayaman da balet ta agla ra natatakot. “Natan et kayak lan istoryaen imay agawa ya agnapapasnokan o natatakot,” so kuan nen Natalya. “Tutulongan kami na Dios ya onabig.”