Jehova—“Manangiliktar” Nensaman
“Mangganat ka ya onla ed siak, O Dios. Sika so tulong ko tan manangiliktar ed siak.”—SAL. 70:5.
1, 2. (a) Kapigan onkekerew na tulong ed Dios iray mandadayew ed sikato? (b) Anton importantin tepet so apalesa, tan iner so pakaromogan na ebat?
LEGAN a manbabakasyon so sakey a pamilya, imbalita ed atateng a say 23 años ya anak dan bii a walaay asawa so misteryoson nababalang. Suspetsan walay nanggawa na mauges ed sikato. Tampol iran nan-impake pian onsempet, tan diad dalan et agmanunda so pikakasi ra ed si Jehova. Sakey a 20 años a Tasi so nalmoan a walay sakit to, tan agmanbayag et naparalisa la so interon laman to. Sikatoy tampol a nampikasi ed si Jehova. Sakey a mansusulon ina, a maseeseet kalamor a manaanap na trabaho, so agmakasaliw na naakan a parad sikato tan ed 12 años ya anak ton bii lapud anggapoy magenap a kuarta to. Imbesngaw toy walad puso to ed si Jehova. On, sano ondadalan ed graben subsubok odino kairapan iray mandadayew ed Dios, patulongan iran patulongan ed sikato. Asali yo ta lay akikasi ed si Jehova diad panaon a kakkaukolan yoy tulong?
2 Say importantin tepet et saya: Talaga ta’n ebatan nen Jehova iray pikakasi tayo? Naromog tayoy makapabiskeg na pananisia ya ebat diad Salmo 70. Sayan makapaseseg a salmo et insulat nen David, sakey a matoor a managdayew nen Jehova ya akasagmak na amayamay a mairap a subok tan problema sanlegay bilay to. Apakiwas iyan pinuyanan a salmista a mangibaga ed si Jehova: “O Dios, sika so tulong ko tan manangiliktar ed siak.” (Sal. 70:5) Natulongan itayo na pangusisa ed Salmo 70 a namoria no akin a makaasingger itayo met ed si Jehova diad panaon na pankaukolan, tan sigpot a makapanmatalek a sikatoy magmaliw a “Manangiliktar” tayo.
“Sika so . . . Manangiliktar”
3. (a) Anton maganat a kerew so walad Salmo 70? (b) Diad Salmo 70, anton panagmatalek so imbalikas nen David?
3 Say Salmo 70 so ginmapo tan anampot ed maganat a kerew ed Dios. (Basaen so Salmo 70:1-5.) Akikasi si David ed si Jehova a “mangganat” komon a mangiliktar ed sikato. Diad bersikulo 2-4, walay limaran kerew nen David, tan balang sakey ed saratan et katekep toy salitan “komon,” a mangipapatnag na pankaliktan odino pampirawat. Say unonan talora et nipaakar ed saramay manplaplanon mamatey ed sikato. Kinerew nen David ed si Jehova a taloen To komon iratan a kakabusol tan pabaingan To ra lapud inkarelmeng da. Say onsublay a duaran kerew to diad bersikulo 4 et nipaakar ed totoo na Dios. Impikasi nen David a napakiwas komon iramay manaanap ed si Jehova a manggayaga tan ‘mangiyabalbaleg’ odino mangidayew ed sikato. Diad sampot na sayan salmo et inkuan nen David ed si Jehova: “Sika so tulong ko tan manangiliktar ed siak.” Imanoen ya ag-imbaga nen David a, “Komon ta sika so,” a singano onkekerew ni. Noagta, inkuan ton, “Sika so,” ya ibabalikas toy talek to. On, manisia si David a sikatoy tulongan na Dios.
4, 5. Anto so naaralan tayo ed si David diad Salmo 70, tan anto so napanmatalkan tayo?
4 Anto so ipapanengneng na Salmo 70 nipaakar ed si David? Sanen sikatoy walad situasyon a saray kakabusol to et determinadon mamatey ed sikato, agto nanuleyan iray bengabengatla. Noagta, impalima to la’d si Jehova so panusa ed saray onsusumpa ed sikato diad dilin panaon tan paraan To. (1 Sam. 26:10) Talagan nansiansian kombinsido si David a tutulongan tan ililiktar nen Jehova iramay manaanap ed Sikato. (Heb. 11:6) Manisia si David a walad saray tuan managdayew so amin a rason pian manliket tan mangirayew ed si Jehova diad pangitongtong ed arum nipaakar ed inkatalonggaring To.—Sal. 5:11; 35:27.
5 Singa si David, sigpot itayon makapanmatalek a si Jehova so Mananulong tan “Manangiliktar” tayo. Kanian, sano walaray mairap a subsubok ed sikatayo odino kakkaukolan tayo so tulong, manepeg labat ya ipikasi tayo ed si Jehova a tulongan to itayon tampol. (Sal. 71:12) Balet, panon ya eebatan nen Jehova iray pikakasi tayo? Antis tayon pantongtongan no panon itayon tutulongan nen Jehova, nengnengen tayo ni so taloran paraan na impangiliktar tan impanulong To ed si David diad panaon na pankakkaukolan to.
Inyagel ed Saray Onsusumpa
6. Panon a naamtaan nen David ya ililiktar nen Jehova iray matunong?
6 Panamegley na pinuyanan a kabiangan na Biblia a wala la ed panaon nen David, naamtaan to a makapanmatalek iray matunong a tulongan ira nen Jehova. Sanen dinelap nen Jehova so mauge-uges a mundo, inliktar to si Noe tan say debosyonado ed Dios a pamilya to. (Gen. 7:23) Sanen inuran nen Jehova na apoy tan asupre so marelmeng a totoo na Sodoma tan Gomorra, tinulongan to a makaliktar so matunong a si Lot tan say duaran marikit to. (Gen. 19:12-26) Sanen pinatey nen Jehova so malastog a Faraon tan say armada to diad Ambalangan Dayat, sinalimbengan To so totoo to, diad ontan et akaliktar ira. (Exo. 14:19-28) Kanian, pankelawan ni kasi no akin ya indaydayew nen David diad sananey a salmo si Jehova bilang “Dios na kiliktar”?—Sal. 68:20.
7-9. (a) Akin a nanmatalek si David ed pakayari na Dios a mangiliktar? (b) Siopa so binidbir nen David ya angiyagel ed sikato?
7 Wala ni personal a rason nen David no akin ya ontan lay panagmatalek to ed pakayari nen Jehova a mangiliktar. Naimatonan ton mismo a sarag ya iliktar na ‘maandon taktaklay’ nen Jehova iray manlilingkor ed Sikato. (Deu. 33:27) Aliwa labat lan aminpinsan ya inyagel nen Jehova si David ed “saray kabusol to.” (Sal. 18:17-19, 48) Nengnengen tayo pa so sakey ya alimbawa.
8 Sanen indayew na saray bibii ed Israel si David lapud inkamaong ton mibakal, akaibeg si Arin Saul, kanian amidua ton ginayang si David. (1 Sam. 18:6-9) Balet alikiran iratan nen David. Kasin ayarian to itan lapu labat ed abilidad tan inkamakilas to bilang eksperton bumabakal? Andi. Impaliwawa na rekord ed Biblia a “si Jehova wala ed sikato.” (Basaen so 1 Samuel 18:11-14.) Diad saginonor, sanen sinmaew so taktika nen Saul a napapatey si David ed lima na saray Filisteo, “si Saul anengneng to tan naamtaan to a si Jehova wala ed David.”—1 Sam. 18:17-28.
9 Siopa so binidbir nen David ya angiyagel ed sikato? Inkuan na superskripsyon na Salmo 18 ya “insalita [nen David] ed Jehova so salita na saya a kanta ed agew ya impangiliktar nen Jehova ed sikato . . . ed lima nen Saul.” Imbalikas nen David so liknaan to diad kansion, a kuan to: “Si Jehova sikato so batondampay ko, tan salimbeng ko, tan mangiliktar ed siak; Dios ko, dampay ko, a dia ed sikato manmatalek ak.” (Sal. 18:2) Agta makapabiskeg na pananisia so pakaamtan sarag nen Jehova ya iliktar so totoo to?—Sal. 35:10.
Pinabiskeg Sanen Mansasakit
10, 11. Kapigan imay impansakit nen David ya asalambit ed Salmo 41, tan panon tayon amta itan?
10 Aminsan et nansakit na grabe si Arin David, tan asalambit itan ed Salmo 41. Lapud paniinagem tan inkakkapuy to, abaloan na arum ed saray mamubusol ed sikato ya ‘aglan balot makabangon.’ (Bersikulo 7, 8) Kapigan iya agawa? Saray kipapasen ya asalambit ed sayan salmo et ontutukoy ed samay makapagonigon a panaon ed bilay nen David sanen nanggunaetan na anak ton si Absalom a samsamen so trono.—2 Sam. 15:6, 13, 14.
11 Alimbawa, tinukoy nen David a say panmamatalkan ton kaaro a datin mimikan ed sikato et nantraidor. (Bersikulo 9) Nanonotan tayo ed saya imay sakey ya insidente ed bilay nen David. Legan na impanrebelde nen Absalom, say panmamatalkan nen David a mananimbawa a si Ahitofel et nantraidor ed sikato tan akinonong ed rebelyon sumpad ari. (2 Sam. 15:31; 16:15) Nonot yo pa, anta makapkapuy la lanti so ari tan ag-anggan makabangon, asukayan to nin sikatoy apaliberan na saray nankokomplot, a manpilalek a sikatoy ompatey la komon pian nipakana ray mauges a plano ra.—Bersikulo 5.
12, 13. (a) Anto so imbalikas nen David a pankokompiyansaan to? (b) Panon a pinabiskeg na Dios si David?
12 Agkinmapuy so panagmatalek nen David ed “Manangiliktar.” Nipaakar ed sakey a matunong a lingkor nen Jehova a maniinagem, inkuan nen David: ‘Sikatoy iliktar nen Jehova ed agew na kaugsan. Si Jehova pabiskegen to ed tapew na dukolan na pansasagpot; sika gawaen mo so amin a dukolan to legan na pansasakit to.’ (Sal. 41:1, 3) Imanoen pa lamet so kompiyansa nen David sanen imbaga ton “si Jehova pabiskegen to.” Segurado si David a sikatoy iliktar nen Jehova. Panon?
13 Ag-iilaloan nen David a manmilagro si Jehova tan paabigen To. Noagta, sikatoy segseguradon “pabiskegen” odino suportaan nen Jehova legan na paniinagem to. Talagan kakkaukolan to itan a tulong. Nilikud ni ed sakit ya amakapuy ed sikato, akapaliber iray kakabusol a mamapauges ed sikato. (Bersikulo 5, 6) Posiblin pinabiskeg nen Jehova si David diad impangipanonot ed sikato ed saray makaligliwan bengatla. Oniay inkuan to: “Sika ampayaen mo ak ed inkamatuak.” (Bersikulo 12) Nayarin apabiskeg met si David diad impandalepdep to ya anggaman makapkapuy tan papaugesen na saray kakabusol to, sikatoy impasen nen Jehova a matua. Diad saginonor et inmabig lanlamang si David. Agta napapaseseg itayo diad pakaamtan sarag nen Jehova a pabiskegen iray mansasakit?—2 Cor. 1:3.
Tinaryaan na Pankaukolan
14, 15. Kapigan nankaukolan si David tan saray sundalo to na naakan tan nainum, tan antoy inter ed sikaran tulong?
14 Sanen nagmaliw ya ari na Israel si David, atawayan to iray mananam a naakan tan sankaabigan a klasen iinumen tan inimbitaan to ni ingen so dakel pian midungo ed sikato. (2 Sam. 9:10) Balet, asali met nen David so naerasan tan napegaan. Sanen nanrebelde so anak ton si Absalom tan sasamsamen to so trono, tinaynan nen David tan saray nanmatoor ed sikato so Jerusalem. Batik ira ed Gilead, a walad bukig na Ilog Jordan. (2 Sam. 17:22, 24) Lapud kapilitan a manamot-amot ed nanduruman pasen si David tan saray sundalo to, asabisabin nadnarasan tan napnapgaan la ra, tan kakkaukolan da met so painawa. Iner so pakalaan day probisyon diad kalawakan?
15 Akasabi ra ed syudad na Mahanaim. Diman et nabet da so taloran makpel a lalaki, si Sobi, Makir, tan Barzillai. Mabulos irayan lalaki ya ontulong ed tinuro na Dios ya ari anggaman kaukolan dan irisgay bilay da, ta no nasamsam nen Absalom so inkaari, seguradon dusaen ton maong so siopaman ya anuporta ed si David. Sanen anengneng day kipapasen nen David tan saray sundalo to, angawit irayan matoor a lalaki na nakaukolan a suplay, a singa say dukdukolan, trigo, sebada, insanglil a bukel, lentehas, dilo, mantikilya, tan karnero. (Basaen so 2 Samuel 17:27-29.) Seguradon misalsalamat si David ed nikadkaduman katooran tan inkamaparawes na sarayan taloran lalaki. Talagan agto nalingwanan so ginawa ra ed sikato!
16. Siopan talaga so angitarya ed pankaukolan nen David tan saray sundalo to?
16 Balet, siopan talaga so angitarya ed pankaukolan nen David tan saray sundalo to? Kombinsido si David ya aasikasoen nen Jehova so totoo to. Seguradon nayarian nen Jehova a “sipegen” odino pakiwasen iray lingkor to pian tulongan iray kapara ran managdayew a mankaukolan. Sanen nonodnonoten nen David imay agawa ed Gilead, andi-duaruwan impasen to so kaabigan na saraman a taloran lalaki a panangipatnag na maaron panangiyansakit nen Jehova. Diad pansamposampot na bilay nen David et insulat to: “Tobonbalo ak nensaman, et natan masiken ak la: agko nin balot anengneng a say matunong [pati sikato] et apaulyan, nisay saray bini to mipabpayabol na nakan.” (Sal. 37:25) Agta makaligliwan naamtaan ya agbalot antikey so lima nen Jehova?—Uli. 10:3.
‘Amta nen Jehova no Panon ya Iliktar so Totoo To’
17. Anto so aminpigapiga lan pinaneknekan nen Jehova?
17 Sakey labat si David ed dakel a managdayew ya inliktar nen Jehova nensaman. Manlapud panaon nen David, aminpigapigan pinaneknekan na Dios a tua so imbaga nen apostol Pedro: “Amta na Katawan so pangiliktar to ed saray masantos ed katukso” odino subsubok. (2 Ped. 2:9) Nengnengen tayo pa so duara nin alimbawa.
18. Nen panaon nen Ezekias, panon ya angiliktar si Jehova?
18 Nen 732 B.C.E., sanen nilusob na mabiskeg ya armada na Asirya so Juda tan tinaktakot da iray ombaley na Jerusalem, oniay impikasi nen Arin Ezekias: “O Jehova a Dios mi, ilaban mo kami . . . pian amin so saray nanarian ed mundo amtaen da komon a sika si Jehova, sika lambengat.” (Isa. 37:20) Say manunan papagaan nen Ezekias et say ngaran tan reputasyon na Dios. Inebatan nen Jehova itan ya impapuson pikakasi. Diad sanlabi labat, pinatey na sakey ya anghel so 185,000 ya Asiryano, kanian akaliktar iray matoor a lingkor nen Jehova.—Isa. 37:32, 36.
19. Anton pasakbay so tinulok na saray inmunan-siglon Kristiano a sengegan na impakaliktar da ed desyang?
19 Pigaran agew labat antis na ipatey nen Jesus, walay mapropetikon impasakbay to parad pakagunggonaan na saray babangatan to ed Judea. (Basaen so Lucas 21:20-22.) Linmabas ni so pigaran dekada, balet kasabi 66 C.E. et linmusob iray armada na Roma lapud nanrebelde iray Judio ed Jerusalem. Nigeba na saray sundalo nen Cestius Gallus so kabiangan na bakor na templo, ingen ta bigla ran inmatras. Lapud atebek na saray matoor a Kristiano a pankanawnawa la iman pian naliktaran da so desyang ya impasakbay nen Jesus, batik ira ed kapalandeyan. Amawil iray armada na Roma nen 70 C.E. Diad saman et agda la tinundaan so Jerusalem, tan sigpot dan aliktob itan. Aliktaran na saray Kristiano a tinmulok ed pasakbay nen Jesus so teriblin desyang.—Luc. 19:41-44.
20. Akin a makapanmatalek itayo a si Jehova so “Manangiliktar” tayo?
20 Sano nonodnonoten tayo so paneknek a tutulongan nen Jehova so totoo to, napabiskeg so pananisia tayo. Saray ginawa to nensaman et basiyan pian manmatalek tayo ed sikato. Antokaman ya irap so sasagmaken odino nasagmak tayo ni, sarag tayo met so sigpot a manmatalek ed si Jehova bilang “Manangiliktar” tayo. Balet, panon itayon ililiktar nen Jehova? Tan komusta iramay agagin asalambit ed gapo? Anto kasi nansumpalan da? Nengnengen tayo ed onsublay ya artikulo.
Kasin Natandaan Mo?
• Unong ed Salmo 70, anto so napanmatalkan tayo?
• Panon a pinabiskeg si David legan na paniinagem to?
• Antoray alimbawa a mangipapanengneng a sarag nen Jehova ya iyagel iray totoo to ed saray onsusumpa?
[Litrato ed pahina 6]
Inebatan nen Jehova so pikakasi nen Ezekias