LEKSION 34
Panon Tayon Nipanengneng ya Inaro Tayoy Jehova?
Kasin mas lalo kan inmapit ed Dios manlapu nen nanaral ka na Biblia? Labay mo nin mas nakaaro so Dios? Tandaan mo ya no nanenengneng nen Jehova ya onaaralem so panangarom ed sikato, lalo to kan aroen tan asikasoen. Panon mon nipanengneng so panangarom ed sikato?
1. Panon tayon ipanengneng ya inaro tayoy Jehova?
No unoren tayoy Jehova, nipapanengneng tayo ya sikatoy inaro tayo. (Basaen so 1 Juan 5:3.) Agto tayo pipiliten ya ontulok ed sikato. Imbes, iikdan toy pankanawnawa so amin ya manpili no kasin ontulok ira o andi. Akin ey? Labay nen Jehova ya magmaliw tayon “matulok [manlapud] puso.” (Roma 6:17) Labay to ya sikatoy unoren mo aliwan lapud kailangan, imbes lapud inarom. Makatulong ed sika so seksion 3 tan 4 na sayan libro pian nipanengneng moy panangarom ed si Jehova diad panggawam ed labay to tan ipaliis ed saray agto labay.
2. Akin et mairap no maminsan ya ipanengneng so panangaro ed si Jehova?
“Dakel so pakakairapan na matunong.” (Salmo 34:19) Amin tayo et aliwan perpekto tan wala ray lalabanan tayon kakapuyan. Tan nayarin wala ray problema tayo ed pinansyal, naeksperiensya ya ag-inkahustisya, tan arum ni ran problema. No mairap so situasyon, ompan aliwan mainomay ya gawaen so pagagawa nen Jehova, ta mas mainomay ya gawaen so aliwa. Balet no matoor mon gagawaen iray pagagawa nen Jehova ed sika, ipapanengneng mo ya sikatoy mas inarom nen say anggan anto. Tan papaneknekan mo ya matoor kad sikato. Kanian manmatoor met ed sika. Agto kan balot taynan.—Basaen so Salmo 4:3.
DAKEL NI NAARALAN MO
Amtaen no akin ya importante ed si Jehova so katutulok mo, tan aralen no antoy makatulong pian mansiansia kan matoor ed sikato.
3. Walay akusasyon ya alanor ka
Diad libro na Biblia ya Job, walay akusasyon nen Satanas, aliwa labat ya diad si Job, imbes pati diad amin ya malabay ya manlingkor ed si Jehova. Basaen so Job 1:1, 6–2:10, insan ebatan iraya:
Base ed si Satanas, akin ya uunoren nen Job si Jehova?—Nengnengen so Job 1:9-11.
Antoy akusasyon nen Satanas ed amin ya totoo, kaiba ka?—Nengnengen so Job 2:4.
Basaen so Job 27:5b, insan ebatan iya:
Panon ya pinaneknekan nen Job ya talagan inaro toy Jehova?
Pinaneknekan nen Job ya inaro toy Jehova ta nansiansian matoor
Sarag tayon paneknekan ya inaro tayoy Jehova no mansiansia tayon matoor ed sikato
4. Paliket moy puso nen Jehova
Basaen so Proverbio 27:11, insan ebatan iraya:
Antoy nalikna nen Jehova no marunong ka tan unoren mo? Akin ey?
5. Sarag moy manmatoor ed si Jehova
Lapud inaro tayoy Jehova, labalabay tayon ipakabat ed arum. Lapud matoor tayod sikato, gawaen tayo itan anggano aliwan mainomay no maminsan. I-play so VIDEO, insan ebatan iraya.
Kasin naiirapan ka ya ibagad arum so tungkol ed si Jehova?
Diad video, antoy akatulong ed si Grayson pian nalabanan toy takot to?
Mas mainomay so manmatoor ed si Jehova no aroen tayo ray aaroen o labay to tan busolen tayo ray agto labay. Basaen so Salmo 97:10, insan ebatan iraya:
Base ed naaralan mo, anto ray labay nen Jehova tan anto ray agto labay?
Panon mon naaralan ya aroen so maong tan busolen so kaugsan?
6. Nabendisyonan itayo no unoren tayoy Jehova
No unoren tayoy Jehova, lanang ya maong so pansumpalan tayo. Basaen so Isaias 48:17, 18, insan ebatan iraya:
Manisia ka ya lanang ya amta nen Jehova no antoy pankaabigan tayo? Akin ey?
Anto la ray nitulong ed sika na panaaral mo na Biblia tan say impikabat mo ed tuan Dios ya si Jehova?
IBABAGA NA ARUM: “Anggan antoy gawaen tayo, ayos labat ’tan ed Dios.”
Anton teksto so usaren mo pian ipanengneng ya naaapektoan si Jehova ed saray gagawaen tayo?
SUMARYO
Nipanengneng mon inarom si Jehova no unoren mo tan manmatoor ka nin siansia ed sikato anggano mairap so situasyon.
Rebyu
Antoy naaralan mo ed si Job?
Panon mon paneknekan ya inarom si Jehova?
Antoy makatulong pian makapanmatoor ka ed si Jehova?
DISKOBRIEN
Amtaen no panon kan makapanmatoor ed si Jehova tan ed kongregasyon.
Aralen no anto ni ray akusasyon nen Satanas ed totoo.
“Impansiansia nen Job so Katooran To” (Say Biblia—Anto so Mensahe To? seksion 6)
Amtaen no panon ya anggan saray ugugaw et sarag dan ipanengneng so panangaro ed si Jehova.
Panon ya makapanmatoor ed Dios iray kabataan no wala ray manpre-pressure ed sikara ya arum nin kabataan?