Kayarian Itayo nen Jehova

1. Akin et matukoy ya ibagan si Jehova so makankayarian ed amin a bengatla? (Nengnengen so litratod gapo na artikulo.)

AMIN a bengatla et kayarian nen Jehova! Kayarian to so “katawenan . . . anggan say katawenan na katawenan, say dalin tan amin a wadtan.” (Deu. 10:14; Apo. 4:11) Kanian lapud si Jehova so amalsa ed too, amin tayo sirin et kayarian to. (Sal. 100:3) Balet manlapu la nensaman, wala ray espisipikon grupo na totoo ya pinili na Dios pian magmaliw ya espisyal a kayarian to.

2. Siopa ray tinukoy na Biblia ya espisyal a kayarian nen Jehova?

² Singa bilang, tinukoy na Salmo 135 iray matoor ya mandadayew ed si Jehova nensaman diad Israel bilang “espisyal a kayarian to.” (Sal. 135:4) Ontan met, impasakbay ed libro na Oseas ya wala ray aliwan Israelita ya magmaliw a totoo nen Jehova. (Os. 2:23) Asumpal so propesiya nen Oseas sanen wala ray pinili nen Jehova ya aliwan Judio a nakaiba nen Kristo ya manuley diad arapen. (Gawa 10:45; Roma 9:23-26) Sayan “masanton nasyon” et “nikabkabiig a kayarian” nen Jehova diad makapadinayew a paraan, saray membro na satan et nilanaan na masanton espiritu tan pinili pian manbilay diad tawen. (1 Ped. 2:9, 10) Panon to balet iray dakel ya matoor a Kristiano natan ya walaan na ilalon manbilay diad dalin? Tinawag met ira nen Jehova ya ‘totoo’ to tan ‘saray pinili’ to.​—Isa. 65:22.

3. (a) Siopa ray walaan na maapit ya relasyon ed si Jehova natan? (b) Antoy aralen tayod sayan artikulo?

³ Natan, say “melag a pulok,” a walaan na ilalon manbilay ed tawen, tan say ‘arum a karnero,’ a walaan na ilalon manbilay diad dalin, et manugyop ed “sakey a pulok” ya bibidbiren nen Jehova bilang totoo to. (Luc. 12:32; Juan 10:16) Seguradon labay tayon ipanengneng so impapuson pisasalamat ed si Jehova ta inikdan to tayo na pankanawnawan nawalaan na maapit a relasyon ed sikato. Aralen ed sayan artikulo iray nanduruman paraan no panon tayon nipanengneng so pisasalamat tayo ed si Jehova diad impangiter tod sikatayo na satan ya espisyal a pribilehyo.

INDEDIKA TAYOD SI JEHOVA SO BILAY TAYO

4. Antoy sakey a paraan ya nipanengneng tayoy pisasalamat ed si Jehova lapud ginawa ton posible so pakawalaan tayoy maapit a relasyon ed sikato, tan panon met ya ginawa itan nen Jesus?

⁴ Nipanengneng tayoy pisasalamat tayod si Jehova no interon puso tayon idedika so bilay tayo ed sikato. Diad pampabautismo tayo, pormal tayo lan ipapaamta ed totoo ya si Jehova so makankayarian ed sikatayo tan mabulos tayon manpasakop ed sikato. (Heb. 12:9) Ontan so ginawa nen Jesus sanen sikatoy nampabautismo, singa to ibabaga ed si Jehova: “Say panggaway linawam, O Dios ko, so pirawat ko.” (Sal. 40:7, 8, paimanod leksab) Inter nen Jesus so bilay to diad panggawa ed linawa nen Jehova, anggaman manlapud inkianak to et sikato lay kabiangan na sakey a nasyon ya nidedika ed Dios.

5, 6. (a) Antoy reaksion nen Jehova sanen nampabautismo si Jesus? (b) Iyilustra no akin ya nibaga tayon papablien nen Jehova so dedikasyon tayo anggano sikatoy akankayarian ed amin a bengatla.

⁵ Antoy reaksion nen Jehova ed impanpabautismo nen Jesus? Oniay ibabaga na Biblia: “Kayarin abautismoan si Jesus, sikatoy inmimwas; tan alukasan so tawen, tan anengneng to so espiritu na Dios a singa malapati ya ondadapo ed sikato. Wala met so sakey a boses manlapud tawen ya angikuan: ‘Saya so Ana’ko, say inad-arok, ya inabobonan ko.’” (Mat. 3:16, 17) Anggaman si Jesus et sipor lan kayarian na Ama to ed tawen, malikeliket si Jehova ya nanengneng so inkamabulos na Anak ton gawaen so linawa To. Malikeliket met si Jehova ya mangawat ed dedikasyon tayo, tan pagalangan to itayo diad pamendisyon tod sikatayo.​—Sal. 149:4.

⁶ Pian iyilustra itan, imadyin mo pay sakey ya ama a walaan na dakel ya balibalin rosas diad hardin to. Aminsan, angalay sakey a rosas so melag nin anak ton bii tan inregalo to itan ed sikato. Agta satan ya rosas et gawa lanlamang na ama to? Akin et iter to ni itan ed ama to anta sikato lanlamang so akanggawa ed satan? Seguradon agla iratan nonoten na sakey a maaron ama. Imbes, maliket ton awaten itan ya regalo lapud balikas itan na panangaro na anak to. Seguradon mas pablien to itan ya saksakey a rosas ya inter na anak to nen say arum nin rosas diad hardin to. Seguradon maliket met si Jehova no mabulbulos tayon idedika ed sikato so bilay tayo tan no sikato labat so dayewen tayo.​—Exo. 34:14.

7. Panon ya indanet nen Malaquias so nalilikna nen Jehova ed saramay mabulos ya manlilingkor ed sikato?

⁷ Basaen so Malaquias 3:16. No agmo ni indedika so bilay mo tan agka ni nampabautismo, isip mo no panon kaimportante so panggawa ed satan. Tua ya wala ka ni labat ed eges et kayarian ka la nen Jehova, pati amin ya totoo. Balet isip mo ya napaliket mon maong si Jehova no idedikam so bilay mo ed sikato tan no gawaen mo so linawa to lapud bibidbiren moy soberanya to. (Pro. 23:15) Bilang resulta, bidbiren met nen Jehova iramay mabulos ya manlilingkor ed sikato, tan isulat toy ngaran da diad “libro na pakanodnonotan.”

8, 9. Antoy kakaukolanen nen Jehova ed saramay nisulat so ngaran da ed “libro na pakanodnonotan”?

⁸ No labay tayon mansiansia so ngaran tayod “libro na pakanodnonotan” nen Jehova, walay nepeg tayon gawaen. Espisipikon imbaga nen Malaquias ya nepeg tayon ‘ontakot ed si Jehova tan mandalepdep ed ngaran to.’ No mandayew tayo ed siopaman odino ed antokaman a bengatla, ekalen nen Jehova so ngaran tayo ed piguratibon libro na bilay.​—Exo. 32:33; Sal. 69:28.

⁹ Kanian say dedikasyon tayod si Jehova et aliwa labat lan basta pangisipan ya gawaen so linawa to insan manpabautismo. Maples tan maminpinsan labat iratan ya nagawa. Balet say pansiansian walad dapag nen Jehova bilang totoo to et mankaukolan na tuloytuloy ya pangipanengneng na katutulok ed sikato, natan tan diad arapen​—legan ya manbibilay tayo.​—1 Ped. 4:1, 2.

IPULISAY IRAY MINUMUNDON PILALEK

10. Antoy malinew ya pandumaan na saramay manlilingkor ed si Jehova tan agmanlilingkor ed sikato?

¹⁰ Inaral tayo ed akaunan artikulo iray salaysay na Biblia nipaakar ed si Cain, Solomon, tan saray Israelita. Amin da et angibagan dadayewen day Jehova, balet aliwan interon puso so panagdayew da. Nanengneng tayod sarayan alimbawa ya saramay tuan kayarian nen Jehova et nepeg a desidido iran mansiansia ed inkatunong tan busolen da so kaugsan. (Roma 12:9) Dugaruga labat ya kayarin binitla nen Malaquias so “libro na pakanodnonotan,” tinukoy nen Jehova so “pandumaan na matunong a too tan mauges a too, samay manlilingkor ed Dios tan samay agmanlilingkor ed sikato.”​—Mal. 3:18.

11. Akin et nepeg ya nanengneng na arum a si Jehova labat so panlilingkoran tayo?

¹¹ Balet wala ni sakey a paraan pian nipanengneng tayoy pisasalamat tayod si Jehova ta pinili to tayon magmaliw a totoo to. Nepeg ya “nanengneng na amin a totoo” so iyaaligwas tayod espiritual. (1 Tim. 4:15; Mat. 5:16) Tepetan moy sarilim: ‘Kasin say sigpot ya katooran kod si Jehova et nanenengneng na arum? Kasin manaanap ak na pankanawnawa pian nipaamtak ed arum ya sakey ak ed saray Tasi nen Jehova?’ Seguradon naermenan a maong si Jehova no kayari to itayon pinili ya magmaliw ya totoo to et ibaing tayon ipaamtad arum ya kayarian to tayo.​—Sal. 119:46; basaen so Marcos 8:38.

12, 13. Panon ya binuragas na arum so pakabidbiran da bilang Tasi nen Jehova?

¹² Makapaermen ta wala ray indibidual ya binuragas day ‘pandumaan na panlilingkor da ed Dios tan agda panlilingkor ed sikato’ diad pangaalig da ed “espiritu na mundo.” (1 Cor. 2:12) Pepeneken na satan ya espiritu iray ‘pilalek na laman na sakey.’ (Efe. 2:3) Singa bilang, siansia nin aliwan masimpit so panangawes tan panag-ayos na arum anggaman aminpigapiga tayo lan makakaawat na simbawa nipaakar ed satan. Mapitpitat tan makapaayat iray isusulong da, anggan diad saray Kristianon pantitipon. Aaligen da ni ingen iray uson katli tan estilo na buek. (1 Tim. 2:9, 10) Bilang resulta, no wala rad publiko, nayarin mairap lan nabidbir no siopay kayarian nen Jehova tan no siopa so ‘kaaro na mundo.’​—Sant. 4:4.

¹³ Wala met iray agagi ya agda sigpot ya ipupulisay so kagagawa na mundo. Say kasasayaw tan kakikiwas da no wala ray okasyon et aliwa lan matukoy parad sakey a Kristiano. Nanengneng ed saray ipo-post dan litrato tan saray comment dad social media ya aliwa ran maespiritual a totoo. Nayarin agmet ni ira adisiplina ed Kristianon kongregasyon lapud seryoson kasalanan, balet mauges so impluensya da ed arum ya agagi a mansasagpot ya pansiansiaen so maong a kondukta ra bilang totoo nen Jehova.​—Basaen so 1 Pedro 2:11, 12.

14. Antoy importantin gawaen tayo pian naprotektaan tayoy espisyal a pikakaaro tayod si Jehova?

¹⁴ Grabe so impluensya na sayan mundo nipaakar ed “pilalek na laman tan say pilalek na mata tan say panangipangta na sakey ed saray kaykayarian to.” (1 Juan 2:16) Balet, lapud kayarian itayo nen Jehova, nabibilin itayon “ipulisay so mauges a kagagawa tan minumundo iran pilalek tan manbilay itayon walaan na limpion kanonotan tan inkatunong tan debosyon ed Dios diad sayan kaplesan a sistema na mundo.” (Tito 2:12) Diad panagsalita, panangan tan kakainum, panangawes tan panag-ayos, ugali tayod trabaho​—diad amin ya gagawaen tayo—​et nepeg ya nanengneng na arum ya si Jehova labat so dadayewen tayo.​—Basaen so 1 Corinto 10:31, 32.

WALAAN ITAYO NA “ARALEM A PANANGARO ED SAKEY TAN SAKEY”

15. Akin et nepeg tayon ipanengneng so kaabigan tan panangaro ed agagi tayo?

¹⁵ Say pisasalamat tayod si Jehova lapud espisyal ya pikakaaro tod sikatayo et napatnagan diad paraan na panagtrato tayo ed agagi. Kayarian met ira nen Jehova. No lanang tayon sankanonot itan, naynay tayon nipanengneng so kaabigan tan panangaro ed agagi tayo. (1 Tes. 5:15) Imbaga nen Jesus ed saray papatumbok to: “Diad saya et naamtaan na amin a sikayo iray disipulok​—no manaaroan kayo.”​—Juan 13:35.

16. Anton alimbawa ed Mosaikon Ganggan so mangiyiilustra ed liknaan nen Jehova ed saray totoo to?

¹⁶ Pian niyilustra no panon so nepeg tayon pantrato ed sakey tan sakey diad kongregasyon, imanoen iya. Saray kagawaan ed templo nen Jehova et nidedika ed sikato, odino imbiig, ya para labat ed dugan panagdayew. Insulat ed Mosaikon Ganggan so detalyadon paraan na pangasikaso ed sarayan kagawaan, tan siopaman ya ag-onunor et nepeg a pateyen. (Num. 1:50, 51) No ontan lay impanprotekta nen Jehova ed saratan ya andiay bilay ya uusaren diad panagdayew ed sikato, di nagkalalon protektaan to iray matoor ya dedikadon mandadayew ed sikato ya pinili to bilang totoo to! Oniay imbaga nen Jehova ed saray totoo to: “Siopaman a maniwit ed sikayo et manidiwit ed bukel na matak.”​—Zac. 2:8.

17. Anto ray ‘iimanoen tan dedengelen’ nen Jehova?

¹⁷ Imbaga nen Malaquias ya si Jehova et “maniimano tan onderengel” no mantotongtong iray totoo To. (Mal. 3:16) Seguradon “kabat nen Jehova iramay kayarian to.” (2 Tim. 2:19) Naiimano to so amin ya gagawaen tan ibabaga tayo. (Heb. 4:13) No aliwan maabig so ipapanengneng tayod saray agagi tayo, ‘iimanoen tan dedengelen’ itan nen Jehova. No maparawes, maiter, manamerdona, tan maong tayo ed sakey tan sakey, segurado tayon iimanoen met iratan nen Jehova.​—Heb. 13:16; 1 Ped. 4:8, 9.

“AGPAULYAN NEN JEHOVA SO TOTOO TO”

18. Panon tayon ipanengneng so pisasalamat tayo ed pribilehyon nagmaliw tayon totoo nen Jehova?

¹⁸ Seguradon labalabay tayon ipanengneng so pisasalamat tayod si Jehova lapud pribilehyon nagmaliw tayon totoo to. Apaneknekan tayon makabat so pamidbir ya sikatoy makankayarian ed sikatayo diad mabulos ya impangidedika tayod bilay tayo ed sikato. Anggano manbibilay tayo “ed limog na pikewet tan mauges a henerasyon,” labay tayon ipanengneng ed saray totoo ya sikatayo et “andiay pakabalawan tan andiay kasalanan, . . . onsisinag [ya] singa silew ed mundo.” (Fil. 2:15) Determinado tayon ipulisay so kaugsan. (Sant. 4:7) Tan inar-aro tan rerespetoen tayo ray agagi tayo, ya bibidbiren tayon kayarian met ira nen Jehova.​—Roma 12:10.

19. Panon ya bebendisyonan nen Jehova iramay kayarian to?

¹⁹ Oniay sipan na Biblia: “Agpaulyan nen Jehova so totoo to.” (Sal. 94:14) Sayan mabiskeg a garantiya et mansiansia antokaman so onsabi ed sikatayon subok. Anggapon balot so makapangisian ed sikatayo manlapud panangaro nen Jehova, anggan say patey. (Roma 8:38, 39) “No manbibilay itayo, manbibilay itayo parad si Jehova, tan no ompatey itayo, ompatey itayo parad si Jehova. Kanian no manbibilay itayo tan no ompatey itayo, kien itayo nen Jehova.” (Roma 14:8) Kanian tatalaranan tayo lay agew ya paolien nen Jehova so amin a matoor ya kakaaro ton naandi lad bilay. (Mat. 22:32) Natan ni labat et dakel lan bendisyon so panliliketan tayo. Singa ibabaga na Biblia, “maliket so nasyon a say Dios to et si Jehova, saray totoon pinili to bilang kayarian to.”​—Sal. 33:12.