1925—Sanlasus Taon Lay Apalabas

AG-AGAWA SO IILALOAN DA

Nen 1925, iilaloan na saray Estudyante na Biblia ya magmaliw lan Paraiso so interon dalin. Oniay imbaga nen Brother Albert Schroeder ya nagmaliw ya membro na Mananguley ya Ulop nipaakar ed satan: “Say amta mi, kasabi 1925, onla lad tawen iray nakekeran alanaan ya papatumbok nen Kristo, tan paolien la diad dalin iray matoor ya lingkor na Dios nensaman, ya singa si Abraham, David, tan arum ni pian manlingkor bilang prinsipe tan idaulo da iray totoo na Dios diad dalin.” Nen nasusumpal lay taon pero agnin siansia agawa so iilaloan da, wala ray agagi ya adisdismaya.—Pro. 13:12.

Anggano adismaya iray Estudyante na Biblia, maslak ed sikara et tuloytuloy nin siansia ya nampulong. Atalosan da ya say kimey ya panagpulong so sankaimportantian ya kimey ya ipapagawa ed sikara nen Jehova. Nengnengen tayo no panon dan impulong so katuaan ed dakel ya totoo panamegley na radyo.

DINMAKEL SO AKARENGEL NA KATUAAN PANAMEGLEY NA RADYO

Nen 1924, dakel ya totoo so dinmengel ed istasyon na radyo tayo ya WBBR. Kanian nen 1925, angipaalagey iray Estudyante na Biblia na sakey nin istasyon na radyo ya asingger ed Chicago, Illinois. Say ngaran na sayan istasyon et WORD (o SALITA). Onia kunoy nanonotan nen Ralph Leffler, sakey ed saray tinmulong ed impanpaalagey ed satan ya istasyon: “Dakel ya totoo ya manaayam ed ararawin lugar so ondedengel ed satan ya istasyon, lalo la no labi tan ambetebetel so panaon.” Singa bilang, wala tay sakey ya pamilya ya manaayam ed Pilot City, Alaska ya akarengel ed sakey ed saray sankaunaan ya programa ya in-broadcast tayo. Masulok ya 5,000 kilometro so kaarawi na panaayaman da manlapud istasyon. Kayari dan dinmengel, sinulatan da iray agagi ya mankikimey ed saman ya istasyon. Misatsalamat ira ta akaaral ira kuno nipaakar ed Dios tan ed Biblia lapud samay programa.

Diad samay The Watch Tower ya isyu na Disyembre 1, 1925, oniay nabasa ya rason no akin ya dakel so makakarengel ed programa na istasyon tayo: “Say WORD so sakey ed saray istasyon na radyo ed United States ya malaklaknab so nasasabi to, ta say transmitter to et 5,000 watts la. Malinlinew ya narengel na totoo iray programa ed istasyon tayo diad interon United States, diad Cuba, tan anggan diad sankaarawian ya lugar ed Alaska. Dakel ya totoo so first time dan naamtaan so katuaan lapud sayan istasyon tan nagmaliw iran interesado.”

Diad saya met lanlamang ya taon, labay na Saray Estudyante na Biblia ya mas palaknaben ni so panguusar tayoy radyo diad panagpulong ya kimey ed Canada. Nen 1924, wala lay impaalagey dan melag ya istasyon na radyo ya tinawag dan CHUC diad Saskatoon, Saskatchewan. Atan so sakey ed saray sankaunaan ya istasyon na radyo ed Canada ya say programa et nipaakar ed relihyon. Nen 1925, kaukolan lan iyalis ed mas baleg ya lugar iyan istasyon kanian inngaran la itan ed Watch Tower Society tan inyalis la diad Regent Building. Daan itan ya bilding ed Saskatoon ya datin teatro, pero sinaliw tan in-renovate na Society.

Lapud sayan istasyon, first time ya nipasabi so maong a balita ed saray totoo ya manaayam ed ararawin lugar diad Saskatchewan. Singa bilang, diad sakey ya nisulinek ya baley, walay bii ya say ngaran to et Mrs. Graham ya dinmengel ed programa ya in-broadcast tayo. Sinmulat iyan bii tan onkekerew na saray literatura tayo ya base ed Biblia. Oniay imbaga nen Brother George Naish nipaakar ed samay sulat to yan bii: “No nabasam may sulat to, singa oneeyag ya ‘Bangatan yo kami dia!’ Kanian impawit mid sikato may interon set na Studies in the Scriptures.” Ag-abayag, impulong la nen Mrs. Graham iray nanaaralan to ed saray totoo ya manaayam ed mas ararawin pasen.

LINMINEW SO PAKATALOS TAYO

Diad samay Marso 1, 1925, ya isyu na The Watch Tower, walay pinmaway ya agnalinglingwanan ya artikulo ya say title to et “Birth of the Nation.” Akin et importantin maong itan ya artikulo? Abayag lan amta na Saray Estudyante na Biblia ya walay organisasyon nen Satanas tan sikato so manuuley ed saray demonyo, saray palson relihyon, gobierno na totoo, tan ed sistema na komersyo diad mundo. Pero diad saman ya artikulo, impaliwawa na “matoor tan makabat ya aripen” ed saray agagi ya wala met so organisasyon nen Jehova ya talagan duma tan kontra ed organisasyon nen Satanas. (Mat. 24:45) Impaliwawa met na saman ya artikulo ya niletneg so Panarian na Dios nen 1914, tan diad saman ya taon, “walay agawan guerra ed tawen,” apalayas si Satanas tan saray demonyo, tan natan et wadia la rad dalin.—Apo. 12:​7-9.

Wala ray Estudyante na Biblia ya agda natanggap iyan balon pakatalos. Iilaloan la itan na matoor tan makabat ya aripen kanian oniay nabasa ed saman lanlamang ya artikulo: “No wala ray manbabasa na sayan isyu na Watch Tower ya agmipakna ed saray akasulat dia, komon ta kalmado kayo labat, manmatalek kayod Katawan, tan tuloytuloy kayon manmatoor.”

Pero antoy alikna na maslak ya Estudyante na Biblia nen abasa da iyan artikulo? Oniay imbaga nen Tom Eyre, sakey ya colporteur (payunir la so tawag natan) ya tagad Britain: “Malikeliket iray agagi nen atalosan day kabaliksan na Apocalipsis kapitulo 12. Nen malinlinew lad sikami ya niletneg lay Panarian diad tawen, mas sinmeseg kami ya ipulong itan ya maong a balita. Apakiwas kami ya lalon mamasya tan diman mi anengneng ya dakel ni ray balibalin gawaen nen Jehova diad arapen.”

PANTASI NIPAAKAR ED SI JEHOVA

Kabkabisado na Saray Tasi nen Jehova natan imay nabasad Isaias 43:10: “‘Sikayo ray tasik,’ so imbaga nen Jehova, ‘On, say lingkor ko a pinilik.’” Pero antis na 1925, mataltalag ya nabitla iyan teksto diad saray publikasyon tayo. Kasabi balet na 1925, seguradon tinmatak iyan teksto ed saray Estudyante na Biblia ta atalakay so Isaias 43:10 tan 12 ed labinsakey ya isyu na The Watch Tower.

Nen bandad sampot na Agosto 1925, walay agawan kombension na Saray Estudyante na Biblia diad Indianapolis, Indiana. Diad samay inimprintan programa, oniay nabasa ya mensahe nen Brother Joseph F. Rutherford ed saray inmatendi: “Linma tayod sayan kombension pian makapantipon tayoy . . . biskeg ya nanlapud Katawan. Diad ontan et makmaksil tayon ompawil ed lawak na kimeyan bilang tasi to.” Diad interon waloran agew na kombension, apaseseg iray inmatendi ya mantasi nipaakar ed si Jehova ed amin ya pankanawnawa.

Nen Sabado, Agosto 29, impaliwawa nen Brother Rutherford so tema ya “A Call to Action.” Diad satan ya paliwawa, indanet to ya importante so kimey ya panagpulong. Kuan to: “Oniay imbaga nen Jehova ed saray totoo to . . . : ‘Sikayo ray tasik . . . siak so Dios.’ Insan oniay malinlinew ya ingganggan tod sikara: ‘Mangitagey kayoy sakey a tanda parad totoo.’ Anggapo lay arum ed mundo ya nayarin mangitagey na sayan tanda noagta saramay totoo labat ya walad sikaray espiritu na Katawan—saray tasi to.”—Isa. 43:12; 62:10.

Kayari na paliwawa nen Brother Rutherford, binasa to so sakey ya resolusyon ya say title to et “Message of Hope.” Inmabobon so amin ya inmatendi ed satan ya resolusyon. Nabasa ditan ya say Panarian na Dios labat so alenleneg ya ilalo pian niwalay “kareenan, inawa, maong ya bunigas, andi-anggaan ya bilay, kawayangan, tan agmanganggan liket.” Impatalos iyan resolusyon ed nanduruman lenguahe, tan inimprinta pian ibunog diad ministeryo. Manga 40 milyon ya kopya so imbunog na Saray Estudyante na Biblia!

Linmabas ni pigaran taon antis ya nagmaliw ya Tasi nen Jehova so tawag ed Saray Estudyante na Biblia. Pero nen 1925, natatalosan da la ya responsabilidad da so magmaliw ya tasi to.

APASESEG IRA YA PAWILEN IRAY INTERESADO

Lapud ondadakel lay Estudyante na Biblia ed interon mundo, pinaseseg ira na organisasyon ya aglabat ira mangibubunog na saray literatura, noagta kaukolan da met ya pawilen iramay angipanengneng na interes. Kayari na kampanya parad pangibunog ed samay tract ya Message of Hope, oniay nabasa ed Bulletina: “Pawil yo iramay abung ya angitilakan yoy Message of Hope.”

Diad samay Enero 1925 ya isyu na Bulletin, oniay nabasan report ya nanlapud sakey ya Estudyante na Biblia ya tagad Plano, Texas: “Abigla kami ta nen pinmawil kamid saramay teritorya ya aminpiga mi lan apulongan, mas madengel iray totoo komparad saramay teritorya ya first time mi ni labat ya pulongan. Walay melag ya baley diad teritorya mi ya aminlima mi lan apawil diad imbeneg ya samploy taon. . . . Ayay agano labat, pinmawil lamet ditan si Sister Hendrix tan si nanay ko, tan dakdakel so nipalima dan libro.”

Tan oniay insulat na sakey ya colporteur ya tagad bansan Panama: “Wala ray totoo ya agda labay so ondengel nen first time ko ran pulongan. Pero nen pidua o pitlok la ran pawilen, madengedengel la ra. Ayan taon, mas dakel so ingganak ya panaon ya pawilen iramay dati lan apulongan ko, tan dakel so balibalin eksperiensyak.”

EKSAYTED LA RAD SARAY NAGAWAD ARAPEN

Diad samay tinaon ya sulat parad amin ya colporteur, imbaga nen Brother Rutherford iray agawaan ed taon 1925, tan no anto ni ray kaukolan ya gawaen. Kuan to: “Nen imbeneg ya taon, pribilehyo yon ligliwaen so dakel ya totoon maneermen. Alikna yoy liket diad puso yo lapud sayan kimey . . . Ayay 1926, seguradon dakel so pankanawnawa yon mantasi nipaakar ed Dios tan ed panarian to tan ipanengneng ed saray totoo no siopa ray tuan lingkor to. . . . Saniiba tayon usaren so boses tayo tan kansionan tayoy panangirayew so Dios tayo tan say Ari tayo.”

Nen asingger lan manampot so 1925, plaplanoen la na organisasyon ya paawangen iray pasilidad ed Brooklyn. Nen 1926, ginmapo so sankabalegan ya construction project na organisasyon tayo diad saman ya panaon.