Si Jehova so “Mamapaliket a Maong” ed Sikatayo

1-2. (a) Antoy nalilikna na dakel ya totoo natan? (b) Antoy pantongtongan tayo ed sayan artikulo?

GAGAWAEN na totoo natan so anggaay nayarian da pian magmaliw iran maliket. Pero anggan antoy gawaen da, singa wala nin siansiay kulang ed bilay da. Dakel so nadi-depress tan nanaekalay ilalo. Anggan sikatayo ran lingkor nen Jehova et makakalikna met na ontan. Agti la ’tan pankelawan ta manbibilay tayo la ed “kaunoran iran agew.” ‘Mair-irap iyan panaon’ kanian dakel so pakakaaburidoan tan pakakaermenan tayo.—2 Tim. 3:1.

² Pantongtongan tayo ed sayan artikulo no anto ray nayarin mangekal na liket tayo, tan no anto ray gawaen tayo pian nalikna tayo lamet so liket. Pero pantongtongan tayo nin unona no siopan talaga so panlalapuan na tuan liket.

SI JEHOVA SO PANLALAPUAN NA TUAN LIKET

3. No obserbaan tayo iray pinalsa nen Jehova, antoy naaralan tayo nipaakar ed sikato? (Nengnengen met so litrato.)

³ Maliket ya Dios si Jehova, tan labay to ya magmaliw tayo met ya maliket. Say liket nen Jehova et sankapatnagan diad saray pinalsa to. Singa bilang, marakdakep so impanggawa tod planeta tayo, dakdakel so kolor ya nanenengneng tayo, ginawa ton cute-cute iray ayayep, tan agnasabaan so mananam ya naakan ya intarya to parad sikatayo. Patunay iratan ya inar-aro to tayo nen Jehova tan labay to ya na-enjoy tayoy manbilay.

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Akin et maliket nin siansia si Jehova anggano nanenengneng toy paniirap ed mundo? (b) Panon to tayon tutulongan nen Jehova? (Salmo 16:11)

⁴ On, “maliket a Dios” si Jehova, pero agto labay ya ibaga ya ibabaliwala to so paniirap na totoo ed mundo. (1 Tim. 1:11) Nanenengneng to pa so mairap ya kipapasen tayo. Pero akin et maliket nin siansia? On ta amta to ya temporaryo labat so paniirap tayo. Diad tua, wala lay inyeskedyul ton agew ya ekalen to so amin ya paniirap ed mundo. Aalagaren to labat la so isabi to ’tan ya agew ta asingsingger la! Pero kaleganan to, manaanos ni si Jehova, tan manggagawa met na paraan pian nasarag tayo iray mairap ya dadalanen tayo. Say sakey ya paraan et tutulongan to tayon magmaliw ya maliket ya singa sikato. (Basaen so Salmo 16:11.) Imanoen tayo pay alimbawa nen Jesus, tan no akin ya alikna toy tuan liket.

5-6. Akin et maliket si Jesus?

⁵ Diad amin ya pinalsa nen Jehova, si Jesus so sankaliketan. Akin ey? On ta si Jesus et kaparpara o “kaulibay na agnanengneng a Dios”—inalig toy amin ya ugali tan kualidad nen Ama to. (Col. 1:15; 1 Tim. 6:15; tan nengnengen met so study note ya “maligaya” diad nwtsty-TG.) Sakey ni, maap-apit so liknaan tod Ama to, say lapuan na tuan liket.

⁶ Malikeliket si Jesus kada no gagawaen toy panlabayan nen Ama to. (Pro. 8:​30, 31; Juan 8:29) Lanang ton uunoren so Ama to, kanian amta to ya pap-proud ed sikato si Jehova.—Mat. 3:17.

7. Antoy gawaen tayo pian nalikna tayoy tuan liket?

⁷ Singa si Jesus, nalikna tayo met so tuan liket no iyapit tayoy liknaan tayo ed si Jehova, ta Sikato so panlalapuan na tuan liket. No diman tayo mas pansasagpotan ya kabaten si Jehova tan aligen tayo iray kualidad to, diman tayo met mas nalikna so liket. Magmaliw tayo met ya maliket no gawaen tayoy panlabayan nen Jehova. No lanang tayon uunoren so ipapagawa to, nalikna tayo ya pap-proud ed sikatayo.a (Sal. 33:12) Pero, nasasalim may wala ray agew ya agka maliket? Wala ingen iray agagi ya abayag da lan nalilikna so ermen. Labay to kasin ibaga, no ontan so nalilikna tayo, anggapod sikatayo so pabor nen Jehova? Andi! Aliwa tayon perpekto, kanian wala ray panaon ya nasasakitan tayo, maer-ermen tayo, tan ompan nadi-depress tayo ni ingen. Natatalosan nen Jehova so situasyon tayo. (Sal. 103:14) Pantongtongan tayo sirin no anto ray nayarin mangekal na liket tayo tan no anto ray gawaen tayo pian nalikna tayo lamet so liket.

ANTOY MAKATULONG PIAN NALIKNA TAYO LAMET SO LIKET?

8. Antoy nalikna tayo no walay problema tayo?

⁸ No naproproblema tayo. Kasin naproproblema ka natan lapud irap na bilay, wala ray kontra ed pandadayew mod si Jehova, apektado kay kalamidad, walay sakit mo, odino ontatatken ka la? Natural labat ya nabalang so liket tayo no ontan so situasyon tayo, lalo la no agtayo itan kontrolado. Ibabaga na Biblia ya no asugatan o ‘asakitan so puso tayo, onermen tayo.’ (Pro. 15:13) Ontan so alikna na sakey ya elder, si Babis. Diad loob labat na apat taon, inatey si kuya to tan saray atateng to. Oniay imbaga to: “Antis ya inatey iray atateng ko tan samay kuyak, aburido ak ya maong tan agko la amtay unaen ko. Labay ko komon ya mas dakel so oras kod sikara pero amayamay met so iyuulok. Ngalngali ak la ombigay ed saman.” On, lapud problema ya dadalanen tayo, ompan no maminsan et naknaksawan tayo la tan singa labay tayo lay onsuko.

9. No ondadalan tayod problema, antoy makatulong pian nalikna tayo lamet so liket? (Jeremias 29:​4-7, 10)

⁹ Antoy makatulong pian nalikna tayo lamet so liket? Maabig no awaten tayoy situasyon tayo, tan iyugali tayoy misalamat lapud saray bendisyon ya nanaawat tayo. Ibabaga na saray totoo ed mundo ya magmaliw tayo labat ya maliket no balibali so situasyon tayo. Pero aliwan tua ’tan. Imanoen tayo pa so agawa ed saray Judio nen abihag irad Babilonia. Binilin ira nen Jehova ya awaten da ya anguman lay situasyon da, tan gawaen day anggaay nayarian da ya magmaliw ya maliket ed balon kipapasen da. (Basaen so Jeremias 29:​4-7, 10.) Antoy naaralan tayod saya? No bilang ta walay dadalanen mon problema ya lapud satan et aliwa lan singa dati so situasyon mo, awat mo ya wala ran talagay agmo kontrolado, tan manpokus ka ed saray balibalin nagagawa ed bilay mo. Tandaan mo ya wadtan si Jehova ya ontulong ed sika. (Sal. 63:7; 146:5) Ontan so naeksperiensya nen Sister Effie. Grabe so impaka-aksidente to, kanian natan et agla makaakar. Pero oniay imbaga to: “Alikliknak so tulong tan suporta nen Jehova, saray kapamilyak, tan saray agagi. No onsuko ak la, di singa ibabaliwalak so amin ya gagawaen da parad siak. Labay kon ipanengneng ya misatsalamat ak ed sikara, kanian gagawaen koy anggaay nayarian ko pian agnabalang so liket ko.”

10. Akin et sarag tayo nin siansiay magmaliw ya maliket anggano walay aarapen tayon problema?

¹⁰ Anggano mairap so situasyon tayo natan o walay onsabin problema ya agtayo iilaloan, sarag tayo nin siansiay magmaliw ya maliket.b (Sal. 126:5) Akin ey? On ta say tuan liket et ag-akadepende ed situasyon tayo. Imanoen so imbaga na sakey ya payunir ya si Maria: “No walay problemam, siempre natural met labat ya onermen odino onakis ka. Pero naliknam nin siansiay liket no sankanonot mo iray balibalin sipan nen Jehova. Wadtan si Aman Jehova ya ontulong ed sikatayo pian agnabalang so liket tayo.” On, anggan anto ni tay subok ya aarapen tayo natan, tandaan tayo ya temporaryo labat iratan—singa iratan bakat na sali ed buer diad gilig na dayat ya nabural lanlamang. Asingsingger lan buralen o ekalen nen Jehova so amin ya sengegan na ermen tan paniirap tayo.

11. Antoy naaralan mo ed alimbawa nen apostol Pablo?

¹¹ Kasin naliliknam no maminsan ya anggapo lad sika so pabor nen Jehova lapud saray probleman dadalanen mo? No ontan so naliliknam, tandaan mo ya wala ray matoor ya lingkor nen Jehova nensaman ya dinmalan met ed mair-irap iran situasyon. Say sakey et si apostol Pablo. Nen nagmaliw ya Kristiano si Pablo, si Jesus ya mismo so nampili ed sikato ya ipulong so katuaan “ed saray nasyon ontan met ed saray arari tan ed saray anak na Israel.” (Gawa 9:15) Balbaleg itan ya pribilehyo! Pero dakdakel met ya subok so dinalan nen Pablo. (2 Cor. 11:​23-27) Labay to kasin ibaga, anggapod sikato so pabor nen Jehova? Andi! Mapatpatnag ingen ya walad sikato so pabor nen Jehova ta asarag to iratan ya amin. (Roma 5:​3-5) Isip mo pa met so situasyon mo natan. Di ba anggan antoy irap, nasasarag moy kada agew tan makakapanmatoor ka nin siansia ed si Jehova? Prueba itan ya walad sika so pabor nen Jehova.

12. Antoy nalikna tayo no agnagawa so iilaloan tayo?

¹² No ag-agawa so iilaloan tayo. (Pro. 13:12) Lapud inar-aro tayoy Jehova tan dakdakel so pisatsalamatan tayod sikato, ompan wala ray espiritual ya goal tayo. Pero siempre, no aliwan realistiko iray goal tayo tan agtayo iratan sarag ya aboten, ompan nadismaya tayo labat. (Pro. 17:22) Ontan so alikna na sakey ya payunir ya si Holly. Kuan to: “Goal kon talaga so manaral ed School for Kingdom Evangelizers, manlingkor ed arum ya bansa, odino man-volunteer ed construction project diad Ramapo. Pero anguma-uman so situasyon ko kanian imposible lan nagawaan ko iratan. Wala ray labalabay kon gawaen pero agko la sarag, kanian nadidismaya ak ya maong.” Ontan met so nalilikna na arum ya agagi.

13. No limitado lay nagagawaan tayo lapud situasyon tayo, anto ray marakep ya i-goal tayo?

¹³ Antoy makatulong pian nalikna tayo lamet so liket? Tandaan tayo ya makonsidera ya Dios si Jehova. Agto ipagawad sikatayo iray bengatlan agtayo sarag. Say panangaro nen Jehova ed sikatayo et ag-akadepende ed karakel na nagagawaan tayo. Basta say kekerewen to labat, amay manmatoor tayo tan mansiansia tayon mapaabeba. (Miq. 6:8; 1 Cor. 4:2) Tua, iimanoen nen Jehova iray nagagawaan tayo, pero say talagan mas importante ed sikato et no antoy walad puso tayo. Kanian no si Jehova et aliwan atagtagey so iilaloan to ed sikatayo, di dapat ontan tayo met!c Mas maabig no manpokus tayo ed saramay sarag tayon gawaen. Singa bilang, anggano limitado lay nagagawaan mo ed panaglingkor, ompan sarag mon tulongan ya onaligwas ed espiritual iray kabataan o pabiskegen iray maedad lan agagi. Ompan sarag mo met ya bisitaen so sakey ya agi, tawagan o i-text pian nakumusta tan napaseseg mo. No manpokus ka ed saray sarag mon gawaen, seguradon bendisyonan ka nen Jehova tan naliknam so liket. Agmo met lilingwanan ya no balon mundo la, nagawaan mo lay amin ya labay mon gawaen parad si Jehova. Atan la kuno so sankanonot nen Sister Holly ya abitla nen niman. Oniay imbaga to: “No nadidismaya ak la, say ibabagak ed sarilik, ‘Andi bale ta walay andi-anggaan ya bilay.’ Diad tulong nen Jehova, nagawaan ko la ray goal ko diad balon mundo.”

14. Anto ni sakey ya nayarin mangekal na liket tayo?

¹⁴ No puros sarili tayo so sankanonot tayo. Diad social media, nanenengneng tayod post na saray totoo ya singa malikeliket ira ta nagagawaan day labalabay da. No agtayo manalwar, ompan naimpluensyaan da tayo. Singa bilang, ompan isipen tayo met la ya magmaliw tayo labat ya maliket no nagagawaan tan nasasaliw tayoy labay tayo, tan no makakapasyar tayod nanduruman lugar. Agmet mauges so man-enjoy. Diad tua, labay nen Jehova ya panliketan tayo iray balibalin ginawa to. Pero apatunayan na dakel ya aramay iisipen dan mangiter na liket ed sikara et araman lanlamang so angekal na liket da. Oniay imbaga na sakey ya payunir ya si Eva: “No say tetelekan na bilay mo et no panon mon napaliket so sarilim, singa wala nin siansiay kulang.” On, no puros sarili tayoy sankanonot tayo, nadismaya tayo labat tan agtayon balot nakontento.

15. Antoy naaralan tayo ed si Arin Solomon?

¹⁵ Makaaral tayod si Arin Solomon. Dakel so sinali ton gawaen pian onliket. Singa bilang, nanduruman klase na mananam ya naakan so tinawayan to, dinmengel ed mararakep iran musika, tan ankabli iray sinasaliw to. Pero anggano asali to iratan ya amin, pakalikna to et wala nin siansiay kulang ed bilay to. Onia ingen so imbaga to: “Say mata et agnapepera ed inenengneng to; tan say layag et agnapepenek ed idedengel to.” (Ecl. 1:8; 2:​1-11) Singa si Arin Solomon, wala ray gagawaen na totoo natan ya say amta ra et aman so mangiter na tuan liket. Pero singa iratan peke ya kuarta. No makadukdok kay peken kuarta, seguro maliket ka ta agmo ahalatan tampol ya peke. Pero seguradon nadismaya ka lanlamang ta aloko ka labat manaya!

16. Akin et maliket tayo no ontutulong tayod arum? (Nengnengen met so litrato.)

¹⁶ Antoy makatulong pian nalikna tayo lamet so liket? Imbangat nen Jesus ya “mas makapaliket so mangiter nen say mangawat.” (Gawa 20:35) Oniay imbaga na sakey ya elder ya si Alekos: “Sankanonot koy itulong ed arum anggan diad simpli labat ya paraan. Alikas ko ya no mas sankanonot koy arum, mas maliket ak ta agak akapokus ed sarilik.” Sika ey? Antoy sarag mon gawaen parad arum? No walay naimanom ya onkakapuy, marakep no pabiskeg moy liknaan to. Tua, ompan agmo nasolusyonan so problema to. Pero no ondengel kad sikato, ipaliknam ya imamalasakit mo, tan ipanonot mod sikato ya ipasakbat tod si Jehova so ambelat ya awit to, balbaleg lay nitulong to ’tan. (Sal. 55:22; 68:19) Ipasegurom met ed sikato ya agan balot mamaulyan si Jehova. (Sal. 37:28; Isa. 59:1) Sarag mo met so manggaway paraan pian onlemew so liknaan to. Singa bilang, sarag mon ilutoan o itagar mon ompasyar. Marakep met no ipilam ya manpulong. Seguradon na-enjoy to itan! No gawaen mo iratan, ipapanengneng mod si Jehova ya labalabay moy manpausar ed sikato pian pabiskegen iray lingkor to. No mas sankanonot tayoy arum nen say sarili tayo, seguradon nalikna tayo so tuan liket!—Pro. 11:25.

17. Akin et nalikna tayoy tuan liket no tuloytuloy tayon onapit ed si Jehova? (Salmo 43:4)

¹⁷ Kanian antoy sekreto pian nalikna tayoy tuan liket? Itultuloy tayoy onapit ed si Aman Jehova. No ontan so gawaen tayo, ipapaseguro na Biblia ya ‘paliketen to tayon maong.’ (Basaen so Salmo 43:4.) Kanian anggan anto ni tay subok o problema ya dadalanen mo natan, tandaan mo ya basta kaibam si Jehova, anggapoy nepeg mon takotan o pampagaan. Makaseguro ka ya aga nabalang so liket mo, ta si Jehova so panlalapuan na tuan liket!—Sal. 144:15.