LEKSION 40
Panon Itayon Magmaliw ya Malinis ed Pakanengneng na Dios?
Imadyin mo pay sakey ya maaron nanay ya papalesan toy anak ton onlad eskuelaan. Seseguroen to ya nanames so anak to, malinis tan maayos so kawes to. Importante iya pian arawi ed sakit so ugaw tan nanengneng na arum ya aasikasoen na atateng to. Ontan met so maaron Ama tayo, si Jehova. Labay to ya malinis itayo diad pisikal tan diad moral. No malinis tayo, parad pankaabigan tayo lanlamang, tan sikatoy napagalangan tayo.
1. Panon itayon magmaliw ya mapalinis?
Ibabagad sikatayo nen Jehova: “Nepeg a magmaliw kayon masanto.” (1 Pedro 1:16) Pian magmaliw ya masanto, dapat malinis tayo ed pisikal tan moral. Malinis tayo ed pisikal no regular tayon manaames, ipepesak tayo ray kawes tayo, lilinisan tan aayosen tayoy abung tan luluganan tayo. Sarag tayo met so mitulongan ed panlinis na Kingdom Hall. No mapalinis tayo, napapagalangan si Jehova.—2 Corinto 6:3, 4.
2. Pian malinis tayo, anto ran kagagawa tan bisyo so iwasan tayo?
Oniay ibabaga na Biblia: “Linisan tayoy sarili tayo ed amin a karutakan na laman tan espiritu.” (2 Corinto 7:1) Kanian, iiwasan tayo ray makaderal ed laman tan isip. Dapat saray nonoten tayo et makapaliket ed si Jehova. Kanian papaliisan tayoy mannonot na marutak tan mauges. (Salmo 104:34) Tan agtayo met manguusar na mabanday tan makapasakit ya salita.—Basaen so Colosas 3:8.
Anto ni ray mandutak ed laman tan moralidad tayo? Wala ray nayarin makaderal ed laman singa say pansigarilyo, panggagal, tan pan-drugs kanian paliisan tayo iratan. No iwasan tayo iratan, arawi tayo ed sakit tan nipapanengneng tayoy respeto ed regalo ya bilay. Malinis tayo met ed moral no iwasan tayo ray marutak ya kagagawa singa say masturbasyon tan inengneng o pambantay ed saray malaswa odino pornograpiya. (Salmo 119:37; Efeso 5:5) Ompan nairapan tayon itunda irayan kagagawa tan bisyo. Pero, tulongan itayo nen Jehova.—Basaen so Isaias 41:13.
DAKEL NI NAARALAN MO
Amtaen no panon tayon napagalangan si Jehova no mapalinis tayo. Amtaen met no panon tayon nitunda iray marutak ya kagagawa.
3. Napapagalangan si Jehova no mapalinis tayo
No basaen tayo ray ganggan nen Jehova ed bansan Israel nensaman, naaralan tayo ya importante ed sikato so kalinisan na totoo to. Basaen so Exodo 19:10 tan 30:17-19, insan ebatan iraya:
Diad sarayan teksto, antoy pakanengneng nen Jehova ed pisikal ya kalinisan?
Anto ray gawaen mo pian naynay kan malinis?
Siempre pian malinis tayo, kailangay panaon tan pankuli. Pero, sarag tayon gawaen itan anggan iner so panaayaman tayo, mayaman man o mairap tayo. I-play so VIDEO, insan ebatan iya.
No manpupulong tayo, akin et napapagalangan si Jehova no malinis tan maayos iray gamit tayo?
4. Itunda iray marutak ya bisyo
Tulongan itayo nen Jehova pian nitunda so anggan anton bisyo
No mansisigarilyo odino mandra-drugs ka, antam no panon kairap ya itunda itan. Antoy makatulong? Isip mo no antoy epekto ed sika na satan ya bisyo. Basaen so Mateo 22:37-39, insan pantongtongan no antoy epekto na panagsigarilyo odino panag-drugs . . .
diad pikakaaro ed si Jehova.
diad kapamilya, tan ed arum.
Manggaway plano pian nitunda so bisyo.a I-play so VIDEO.
Basaen so Filipos 4:13, insan ebatan iya:
Panon ya makatulong so regular ya pampikasi, panag-aral na Biblia, tan pipiaral pian nitunda so marutak ya bisyo?
5. Labanan so marutak ya panagnonot tan kagagawa
Basaen so Colosas 3:5, insan ebatan iraya:
Panon tayon amta ya say pornograpiya, sexting, tan masturbasyon et marutak ed pakanengneng nen Jehova?
Parad sika, duga labat kasi ya ilaloan nen Jehova ya malinis tayo ed moral? Akin ey?
Amtaen no panon mon labanan so marutak ya panagnonot. I-play so VIDEO.
Angusar si Jesus na ilustrasyon pian ibangat ya kailangan tayoy onkiwas pian mansiansian malinis ed moral. Basaen so Mateo 5:29, 30, insan ebatan iya:
Aglabay ya ibaga nen Jesus ya sakitan tayoy sarili tayo, imbes bibilinen to tayo ya kailangan tayoy onkiwas. Antoy gawaen na sakey pian nalabanan toy marutak ya panagnonot?b
No lalabanan moy marutak ya panagnonot, segurado ya papablien nen Jehova so pansasagpot mo. Basaen so Salmo 103:13, 14, insan ebatan iya:
No naiirapan kan labanan so marutak ya kagagawa, panon ya makatulong ed sika iyan teksto?
No atumba ka, makabangon ka!
Mainomay ya ibagay, ‘Anto la ya, apawil ko lamet, agko la!’ Pero isip mo pa, akin, no say runner et atumba, atalo la odino ompawil lamet diman ed gapo? Siempre andi. Ontan met, no apawil moy bisyom, agto labay ya ibagan atalo ka la tan anggapo lay pag-asam odino asayang so amin ya impansagpot mo. Normal labat so nalingo no lalabanan tayo ray kakapuyan tayo. Agka onsusuko! Diad tulong nen Jehova, nasarag mon taloen so marutak ya bisyo.
IBABAGA NA ARUM: “Adik ak la eh, mairap ko la yan itunda.”
Anton teksto so usaren mo ya mangipanengneng ya sarag nen Jehova so ontulong pian nitunda so bisyo?
SUMARYO
Napaliket tayo si Jehova no pansiansiaen tayon malinis so laman, isip, tan kagagawa tayo.
Rebyu
Akin et importante ya malinis tayo?
Panon kan magmaliw ya mapalinis?
Panon mon napansiansian malinis so isip tan kagagawam?
DISKOBRIEN
Anto ray simplin nagawaan mo pian magmaliw kan malinis anggano aliwan mainaway bilay?
Kalinisan tan Pangasikaso ed Laman—Panag-uras na Lima (3:01)
Amtaen iray praktikal ya paraan pian nitundam so panagsigarilyo.
“No Panon ya Nitunda so Panagsigarilyo” (Onliing!-E, Mayo 2010)
Amtaen iray epekto na pornograpiya.
“Pornograpiya—Mauges o Andi?” (Say Panag-bantayan, Setyembre–Oktubre 2013)
Basaen no panon ya nitunda na sakey a laki so inka-adik to ed pornograpiya.
“Agak Sinmuko ya Anggad Alabanan Ko” (Say Panag-bantayan No. 4 2016)
a Nabasa ed “No Panon ya Nitunda so Panagsigarilyo,” ya walad seksion ya Diskobrien ed sayan leksion, iray praktikal ya paraan pian nitunda so panagsigarilyo.
b Pian nalabanan so masturbasyon, nengnengen so “Paano Ko Madadaig ang Masturbasyon?” diad libron Ang mga Tanong ng mga Kabataan—Mga Sagot na Lumulutas, Tomo 1, kabanata 25.