Say Panangaro na Dios et Mansiansia ya Anggad Angga

1-2. Antoy dadalanen na dakel ya agagi natan?

IMADYIN mo pa so melag ya barko ya walad pegley na dayat legan ya makmaksil so bagyo. Iyaanor-anor na angkakabaleg ya daluyon! Pero antoy nagawa no akapelag lay angkla to may barko? Seguradon ondeen la anggano makmaksil ni tay bagyo.

² No ondadalan ka ed singa bagyon subok, ompan say pakaliknam et singa ka samay melag ya barko. Ompan maguloguloy isip mo tan ag-ondeen so liknaan mo. Singa bilang, ompan natan et kokkombinsido ka ya inaro ka nen Jehova tan tulongan to ka, pero ompan nabuas say pakaliknam et alingwanan to ka la. (Sal. 10:1; 13:1) No walay kaarom ya mamaseseg ed sika, seguro anggan panon et onlemew met so liknaan mo. (Pro. 17:17; 25:11) Pero nagunoyan, ompan ompawil may liknaan mo ya agka inaro nen Jehova. Ompan isipen mo ingen ya sinukoan to ka la. No ondadalan kad singa bagyon problema natan, panon mon ipelag so angkla, ya singa panangibaga? Diad arum ya salita, antoy gawaen mo pian naliknam tan tuloytuloy mon nalikna so panangaro tan tulong nen Jehova?

3. Antoy labay ya ibaga na “matoor a panangaro” ya abitlad Salmo 31:7 tan 136:​1, tan akin et anggapon balot so makapipara ed matoor a panangaro nen Jehova? (Nengnengen met so litrato.)

³ No ondadalan kad subok, say sakey ya paraan ya naipelag mo so angkla et no lanang mon tandaan ya matoor so panangaro nen Jehova. (Basaen so Salmo 31:7; 136:1.) No nabitlad Biblia so salitan “matoor a panangaro,” ontutukoy itan ed samay klase na panangaro ya ag-onikban tan ag-onsian ed samay aaroen to. Anggapon balot so makapipara ed matoor a panangaro nen Jehova. Diad tua, ibabaga na Biblia ya “abalbaleg [so] matoor a panangaro” to. (Exo. 34:​6, 7) Diad orihinal ya Hebreon lenguahe, say labay ton ibaga may salitan inusar ed Exodo 34:​6, 7 et napnapno na panangaro tan katooran si Jehova. Isip mo pa: Lapud matoor so panangaro nen Jehova, agton balot taynanan tan agton balot paulyanan iray lingkor to. No atan so sankanonot mo, singa ka barko ya aka-angkla, kanian maligen so liknaan mo anggano ondadalan kad singa bagyon problema.—Sal. 23:4.

IPASEN MON MANUNAN BANGAT NA BIBLIA SO PANANGARO NEN JEHOVA

4. Mangiter na alimbawa na saray manunan bangat na Biblia, tan ipaliwawa no akin ya ag-itayo bastabasta nakombinse no walay mangibagan aliwan tua iratan.

⁴ Say sakey nin makatulong pian singa ka aka-angkla anggano ondadalan kad singa bagyon problema et no ipasen mon manunan bangat na Biblia so panangaro nen Jehova. No imbagan “manunan bangat na Biblia,” anton tampol so naisip mo? Seguro naisip mo ray katuaan ya naaralan mod Biblia. Singa bilang, naaralan mo ya say ngaran na Dios et Jehova, si Jesus so bogbogtong ya Anak to, anggapo lay amta na saray inatey, tan onsabi panaon et magmaliw ya paraiso so interon dalin ya panayaman na saray totoo diad andi-anggaan. (Sal. 83:18; Ecl. 9:5; Juan 3:16; Apo. 21:​3, 4) No walay mangibagad sika ya aliwan tua iratan ya bangat, anto kasi magmaliw ya reaksion mo? Seguradon agto ka nakombinse, ta apaneknekan mon mismo ya tua iratan ya bangat. Pantongtongan tayod ontutumbok ya parapo no akin ya importantin ipasen tayo met so panangaro nen Jehova bilang sakey ed saray manunan bangat na Biblia, tan no panon itan ya makatulong pian agtayo pandudaan ya talagan iimanoen tan imamalasakit to tayo.

5. Ideskribe no panon ya nakombinse so sakey ya too ya aliwan tua iray palson bangat ya datin papanisiaan to.

⁵ Nen kakkagapom ni labat ya manaral na Biblia, antoy akatulong pian nakombinse ka ya aliwan tua iray palson bangat ya datin papanisiaan mo? Seguro impankomparam iray ibabangat na relihyon mo ed no anton talagay ibabangat na Biblia. Singa bilang, ompan dati et panisiaan mo ya si Jesus so Makapanyarin-amin ya Dios. Pero nen manaaral ka lay Biblia, seguro naisip mo, ‘Singa aliwa amo iyay papanisiaan ko.’ Nen inusisam ya maong so ibabangat na Biblia, diman mo atalosan ya aliwan si Jesus so Dios. Kanian manlapu lad saman, say panisiaan mo la et amay ibabaga na Biblia ya si Jesus so “panguloan na amin a pinalsa” tan “bogbogtong ya Anak na Dios.” (Col. 1:15; Juan 3:18) Siempre, ompan wala ray palson bangat ya mairap mon inikbanan, lalo la no abaybayag mo lan papanisiaan iratan. (2 Cor. 10:​4, 5) Pero nen naamtaan mo lay katuaan, nilingwanan mo la iratan ya palson doktrina, tan seguradon agmo la labay ya pawilen.—Fil. 3:13.

6. Akin et makapantiwala ka ya ‘say matoor a panangaro nen Jehova et mansiansia ya anggad angga’?

⁶ No ondadalan kad subok tan pandududaan mo ya inaro ka nen Jehova, sarag mo met ya gawaen imay ginawam nen onggagapo ka ni labat ya manaral na Biblia. Tepetan moy sarilim, ‘Duga kasi yay iisipen ko?’ Insan mo natan ikompara so iisipen mo ed no anton talagay ibabangat na Biblia nipaakar ed panangaro nen Jehova. Singa bilang, imanom pa imay ibabaga na Salmo 136:​1, say pinagkateman teksto na sayan artikulo. Akin kasi et impaisulat nen Jehova ed Biblia ya “matoor” so panangaro to? Akin kasi et 26 ya beses ya abitla ed satan ya salmo ya “say matoor a panangaro to et mansiansia ya anggad angga”? Singa apantongtongan tayo nen niman, say matoor ya panangaro nen Jehova ed saray lingkor to et sakey ed saray manunan bangat na Biblia. Atan so tua! Anggapoy pidumaan to ’tan ed arum nin manunan bangat ya naamtaan mod Salita na Dios. Kanian no bilang ta naliliknam ya anggapoy kanam ed si Jehova tan agto ka inaro, katilaan itan! Anggapoy pidumaan to ’tan ed saray palson bangat ya kontra ed ibabangat na Biblia. Ekal mo sirin itan ya tampol ed nonot mo!

7. Mangibaga na saray teksto ya mangipapaseguron inar-aro ka nen Jehova.

⁷ Dakel ni so nabasad Biblia ya mangipapaseguron inar-aro to tayo nen Jehova. Singa bilang, oniay imbaga nen Jesus ed saray papatumbok to: “Mas mabli kayo nen say dakel ya anuyaw.” (Mat. 10:31) Tan oniay imbagan mismo nen Jehova ed saray totoo to: “Pabiskegen ta ka, on, tulongan ta ka. Talagan bembenan ta ka ed kawanan a limak unong ed inkatunong ko.” (Isa. 41:10) Segsegurado si Jesus tan Jehova nen imbaga da itan. No naimanom, ag-imbaga nen Jesus ya, ‘Ompan mas mabli kayo nen say dakel ya anuyaw.’ Tan agto imbaga nen Jehova ya, ‘Ompan tulongan ta ka.’ Andi, aliwan ontan so imbaga ra. No basaen mo lamet iramay teksto, malinlinew ya ipapaseguro nen Jehova ya inar-aro to ka. Kanian no ondadalan kad subok tan pandududaan mo lay panangaro to, basam iray ontan ya teksto.a No ontan so gawaen mo, aglabat naekal so negatibon naliliknam, noagta nanonotan mo met so katuaan ya dati lan antam—say katuaan ya inaro ka na Dios. No manpikasi kad si Jehova tan dalepdepen mo iratan ya teksto, nibagam met imay walad 1 Juan 4:16: “Naamtaan tayo la tan papanisiaan tayo so panangaro na Dios ed sikatayo.”

8. Antoy gawaen mo no pawil-pawil ni may liknaan mo ya agka inaro nen Jehova?

⁸ Panon to balet no pawil-pawil so liknaan mo ya agka inaro nen Jehova, antoy gawaen mo? Ikomparam itan ya naliliknam ed katuaan ya antam. Antoy dugan panisiaan mo—amay naliliknam o amay ibabangat na Biblia? Mas napantiwalaan so ibabangat na Biblia ta atan so katuaan! No agmo panisiaan ya inaro ka nen Jehova, singam ibabaga ya aliwan tua may nabasad Biblia ya “say Dios et aro.”—1 Juan 4:8.

LANANG MON ISIPEN YA MAAP-APIT SO LIKNAAN NEN JEHOVA ED SIKA

9-10. Antoy itotongtong nen Jesus ed saray disipulo to nen imbaga ton, “Aaroen kayo na Ama”? (Juan 16:​26, 27) (Nengnengen met so litrato.)

⁹ Lalo tayon natalosan so panangaro nen Jehova no isipen tayo iyan imbaga nen Jesus ed saray papatumbok to: “Aaroen kayo na Ama.” (Basaen so Juan 16:​26, 27.) Diad orihinal ya Griegon lenguahe, amay inusar nen Jesus ya salitan “aaroen” et dedeskribien toy maap-apit ya liknaan nen Jehova ed saray disipulo nen Jesus. Seguradon balibali liknaan na saray disipulo ed satan ya imbaga nen Jesus. Pero imbaga to itan aliwa labat ya pian naligliwa ira. No nengnengen tayoy akadkauna iran bersikulo, say itotongtong lad sikara nen Jesus et nipaakar ed pikakasi.

¹⁰ Diad bersikulo 23 tan 24, imbaga nen Jesus ed saray disipulo ya nepeg ya manpikasi ira diad ngaran to, pero aliwan diad sikato. (Juan 16:​23, 24) Akin et impuppurek itan nen Jesus ed sikara? On ta no onoli lay Jesus, ompan sikato so pampikasian na saray disipulo, lalo la ta kaaro so turing dad sikato. Seguro naisip da ya lapud maap-apit so liknaan tod sikara, seguradon dengelen to iray pikakasi da, tan sikato lay mangibaga ed Ama to na saray kerew da. Pero aglabay nen Jesus ya ontan so isipen da. Akin ey? On ta “aaroen [ira] na Ama.” Singa ibabaga nen Jesus ed sikara ya, ‘Manpikasi kayod si Amak ta maap-apit met so liknaan tod sikayo.’ Antoy naaralan mod satan? Diad impanaral moy Biblia, akabkabat tan naar-arom si Jesus, tan seguradon naar-aro to ka met. (Juan 14:21) Pero singa saray disipulo nen inmunan siglo, labay nen Jesus ya tandaan mo ya aliwan sikato labat so mangaaro ed sika. Aaroen ka met nen Ama to. Kanian makapantiwala ka ya dengelen nen Jehova iray pikakasim.—1 Juan 5:14.

AGMO LILINGWANAN SO RASON NO AKIN YA MANDUARUWA KA

11. Akin et labay nen Satanas ya panduaruwaan tayoy panangaro nen Jehova?

¹¹ Anto kasi rason akin et panduaruwaan tayo ya inaro to tayo nen Jehova? No say ebat mo et si Satanas, duga ka. Labalabay itayon “buagen” na Diablo. (1 Ped. 5:8) Pian nabiktima to tayo, labay ton panduaruwaan tayoy panangaro nen Jehova. Say sankabalegan ya patunay ya inar-aro itayo nen Jehova et say dondon. Pero labay nen Satanas ya nalikna tayon agtayo kanepegan so nadondon. (Heb. 2:9) Pero isip mo pa: Siopay manliket no panduaruwaan tayoy panangaro nen Jehova? Si Satanas! Tan siopay manliket no ontunda tayo lan manlingkor ed si Jehova no ondadalan tayod subok? Si Satanas met! Papapawayen to ya ag-itayo inaro nen Jehova. Pero diad tua, sikato so talagan agla makanepegan ya aroen nen Jehova. Kanian no panduaruwaan mo lay panangaro nen Jehova, isip mon tampol ya “pakana” itan nen Satanas. (Efe. 6:11) No lanang mon tandaan ya pakana to itan, mas desidido ka ya labanan so panduaruwam.—Sant. 4:7.

12-13. Antoy sakey nin rason akin et pandududaan tayoy panangaro nen Jehova? Ipaliwawa.

¹² Wala ni sakey ya rason no akin ya no maminsan et panduaruwaan tayoy panangaro nen Jehova. Anto ’tan ey? Say atawir tayon kasalanan. (Sal. 51:5; Roma 5:12) Lapud kasalanan, arawi liknaan na too ed Dios. Tan lapu met ed kasalanan, wala lay depekto na isip, puso, tan laman tayo.

¹³ Balbaleg so epekto na kasalanan ed emosyon tayo. No makagawa tayoy kasalanan, seguradon nakokonsiensia, mapagpaga, natatakot, tan nababaingan tayo. Pero diad tua, anggano agtayo akagaway kasalanan, nalilikna tayo nin siansia iratan. Akin ey? On ta amta tayod sarili tayo ya makasalanan tayo—ayan kipapasen tayo et arawin dalin ed samay talagan inkagawa tayo. (Roma 8:​20, 21) Singa tayo kotse ya a-flat so dalig to. Di ba anggano kondisyon so makina na kotse pero a-flat so dalig to, aliwan marakep so batik to. Ontan tayo met. Tua, balibali impanggawa nen Jehova ed sikatayo. Pero lapud atawir tayon kasalanan, aliwa lan marakep so batik na nonot tayo tan wala lay deperensya na liknaan tayo. Agtayo la sirin pankelawan ya no maminsan et pandududaan tayoy panangaro nen Jehova. Kanian no ontan lay naliliknam, tandaan mo ya si Jehova et “mangipapatnag na matoor a panangaro ed saramay mangaarod sikato tan manusumpal ed saray ganggan to.”—Neh. 1:5.

14. No bilang ta iisipen mo ya agkan balot naaro nen Jehova, akin et makatulong no dalepdepen mo so dondon? (Roma 5:8) (Nengnengen met so kahon ya “Agka Manpapaloko ed ‘Mapalikdon Pakayari na Kasalanan.’”)

¹⁴ No maminsan, ompan say pakalikna tayo et ag-itayo makanepegan ya aroen nen Jehova. Tan no tongtongey tua, agtayon talaga makanepegan. Pero aman so makapabilib ed si Jehova. Anta makasalanan tayo, inaro to tayo nin siansia. Inter toy Anak to bilang dondon pian nasakoban iray kasalanan tayo. Inter toy dondon, aliwan lapud nan-irapan o nansagpotan tayo itan, noagta lapud inar-aro to tayo. (1 Juan 4:10) Tandaan tayo met ya linmay Jesus diad dalin parad saray makasalanan, aliwan parad saray agmankakasalanan. (Basaen so Roma 5:8.) Amin tayo et aliwan perpekto, kanian amta nen Jehova ya nalingo tayon nalingo. No bilang ta panduaruwaan tayoy panangaro nen Jehova, tandaan tayo ya epekto itan na atawir tayon kasalanan. No atan so sankanonot tayo, mas desidido tayon labanan so ididikta na isip tayo.—Roma 7:​24, 25.

MANSIANSIA KAN MATOOR ED SI JEHOVA

15-16. No manmatoor tayod si Jehova, anto met so nailaloan tayon gawaen to, tan akin et makaseguro tayod satan? (2 Samuel 22:26)

¹⁵ Labay nen Jehova ya pilien tayoy ‘mansiansia ed sikato’ ta atan so dugan gawaen. (Deu. 30:​19, 20) No manmatoor kad sikato, makaseguro ka ya manmatoor met ed sika. (Basaen so 2 Samuel 22:26.) Anggan anto ni tay subok ya onsabid bilay mo, nailaloan moy tulong to, basta manmatoor ka labat ed sikato.

¹⁶ On, say panangaro nen Jehova et singa angkla ya mamaligen ed liknaan tayo anggano ondadalan tayod singa bagyon problema. Amta tayo ya inar-aro to tayo tan agto tayon balot paulyanan. Atan so tua, ta atan so ibabangat na Biblia. Katon no bilang ta onsagi ed isip mo ya agto ka inaro, manpokus ka ed saray katuaan ya antam, aliwan diad naliliknam. On, mantiwala ka ed samay ibabaga na Biblia ya say matoor ya panangaro nen Jehova et mansiansia ya anggad angga!