Ibagam ed si Jehova so Amin ya Walad Pusom

1-2. (a) Akin ya no maminsan et agtayo nibagad si Jehova so amin ya nalilikna tayo? (b) Panon tayon amta ya talagan dedengelen nen Jehova iray pikakasi tayo?

KASIN no maminsan et nalilikas mon apasakey la tan agnanlapud puso iray pikakasim? Aliwan sika labat so ontan. Lapud bip-busy tayon amin, ompan inapura la iray pikakasi tayo. Ompan nababaingan tayo ni ingen ya ibagad si Jehova so walad puso tayo ta say pakalikna tayo et agtayo makanepegan ya onasingger ed sikato.

² Ipapaseguro na Biblia ya aliwan say karakep tan inkarunong tayon mansalita so iimanoen nen Jehova no manpipikasi tayo. Say importante ed sikato et amay nanengneng ton mapaabeba tayo tan nanlapud puso iray ibabaga tayo. ‘Dedengelen toy kerew na saray mauyamo.’ (Sal. 10:17) Imamalasakit to tayo kanian dedengelen to so kada salita ya ibabaga tayod sikato.—Sal. 139:​1-3.

3. Anto ran tepet so pantongtongan tayo ed sayan artikulo?

³ Pantongtongan tayod sayan artikulo irayan tepet: Akin et agtayo dapat natatakot ya ibagad si Jehova so amin ya walad puso tayo? Antoy gawaen tayo pian lalo tayon onapit ed si Jehova kada no manpikasi tayo? Antoy naaralan tayod saray pikakasi ya akasulat ed Biblia, tan panon iratan ya makatulong pian napaaligwas tayoy pikakasi tayo? Tan antoy sarag tayon gawaen no agtayo amtay ibaga tayod si Jehova lapud kabelat na problema tayo?

AGKA NATATAKOT YA IBAGA ED SI JEHOVA SO AMIN YA WALAD PUSOM

4. Antoy makatulong pian agtayo natatakot ya ibagad si Jehova so amin ya walad puso tayo? (Salmo 119:145)

⁴ Labay nen Jehova ya say turing tayod sikato et malet ya kaaro—sakey ya kaaro ya sankanonot toy pankaabigan tayo. No kaaro so turing tayod si Jehova, agtayo natatakot ya ibagad sikato so amin ya walad nonot tan puso tayo. Ontan so ginawa na samay nansulat na Salmo 119. Dakel so dinalan ton problema. Wala ray mamubusol ed sikato tan dineralan da. (Sal. 119:​23, 69, 78) Kinmapuy met so liknaan to lapud wala ray agawaan ton lingo. (Sal. 119:5) Pero anggano onman, aga nan-alangan ya manpikasi ed si Jehova. Imbaga toy amin ya walad puso to.—Basaen so Salmo 119:145.

5. Akin et agtayo dapat manaalangan ya manpikasi anggano nababaingan tayo? Mangiter na ilustrasyon.

⁵ Anggan saramay akagawa na seryoson kasalanan et papasesegen nen Jehova ya manpikasid sikato. (Isa. 55:​6, 7) Kanian anggano nababaingan tayo, manpikasi tayo labat ed si Jehova. Isip mo pa so sakey ya piloto. No bilang ta walay onlesan problema legan ton papatikyaben so eroplano, amta to ya sarag toy ontawag ed saray air traffic controller pian natulongan da. Panon to no walay aliwan ginawa to kanian nanka-aberya may eroplano tan aliwa lay aarapen to? Kasin manalangan ya manpatulong lapud kasalanan to may agawa? Andi, seguradon onkerew na tulong! Ontan tayo met. Anggano aliwa lay aarapen tayo o akagawa tayoy kasalanan, agtayo komon natatakot ya manpikasi ed si Jehova.—Sal. 119:​25, 176.

ANTOY GAWAEN MO PIAN LALO KAN ONAPIT ED SI JEHOVA KADA NO MANPIKASI KA?

6-7. Antoy gawaen tayo pian lalo tayon onapit ed si Jehova kada no manpikasi tayo? Mangiter na alimbawa. (Nengnengen met so paimanod leksab.)

⁶ No ibaga tayod si Jehova so amin ya walad nonot tan puso tayo, seguradon lalon onapit so liknaan tayo ed sikato. Antoy makatulong pian nagawaan mo itan?

⁷ Isip mo ray kualidad nen Jehova.a No isipen tayo ray balibalin kualidad nen Jehova, mas mainomay tayon nibagad sikato iray walad puso tayo. (Sal. 145:​8, 9, 18) Imanoen so alimbawa nen Kristine. Lapud maruksa tan mapasnok si tatay to, akaapekto kuno man ed pakanengneng tod si Jehova. Oniay imbaga to: “Nairapan ak ya imadyinen ya maaron Ama si Jehova. Kanian ngalngali agko labay so mitongtong ed sikato. Pakaliknak, no walay nagawaan kon lingo, agto ak la aroen.” Anton kualidad nen Jehova so dinalepdep nen Kristine? Kuan to: “Nen inaral kon maong so matoor ya panangaro nen Jehova, linmigen so liknaan ko. Amtak ya agton balot ikbanan so limak. Anggano natumba ak, seguradon ipaalagey to ak. Matmainomay ko la natay mitongtong ed si Jehova. No maliket ak, ibagak. No maermen ak, ibagak met. Anggapoy iyaamot kod sikato.”

8-9. Akin et marakep no isipen mo ni ibagam antis kan manpikasi? Mangiter na alimbawa.

⁸ Isip mo ni no antoy ibagam. Antis kan manpikasi, marakep no tepetan mo ni sarilim. Singa bilang: ‘Anton espisipikon problema so labay kon ibaga ed si Jehova? Wala kasi too ya kaukolan kon perdonaen? Kasin walay pananguman ya agawad bilay ko tan kakkaukolan koy tulong nen Jehova?’ (2 Ara. 19:​15-19) Agmo met lilingwanan iramay binitla nen Jesus nen imbangat ton manpikasi iray disipulo to. Isip mo no antoy ipikasim ed si Jehova nipaakar ed ngaran to, Panarian to, tan say linawa to.—Mat. 6:​9, 10.

⁹ Imanoen so alimbawa nen Sister Aliska. Nen a-diagnose so asawa to ya wala manayay brain cancer to tan ataningan lay bilay to, irap kuno nen Aliska so manpikasi. Kuan to: “Kada no onggapo ak lan manpikasi, agko la amtay onsublay ya ibagak ta maguloguloy isip ko.” Antoy akatulong ed si Aliska? Oniay imbaga to: “Antis ak ya manpikasi, iisipen ko ni no antoy labay kon ibaga ed si Jehova ta labay kon seguroen ya aliwan puros sarilik tan si asawak labat so kargay pikakasik. Alikas ko ya no ontan so gawaen ko, mas kalmado ak tan mas nibagak ed si Jehova iray labay kon ibaga.”

10. Akin et importante ya dukeyan tayo labat iray pikakasi tayo? (Nengnengen met so litrato.)

¹⁰ Dukeyan mo labat so pikakasim. Kada no manpipikasi tayo, lalo tayon onaapit ed si Jehova, anggano antikey labat so pikakasi tayo. Pero duman-duma no dukeyan tayoy pikakasi tayo pian nibaga tayod si Jehova so amin ya walad puso tayo.b Ontan kuno so gagawaen na asawa nen Sister Aliska ya si Elijah. Kuan to: “Diad loob na sanagew, maminpiga ak ya manpipikasi. Pero naimanok ya mas onaapit so liknaan kod si Jehova no mas andukey so pikakasik. Sabagay, agto ak met aapuraen, kanian agak met dapat manaapura.” Antoy makatulong pian nagawaan mo met itan? Manpili kay oras tan pasen ya anggapoy makaisturbo pian makapanpikasi kay andukey—no nayari et amay aliwan diad isip labat, noagta amay narengel moy sarilim. Salim itan, ya anggad napasalan mo lay manpikasi na andukey.

DALEPDEP MO IRAY PIKAKASI YA AKASULAT ED BIBLIA

11. Akin et marakep no dalepdepen tayo iray pikakasi ya akasulat ed Biblia? (Nengnengen met so kahon ya “Kasin Pareho so Situasyon Mo ed Situasyon Da?”)

¹¹ Marakep no dalepdepen mo iray pikakasi tan sagradon kansion, o salmo, ya akasulat ed Biblia. No basaen mo iratan, ditan mo nanengneng ya agnababaingan iray lingkor nen Jehova nensaman ya ibalikas ed sikato iray walad isip da, kanian napakiwas ka met ya ibagad si Jehova so amin ya walad pusom. Ompan wala met iray nadiskobrem ya balikas na panangirayew ed si Jehova ya labay mo met ya bitlaen ed saray pikakasim. Tan ompan walay nabasam ya pikakasi na lingkor nen Jehova ya say situasyon to et parehon-pareho ed situasyon mo.

12. Anto ray itepet tayod sarili tayo legan tayon dadalepdepen so sakey ya pikakasi ya akasulat ed Biblia?

¹² Legan mon dadalepdepen so sakey ya pikakasi ya akasulat ed Biblia, tepetan moy sarilim: ‘Siopa yay manpipikasi tan antoy situasyon to? Kasin wala ray imbaga to ya pareho ed naliliknak? Anto ray naaralan kod pikakasi to?’ Pian naebatan mo iratan ya tepet, ompan kaukolan mo ni man-research. Seguradon sulit so pan-research mo ta talagan makaaral ka. Pantongtongan tayo natan so apatiran alimbawa na saray pikakasi ya akasulat ed Biblia.

13. Antoy sakey ya naaralan tayo ed samay pikakasi nen Hana? (1 Samuel 1:​10, 11) (Nengnengen met so litrato.)

¹³ Basaen so 1 Samuel 1:​10, 11. Nen impikasi itan nen Hana, walay duaran baleg ya problema to. Agmakaanak si Hana, tan sikatoy kabkabusol tan lanang ya babalawen nen Penina, amay sakey nin asawa nen mister to. (1 Sam. 1:​4-7) Kasin mair-irap met so dadalanen mo natan? Antoy naaralan mod pikakasi nen Hana? Nampikasi na andukey si Hana tan imbaga tod si Jehova so amin ya walad puso to, kanian linmemew so liknaan to. (1 Sam. 1:​12, 18) Onlemew met so liknaan mo no “ipasakbat mod si Jehova so ambelat ya awit mo.” (Sal. 55:22) Singa si Hana, ibagam labat ed si Jehova so problemam tan no antoy epekto to ’tan ed emosyon mo.

14. (a) Anto ni naaralan tayod si Hana? (b) Antoy epekto ed saray pikakasi tayo no dalepdepen tayo ray akasulat ed Biblia? (Nengnengen so paimanod leksab.)

¹⁴ Nen apakso la so anak nen Hana ya si Samuel, inyakar to ed atagey ya saserdote ya si Eli. (1 Sam. 1:​24-28) Diman ed tabernakulo, nampikasi lamet si Hana. Misatsalamat ta anengneng ton mismo ya talagan proprotektaan tan aasikasoen nen Jehova iray matoor ya lingkor to.c (1 Sam. 2:​1, 8, 9) Anggano agnaandi so amin ya problema nen Hana, say nampokusan to la et saray bendisyon nen Jehova ed sikato. Antoy naaralan tayo? Mas naanosan tayo ray subok no manpokus tayo ed pangaasikaso tan itutulong nen Jehova ed sikatayo, imbes ya puros problema so sankanonot tayo.

15. No biktima tayoy ag-inkahustisya, antoy naaralan tayod samay pikakasi nen propetan Jeremias? (Jeremias 12:1)

¹⁵ Basaen so Jeremias 12:1. Ontan so impikasi nen propetan Jeremias ta agto natanggap ya mas maaligwas so bilay na saray mauges. Kinmapuy met so liknaan to ta babalawen na saray kapara ton Israelita. (Jer. 20:​7, 8) Natatalosan tayoy liknaan nen Jeremias. Ompan onsyodot tayo met no nanengneng tayo ya no siopa ni iramay masaol, sikara laingen so maasenso. Onkapuy met so liknaan tayo no walay mamabalaw ed sikatayo. Pero say marakep ed si Jeremias, anggano imbalikas toy pakakasyodot to, agto tinetel si Jehova. Nen anengneng to ya dinisiplina nen Jehova iray rebelden Israelita, seguradon mas akombinse ya talagan iter nen Jehova so tuan hustisya. (Jer. 32:19) Antoy naaralan tayo ed si Jeremias? Ibaga tayo labat ed si Jehova iray pakakasyodotan tayo. Pero singa si Jeremias, ibalikas tayo met ed si Jehova ya baleg so tiwala tayo ya iter to lanlamang so hustisya diad dugan panaon.

16. No bilang ta limitado lay nagagawaan tayo parad si Jehova, antoy naaralan tayo ed samay abihag ya Levita? (Salmo 42:​1-4) (Nengnengen met so litrato.)

¹⁶ Basaen so Salmo 42:​1-4. Sayan kansion et insulat na sakey ya abihag ya Levita ya agto la nakakaiba iray kapara ton mandadayew ed si Jehova. Nanengneng ed sayan insulat ton salmo ya agaylay pakakadismaya to. Nayarin ontan met so nalilikna na saray agagi ya agla makaalis ed abung lapud walay graben sakit da tan saramay apriso lapud pananisia da. No ontan so situasyon mo, ompan manguman-uman so emosyon mo. Antokaman so naliliknam, ibagam labat ed si Jehova. Makatulong itan pian mas natalosan moy sarilim tan mas makapannonot kay duga. Ontan so ginawa na samay Levita. Nen nampikasi, diman to atalosan ya naidayew to nin siansia si Jehova anggano anguman so situasyon to. (Sal. 42:5) Diman to met naisip ya sikatoy agpapaulyanan nen Jehova. (Sal. 42:8) No masimoon tayo met ya manpikasi, mas natalosan tayoy nalilikna tayo, onkalmada tayo, tan mas napakiwas tayon mananos.

17. (a) Antoy naaralan tayo ed samay pikakasi nen Jonas? (Jonas 2:​1, 2) (b) Akin et marakep no man-memorize tayo na saray teksto ed Salmo? (Nengnengen so paimanod leksab.)

¹⁷ Basaen so Jonas 2:​1, 2. Impikasi itan nen propetan Jonas legan ya walad eges na baleg ya sira. Anggano agto inunor si Jehova, baleg so tiwala to ya dengelen nin siansia nen Jehova so pikakasi to. No imanoen tayo may pikakasi to, maslak ed saray imbaga to et nanlapud Salmo.d Mapatpatnag ya kakkabisado to iratan ya sagradon kansion. Aratan so dinalepdep to kanian kokkombinsido ya tulongan nen Jehova. Antoy naaralan tayo? Marakep no man-memorize tayo na saray teksto ed Biblia pian no ondadalan tayod mairap ya situasyon, aratan ya tampol so nanonotan tayo no manpikasi tayod si Jehova, tan makatulong iratan pian onlemew so liknaan tayo.

ASINGGERAN MO LABAT SI JEHOVA

18-19. Antoy ipapaseguro na Roma 8:​26, 27 no agtayo la amtay ipikasi tayod si Jehova? Mangiter na alimbawa.

¹⁸ Basaen so Roma 8:​26, 27. Diad kabelat na probleman dadalanen tayo, ompan no maminsan et agtayo la amtay ibaga tayo ed si Jehova. Maong labat ta diad ontan iran situasyon, say masanton espiritu la na Dios so “mikasi” parad sikatayo. Antoy labay ton ibaga ’tan? Inusar nen Jehova so masanton espiritu to pian ipaisulat diad Biblia so dakel ya pikakasi na saray lingkor to. No agtayo la amta no panon ya ibalikas so walad nonot tayo, saray karga na saratan ya pikakasi et ipasen nen Jehova ya singa nanlapud sikatayon mismo. Parad sikato, singa pikakasi tayon mismo iratan tan ebatan ton ebatan.

¹⁹ Atan kuno so inisip nen Sister Yelena ya taga Russia nen naaresto lapud pampipikasi to tan pambabasa toy Biblia. Na-stress kunon maong kanian ngalngali agto amtay ipikasi tod si Jehova. Kuan to: “Anonotan ko balet ya no agko la amtay ibagak ed si Jehova lapud mapagpaga ak ya maong, ipasen nen Jehova ya singa pikakasik ya mismo iramay pikakasi na saray lingkor to nensaman. . . . Balbaleg so nitulong to ’tan ed siak diad saraman ya mair-irap ya panaon.”

20. No nai-stress tayo, anto ray nayarin gawaen tayo pian niparaan tayoy isip tayo antis tayon manpikasi?

²⁰ No nai-stress tayo, ompan agtayo masyadon makapanpokus legan tayon manpipikasi. Antoy makatulong pian niparaan moy nonot mo antis kan manpikasi? Marakep no basam ya maksil so pigaran bersikulo ed Salmo. Salim ya isulat no antoy naliliknam, ya singa ginawa nen Arin David. (Sal. 18, 34, 142; saray superskripsion.) Anggapo met so estrikton instruksion ed saya. Akauley ka no antoy nalikas mon epektibo parad sika. Say importante, niparaan moy sarilim antis kan manpikasi.—Sal. 141:2.

21. Akin et ibaga tayo labat ed si Jehova so amin ya walad puso tayo?

²¹ Dia tua, anggano anggapo ni imbaga tayod si Jehova, amta to lay nalilikna tayo. (Sal. 139:4) Pero anggano nababasa toy walad puso tayo, labay to ya ibaga tayo nin siansia ed sikato so amin ya nalilikna tayo ta pakapatnagan itan ya mantitiwala tayod sikato. Kanian agka komon nababaingan ya onasingger ed Amam diad tawen. Gawam ya inspirasyon iray pikakasi ya akasulat ed Biblia. Ipikasim ed si Jehova so amin ya walad pusom. Balanglan maliket o maermen ka, ibagam labat ed sikato. Tandaan mo ya tuan Kaaro si Jehova—wadtan ya lanang parad sika!