Agmo Lilingwanan ya Ipikasi so Arum

1. Panon tayon amta ya importante ed si Jehova iray pikakasi tayo?

BALBALEG ya pribilehyo so manpikasi ed si Jehova. Isip mo pa: Wala ray kimey ya inyasain nen Jehova ed saray anghel. (Sal. 91:11) Inikdan to met si Jesus na ambelat iran responsabilidad. (Mat. 28:18) Pero wala kasi inyasain nen Jehova ya ondengel ed saray pikakasi tayo? Anggapo, ta labay to ya sikaton mismo so ondengel! Kampegan ibabaga na Biblia ya sikato so “Dumerengel na pikakasi.”—Sal. 65:2.

2. No pangipikasi ed arum so pantongtongan, akin et maong ya alimbawa si apostol Pablo?

² Labay nen Jehova ya ipikasi tayod sikato iray problema tayo, pero labay to met ya ipikasi tayoy arum. Ontan so ginawa nen apostol Pablo. Singa bilang, nen sinulatan to so kongregasyon ed Efeso, oniay imbaga to: “Naynay ta kayon bibitlaen ed saray pikakasik.” (Efe. 1:16) Wala met iray espisipikon agagi ya impikasi nen Pablo. Singa bilang, oniay imbaga to ed si Timoteo: “Misasalamat ak ed Dios, . . . tan agta kan balot lilingwanan diad masimoon a pikakasik ed agew tan labi.” (2 Tim. 1:3) Diad tua, dakel met so problema nen Pablo ya kaukolan ton ipikasi. (2 Cor. 11:23; 12:​7, 8) Pero agto nilingwanan ya ipikasi met so arum.

3. Akin ya no maminsan et nalilingwanan tayon ipikasi so arum?

³ Akin balet et nalilingwanan tayon ipikasi so arum no maminsan? Oniay imbaga nen Sister Sabrinaa ya sakey ya rason: “Bip-busy tayon maong. Dakdakel so iyuulo tayo kanian ompan puros problema tayo labat so ipipikasi tayo ed si Jehova.” Seguro ontan ka met no maminsan. Makatulong sirin ed sika iyan artikulo. Pantongtongan tayo no akin ya importantin ipikasi tayo so arum tan no panon tayon nagawaan itan.

AKIN ET IMPORTANTE YA IPIKASI TAYO SO ARUM?

4-5. Akin et nibaga tayon “balbaleg so nagawaan” na pangipikasi tayod arum? (Santiago 5:16)

⁴ “Balbaleg so nagawaan” na pangipikasi tayod arum. (Basaen so Santiago 5:16.) Talaga kasin makatulong so pangipikasi tayod arum pian manguman so situasyon da? On! Singa bilang, imanoen so imbaga nen Jesus ed si apostol Pedro nen asingger lan iburi na sayan apostol: “Impikasi ta ka lan masimsimoon ta pian ag-onkapuy so pananisiam.” (Luc. 22:32) Anggan si Pablo et kombinsido ya balbaleg so nagawaan na pangipikasi ed arum. Nen apriso ed Roma, oniay insulat to ed si Filemon: “Maniilalo ak a diad panamegley na saray pikakasi yo et makapawil ak ed sikayo.” (Filem. 22; nengnengen so study note ya “dahil umaasa akong sa tulong ng mga panalangin ninyo” diad nwtsty-TG.) Ontan ya mismo so agawa! Nibulos si Pablo tan akapampulong lamet.

⁵ Pero siempre, agto labay ya ibagan no ipikasi tayo so arum et singa tayo oobligaen si Jehova ya gawaen so sakey ya bengatla. Nanenengneng nen Jehova so malasakit tayo, tan nayarin sikatoy napakiwas ya iter iray kekerewen tayo. Kanian ipikasi tayo labat so arum anggan anto ni tay situasyon da, tan akauley lay Jehova no antoy sankaabigan ya gawaen.—Sal. 37:5; nengnengen so 2 Corinto 1:11 tan saray study note diad nwtsty-TG.

6. Antoy epekto ed sikatayo no ipipikasi tayoy arum? (1 Pedro 3:8)

⁶ No ipikasi tayo so arum, naaralan tayon “ipatnag [so] pililikna.” (Basaen so 1 Pedro 3:8.) Say too ya walay pililikna to et nasasakitan no nanenengneng ton maniirap so arum tan agto nitepel so ag-ontulong. (Mar. 1:​40, 41) Oniay imbaga nen Michael, sakey ya elder: “No ipipikasik iray mankakkaukolan ya agagi, diman ko mas natatalosan so irap ya dadalanen da, kanian lalok iran naaaro. Agda labat amta, pero diad tuay tua, lalon onaapit so liknaan kod sikara no ipipikasik ira.” Onia met so imbaga nen Richard ya sakey met ya elder: “No ipikasi tayo so sakey ya agi, napakiwas tayo met ya mannonot na paraan pian natulongan tayo.” Tan onia ni inyarum to: “No tulongan tayo imay agi ya ipipikasi tayo, singa tayo lanlamang manpapausar ed si Jehova pian naebatan imay pikakasi tayo ed sikato.”

7. Panon ya makatulong so pangipikasi ed arum pian agtayo akapokus ed saray problema tayo? (Filipos 2:​3, 4) (Nengnengen met so litrato.)

⁷ Makatulong so pangipikasi tayod arum pian agtayo akapokus ed saray problema tayo. (Basaen so Filipos 2:​3, 4.) Anggad si Satanas ni so manuuley ed sayan mundo, aga naandi tay problema. (1 Juan 5:19; Apo. 12:12) No lanang tayon ipikasi so arum, napanonotan tayo ya aliwan sikatayo labat so naiirapan—‘naeeksperiensya met itan na amin ya agagi tayo diad interon mundo.’ (1 Ped. 5:9) Oniay imbaga nen Katherine, sakey ya payunir: “Kada no ipipikasik so arum, napapanonotan ak ya agko bukbukor so nasusubok. Baleg so nitutulong to ’tan pian agak masyadon akapokus ed saray problemak.”

KAKKAUKOLAN DAY PIKAKASI TAYO

8. Siopa ray ipikasi tayo?

⁸ Siopa ray ipikasi tayo? Ipikasi tayo iray agagin mansasakit, saray kabataan ya babalawen na saray kaklase da tan napre-pressure ya manggaway aliwa, tan saramay onkakapuy lay laman da lapud maedad la ra. Dakel met ya agagi so nasusubok lapud kokontraen ira na saray kapamilya da odino papairapen ira na gobierno diad bansa ra. (Mat. 10:​18, 36; Gawa 12:5) Wala met iray agagi ya kaukolan day ontakas ya tampol tan tinaynan day abung da lapud magulogulo diad lugar da. Say arum et biktima na kalamidad. Ompan agtayo personal ya kabat irayan agagi. Pero no ipikasi tayo ra, ipapanengneng tayo ya inar-aro tayo ra tan uunoren tayo may ganggan nen Jesus ya “manaaroan kayo.”—Juan 13:34.

9. Akin et agtayo met lilingwanan ya ipikasi iray brother ya mangidadaulo ed organisasyon nen Jehova tan saray misis da?

⁹ Ipikasi tayo met iray brother ya mangidadaulo ed organisasyon nen Jehova. Kaibad saya so Mananguley ya Ulop tan saray katulongan da, saray Branch Committee ed nanduruman bansa, saray overseer diad Bethel, saray manangasikaso na sirkito, saray elder ed kongregasyon, tan saray ministeryal a lingkor. Wala met so kanya-kanyan problema na sarayan brother, pero mabulbulos iran mansasakripisyo parad sikatayo. (2 Cor. 12:15) Singa bilang, oniay imbaga nen Mark, sakey ya manangasikaso na sirkito: “Say sakey ya subok ed siak et amay arawi ak ed atateng ko. Lanang ko ran sankanonot ta maedad la ra tan makapuy lay laman da. Agmet ira napapaulyanan ta wadtay atsik tan say asawa to ya mangaasikaso ed sikara. Pero siempre bilang anak, naeermenan ak ta anggapo ak ed abay da.” Ipikasi tayo sirin irayan makukulin brother anggano agtayo amta so espisipikon problema ya dadalanen da. (1 Tes. 5:​12, 13) Agtayo met lilingwanan ya ipikasi iray misis da ta matoor dan susuportaan irayan brother pian makapantultuloy ira diad asainmin da.

10-11. Kasin naliliketan si Jehova ed saray pikakasi tayo anggano anggapoy espisipikon agi ya binitla tayo? Ipaliwawa.

¹⁰ Singa apantongtongan tayo la, sarag tayon ipikasi iray agagi anggano anggapoy espisipikon agi ya bitlaen tayo. Singa bilang, sarag tayon kerewen ed si Jehova ya tulongan to iramay apriso, tan ligliwaen to iray inateyan. Oniay imbaga nen Donald, sakey ya elder: “Dakdakel so agagi tayo ya ondadalan ed nanduruman subok, kanian no maminsan, say pikakasik et para lad amin pian segurado la ya anggapoy nalingwanan ko.”

¹¹ Naliliketan kasi si Jehova ed ontan iran pikakasi? On! Siempre natatalosan to ya agtayo amta so espisipikon pankaukolan na kada agi. Kanian duga labat ya ipikasi tayo iray agagi ya nandurumay situasyon da, anggano anggapoy bitlaen tayon ngaran. (Juan 17:20; Efe. 6:18) No ipikasi tayo ra, ipapanengneng tayo ya ‘inaro tayoy amin ya agagi.’—1 Ped. 2:17.

NO LABAY TAYON IPIKASI SO SAKEY YA AGI

12. Akin et marakep no obserbaan tayo ray agagi tan amtaen tayoy dadalanen da?

¹² Magmaliw tayon maobserba. Naliliketan met si Jehova no espisipiko tayon ipikasi so sakey ya agi. Singa bilang, diad kongregasyon yo, kasin walay agi ya walay graben sakit to? Kasin walay kabataan ya maermen tan abupburido lapud napre-pressure ed eskuelaan? Kasin walay mansosolon ateng ya naiirapan ya pabalegen so anak to “diad disiplina tan panamilin nen Jehova”? (Efe. 6:4) No obserbaan mo iray agagi tan amtaen moy dadalanen da, diman mo mas natalosan so situasyon da, kanian napakiwas ka ya ipikasi ira.b—Roma 12:15.

13. Panon tayon naipikasi so sakey ya agi anggano agtayo personal ya kabat?

¹³ Bitlaen tayoy ngaran da. Diad saray pikakasi tayo, sarag tayon bitlaen so ngaran na saray agagi ya agtayo personal ya kabat. Singa bilang, isip mo pa iray agagi tayo ya akapriso diad Crimea, Eritrea, Russia, Singapore, tan arum nin bansa. Nanengneng moy kangaranan da diad jw.org.c Oniay imbaga nen Brian, sakey ya manangasikaso na sirkito: “No labay kon ipikasi so sakey ya agi ya apriso, isusulat koy ngaran to insan ko basaen ya maksil. Makakatulong itan pian natandaan ko ’tan ya agi tan nabitlak so ngaran to diad pikakasik.”

14-15. Antoy gawaen tayo pian espisipiko iray pikakasi tayo parad arum?

¹⁴ Gawaen ya espisipiko iray kerew tayo. Oniay imbaga nen Michael ya abitla nen niman: “Legan kon babasaen ed jw.org iray eksperiensya na saray brother ya akapriso, iimadyinen ko no antoy naliknak no siak so walad situasyon da. No siak so walad prisoan, seguradon aburido ak ed si asawak, tan labay kon seguroen ya agnapaulyanan anggano agkami saniba. Akatulong itan pian amtak so espisipikon ipikasik parad saray aprison brother ya walay asawa ra.”—Heb. 13:​3, paimanod leksab.

¹⁵ No isipen tayoy inagew-agew ya bilay na saray agagi tayo diad prisoan, walan-walay nanonotan tayon espisipiko ya naipikasi tayo parad sikara. Singa bilang, ipikasi tayo ya maomaong komoy pantrato ed sikara na saray guardia ed prisoan, tan bulos iran makapandayew ed si Jehova. (1 Tim. 2:​1, 2) Ipikasi tayo met ya napaseseg komon iray kakongregasyon da ed panmamatoor da, tan naimano komon na saray aliwan Tasi so maong ya ugali da pian napakiwas iran ondengel ed mensahe tayo. (1 Ped. 2:12) On, antokaman so subok ya dadalanen na saray agagi, maabig no iyan tayoy sarili tayo ed situasyon da pian espisipiko iray kerew tayod si Jehova parad sikara. No magmaliw tayon maobserba ed dadalanen na arum, no bitlaen tayoy ngaran da diad saray pikakasi tayo, tan no espisipiko iray kerew tayo parad sikara, ipapanengneng tayo ya ‘balbaleg so panangaro tayo ed sakey tan sakey.’—1 Tes. 3:12.

AMTA NEN JEHOVA NO ANTOY SANKAABIGAN YA EBAT ED SARAY PIKAKASI TAYO

16. No ipipikasi tayoy arum, anto dapat so tandaan tayo? (Mateo 6:8)

¹⁶ Singa apantongtongan tayo la, nayarin makatulong so pangipikasi tayod arum pian manguman so situasyon da. Pero tandaan tayo ya anggano walay ipipikasi tayo, si Jehova nin siansiay makaamta no antoy sankaabigan ya gawaen. Diad tua, antis tayo nin naamtaan so pankaukolan na sakey ya agi, amta la itan nen Jehova. Amta la ingen itan nen Jehova antis nin nalikas na samay mismon agi ya walay pankaukolan to manaya. (Basaen so Mateo 6:8.) Manpipikasi tayo aliwan pian ipaamtad si Jehova so bengatlan agto ni amta, tan aliwan pian ibagad sikato no antoy sankaabigan ya gawaen parad sakey ya agi. No ontan manaya, akin et kaukolan tayo nin ipikasi so arum? Apantongtongan tayo lay pigaran rason ed sayan artikulo. Pero nia ni sakey ya rason: Ipipikasi tayoy arum ta imamalasakit tan inar-aro tayo ra. Maar-aron Dios si Jehova, kanian naliliketan met ed saray maar-aron lingkor to.

17-18. Antoy nalilikna nen Jehova no ipipikasi tayoy arum? Mangiter na ilustrasyon.

¹⁷ No bilang ta say ebat nen Jehova ed pikakasim et duma ed samay iilaloan mo, agka nadidismaya. Say importante, impikasim so arum. Pakapatnagan itan ya inar-arom iray agagi, tan ag-itan balot lingwanan nen Jehova. Pian mas natalosan tayoy nalilikna nen Jehova no ipipikasi tayoy arum, imanoen iyan ilustrasyon: Imadyin mo pa so sanagi ya ugugaw ni—sakey ya laki tan sakey ya bii. Nen nansakit may laki, oniay imbaga na ading to ed si tatay da: “Papa, tulongan yoy kuya pian onabig la. Kaskasian!” Seguradon manggagawa lay paraan imay tatay pian onabig so anak to, ta inar-aro to. Pero anto kasi reaksion to nen mikakasi may anak ton bii parad si kuya to? Seguradon makakaliket ta inar-aro na anak to so kuya to!

¹⁸ Ontan so labay nen Jehova ya gawaen tayo—amay imalasakit tan ipikasi tayoy sakey tan sakey. No ipipikasi tayoy arum, ipapanengneng tayod si Jehova ya aliwan sarili tayo labat so sankanonot tayo. Papablien nen Jehova iray ontan ya pikakasi! (2 Tes. 1:3; Heb. 6:10) Tan singa apantongtongan tayo, balbaleg so nagawaan na saray pikakasi tayo ta lapud satan et ompan manguman so situasyon na sakey ya agi. Agtayo sirin lilingwanan ya ipikasi so arum!