‘Nenengnengen Ko Iramay Mabilay a Pinalsa’

Seguradon wala ray anengneng nen Ezequiel ya angkakabaleg ya estatua na saray baka tan leon ya nampayak tan walaay ulo na too ya akaalagey a singa bantay diad arap na saray palasyo tan templo. Saray ontan ya estatua et naromog ed interon Asirya tan Babilonia nensaman. Singa saray arum nin makakanengneng, nayarin pankelkelawan nen Ezequiel irayan balbaleg ya estatua, ya say arum et ngalngali 6 metro odino 20 feet ed katagey. Balet, anggano singa mabisbiskeg so itsura na sarayan estatua, aliwa ran mabilay, inyukit labat iraya ed bato.

Saramay apatiran pinalsa balet ya anengneng nen Ezequiel ed pasingawey et “mabilay a pinalsa.” Talagan baleg so pidumaan da! Mandinayew ya maong si Ezequiel ed sayan anengneng to kanian 11 beses ton binitla iray salitan “mabilay a pinalsa” diad gapo na propesiya to. (Eze. 1:5-22) Seguradon atalosan nen Ezequiel ya si Jehova so sigpot ya walaay kontrol ed amin a pinalsa lapud anengneng tod pasingawey ya saray apatiran mabilay a pinalsa et wala rad leksab na trono na Dios tan bansag ya oonlad parehon direksion. Natan, siansia nin pandinayewan tayo itan ya pasingawey ta ontutulong itan pian natalosan tayoy pakapanyari tan biskeg nen Jehova tan say katagyan na inkasoberano to.​—1 Awa. 29:11.