Tepet na Saray Manbabasa
Akin et Agmigiguerra Iray Tasi nen Jehova?
Inerman so panaayaman na saray Tasi nen Jehova, walaan iray rekord nanlapu la’d gapo ya ag-ira mibabali ed saray panlalaban na saray bansa odino diad saray guerra ed mismon bansa ra. Oniay inkuan na say Australian Encyclopædia 50 taon lay apalabas: “Pansiasiansiaen na saray Tasi nen Jehova so mapekder a neutralidad ed panaoy guerra.”
Say manunan rason no akin ya agmigiguerra iray Tasi et lapud kontra itan ed ididikta na Kristianon konsiensia ra. Say konsiensia ra et impasal ed saray ganggan tan ehemplo na Katawan a Jesu-Kristo. Ingganggan to ray papatumbok to ya aroen da so kapara ran too. Inyarum to ni: “Aroen yo so saray kabusol yo, manggawa kayo’y maong ed saray mamusol ed sikayo.” (Lucas 6:27; Mateo 22:39) Sanen sinali na sakey ed saray disipulo ya iyagel si Jesus panamegley na espada, inkuan nen Jesus: “Ipawil mo so kampilan mo ed pasen to, ta saray amin a mangala na kampilan ompatey ira naani ed kampilan.” (Mateo 26:52) Kanian diad salita tan gawa, malinew ton impanengneng a saray papatumbok to et agnepeg a mangusar na saray armas.
Say sananey nin makasengeg no akin ya agmigiguerra iray Tasi nen Jehova et lapud sakey iran relihyoson grupo a walaan na saray membro ed interon mundo. Natan no miguerra ira, ag-arawin napilabanan da pati saray kamembroan da. Tan satan so onkontra ed ganggan nen Jesus ya ‘aroen day sakey tan sakey.’—Juan 13:35.
Parad saray Tasi nen Jehova, sarayan prinsipyo a nibase ed aro et nepeg ya aliwa labat lan angangga’d salita, noagta nepeg met ya ikana ed bilay. Bilang alimbawa, imanoen pay inkiwas da legan na Guerra Mundial II, nen 1939-1945. Diad Estados Unidos na Amerika, masulok ya 4,300 a Tasi nen Jehova so impripriso lapud ag-ira inmabuloy a mansundalo. Diad Britanya, masulok a 1,500 so impriso, kaiba lay masulok a 300 a bibii, lapud ag-ira akitulongan ed guerra. Lapud aglabay na saray Tasi so milaban, masulok a 270 ed sikara so impapatey na gobierno na Nazi Alemanya. Masulok a 10,000 a Tasi so inkukulong diad saray prisoan odino diad saray panamairapan a kampo. Teribli met so impanirap da ed Hapon. Sirin, makaseguro so siopaman a naandiay inad-aro diad samay komaduan Guerra Mundial, odino diad saray tinmutumbok nin guerra, ya anggapoy anggan sakey a Tasi nen Jehova a responsable ed saratan.
Diad saramay unor a salita nen Wolfgang Kusserow et malinlinew a nibalikas so panmoria na saray Tasi nen Jehova nipaakar ed guerra. Nen 1942, sayan 20 años ya Aleman et pinutotay ulo na saray Nazi lapud agto impibiang ed guerra. (Isaias 2:4) Onia iray salita to sanen inyarap ed korte na militar: “Pinabaleg ak bilang sakey ed saray Tasi nen Jehova, unong ed Salita na Dios a walad Masanton Kasulatan. Say sankaimportantian tan sankasantosan a ganggan ya inter to ed katooan et: ‘Nepeg mon aroen so Dios mo a manuna ed amin, tan say kaparam a too a singa ed laman mon dili.’ Inkuan ni ingen na arum a ganggan: ‘Agka mamatey.’ Impaisulat labat kasi iraya na Amalsa parad saray kiew?”—Marcos 12:29-31; Exodo 20:13.
Papanisiaan na saray Tasi nen Jehova a say makapanyarin amin a Dios a Jehova labat so makayarin mangiter na permanentin kareenan diad dalin. Maniilalo ra a sumpalen to so sipan ton ‘patundaen so bakabakal angga ed sampot na dalin.’—Salmo 46:9.