Istorya na Bilay

Mairap Balet Makapaliket so Impamabaleg Ko ed Waloran Anak Ko Unong ed Daladalan nen Jehova

UNONG ED SALAYSAY NEN JOYCELYN VALENTINE

Nen 1989, linma ed arum a bansa so asawak pian mantrabaho. Insipan to a pawitan to ak na kuarta pian nalegpet koy waloran anak ko. Linmabas so pigaran simba, balet anggapo ni balitak ed sikato. Linmabas so pigaran bulan, tan anggapo nin siansia so komunikasyon mi. Naynay kon tatambayoen so inkasiak, ‘Sano akatipon la lagi, sikatoy onsempet la.’

ANGGAPO lay panggastos ko parad pamilya mi, kanian aburido ak a tuloy. Dakel a labi ya agak makakaugip, a naynay kon itetepet ed inkasiak tekep na panduaruwa, ‘Panon ton nagawaan iya ed pamilya to?’ Diad kaunoran et naakok la so makapaermen a katuaan ya inkaindan kami la na asawak. Kayari na 16 a taon manlapud intaynan to, agnin siansia pinmawil. Diad ontan et bukbukor ko la so amabaleg ed ananak ko. Mairap, balet malikeliket ak lapud nanenengneng kon papablien na saray anak ko so daladalan nen Jehova. Balet, sakbay kon isalaysay no panon min ayarian itan bilang pamilya, isalaysay ko ni ed sikayo so nipaakar ed impamabaleg ed siak.

Say Impananap Ko ed Panangiwanwan na Biblia

Nianak ak nen 1938 diad isla na Caribbean diad Jamaica. Anggaman anggapoy bibidbiren nen Tatay a relihyon to, impasen toy inkasikato a matakot ed Dios. Diad labi et mabetbet ton paibasa ed siak so libro na Biblia a Salmos. Ag-abayag et dakel lan salmo so nipatlep ko. Si Nanay et kabiangan na sakey a relihyon ed lugar mi, tan no maminsan et itagar to ak diad relihyoso iran pantitipon da.

Diad saraman a pantitipon, nibangat ed sikami ya aalaen na Dios ed tawen iray maong a totoo bangta saray mauges et magnayon ton popoolan diad impiernon-apoy. Nibangat met ed sikami a si Jesus so Dios tan mangaaro ed ugugaw. Siak so awetwet la ingen tan natatakot ed Dios. Nanumameng ak, ‘Panon a say Dios, a mangaaro ed sikatayo, so mamairap ed totoo diad apoy?’

Agak makaugip sano nanonotan ko so impiernon-apoy. Asabi panaon, nanaral ak na Biblia panamegley na korespondensia ya inorganisa na relihyon a Sabatista. Ibabangat da a saray mauges a totoo et agnapairap a magnayon, noagta poolan ya anggad magmaliw a dapol. Ompatnag a mas makatunongan itan, kanian ginapoan koy inmatendi ed relihyoso iran pantitipon da. Balet awetwet ak diad saray bangat da, tan saray naaralan ko et ag-angipetek ed lingo iran panmoriak nipaakar ed moralidad.

Diad saman a panaon et saray totoo so kaslakan a mangipapasen a mauges so pilalawanan. Ingen, siak tan saray arum so manisia a saraman lambengat so miaakdol ed piga-pigaran totoo so natawag a milalawanan. Kanian, say duaran too ya aliwan sanasawa, a sikara labat so manaakdol, so agmankakasalanan. (1 Corinto 6:9, 10; Hebreos 13:4) Say ontan a pananisia so angimpluensya ed siak ed impagmaliw kon agkasal ya ina na anemiran ananak.

Say Inyaligwas Ko ed Espiritual

Nen 1965, si Vaslyn Goodison tan Ethel Chambers so nanayam diad asingger a baryo na Bath. Sikaray tatawagen a payunir, odino sigpot-panaon a ministro na saray Tasi nen Jehova, tan sakey ya agew et kinatongtong da so tatay ko. Inawat to so opresi ran panangiyaral ed Biblia. No wala ak ed abung legan na ibisita ira, siak met so kakatongtongen da. Anggaman paniinapan kon maong iray Tasi nen Jehova, inmabuloy ak a paiyaralan ed sikara na Biblia pian paneknekan a palso ira.

Dakdakel so intetepet ko legan na panagaral, tan inebatan iratan ya amin na saray Tasi panamegley na Biblia. Diad tulong da, naamtaan kon saray inaatey et anggapoy amta ra tan ag-ira maniirap diad impierno. (Eclesiastes 9:5, 10) Naaralan ko met so nipaakar ed ilalon bilay ya andi-anggaan diad dalin a Paraiso. (Salmo 37:11, 29; Apocalipsis 21:3, 4) Anggaman intunda la nen tatay so panaaral toy Biblia, siak so ginmapon inmatendi ed saray pantitipon na kongregasyon na saray Tasi nen Jehova diad lugar mi. Lapud mareen tan mauksoy a panangikondukta ra ed saraman a pantitipon, dakel so naaralan ko nipaakar ed si Jehova. Inmatendi ak met ed saray sirkiton asamblea tan distriton kombension, saray babaleg a pantitipon ya oorganisaen na saray Tasi. Say pakakaaral ko ed Biblia so amabiskeg ed pilalek kon mandayew ed si Jehova diad dugan paraan. Balet walay mamupuger ed siak.

Diad saman a panaon, siak so miaamong ya agkasal ed laki ya ama na talora ed anemiran ananak ko. Diad Biblia et naaralan ko a kokondenaen na Dios so seksual a pirerelasyon ed ag-asawa, tan siak lay nakokonsiensia. (Uliran 5:15-20; Galacia 5:19) Legan ya onaaralem so panangarok ed katuaan, pinirawat kon nitunos so bilay ko ed ganggan na Dios. Diad kaunoran et akapandesisyon ak. Imbagak ed samay lakin piaamongan ko a balanglan mankasal kami odino mansian kami la. Anggaman agto mipakna ed saray sisiaen ko, sikami so legal a nankasal nen Agosto 15, 1970, limay taon kayari na primeron impitongtong ed siak na saray Tasi. Nen Disyembre 1970, insimbolok so dedikasyon ko ed si Jehova diad bautismo ed danum.

No nipaakar ed ministeryo, agkon balot nalingwanan so primeron agew ya impibiang ko ed kimey a panagpulong. Mannerbiyos ak tan agko amta no panon ya igapo so tongtongan ed Biblia. Diad tua et akainawa ak sanen sinampotan a tampol na inmunan unabung so tongtongan mi. Balet, naandi lanlamang so pannerbiyos ko diad saginonor. Kayari na saman ya agew et malikeliket ak lapud akapitongtong ak, anggaman aganggano, ed pigaran totoo nipaakar ed Biblia tan akapangitilak ak ed sikara na pigaran publikasyon a nibase ed Biblia.

Say Impansiansian Mabiskeg ed Espiritual na Pamilyak

Nen 1977 et binmaleg so pamilya mi, a nagmaliw a walora so anak ko. Determinado ak a gawaen so anggaay nayarian ko a tulongan so sankaabungan ko a manlingkor ed si Jehova. (Josue 24:15) Kanian nanseet ak a mangikondukta na regular a panagaral mi ed Biblia bilang pamilya. No maminsan, lapud abanabanalan ak, siak so manteglep legan a babasaen a maksil na sakey ed saray anak ko so parapo, tan siak so kaukolan a liingen na saray anak ko. Balet say pisikal a kesaw so agbalot angamper ed sikami pian makapanaral na Biblia bilang pamilya.

Mabetbet ak met a manpipikasi a kaiba na saray anak ko. Sanen angkakabaleg la ra, imbangat ko iran manpikasin bukor ed si Jehova. Sinegurok a kada sakey ed sikara so personal a manpikasi sakbay ya onugip. Balet saray ankelag nin anak ko ya agni marunong a manpikasi so sansakey ya ipipikasian ko.

Diad gapo et aglabay na masiken ko ya awiten ko iray anak mi diad saray pantitipon na kongregasyon. Balet ta inmabuloy lanlamang lapud ninonot to a sikaton bukor so mangasikaso ed saray ugugaw no wala ak ed aral. Diad labi et labalabay to so ompaway tan ompasyar a kaiba iray kabarkada to, balet ta agto panliketan itan no kaiba to so waloran ugugaw! Kanian, diad saginonor et tutulongan to ak ni ingen a mangiparaan ed saray anak mi a paonla ed Kingdom Hall.

Agnambayag et nipasal iray anak kon onatendi ed amin a pantitipon na kongregasyon tan mibiang ed mapublikon ministeryo. Legan na bakasyon da ed panaon na tiagew, mabetbet iran ompapaway pian manpulong a kaiba na saray payunir, odino sigpot-panaon a ministro, diad kongregasyon. Satan so akatulong ed saray anak ko pian nabayuboan da so masimoon a panangaro ed kongregasyon tan ed kimey a panagpulong.​—Mateo 24:14.

Panaon na Subok

Pian lalon nasuportaan ed pinansyal so pamilya mi, linma ed arum a bansa so masiken ko pian mantrabaho. Sikatoy abaybayag ya akaarawi ed pamilya ingen ta regular met ya onsesempet. Balet sanen inmalis nen 1989, sikatoy agla pinmawil. Unong ya asalambit ko la’d gapo, siak so pirmin agonigon lapud impakaandi to. Nilabilabin onaakis ak tan masimoon a manpipikasi ed si Jehova a ligliwaen to ak pian makapansungdo ak, tan aliknak ya inebatan to iray pikakasik. Saray teksto a singa say Isaias 54:4 tan 1 Corinto 7:15 so angiter ed siak na deen na kanonotan tan biskeg pian mantultuloy a manbilay. Saray kakanayon tan kakaarok diad loob na Kristianon kongregasyon so tinmulong met ed siak diad emosyonal tan materyal a paraan. Pisalsalamatan ko si Jehova tan saray totoo to lapud tulong da.

Wala niray arum a subok ed sikami. Aminsan et inekal ed kongregasyon so sakey ed saray marikit ko lapud agmakasulatan a kondukta. Inar-arok so amin ya anak ko, ingen manunaan nin siansia so katooran ko ed si Jehova. Kanian legan na saman, saray arum ya anak ko tan siak so mapeget ya angunor ed panangidirehi na Biblia no panon so pideneng ed saray adispelosip. (1 Corinto 5:11, 13) Sikami so naynay a babalawen na totoo ya agmakatalos ed talindeg mi. Balet, kayarin nipawil ed kongregasyon so anak ko, inkuan na asawa to a nandinayewan to so mapekder a talindeg mi ed saray prinsipyo na Biblia. Sikaran pamilya so manlilingkor la natan ed si Jehova.

Say Impangarap Ko ed Kairapan ed Pinansyal

Sanen tinaynan kami na asawak, anggapoy maligen ya anapan ko, tan agto met la mangipapawit na kuarta ed sikami. Sayan kipapasen so angibangat ed sikami a mankontento ed simplin panagbilay tan mas pablien iray espiritual a kayamanan nen saray materyal a gegemtan. Legan a naaaralan na saray anak ko so panaaroan tan pantutulongan, sikaray lalon inmapit ed sakey tan sakey. Sanen akapantrabaho la iray panguloan, mabulos dan sinuportaan iray agagi ra. Say sankapanguloan ya anak ko a si Marseree so tinmulong ed bolirek ya agi ton si Nicole a makapansumpal ed haiskul. Niarum ni, awalaan ak na melag a grocery. Say daiset a naaalmok so tinmulong ed siak pian naasikaso so arum a pankaukolan mi ed materyal.

Agkamin balot pinaulyanan nen Jehova. Aminsan et asalambit ko ed sakey a Kristianon agin bii ya agkami makaatendi ed distriton kombension lapud kulang so badyet mi. Oniay inyebat to: “Sister Val, no magano lay kombension gapoan mo lay man-impaki! Wala so itarya nen Jehova.” Inunor ko so simbawa to. Walan tua so intarya nen Jehova, tan lawas ton gagawaen itan. Kanian agnin balot asaew na pamilya mi so anggan sakey ya asamblea odino kombension lapud kulang so kuarta.

Nen 1988, dinesyang na maksil a bagyon Gilbert so Jamaica, kanian tinaynan mi so abung mi pian onsirom ed mas maligen a pasen. Sanen temporaryon kinmepa so bagyo, inmalis kami na anak kon laki ed lugar a nansiroman mi pian nengnengen so aderal lan abung mi. Legan min nenengnengen iray geray, walay apasikmatan ko a labay kon alaen. Kabekta et inmungol lamet so dagem, balet sankabembenan ko nin siansia imay labay kon isalba. “Nay, ikbanan yo la‘tan a telebisyon. Singa kayo asawa nen Lot!” (Lucas 17:31, 32) Amoriak so lingok lapud satan ya imbaga na anak ko. Inikbanan ko so TV ya abasa lan maong na uran, tan binmatik kamin dua pian niliktar.

Manggiwgiw ak sano nanonotan ko ya impeligrok so bilay ko parad sakey labat a TV. Balet naliliketan ak sano nanonotan ko imay imbaga na anak ko a makapaliing ed espiritual. Diad panamegley na inkipasal to ed Biblia manlapud Kristianon kongregasyon, siak so atulongan to a napaliisan so baleg a peligro ed pisikal tan nayarin ontan met ed espiritual.

Say maksil a bagyo so pirmin aneral ed abung mi tan ed kaykayarian mi, tan pinakapuy met na satan so liknaan mi. Kayari na satan, sinmabi iray Kristianon agagi mi. Pinaseseg da kami a lingwanan la iray aperdi ed sikami tan manmatalek ed si Jehova, tan mantultuloy ya aktibo diad ministeryo, insan tinulongan da kami ya ipaalagey lamet so abung mi. Say ontan a maaro tan masakripisyon kimey a ginawa na saray boluntaryon Tasi ed Jamaica tan ed arum a bansa so anenyeg a tuloy ed sikami.

Inyuna Mi si Jehova

Kapangraduar na komaduan anak ko a si Melaine, sikatoy nanlingkor bilang payunir. Insan, inawat to so imbitasyon a manpayunir diad sananey a kongregasyon, kanian kaukolan ton ikbanan so sekular a trabaho to. Anggaman baleg so nitutulong to ed pamilya mi diad pinansyal lapud trabaho to, sikami so nanmatalek ed si Jehova ya asikasoen to kami no iyuna na balang sakey ed sikami so intereses na Panarian. (Mateo 6:33) Diad saginonor, say anak kon laki, a si Ewan, so akaawat met na imbitasyon a manlingkor bilang payunir. Sikatoy mansusuporta ed pamilya mi diad pinansyal, balet kinombinse mi ya awaten to so imbitasyon tan impikasi mi a sikatoy bendisyonan nen Jehova. Agkon balot dinismaya iray anak ko a mamalaknab ed serbisyo ra ed Panarian, tan sikami ra ya atilak ed abung so agbalot kinmulang ed saray pankaukolan mi. Imbes, lalon alikna mi so gayaga, tan no maminsan et natutulongan mi ni so arum a mankaukolan.

Natan et malikeliket ak lapud nanenengneng ko iray anak ko a ‘manaakar ed katuaan.’ (3 Juan 4) Say anak kon si Melaine, so peles a kaiba nen asawa to diad panagbaroy a ministeryo bilang manangasikaso na sirkito. Say sakey nin anak ko a si Andrea tan say asawa to so manlilingkor bilang espisyal payunir, tan iibaan to met so asawa to sano ombibisita ed saray kongregasyon bilang kasandin manangasikaso na sirkito. Say anak kon si Ewan tan say asawa to so manlilingkor met bilang espisyal payunir, tan sakey a matatken ed kongregasyon. Say sananey nin anak kon bii a si Ava-Gay so kaiba nen asawa to a manlilingkor diad sangan opisina na saray Tasi nen Jehova ed Jamaica. Si Jennifer, Genieve, tan si Nicole so manlilingkor a kaiba na kaasawaan da tan ananak da bilang aktibon membro ed balang kongregasyon da. Si Marseree so kaibak ed abung, tan sikamin dua natan so onaatendi ed Kongregasyon na Port Morant. Dakel iray bendisyon ya agamoran ko, lapud mantutultuloy a mandadayew ed si Jehova so amin a waloran anak ko.

Diad ilalabas na panaon et onleletey lay pisikal a bunigas ko. Kaukolan kon sungdoan so sakit kon rayuma, balet panggagayagaan ko nin siansia so serbisyok bilang sakey a payunir. Balet, diad agano ni labat et naiirapan ak lan manakar diad nipukpukdol a lugar ed baryo mi. Naiirapan ak lan makapaway diad lawak na ministeryo. Sinalik so manbisikleta tan mas mainomay manaya itan nen say manakar. Kanian analiw ak na daan lan bisikleta tan satan so inusar ko. Diad gapo et napapagaan iray anak ko sano nanenengneng dan manbibisikleta so ina ra a walaan na rayuma. Ingen, malikeliket ira lapud siak so ag-ontutundan manpulong, unong a satan so labalabay kon gawaen.

Siak so naliliketan a maong lapud saray totoon iyaaralan ko et aawaten da so katuaan ed Biblia. Lawas ipipikasik ed si Jehova a tulongan to so amin a membro na pamilyak a mansiansian matoor ed sikato diad sayan panaon na anggaan tan diad ando lan ando. Labay kon ibalikas so panangidayew tan pisasalamat ko ed si Jehova, say Baleg a “Dumerengel na pikakasi,” lapud tinulongan to ak a naarap so subok ed impamabaleg ko ed waloran anak ko diad saray dalan to.​—Salmo 65:2, NW.

[Litrato ed pahina 10]

Kaibak iray anak ko, saray kaasawaan da, tan saray apok

[Litrato ed pahina 12]

Manbibisikleta ak la natan no manpulong ak