Kasin say Pangasawa so Mamaliket ed Sakey a Too?

Kasin ibabangat na Biblia ya kaukolan moy mangasawa o miasawa pian onliket tan nakompleto so bilay mo? Nayarin ontan so naisip mo no kakkagapom nin basaey Biblia. Akin kasi?

Unong ed libro na Genesis, anengneng na Dios ya “aliwan maong” a manbukbukor so unonan laki ya si Adan. Kanian pinalsa na Dios si Eva pian magmaliw a “katulongan” nen Adan. (Genesis 2:18) Base ed satan ya teksto, ompan isipen tayon walay kulang ed bilay na sakey a too no anggapoy asawa to. Sakey ni, dakel ya istoryad Biblia so mangipapanengneng ya bendisyon tan lapuay liket so pangasawa. Say sakey ya alimbawad satan et samay istoryay bilay nen Rut.

Balet, labay kasin ibaga na satan ya imposiblin magmaliw a maliket tan kompleto so bilay na sakey a Kristiano natan no anggapoy asawa tan anak to? Andi. Sanen linma diad dalin si Jesu-Kristo, agbalot angasawa balet nibaga tayon kompleto tan maliket so bilay to. Sikato so sankatalinoan ya toon nambilay, tan siento porsiento ton impatnag iray kualidad na “maliket a Dios,” si Jehova. (1 Timoteo 1:11; Juan 14:9) Sinansakey to ray mamaliket ed sakey a too. (Mateo 5:1-12) Agto balet binitlay pangasawa.

No ontan sirin, kasin mankokontraan so ibabaga na Biblia nipaakar ed saya? Andi. Nepeg tayon amtaen so gagala nen Jehova sano aaralen tayoy ibabaga na Biblia nipaakar ed panangasawa. Anggaman gagala na Dios ya say panangasawa et mangiter na liket tan pian say sakey et walay kaiba tod bilay, inletneg to met itan pian nagaway linawa to. Alimbawa, linawa na Dios ya si Adan tan Eva et ‘manparakel tan makmakan da so dalin.’ (Genesis 1:28) Agda itan nagawaan no anggapoy sakey ed sikara. On, nibagan kaukolan day balang sakey, tan panoan day balang sakey pian nasumpal so linawa na Dios.

Wala met so espisyal ya angigagalaan nen Jehova ed pangasawa tan pampamilya sanen susumpalen toy linawa to ed bansan Israel. Labay ton ondakel so populasyon da pian ag-ira napagyaw na saray kalaban. Gagala to met ya diad tribu nen Juda so panlapuan na Mesias a mangekal ed epekto na kasalanan tan patey. (Genesis 49:10) Kanian parad saray bibii ed Israel nensaman, baleg a kagalangan so piasawa tan pananak, ta no andi, kababaing tan pakaskasi ira.

Diad panaon tayo balet ey? Kasin lapud samay ganggan na Dios nensaman ya ‘makmakan so dalin’ et obligado nin siansia iray Kristiano ya mangasawa tan manpamilya anta napnapno lay dalin natan? Andi la. (Mateo 19:10-12) Tan agmet la kaukolan ya protektaan na Dios so poli tan bansan panlapuan na Mesias a Mangiliktar. No ontan sirin, antoy nepeg a panmoria na saray Kristiano ed pangasawa tan agpangasawa?

Diad tua, parehon ibabaga na Biblia ya regalo na Dios so pangasawa o agpangasawa. Singa ed regalo, wala iramay ombagay ed arum balet diad arum et andi​—say arum kaukolan day kaibad bilay balet wala ray kontento lan single. Say panangasawa et sagradon uksoyan ya ditan et nalikna na sakey so aro, walay kaiba tod bilay, tan pundasyon itan parad panagpamilya. Balet realistiko so Biblia sanen imbaga to ya saramay mangasawa o miasawa et nawalaan na saray problema o “kairapan ed laman.” Diad saray single balet, agbalot imbaga nen Jehova ya kababaing o kaskasian ira. Ibabaga ingen na Salita to ya mas dakel so pankaabigan na pansiansian single nen say pangasawa.​—1 Corinto 7:28, 32-35.

Balanse sirin so Biblia no nipaakar ed pangasawa o agpangasawa. Labay nen Jehova, say Angiletneg na panangasawa tan panagpamilya, ya maliket tan kontento so amin a lingkor to, wala man so asawa ra o anggapo.